Read Dagara, Northern Bɛn Sɩɩra 14 Bible Online

Bɛn Sɩɩra 14 - Dagara, Northern bible

Bɛn Sɩɩra 14

¹Zu-nʋ̃ɔ̀ sob'ɩ a sob nɛ na bɛ mɩ́ mab a ʋ ƴɛ̀rʋ pʋɔ, ɛ́ a ʋ sãwna tɩɛrʋ bɛ damnɛ ʋ a.

²Zu-nʋ̃ɔ̀ sob'ɩ a sob nɛ a ʋ pʋɔ na bɛ yere k'ʋʋ sãw na, ɛ́ a ʋ tɩɛrʋ bɛ dãw wɛ a. A mimir sob kpɩɛrʋ

³A mimir sob bɛ kpɛ taa nɩ a naalʋ ɛ. A naalʋ kpɛb pɛr'ɩ bo, fʋ̃ʋ bɛ wa dɩrɛ a fʋ libir a?

⁴Nɩr na kpowr ʋ tʋɔra ɛ́ bɔbr ɓanɛ taa a, ʋ bɔbr'a ɓanɛ taa nɩ-yũo ƴãw. A ʋ bome n'a nɩ-yoru na wone nɩ nʋ̃ɔ̀.

⁵Nɩr na ko mimir a ʋl mɩŋa ƴãw a, anʋ ƴãw n'a ʋ na ɩ nɩ-vla? Ʋ kʋ̃ wõ n a ʋ bʋ̃-tɛrɩ nʋ̃ɔ̀ ɩ.

⁶Bom bɛ ka be kpɛ faa zuo, a nɩr na ɩrɛ ʋ tʋɔra a kpɩɛr a ɩ, a ʋ po-tuolu sã-ya n'a.

⁷Mimir sob wa maalɩ yel-vla a, ʋ bɛ bãw kɛ́ ɩ ɛ, a ʋ po-tuolu mɩ́ wa sãá nɩ a baarʋ daar.

⁸A nɩr na mɩ́ nyɛ̃ a bom a mimir zaalɛ a, nɩ-faa n'ʋ, ʋ mɩ́ lɩɛb'ɩ a niwn bɛr zi-yoru, ɛ́ jewre a nɩbɛ.

⁹Nyuur sob bom ʋ na tɛr a bɛ mɩ́ sɛw ʋ ɛ, a tɛra vʋla mɩ́ ɩ na a ʋ socir kpawlɩ.

¹⁰A mimir sob bɛ ɩrɛ ʋ bʋ̃-dɩra kʋ̀rɛ nɩr ɛ, a tɛɛ za bɛ mɩ́ ka a ʋ yir ɛ. A nyɔ-vʋʋrʋ tɔnɛ íru

¹¹Ɩ̃ bie e, alɛ wa tɛr fʋ ɩb a, fʋ̃ʋ kaarɛ fʋ tʋɔra zie vla. Wa n de-kʋ̀b bome na sɛw taa nɩ a Sore a, wa kʋ̀ ʋ.

¹²Bãwnɩ a a kũu na bɛ cɛlɛ a, nɩ fʋ na bɛ bãw a bibir ʋ na ƴãw a ɩ.

¹³Maalɩ a fʋ bá vla, ɛ́ bãw kpi, kʋ̀ ʋ man a lɛ a na tɛr fʋ ɩb a.

¹⁴Ta sɩb fʋ tʋɔra bibir been nʋ̃ɔ̀ ɩ, ta bɛr a fʋ pʋ-tɩɛrʋ bʋ̃-bɔbra kãw na sɛw taa nɩ a, ʋ tɔl ɛ.

¹⁵Fʋ bãwnɩ a na, a na fɛr'a fʋ bɛr a fʋ hanʋ tɔnɛ kʋ̀ nɩ-yoru, a fʋ gbã-dɩrbɛ na ŋmɛ n gbãw, põ a a bɛ cara pʋɔ.

¹⁶Mɩ́ tɩr bɩɩ de, ɛ́ nʋ̃ɔ̀ ɩrɛ fʋ. Bʋ̃ʋ n'ʋ vɛ̃, a kpɩmɛ tẽw a, nʋ̃ɔ̀ za bɛ be be fʋ na bɔbr ɛ.

¹⁷A nyɔ-vʋʋrʋ mɩ́ kòre na cere mɛ̃ kparʋ a. «A na fɛr'a fʋ kpi», a nʋɔr na ƴãw kʋralɛ a n'ʋ.

¹⁸Tɩɛ na ɩ váar zimpiri a zu a, a váar a mɩnɛ mɩ́ suore na, ɛ́ a mɩnɛ tɔmnɛ. Lɛ mɩ̀ n'a a ŋmɛ̃ a nɩbɛ na dɔwr lɩɛrɛ taa a zie: bɛ mɩnɛ kpiir'a ɛ́ bɛ mɩnɛ dɔwr.

¹⁹Bʋ̃-maala za na ɩ bʋ̃-wɛra a, na bɔr a, ɛ́ a sob nɛ na maalɩ ʋ a na páw ʋ na cen. A nʋ̃ɔ̀ a yã-bãwfʋ na waar'ɩ a

²⁰Zu-nʋ̃ɔ̀ sob'ɩ a nɩr ʋl na cɛlɛ a yã-bãwfʋ zie, ɛ́ tɛr a ʋ yã tɩɛrɛ nɩ a,

²¹na mɩ́ tɛr a yã-bãwfʋ sɛ́ɛ jɛlɛ a ʋ socir pʋɔ, ɛ́ tɩɛrɛ a ʋ yel-sɔwlɩ a.

²²Ʋ mɩ́ diwr'a bɩ́ɛrɛ ʋ, mɛ̃ nabawlɛ a, ʋ mɩ́ gù ʋ nɩ a be ʋ na na tɔl a.

²³Ʋ mɩ́ jɩ́rɛ nɩ a tokoro vʋɔrɩ́, ʋ mɩ́ bɛrɛ na wone a ʋ dɩ̃dɔr nʋɔr.

²⁴Ʋ mɩ́ kpɩɛr'a pɩɛlɩ a ʋ yir, ɛ́ maalɩ a ʋ laɩ pɩɛlɩ a ʋ dacine.

²⁵Ʋ mɩ́ maal'ɩ a ʋ pɛn-sɛw pɩɛlɩ a yã-bãwfʋ, ɛ́ kpɩɛr a zie na ɩ nʋ̃ɔ̀ zie a.

²⁶Ʋ mɩ́ kʋ̀ n a ʋ bibiir a yã-bãwfʋ ʋ gùre, ʋ mɩ́ kpɩɛr'ɩ a ʋ wuli pile.

²⁷A yã-bãwfʋ mɩ́ piw ʋ na tɛr a tʋlʋ ƴãw, a ʋ ɓaarʋ́, ɛ́ ɩ ʋ be a ʋ yúor-vɩɛlʋ-danʋ pʋɔ.