Read Dagara, Northern Bɛn Sɩɩra 10 Bible Online

Bɛn Sɩɩra 10 - Dagara, Northern bible

Bɛn Sɩɩra 10

¹Tẽw nɩ-kpɛ̃ɛ na ɩ yã-bãwnɛ a mɩ́ wule nɩ a ʋ nɩbɛ. Ʋlɛ wa tɛr yã a, bɛ na sàw nɩ a ʋ nɩ-kpɛ̃ɛnʋ.

²A lɛ a tẽw nɩ-kpɛ̃ɛ na ŋmɛ̃ a, lɛ n'a a ʋ tõ-tõ-bi-bɛrɛ mɩ̀ ŋmɛ̃. A lɛ a tẽ-kpɛ̃ɛ kaarɛ na ŋmɛ̃ a, lɛ n'a a ʋ nɩbɛ ʋ na kaarɛ a mɩ̀ ŋmɛ̃.

³Nãà na bɛ bãw bom a ɩ n a ʋ nɩbɛ loba, nɩ-bɛrɛ na tɛr yã a mɩ́ ɩ na a tẽ-kpɛ̃ɛ yele cere vla.

⁴A Sore nuru pʋɔ n'a a tẽ-daa kaafʋ be, ʋ mɩ́ ɩ na a nɩ-kpɛ̃ɛ ʋl na sɛw taa nɩ a tẽ-daa kaafʋ a, ʋ yi a ʋ daar.

⁵Nɩr wa ɩ nɩr a, a Sore zie n'a a mɩ́ yi, ʋ mɩ́ kʋ̀ n a ʋ kpɛnʋ a sob nɛ na ƴãwnɛ a nɛ́ɛ a[4]. A pɔ̀lʋ nɩ a po-to-fãw-ɩb

⁶Ta tɛr'ɩ a fʋ tɔ sob na ɩ fʋ faa a, pʋ-bier ɛ, ɛ́ taa ɩrɛ bom za nɩ po-to-fãw-ɩb ɛ.

⁷A Sore nɩ a nɩsaalbɛ bɛ nɔnɛ a pɔ̀lʋ ɛ, a bɛ za zie a, a yel na bɛ tu a mɩnʋ a ɩ n sãwna.

⁸A po-to-fãw-ɩb, a pɔ̀lʋ nɩ a libi-nɔ̃w, alɛ n'a mɩ́ ɩ a naalʋ-dɩb yi nɩ-bʋʋrɛ bɛ ŋa zie lʋ̃ɔ nɩ-bʋʋrɛ bɛ ŋa.

⁹A nɩsaal ɩ n úuru nɩ tãpɛlʋ tɛwr, bʋ̃ʋ n'ʋ só ʋ ɩrɛ pɔ̀l-ɩb? A ʋ nyagɛ mɩ́ ɩ n pʋɔrʋ tɛwr a ʋ cãafʋ daar.

¹⁰Bàalʋ na ɩ faa a tobr bɛ ka dɔwta ƴãw ɛ. Sob nɛ na ɩ nãà dɩ̃a a na kpi n bio.

¹¹A nɩsaal wa kpi baar'a, ʋlɩ bom nɛ na cɛ ʋ a n'ɩ a bʋ̃-vuri, a wɛ-dʋn, nɩ a zãzule.

¹²A nɩsaal pɔ̀lʋ tib daar'ɩ a Sore ʋ na zawrɩ bɛr a, ʋlɛ n'ɩ a ʋ socir na mɩ́ gaarɩ a ʋ Íre zie a.

¹³A pɔ̀lʋ tib zie n'ɩ a yel-bier. Sob nɛ na maalɛ ʋ a mɩ́ ɩ n yel-faar na bɛ maal'ɩ wob a yib zie. Alɛ n'a só a Sore ƴãw a pɔ̀lʋ dem dɔwrʋ na ta dɔwrʋ a, ɛ́ ɩ a bɛ yele baarɩ pẽlẽpẽlẽ.

¹⁴A Sore cã n a na-mɩnɛ lɔb a bɛ naalʋ-dà-kɔwr zu, ɛ́ ƴãw a su-baalʋ dem lɩɛrɩ bɛ zɩ̃.

¹⁵A Sore ír'ɩ a pɔ̀lʋ dem bɛr, ɛ́ ƴãw a su-siwri dem lɩɛrɩ.

¹⁶A Sore sãw nɩ a nɩ-bʋʋr-yoru ten bɛr, ʋ sãw a na bɛr tɩ tɔ a tẽsɔw pɛr.

¹⁷Ʋ ɩ na a bɔr, ʋ sãw a na bɛr, nɩr za bɛ cãà tɛr a tɩɛrʋ ɛ.

¹⁸A Naaŋmɩn bɛ ír a nɩsaalbɛ kɛ́ bɛ ɩ pɔ̀lʋ dem ɛ, suur nyɛ́b ƴãw bɛ n'a bɛ dɔw ɛ.

¹⁹Bʋʋr-buor'ʋ sɛwnɩ ƴãwfʋ? A nɩsaalbɛ bʋʋrɛ n'ʋ, bɛlɛ wa zɔrɛ a Sore a. Bʋʋr-buor'ʋ bɛ sɛwnɩ ƴãwfʋ? A nɩsaalbɛ bʋʋrɛ n'ʋ, bɛlɛ wa zawrɛ a ʋ nɛ-ƴãwnɩ a.

²⁰A nɩ-kpɛ̃ɛ mɩ́ nyɛrɛ nɩ ƴãwfʋ a ʋ nɩbɛ sɔgɔ, ɛcɛ a ʋl tɔr za mɩ́ ƴãwnɛ nɩ a bɛlɩ dem na zɔrɛ a Sore a.

²²A nɩr na kpɛ a Zifʋ mɩnɛ puoru a, a sãan, a nã́w sob, a Sore zɔba n'ɩ a bɛ nyʋ̀ʋ́r bom.

²³Nã́w sob na ɩ yã-bãwnɛ a tʋb bɛ vɩɛl ɛ, ɛ́ yel-bier sob ƴãwfʋ bɛ sɛw taa nɩ ɛ.

²⁴Bɛ mɩ́ ƴãwnɛ nɩ a nɩ-tɩbr, a ƴɛ̀r-dɩrbɛ nɩ a nɩ-bɛrɛ. Ɛcɛ a bɛ kãw za bɛ ɩ kpɛ̃ɛ zuo a sob nɛ na zɔrɛ a Sore a ɩ.

²⁵Yã-bãwnɛ saa ɩ gbãgbaa a, ʋ na tɛr'ɩ nɩbɛ na só bɛ tʋɔra a bɛ tone a ʋ tome, ɛ́ nɩr na tɛr tɩɛrʋ a kʋ̃ tɛr ƴɛ̀rʋ ƴɛ̀r a pʋɔ ɩ. Tʋɔra-siwru nɩ yel-mɩŋa

²⁶Ta bʋɔlɛ fʋ tʋɔra yã-bãwnɛ a fʋ tome tob pʋɔ ɩ, á ta fɛrɛ fʋ ɛ́ fʋ zɛwr fʋ tʋɔra ɩ.

²⁷Nɩr na tone ɛ́ tɛr bom za gʋ̀r bɛr a sa n a sob nɛ na pɔrɛ ɛ́ bɛ tɛr bʋ̃-dɩra a.

²⁸Ɩ̃ bie e, mɩ́ zɛwr fʋ tʋɔra man nɩ, mɩ́ mʋʋrɛ fʋ tʋɔra man nɩ a lɛ fʋ na sɛwnɩ a.

²⁹Ãa n'ʋ na sàw kʋ̀ yel-mɩŋa sob nɛ na ɩrɛ faa kʋ̀rɛ ʋ tʋɔra a? Ãa n'ʋ na mʋʋrɛ sob nɛ na ƴãwnɛ ʋ tʋɔra vĩ a?

³⁰Nã́w sob na tʋ̃ɔ́ na nyɛrɛ ƴãwfʋ a ʋ bãwfʋ zũú, ɛ́ nãá nyɛrɛ ƴãwfʋ a ʋ na-bome zũú.

³¹Nɩr wa nyɛrɛ ƴãwfʋ a ʋ nã́w pʋɔ a, ŋmɩŋmɩn n'a a na ŋmɛ̃ ʋlɛ wa tɛr a a? Ɛcɛ bɛlɛ bɛ wa ŋmɛlɛ kaar fʋ a fʋ tɛra pʋɔ a, ŋmɩŋmɩn n'a a na ŋmɛ̃ fʋ̃ʋ wa lɩɛbɩ nã́w sob a?