Read Dagara, Northern Bɛn Sɩɩra 19 Bible Online

Bɛn Sɩɩra 19 - Dagara, Northern bible

Bɛn Sɩɩra 19

¹Tõ-tone na ɩ dã-nyúure a bɛ kpɩɛr naalʋ ɛ. Sob nɛ na bɛ cɛlɛ a yel-bili zie a na lore nɩ bɩɛlbɩɛl tɩ lo.

²A divɛ̃ nɩ a pɔwbɛ bɔrɛ nɩ a nɩbɛ na tɛr yã a. Sob nɛ na tuur a pɔw-yɛmɛ pùor a, ʋ mɩ́ tɛr'a bɛ tɩ cãà só ʋ tʋɔra ɩ.

³A ɩb ŋa na ɩ na ʋ kpi, ɛ́ a zãzule na só a ʋ ƴã-gã-pʋ̃ɔn. A ƴɛ̀r-yaga bɛ vɩɛl ɛ

⁴Sob nɛ na mɩ́ sàw a ƴɛ̀rʋ fɔ̃wlɛ a, ɩ n yã-bile sob. Sob nɛ na maalɛ a faa a malɛ nɩ ʋ tʋɔra.

⁵Sob nɛ na nɔnɛ a faa maalʋ a na nyɛ̃ nɩ ƴɛ̀rʋ-dɩb dɔwrʋ.

⁶Ɛcɛ sob nɛ na bɛ nɔnɛ a ƴɛ̀r-yaga a, mɩ́ nɩɩr'ɩ a faa bɛr.

⁷Ta mɩ́ lɛb yel a lɛ bɛ na yel a towtow ɛ, ɛ́ fʋ bɛ nyɛrɛ faa kãw za a pʋɔ ɩ.

⁸Taa manɛ bom za, bá bɩɩ dɔ̃ sob ƴãw ɛ. A fʋ gbili kʋ̃ wa ɩ fʋ tɛr sãwna a, fʋ̃ʋ taa yere bom za ɩ.

⁹Bʋ̃ʋ n'ʋ vɛ̃, à ŋá sob na tʋ̃ɔ́ na wõ a lɛ fʋ na yel a, ɛ́ cɩ́rɛ a fʋ ƴãw, ɛ́ a daar wa ta ʋ hɩ̃ɛn fʋ.

¹⁰Fʋ wõ n yel kãw bɩɩ? Tɛr ʋ tɩ ta n a fʋ kũu daar. Ɓãá ƴãw! Ʋ kʋ̃ʋ wa mab ɩ fʋ pur ɛ!

¹¹Ƴɛ̀rʋ tɛwr bɛ na ƴɛ̀r a, ɛ́ a 'wɔbr a dãbol sob mɛ̃ pɔw na ta dɔwfʋ a.

¹²Ƴɛ̀rʋ a dãbol sob púorí ɩ na mɛ̃ pĩi na cɔ̀r bà a ʋ gbɛkpɛ̃ɛ zu a. Mɩ́ bɩɛrɩ nyɛ̃, a ƴɛ̀rʋ fʋ na wõ a ɩ n sɩza bɩɩ

¹³Sowri a fʋ bá kaa: kapaw ʋ bɛ ɩ bom za ɩ, ɛ́ ʋlɛ wa ɩ bom a, ʋ bɛ lɛb ɩrɛ ɩ.

¹⁴Sowri a fʋ tɔ kaa: kapaw ʋ bɛ yel yel za ɩ, ɛ́ ʋlɛ wa yel bom a, ʋ bɛ lɛb yere ɩ.

¹⁵Sowri a fʋ bá kaa, bʋ̃ʋ n'ʋ vɛ̃, a gɛgɛrʋ be n be kʋralɛ, ta mɩ́ sàw a lɛ za bɛ na yere a ɩ.

¹⁶Kãw n'ɩ ŋan mab, ɛ́ bɛ tɩ́ɛrɩ faa ɩ: ãa n'ʋ bɛ dãw ƴɛ̀r sãw?

¹⁷Sowri a fʋ tɔ kaa ɛ́ bãw yere ʋ, bɛr a Naaŋmɩn-na-do-saa-bɛ-pɩɛl-a wulu ʋ tu a ʋ tub. A yã-bãwfʋ na ɩ sɩza a nɩ a yã-bãwfʋ na ɩ ziri a

²⁰Yã-bãwfʋ za ɩ n a Sore fʋ na zɔrɛ a, nɩ a ʋ wulu fʋ na sàwr a.

²²Ɛcɛ a yel-faa bãwfʋ bɛ ɩ a yã-bãwfʋ ɛ, ɛ́ a yel-bebe dem wulu deb bɛ ɩ a yã tɛrʋ ɛ.

²³Bãwfʋ kãw be n be kpɛ faa bɛ maal'ɩ wob ɛ. Nɩr na bɛ tɛr yã-bãwfʋ a bol'a.

²⁴Nɩr na bɛ maal tɛr yã ɛ́ zɔrɛ a Sore a, alɛ sa nɩr na tɛr yã yaga za ɛ́ zawrɛ a Sore wulu a.

²⁵Bãw-ɩb kãw na maal cɔbrɩ nɩ yã a be n be na tʋ̃ɔ́ ƴãw fʋ ɩ ɩb na bɛ tu a mɩnʋ a. Bɛ mɩnɛ mɩ́ ɩ n nyãnyu-ɩb, yel kɛ́ bɛ wul bɛ na tɛr sɔ́r a.

²⁶Kãw nɩ ŋan cere ka gùr, a pʋ-sãwna zũú, ɛcɛ nɩbɛ bɛlʋ tɛwr tɩɛrʋ n'a paalɩ a ʋ socir.

²⁷Ʋ mɩ́ su n a zú ɛ́ bãw kɛ́ ɩ a wõw, ɛcɛ nɩr za bɛ wa cɛlɛ be a, ʋ mɩ́ tʋ̃ɔ́ fʋ na.

²⁸Kãw n'ɩ ŋan bɛr a yel-faa maalʋ, ʋ na bɛ tɛr fãw a ƴãw. Ɛcɛ ʋlɛ wa dɛ nyɛrɛ vuo a, ʋ na maal'ʋ na.

²⁹Nyɛ́b'a fʋ mɩ́ nyɛ̃ a nɩr bãw ʋ, a ʋ niwn n'ʋ fʋ mɩ́ nyɛ̃ bãw k'ʋʋ bãw nɩ yã.

³⁰A nɩr suuru, a ʋ laarʋ, a ʋ cenu mɩ́ wul'a nɩr nɛ bʋʋrɛ na n'ʋ a.