Read Dagara, Northern Bɛn Sɩɩra 11 Bible Online

Bɛn Sɩɩra 11 - Dagara, Northern bible

Bɛn Sɩɩra 11

¹A su-siwra sob yã-bãwfʋ mɩ́ ɩ na ʋ dʋɔ zu: ʋ mɩ́ ɩ na ʋ zɩ̃ nɩ-bɛrɛ sɔgɔ. A nyɛ́b tɛwr ta mɩ́ ɩ tɩ bãwnɛ yele ɩ

²Ta mʋʋrɩ nɩr ʋ na pɔ̀l a ƴãw ɛ, ta jewri nɩr a ʋ ŋmɛ̃a na sãà a ƴãw ɛ.

³A sɩw-bir ɩ n pʋrɩ a bʋ̃-pɩgɛ za pʋɔ, ɛcɛ a ʋ sɩwr nʋ̃ɔ̀ gãw nɩ bom za a tẽ-daa zu.

⁴Ta pɔrɛ nɩ a kpar-kpɛ̃ɛ fʋ na su a ɩ, ta zɛwr fʋ tʋɔra a fʋ yúor tɛrʋ bibir ɛ. Bʋ̃ʋ n'ʋ vɛ̃, a Sore tone nɩ nɔ-ɓãa tome, ɛ́ nɩr kʋ̃ tʋ̃ɔ́ de niwn bãw a ɩ.

⁵Na-mɩnɛ yaga wa zɩ̃ n tẽsɔw, ɛ́ a sob nɛ bɛ na bɛ tɩ tɩɛrɛ a wa vɔblɩ a nãà-kpawʋɔ.

⁶Tẽw nɩ-bɛrɛ yaga wa nyɛ̃ nɩ vĩ bɛ dɩ vuo ɩ, ɛ́ nɩbɛ na tɛr yúor a lɩɛbɩ gbãgbaar.

⁷Ta yere ɛ́ bɛ de niwn sowri kaa baarɩ ɛ, tɩɛrɩ baarɩ ɛ́ bãw yere a na bɛ n'a a.

⁸Ta sɔw ɛ́ bɛ de niwn bɛr wõ ɩ, ta ŋmãa a sob nɛ na ƴɛ̀rɛ a ƴɛ̀rʋ ɛ.

⁹Ta zɛbr yel na bɛ jɩ́rɛ fʋ a ƴãw ɛ, ta kpɛ pʋɔ nɩ-faar zɛb-taa pʋɔ ɩ. Naalʋ nɩ nã́w

¹⁰Ɩ̃ bie e, ta tu yel-yaga pùor zuo ɩ, alɛ wa yãwmɛ zuo a, fʋ kʋ̃ tʋ̃ɔ́ ɩ. Fʋ̃ʋ saa na zɔrɛ a, ɛcɛ fʋ bɛ tʋ̃ɔ́nɛ ɩ. Fʋ̃ʋ wa zɔrɛ tuur a ziir za a, fʋ bɛ páwr bom ɛ.

¹¹Kãw n'ɩ ŋan hanɛ, bàlɛ ʋ tʋɔra, ɛ́ páwr a tome ƴãw, ɛ́ cãà zãá nɩ a ʋ bʋ̃-bɔbra páwfʋ.

¹²Kãw n'ɩ ŋan ɩ bãbàal ɛ́ tɩɛrɛ bɛ ka be ɩ, ʋ bɛ tɛr a ɩ, ɛ́ a nã́w n'ɩ a ʋ bom. Ɛcɛ a Sore jɩ́rɛ ʋ na nɩ nɔ̃wfʋ, ʋ̀ nyɔw ʋ nɩ a ʋ kpɩɛrʋ pʋɔ ʋ lɛb ìr.

¹³Ʋ ɩ na ʋ lɛb zɛw zu, a ɩ nɔ-ɓãan nɩ-yaga zie.

¹⁴A vla nɩ a faa, a nyɔ-vʋʋrʋ nɩ a kũu, a nã́w nɩ a naalʋ, a Sore zie n'a a za yire.

¹⁷A bɛlɩ dem na tu a Sore a, bɛlɛ só a ʋ maalʋ, a ʋ nɔ̃wfʋ na tɛr bɛ nɩ kʋralɛ sɔr-dẽdẽ zu.

¹⁸Kãw n'ɩ ŋan kpɛ naalʋ, ʋ̀ na bɛ dɩrɛ a ʋ libie za, ɛ́ maal bine a ƴãw. Ɛcɛ nyɛ̃ a sã-ya ʋ na na páw a:

¹⁹A bibir ʋl ʋ na yere ʋ tʋɔra kɛ́: «Ɩ̃ na tʋ̃ɔ́ na pɩ̃ɛnɛ, ƴɛrɛŋa a, ɩ̃ na tʋ̃ɔ́ na wone nʋ̃ɔ̀ nɩ a ɩ̃ bʋ̃-tɛrɩ» a, ʋ bɛ bãw debor'a a na cɛlɩ tɩ ta, ʋʋ bɛr a ʋ bome kʋ̀ nɩ-yoru ɛ́ kpi a ɩ. A Sore na tʋ̃ɔ́ na lɩɛbɩ a yele

²⁰Àr a fʋ tõ-fɛra ƴãw, ƴãw a fʋ fãw za a ʋ tob ƴãw ɛ́ tõ ʋ tɩ kor'ɩ.

²¹Ta nyɔw nʋɔr a yel-bier sob tome ƴãw ɛ. Ƴãw a fʋ tɩɛrʋ a Sore ƴãw, ɛ́ tone a fʋ ton cere nɩ. Bʋ̃ʋ n'ʋ vɛ̃, a ɩ n mɔlɛ a Sore zie, ʋ na na ùr kʋ̀ a naalʋ a nã́w sob daƴen daadaa a.

²²A Sore maalʋ n'ɩ a nɩr na tu ʋ a sã-ya, ʋ mɩ́ ɩ na ʋ nyɛ̃ a ʋ bʋ̃-bɔbrɩ za pɛtɛlʋlɛ.

²³Ta yere kɛ́: «Bʋ̃ʋ n'ʋ cɛ m? Bʋ̃ʋ bome n'a ɩ̃ na tʋ̃ɔ́ lɛb tɛr» ɛ?

²⁴Mɩ̀ ta yere kɛ́: «Ɩ̃ tɛr'ɩ bom za, bʋnʋ yel-faa n'ʋ na tʋ̃ɔ́ lɛb páw mɛ̃» ɩ?

²⁵A nʋ̃ɔ̀ bibir a, fʋ mɩ́ yiir'ɩ a kpɩɛrʋ, ɛ́ a kpɩɛrʋ bibir fʋ yiiri a nʋ̃ɔ̀.

²⁶A kũu bibir a, a mɩ́ ɩ n mɔlɛ a Sore zie, ʋ na na ya a nɩr man nɩ a ʋ ɩb a.

²⁷Tɛm been kpɩɛrʋ mɩ́ ɩ na fʋ yiiri a nʋ̃ɔ̀ bɛr, ɛ́ a nɩr kũu daar'a a ʋ tome mɩ́ sãá bɛ nyɛ̃.

²⁸Ta yel kɛ́ nɩr tɛr'ɩ zu-nʋ̃ɔ̀, ʋ́ʋ̀ bɛ kpi sɛr ɛ: a nɩr kũu daar'a bɛ mɩ́ bãw ʋ. Gùre fʋ tʋɔra a nɩ-faa ƴãw

²⁹Ta mɩ́ bʋnɩ tɛr nɩr kpɛ n a fʋ yir ɛ, bʋ̃ʋ n'ʋ vɛ̃, a nɩbɛ na kpɛ yã a bɛ̀lʋ bʋʋrɛ yãwmɛ na.

³⁰A pɔ̀lʋ sob ŋmɛ̃ na mɛ̃ kɔrnyɛ̃ bɛ na nyɔw pàw, kɛ́ bɛ bɛlɩ nyɔw nɩ a taabɛ a. Ʋ piwre nɩ a fʋ loba, mɛ̃ nɩr na sɔwlɛ bãwnɛ zie a.

³¹A pɔ̀lʋ sob ƴãwnɛ nɩ a ʋ bɛrɩ, ɛ́ mɩ́ ɩ a vla lɩɛbɩ a faa. A ɩ-ɩrɩ na vɩɛl vɩɛl a, ʋ mɩ́ cãà na nyɛ̃ faa a pʋɔ ƴɛ̀r.

³²Vũu-zɛle na tʋ̃ɔ́ na ƴãw vũu-kpɛ̃ɛ nyɔw, lɛ mɩ̀ n'a a yel-bier sob bɛrɩ ƴãwnɛ a kũu pʋɔ.

³³Gùre fʋ tʋɔra a nɩ-faa ƴãw, bʋ̃ʋ n'ʋ vɛ̃, faa n'a ʋ mɩ́ tɩɛrɛ, ɛ́ na tʋ̃ɔ́ sãw a fʋ yúor bɛr a baarɩ.

³⁴Fʋ̃ʋ wa de nɩr fʋ na bɛ bãw a sãanʋ a, ʋ na tʋ̃ɔ́ na ƴãw damnʋ a fʋ yir pʋɔ, ɛ́ ƴãw fʋ̃ʋ nɩ a fʋ yir dem tãá.