Read Dagara, Northern Bɛn Sɩɩra 15 Bible Online

Bɛn Sɩɩra 15 - Dagara, Northern bible

Bɛn Sɩɩra 15

¹Sob nɛ na zɔrɛ a Sore a, mɩ́ ɩrɛ na mɛ̃ a lɛ a na sɛw a. A Naaŋmɩn wulu bãw-bãw-kara na páw nɩ a yã-bãwfʋ.

²A yã-bãwfʋ na cen na tuori ʋ mɛ̃ mã a, ʋ na de ʋ na mɛ̃ a pɔwsɩrale ʋ na kul a.

³A bʋ̃-dɩra ʋ na na guole nɩ ʋ a n'ɩ a yã, a kʋ̃ɔ ʋ na na kʋ̀rɛ ʋ ʋ nyúur a n'ɩ a yã-bãwfʋ.

⁴A yã-bãwfʋ n'ʋ ʋ na mɩ́ dɩ́ɛlɩ, ɛ́ kʋ̃ lo ɩ, ʋ na mɩ́ tu ʋ na, ɛ́ kʋ̃ nyɛ̃ vĩ ɛ.

⁵A yã-bãwfʋ na zɛw ʋ na ʋ zuo a ʋ taabɛ, ʋlɛ wa ƴɛ̀rɛ a nɩbɛ za niŋé a, ʋ na mɩ́ waal'ɩ a ƴɛ̀rʋ kʋ̀ ʋ.

⁶À ŋá n'a nʋ̃ɔ̀ na mɩ́ paalɩ ʋ tɩ laarɩ, ɛ́ a ʋ yúor yi kʋralɛ.

⁷A dãbole kʋ̃ tɛr a yã-bãwfʋ ɛ, a yel-bebe dem kʋ̃ nyɛ̃ ʋ ɛ.

⁸Ʋ mɩ́ zãá nɩ nɩ a pɔ̀lʋ dem, a zir-ŋmarbɛ na yiiri ʋ na bɛr.

⁹A yel-bier sob bɛ sɛw taa nɩ a Sore danʋ ɛ. Bʋ̃ʋ n'ʋ vɛ̃, a danʋ ŋa bɛ mɩ́ yi a Sore zie ɩ.

¹⁰A yã-bãwfʋ n'ʋ mɩ́ ƴãw a nɩr danɛ a Naaŋmɩn, a Sore mɩŋa n'ʋ mɩ́ waalɛ a danʋ kʋ̀rɛ ʋ. A nɩsaal na só ʋ tʋɔra a yele

¹¹Ta yere kɛ́: «A Sore n'ʋ só ɩ̃ bɛr a sɔ́r» ɛ. Bʋ̃ʋ n'ʋ vɛ̃, ʋ bɛ ɩrɛ a ʋlɩ bom nɛ ʋ na bɛ nɔnɛ a ɩ.

¹²Ta yere kɛ́: «A Sore n'ʋ tuli mɛ̃» ɩ, bʋ̃ʋ n'ʋ vɛ̃, ʋ bɛ tɛr a yel-bier sob yel-ɩra ɩ.

¹³A Sore bɛ nɔnɛ ɩ-faa kãw za ɩ, ɛ́ nɩr kʋ̃ tʋ̃ɔ́ zɔrɛ a Sore ɛ́ nɔnɛ a ɩ-faa ɩ.

¹⁴A Sore n'ʋ ír a nɩsaal a pɛr-tib daar, ɛ́ bɛr ʋ k'ʋʋ mɩ́ ɩ a lɛ ʋ na tɩɛrɛ a.

¹⁵Fʋ̃ʋ wa bɔbr a, fʋ na sàwr'ɩ a Naaŋmɩn nɛ́ɛ, a fʋ pùor-bɛ-lɛbrʋ be n a fʋ zie.

¹⁶Ʋ bin nɩ a vũu nɩ a kʋ̃ɔ a fʋ niŋé, tùr a nũú cɔw a ʋl fʋ na kaa ír a.

¹⁷A nyɔ-vʋʋrʋ nɩ a kũu n'ɩ á ŋá, ʋ wule a nɩsaalbɛ: ŋa za na mɩ́ páw nɩ a ʋl ʋ na nɔnɛ a.

¹⁸A Sore yã-bãwfʋ sɩrɩ na ɩ kpɛ̃ɛ, a Sore kpɛnʋ bɛrmɛ na, ʋʋ nyɛrɛ bom za.

¹⁹Ʋ jɩ́rɛ nɩ a bɛlɩ dem na zɔrɛ ʋ a, ʋl mɩŋa bãw nɩ a nɩsaalbɛ tõ-toni za.

²⁰Ʋ bɛ yel kɛ́ nɩr kãw za ɩ nɩ-faa ɩ, ʋ bɛ kʋ̀ sɔ́r nɩr za k'ʋʋ maalɛ yel-bier ɛ.