Read Dagara, Northern Bɛn Sɩɩra 2 Bible Online

Bɛn Sɩɩra 2 - Dagara, Northern bible

Bɛn Sɩɩra 2

¹A kanyir a kpɩɛrʋ daar Ɩ̃ bie e, fʋ̃ʋ wa yel kɛ́ fʋ na tone nɩ a Sore tome a, fʋ̃ʋ cɔbrɩ fʋ tʋɔra gù n a kpɩɛrʋ.

²Tɛr soci-kpɛ̃w ɛ́ ƴãw fãw, a fʋ tɩɛrʋ ta damnɛ fʋ a kpɩɛrʋ daar ɛ.

³Tu a Sore, taa tawr yire a ʋ pùor ɛ. Vla tɛwr'a a na ɩ b a fʋ nyɔ-vʋʋrʋ baarʋ daar.

⁴Bom za na tarɛ fʋ a, sàw ɛ́ tɛr kanyir a yele na síwre fʋ a pʋɔ.

⁵Bʋ̃ʋ n'ʋ vɛ̃, vũu n'a bɛ mɩ́ ɩ n a salm-zɩɛ kaa bãw a ʋ vɩɛlʋ. Vĩ nyɛ́b kpɩɛrʋ pʋɔ n'a bɛ mɩ̀ mɩ́ ɩ a bɛlɩ dem na pɛlɩ a Naaŋmɩn pʋɔ a kaa.

⁶Ƴãw a fʋ tɩɛrʋ a Naaŋmɩn ƴãw, ʋʋ na sõw fʋ na. Tuur sɔ́r na ɩ dẽdẽ a, ɛ́ ƴãw a fʋ tɩɛrʋ a Naaŋmɩn ƴãw.

⁷Nyɩɩm na zɔrɛ a Sore a, nyɩ ƴãw a nyɩ tɩɛrʋ a ʋ su-ɓaarʋ ƴãw. Nyɩ taa tawr yire kɛ́ bɛrɛ ʋ ɛ, alɛ bɛ ɩ lɛ, nyɩ na lo na.

⁸Nyɩɩm na zɔrɛ a Sore a, nyɩ ƴãw a nyɩ tɩɛrʋ a ʋ ƴãw, nyɩ kʋ̃ gúu a nyɩ sã-ya ɩ.

⁹Nyɩɩm na zɔrɛ a Sore a, nyɩ ƴãw a nyɩ tɩɛrʋ a ʋ maalʋ ƴãw, nʋ̃ɔ̀ na bɛ báarɛ a ƴãw, nɩ a ʋ su-ɓaarʋ ƴãw.

¹⁰Nyɩ bɛ́l a nɩbɛ na dɔw lɩɛrɩ taa tɔl a nyɛ̃: ãa n'ʋ ƴãw a ʋ tɩɛrʋ a Sore ƴãw ɛ́ wa nyɛ̃ vĩ? Ãa n'ʋ tu a Sore zɔba pùor, ʋʋ wa zawr'ʋ bɛr? Ãa n'ʋ bʋɔlɩ ʋ, ʋʋ bɛ ŋmɛlɩ kaa ʋ?

¹¹Bʋ̃ʋ n'ʋ vɛ̃, a Sore zɔrɛ nɩ nɩbaalʋ ɛ́ tɛr su-ɓaarʋ, ʋ mɩ́ dɩ n a yel-bebe suur, ɛ́ faa a kpɩɛrʋ daar.

¹²Baw-bio dem'ɩ a dɛ̃bɩ̃ɛ dem nɩ a nɩ-salala mɩnɛ, a yel-bebe dem na cere sɛ́ɛ ayi zu a.

¹³Baw-bio sob'ɩ ʋlɩ sob na bɛ kpɛ socir, na bɛ ƴãw a ʋ tɩɛrʋ a Sore ƴãw a. A lɛ pʋɔ a, a Sore kʋ̃ gù ʋ ɛ.

¹⁴Baw-bio dem'ɩ nyɩ, nyɩɩm na bɛ ƴãw fãw tɩ ta a baarʋ daar a! Bʋ̃ʋ n'ʋ nyɩ na ɩ, a Sore wa jɛlɛ a nyɩ yele a?

¹⁵Bɛlɩ dem na zɔrɛ a Sore a, bɛ bɛ zawrɛ a ʋ ƴɛ̀rʋ towtow ɛ, bɛlɩ dem na nɔnɛ ʋ a, bɛ mɩ́ tuur'ɩ a ʋ sɛ́ɛ.

¹⁶Bɛlɩ dem na zɔrɛ a Sore a, bɛ mɩ́ bɔbr'a kɛ́ bɛ ɩrɛ a pɛlɩ a ʋ pʋɔ. Bɛlɩ dem na nɔnɛ ʋ a, bɛ mɩ́ guole nɩ bɛ tʋɔra nɩ a ʋ Wulu.

¹⁷Bɛlɩ dem na zɔrɛ a Sore a, bɛ mɩ́ gɔ na gù a ʋ tome tob. Bɛ mɩ́ síwre nɩ bɛ tʋɔra a ʋ niŋé, yere nɩ:

¹⁸«A Sore nuru pʋɔ loba sa a nɩsaalbɛ nuru pʋɔ loba. Bʋ̃ʋ n'ʋ vɛ̃, a lɛ ʋ na ɩ kpɛ̃ɛ sɛw a, lɛ n'a ʋ mɩ̀ tɛr a su-ɓaarʋ.»