Read Dagara, Northern Bɛn Sɩɩra 1 Bible Online

Bɛn Sɩɩra 1 - Dagara, Northern bible

Bɛn Sɩɩra 1

¹WULU NA ƁÃ TAA A ZI-DÃW-NIWN SOB A yã-bãwfʋ yib zie Yã-bãwfʋ za yi n a Sore zie, ʋ lãw na kpɩɛr'ɩ a Sore kʋralɛ.

²A kʋ̃ɔ-bɛrɛ nʋɔr biire, a sa-bie bɩɩ a zie na be kʋralɛ a bibie a, ãa n'ʋ na tʋ̃ɔ́ sɔ́r bãw a nʋɔr?

³A salom kɛrʋ, a tẽsɔw yɛ̀lʋ, a kʋ̃ɔ-kpɛ̃ɛ zulu, ãa n'ʋ na tʋ̃ɔ́ nyɛ̃ a?

⁴A Sore de nɩ niwn ír a yã-bãwfʋ[1] a bome za ƴãw, a tɩɛrʋ na tɩɛrɛ nɩ yã a, be n be a dɩta-pɛ-yome za.

⁶Ãa n'ʋ bɛ wul a yã-bãwfʋ nyɩwr? Ãa n'ʋ bãw a ʋ yel-sɔwlɩ?

⁸Nɩ-been yõ n'ʋ ɩ yã-bãwnɛ, ɛ́ sɩrɩ bɛ tɛr dɩ̃ɛnʋ ɛ: a Sore na zɩ̃ a ʋ naalʋ-dà-kɔw zu a n'ʋ.

⁹Ʋlɛ n'ʋ ír a yã-bãwfʋ. Ʋ nyɛ̃ ʋ na, ɛ́ jieli a ʋ vɩɛlʋ, ʋ ƴãw ʋ nɩ bom za ʋ na maalɩ a pʋɔ.

¹⁰Ʋ kʋ̀ n nɩsaal za a yã-bãwfʋ yaga za, baa zuo a za a bɛlɩ dem na nɔnɛ a ʋl Sore a. A Sore zɔba n'ɩ a yã-bãwfʋ tib zie

¹¹A Sore zɔba[2] ɩ n yúor-vɩɛlʋ-danʋ nɩ nyʋ̀ʋ́r, nʋ̃ɔ̀ nɩ cɩlʋ na bɛ dɩ vuo a.

¹²A Sore zɔba waar'ɩ nɩ su-nʋ̃ɔ̀, ʋ tɩrɛ nɩ nʋ̃ɔ̀ yaga nɩ nyɔ-vʋʋr-wogo.

¹³Sob nɛ na zɔrɛ a Sore a zie a, a yele za na ɩ n vla tɩ baarɩ. A ʋ kũu bibir a, ʋ na nyɛ̃ nɩ maalʋ.

¹⁴A Sore zɔba n'ɩ a yã-bãwfʋ tib zie. A bɛlɩ dem na sàw de a zie a, bɛ ír'ɩ a yã-bãwfʋ lãwnɩ bɛ a bɛ mã puori.

¹⁵Ʋ wób'ɩ a ʋ ców kʋralɛ a nɩsaalbɛ pʋɔ, ʋ na tu n a bɛ bʋʋrɛ pùor kʋralɛ.

¹⁶A Sore zɔba n'ɩ a yã-bãwfʋ na bãw tɩ tɔ a. A lɛ pʋɔ a, ʋ mɩ́ kʋ̀ n a nɩsaalbɛ a ʋ wɔmɛ yaga za.

¹⁷Ʋ mɩ́ paal'ɩ a bɛ yir za nɩ alɩ bome nɛ bɛ na bɔbr a, a bɛ boge mɩ́ paal'a nɩ a bome ʋ na kʋ̀rɛ bɛ a.

¹⁸A Sore zɔba n'ɩ a yã-bãwfʋ vɩɛlʋ za nʋɔr-kʋb. A yã-bãwfʋ mɩ́ ɩ na a nʋ̃ɔ̀ nɩ a ƴã-ɓaarʋ waar.

¹⁹Ʋ mɩ́ tɩr'ɩ a bãwfʋ nɩ a yã a bãwfʋ pʋɔ mɛ̃ saa a. Ʋ mɩ́ ɩ n a bɛlɩ dem na tɛr ʋ a, bɛ tɛr yúor.

²⁰A yã-bãwfʋ nyɩwr'ɩ a Sore zɔba, ɛ́ a ʋ wuli n'ɩ a nyɔ-vʋʋr-wogo. A kanyir nɩ a tʋɔra-nyɔwfʋ

²²A suur fʋ na nyɛ̃ ɛ́ a bɛ tɛr sɔ́r a, nɩr bɛ sàwr kʋ̀rɛ fʋ ɛ. Bʋ̃ʋ n'ʋ vɛ̃, a su-nyɛrɛ be n a ʋ wɛb sɔ́r zu.

²³A kanyir sob mɩ́ nyɔw nɩ ʋ tʋɔra tɩ ta a lɛ a na sɛw a, ɛ́ a baarʋ daar ʋ lɛb nyɛ̃ a nʋ̃ɔ̀.

²⁴Ʋ bɛ yere a ʋ tɩɛrʋ ɛ, ɛ́ tɩ ta a lɛ a na sɛw a, a nɩbɛ za na yere na k'ʋʋ tɛr'ɩ yã. Ɩ yã-bãwnɛ nɩ nɩr a ɩb na tori a

²⁵A yã-bãwfʋ na-bome pʋɔ a, bãwfʋ zʋkpaɩ be n be. Ɛcɛ a Naaŋmɩn ƴãwfʋ ɩrɛ nɩ a yel-bier sob kɔkɔrʋ.

²⁶Fʋ̃ʋ wa bɔbr a yã-bãwfʋ a, fʋ̃ʋ tuur a nɛ-ƴãwnɩ, ɛ́ a Sore na kʋ̀ b' a yã-bãwfʋ yaga za.

²⁷A yã-bãwfʋ nɩ a wulu a, alɛ n'ɩ a Sore zɔba, a ʋlɩ bom nɛ na mɩ́ pɛlɩ a ʋ pʋɔ a, ʋlɛ n'ɩ a pùor-bɛ-lɛbrʋ nɩ a bàalʋ bàalʋ ɩb.

²⁸Ta tɛr bɛ-wonu a Sore zɔba pʋɔ ɩ, ta waar a ʋ zie nɩ tɩɛrʋ na põ a ɩ.

²⁹Ta tɛr libelibe a nɩbɛ zie ɩ, ɛcɛ maal tɛr a fʋ nʋɔr.

³⁰Ta zɛwr fʋ tʋɔra ɩ, alɛ bɛ ɩ lɛ, fʋ na lo na ƴãw fʋ tʋɔra vĩ, ɛ́ a Sore na yuo nɩ a fʋ yel-sɔwlɩ wul. Ʋ na ƴãw fʋ nɩ vĩ a lãw sɔgɔ, fʋ na bɛ tɛr a ʋ zɔba, ɛ́ a fʋ tɩɛrʋ ɩ ziri tɛwr'a.