Read Dagara, Northern Bɛn Sɩɩra 12 Bible Online

Bɛn Sɩɩra 12 - Dagara, Northern bible

Bɛn Sɩɩra 12

¹Ta mɩ́ bʋnɩ maalɩ nɩr za vla ɩ Fʋ̃ʋ wa maalɛ a vla a, bãw a sob nɛ fʋ na maalɛ a vla a, ɛ́ a nɩbɛ na puore fʋ nɩ a fʋ yel-vɩɛlɩ ƴãw.

²Maalɛ a vla a nɩr na tu a Naaŋmɩn a, ɛ́ fʋ na nyɛ̃ nɩ a fʋ sã-ya, alɛ bɛ wa ɩ a ʋ zie n'a a, a na ɩ n a Naaŋmɩn-na-do-saa-bɛ-pɩɛl-a zie.

³Nʋ̃ɔ̀ bɛ be a sob nɛ na maalɛ a yel-faa kʋralɛ a ƴãw, ɛ́ mɩ́ zawrɩ na sõw a nã́w sob a ɩ.

⁴Mɩ́ kʋ̀ a sob nɛ na tu a Naaŋmɩn a, ɛ́ taa sõwne a yel-bier sob towtow ɛ.

⁵Mɩ́ maalɩ a su-siwra sob vla, ɛ́ taa kʋ̀rɛ bom za a nɩr na bɛ ƴãwnɛ a Naaŋmɩn a ɩ, bʋ̃ʋ n'ʋ vɛ̃, ʋ nãà wa tɛr'ɩ fãw zuo fʋ, ʋʋ na maalɩ fʋ nɩ faa gb'a ayi, a vla fʋ na maalɩ ʋ a ƴãw.

⁶A Naaŋmɩn-na-do-saa-bɛ-pɩɛl-a bɛ nɔnɛ a yel-bebe dem towtow ɛ, ɛ́ mɩ́ ƴãw a yel-fa-maalbɛ a dɔwrʋ ʋl bɛ na sɛw taa nɩ a.

⁷Mɩ́ kʋ̀ a nɩ-vɩɛlɩ, ɛ́ taa sõwne a yel-bier sob towtow ɛ. Gùre fʋ tʋɔra a bá-bɛlɛbɛlɛ ƴãw

⁸A nʋ̃ɔ̀ daar bɛ n'a bɛ mɩ́ bãw a bá-sɩza ɩ, ɛcɛ a kpɩɛrʋ daar a, a dɔ̃ sob bɛ mɩ́ sɔwlɩ ɛ.

⁹Nʋ̃ɔ̀ wa ɩrɛ nɩr a, a ʋ dɔ̃ dem mɩ́ tɛr'ɩ pʋ-sãwna. Ʋlɛ wa be kpɩɛrʋ pʋɔ a, a ʋ bá tɔr za mɩ́ zawr'ʋ na bɛr.

¹⁰Taa ƴãwnɛ a fʋ tɩɛrʋ a fʋ dɔ̃ sob ƴãw towtow ɛ, bʋ̃ʋ n'ʋ vɛ̃, a ʋ po-tuolu ɩ na mɛ̃ kur-zɩɛ bazɩ̃ɩ na pàw a.

¹¹Ʋlɛ saa bãw kɛ́ ɩ su-siwra sob, ɛ́ cere gũgune a, fʋ̃ʋ maal ɩrɛ, ɛ́ gù fʋ tʋɔra. Ɩrɛ a ʋ zie mɛ̃ nɩr na ɩrɛ caala ʋ nyɩwrɛ a, bãwnɩ a a bazɩ̃ɩ na kʋ̃ pàw ʋ kʋralɛ a.

¹²Ta ƴãw ʋ zɩ̃ kɔwlɩ fʋ ɛ, ʋ nãà mab'a dáa fʋ lɔb, ɛ́ de a fʋ zie. Ta ƴãw ʋ a fʋ dʋrʋ lowr ɛ, ʋ nãà mab'a bɔbr a fʋ̃ʋ mɩŋa dà-kɔw. Fʋ nãà nyɛ̃ na k'ɩ̃ɩ tɩ tɛr'ɩ yel-mɩŋa, ɛ́ mɩ́ lɛb tɩɛrɩ a ɩ̃ ƴɛ̀rʋ, a ɩ b kpɩɛrʋ.

¹³Ãa n'ʋ na zɔrɛ wa-bɛlɛ waab na dʋ̃ a nɩbaalʋ, nɩ bɛlɩ dem na mɩ́ tawr pɩɛlɛ a wɛ-dʋ̃-faar a?

¹⁴Lɛ n'a bɛ mɩ̀ kʋ̃ zɔrɛ nɩr na tuur yel-bier sob, ɛ́ mɩ́ ɩrɛ mɛ̃ a ʋl a nɩbaalʋ ɛ.

¹⁵Lɛn daar za a yel-bier sob na lãw cere nɩ fʋ a, ʋ bɛ wule fʋ a ʋ ŋmɛ̃a tɔr za ɩ. Fʋ̃ʋ wa ɩ mɛ̃ fʋ lo na a, ʋ mɩ́ tɩɛ fʋ na bɛr. Lɛn daar za fʋ na àr saaƴẽwn a, ʋ mɩ́ àr'ɩ a lige pʋɔ, fʋ̃ʋ wa dɛ ŋmɩɛr gbɛ́r a, ʋ bɛ lɛb nyɔwr ʋ tʋɔra ɩ.

¹⁶A dɔ̃ sob mɩ́ ƴɛ̀rɛ nɩ nɔ-kãá a fʋ zie, ɛ́ a ʋ tɩɛrʋ pʋɔ ʋ bɔbr k'ʋʋ nãá ɩ fʋ lo bɔw pʋɔ. Ʋ na tʋ̃ɔ́ na ɩ mɛ̃ a kpɩɛr ʋ na ʋ kone a, ɛcɛ alɛ wa ɩ mɛ̃ ʋ páw nɩ vuo a, a fʋ zɩ̃ɩ bɛ saalɛ ʋ ɛ.

¹⁷Faa kãw wa páw fʋ a, fʋ na nyɛ̃ ʋ na ʋ de niwn be be a fʋ ƴãw, ʋ na yel'a k'aa fʋ sõwfʋ n'a, ɛ́ ɩ fʋ kaw gbɛ́r lo.

¹⁸Lɛ n'a a ʋ ŋmɛ̃a tɔr za na sãà, ʋ na gɔwrɛ nɩ zu ɩrɛ nɩ fʋ laar, ʋ na ŋmɛ n nuru ƴãw, ɛ́ ƴɛ̀rɛ faa a fʋ ƴãw kʋralɛ.