Read Dagara, Northern Bɛn Sɩɩra 13 Bible Online

Bɛn Sɩɩra 13 - Dagara, Northern bible

Bɛn Sɩɩra 13

¹A nɩbɛ tub a mɩnɛ na ɩ faa a Fʋ̃ʋ wa tɔ súur a, fʋ mɩ́ dɛw nɩ a fʋ nuru, fʋ̃ʋ wa tuur pɔ̀lʋ sob a, fʋ mɩ́ nãà wa ŋmɛ̃ na taa nɩ ʋ.

²Ta zɛw bʋ̃-tɩbrʋ na tɩbrɛ gãw a fʋ fãw a ɩ, mɩ̀ ta tuur nɩr na kpɛmɛ zuo fʋ bɩɩ tɛr a zuo fʋ a ɩ. Ŋmɩŋmɩn n'a yawra lale nɩ kure lale na tʋ̃ɔ́ lãw taa? Alɛ wa tɔ taa a, a dãw-niwn sob na ŋmɛr a.

³A tɛra sob mɩ́ ɩ n a ɩb a bɛ tu a mɩnʋ ɛ, ɛ́ ʋlɛ n'ʋ mɩ́ nyɛ̃ a suur. A nã́w sob'ʋ bɛ mɩ́ ɩ a ɩb na bɛ tu a mɩnʋ a càar'ɩ, ɛ́ ʋlɛ n'ʋ bɛ mɩ́ fɛr k'ʋʋ zɛlɩ a gaafara.

⁴A tɛra sob wa tɛr fʋ yel-ɩra a, ʋ na nɛbr fʋ na. Fʋ̃ʋ bɛ wa cãà tɛr bom a, ʋ na zawrɩ fʋ na bɛr.

⁵Fʋ̃ʋ wa tɛr bome a, ʋ na lãwnɩ fʋ na vʋʋrɛ, ʋ na bɛlɩ a na dɩ, ɛ́ a ʋ pʋɔ bɛ zɛbr'ɩ ʋ ɛ.

⁶Ʋlɛ wa tɛr fʋ yel-ɩra a, ʋ na bɛlɩ fʋ na: ʋ na laar'ɩ la-vɩɛlɩ sɔwr fʋ, ʋ na ƴɛ̀rɛ nɩ ƴɛ̀r-vɩɛlɩ a fʋ zie ɛ́ sowre fʋ: «Bʋ̃ʋ n'ʋ ɩ̃ na tʋ̃ɔ́ ɩ a fʋ ƴãw?»

⁷Ʋ na bʋɔlɛ fʋ nɩ kʋralɛ a ʋ cuwr dɩb zie, mɩ́ tɩ ƴãw fʋ vĩ, tɛr lɛɛɛ fʋ tɩ sãw a fʋ libie za bɛr, gb'a ayi, gb'a ata, fʋ na na mɩ́ bʋɔlɩ ʋ yáa a san a. A baarʋ daar a, ʋ na gɔwrɛ nɩ zu, ɩrɛ nɩ fʋ laar. Ʋlɛ wa nyɛ̃ b a, ʋ bɛ ŋmɛlɛ kaar fʋ ɛ.

⁸Gù fʋ tʋɔra, ta bɛr bɛ bɛlɩ fʋ, ɛ́ siwri fʋ a fʋ dãbolu zũú ɛ.

⁹Nɩ-kpɛ̃ɛ wa bʋɔlɩ fʋ bʋ̃-kãw ƴãw a, ta sàw ɛ, lɛ n'a ʋ na lɛb bãw bʋɔlɩ.

¹⁰Ta ŋmʋr cen ɛ, ʋ nãà mab'a diw fʋ fʋ lɛb, ɛcɛ ta àr zãá zuo ɩ, ʋ nãà mab'a yiiri fʋ bɛr.

¹¹Ta yel kɛ́ fʋ̃ʋ nɩ ʋl lãw ƴɛ̀r mɛ̃ nyɩ zɛ̃ n taa a ɩ, mɩ̀ ta sàw de a lɛ za ʋ na yere a ɩ. Bʋ̃ʋ n'ʋ vɛ̃, ʋ ɩrɛ fʋ na kaar a ʋ ƴɛ̀r-yaga pʋɔ, ɛ́ jiele fʋ a ʋ laarʋ pʋɔ.

¹²Ʋ na manɩ nɩ a lɛ fʋ na yel a, bɛ tɛr'ɩ nɩbaal-zɔba kãw za ɩ. Ɛ́ bãwnɩ a k'ʋʋ bɛ bɛrɛ fʋ nɩ a ŋmɩɛrʋ nɩ a gaso ɩ.

¹³A na ɩ lɛ a, gùre fʋ tʋɔra, ɛ́ tɛr maal-ɩrɛ yaga za: kũu sɔ́r na kpɛ faa a zu n'a fʋ cere. A na-mɩnɛ nɩ a nan dem

¹⁵A dʋn mɩ́ nɔnɛ nɩ a al na ŋmɛ̃ taa nɩ a a, ɛ́ nɩsaal za nɔnɛ a ʋ tɔ.

¹⁶A dʋn mɩ́ lãwnɛ nɩ taa bʋʋrɛ bʋʋrɛ, ɛ́ a nɩsaal mɩ́ tu a ʋ nɩsaal-tɔ.

¹⁷Bʋ̃ʋ n'ʋ wɛ-baa nɩ pele na tʋ̃ɔ́ lãw? Yel-bier-maalɛ nɩ nɩr na tu a Sore a?

¹⁸Bʋnʋ ƴã-ɓaarʋ n'ʋ na tʋ̃ɔ́ be jɩbʋra nɩ báa cara pʋɔ? Bʋnʋ ƴã-ɓaarʋ n'ʋ na tʋ̃ɔ́ be nãà nɩ nã́w sob cara pʋɔ?

¹⁹A wɩ̀ɛ pʋɔ a, a bòn-gaarɩ n'ɩ a gben bʋ̃-nyɔwrɩ, lɛ mɩ̀ n'a a nan dem ɩ a na-mɩnɛ dɩb.

²⁰A pɔ̀lʋ sob bɛ nɔnɛ a tʋɔra-siwru ɛ, lɛ n'a a nãà mɩ̀ bɛ nɔnɛ a nã́w sob ɛ.

²¹Nãà wa dẽderi cen loba a, a ʋ bárɩ mɩ́ tɩɛ ʋ na tɛr, ɛcɛ nã́w sob wa lore a, a ʋ bárɩ mɩ́ dáa ʋ na bɛr.

²²Nãà wa tuli a, nɩbɛ yaga mɩ́ sõw ʋ na. Ʋlɛ wa ƴɛ̀r dãbol-ƴɛ̀rʋ a, bɛ mɩ́ yel k'ʋʋ tɛr'ɩ yel-mɩŋa. Ɛcɛ nã́w sob wa tuli a, bɛ mɩ́ yere ʋ na. Ʋlɛ wa ƴɛ̀r yã-bãwnɛ ƴɛ̀rʋ a, bɛ bɛ mɩ́ ŋmɛlɩ kaa ɩ.

²³Nãà wa ƴɛ̀rɛ a, a nɩbɛ za mɩ́ ɩ n gbili, ɛ́ mʋʋrɛ a ʋ ƴɛ̀rʋ. Nã́w sob wa ƴɛ̀rɛ a, a nɩbɛ mɩ́ sowre na: «Ãa n'ʋ?» Ɛ́ ʋlɛ wa ŋmɩɛr gbɛ́r a, bɛ mɩ́ dáa ʋ na k'ʋʋ lo.

²⁴A naalʋ ɩ n bʋ̃-vla, yel-bier bɛ wa tu yi a ʋ pʋɔ a. Ɛcɛ a nɩ-faa zie n'a a nã́w ɩ bʋ̃-faa.

²⁵A nɩsaal tɩɛrʋ n'ʋ mɩ́ lɩɛbɩ a ʋ niwn, ʋ vɩɛl bɩɩ ʋ kpɛ faa.

²⁶Niw-vla wule nɩ tɩɛrʋ na vɩɛl a. Ɛcɛ a mɩ́ fɛr'a kɛ́ fʋ mɩ́ tɩɛrɩ hanɩ nɩ, ɛ́ bãw nyɛ̃ a zʋkpaɩ.