Read Dagara, Northern Bɛn Sɩɩra 20 Bible Online

Bɛn Sɩɩra 20 - Dagara, Northern bible

Bɛn Sɩɩra 20

¹Bãw a ƴɛ̀rʋ daar nɩ a gbili-ɩb daar A nɩr gɔ́b a mɩnɛ bɛ mɩ́ wa sɛw taa nɩ ɛ, ɛ́ gbili-ɩb kãw wule nɩr na bãw yã a.

²Ɛcɛ a nɩr na sãw a gɔ́b sa, fʋ na na sɩb a suur tɛr a.

³Sob nɛ na mɩ́ sàw a ʋ sãwna a bɛ bãwnɛ niw-sʋba ɩ.

⁴Sob nɛ na bɔbr k'ʋʋ bin a mɩnʋ nɩ fãw a, ŋmɛ̃ na taa nɩ dɛ-vár na bɔbr k'ʋʋ fɛr gã nɩ pɔwsɩrale a.

⁵Ŋa sob ɩ n gbili, wul k'ʋʋ tɛr'ɩ yã-bãwfʋ, ɛ́ ŋa sob ɩ bɛ hɩ̃ɛn ʋ, a ʋ ƴɛ̀r-yaga ƴãw.

⁶Ŋa sob ɩ n gbili, ʋ na bɛ bãw a lɛ ʋ na na sɔw a ƴãw, ɛ́ ŋa sob ɩ gbili, ʋ na bãw a ƴɛ̀rʋ daar a ƴãw.

⁷A yã-bãwnɛ mɩ́ ɩ n gbili tɩ ta a ƴɛ̀rʋ daar, ɛcɛ a sob nɛ na mɩ́ pɔrɛ a, nɩ a nɩr na bɛ bãw yã a, mɩ́ bɛr'ɩ a ƴɛ̀rʋ daar ʋ tɔl.

⁸Nɩr na ƴɛ̀rɛ zuo a na ɩ na bɛ hɩ̃ɛn ʋ, ɛ́ nɩr na bɛ sàwr ƴɛ̀rɛ a na ɩ na bɛ bɛ nɔnɛ ʋ ɛ. A yele na mɩ́ ɩ bɩɛbɩɛ za a

⁹A mɩnɛ kãw, nɩr mɩ́ wa nyɛ̃ nɩ tɔnɛ a ʋ kpɩɛrʋ pʋɔ, ɛ́ a mɩnɛ kãw a ɩ a mɔlɛ na pire pee a.

¹⁰Bom kãw fʋ na mɩ́ wa kʋ̀ nɩr a, bɛ mɩ́ wa n tɔnɛ kãw za a fʋ zie ɩ, ɛ́ bom kãw fʋ na kʋ̀ nɩr a, ɩ kɛ̀ fʋ pàw gb'a ayi dɔwlɩ.

¹¹A mɩnɛ kãw, a yúor mɩ́ wa n nɩ siwru, ɛ́ kãw mɩ́ lɛb ɩ nɩr a siwru pʋɔ.

¹²Kãw nɩ ŋan mɩ́ da bome yaga nɩ libie blãlɛ, ɛ́ kãw dà a gb'a ayopõi dɔwlɩ.

¹³A yã-bãwnɛ mɩ́ ƴɛ̀r'ɩ blãlɛ, ɛ́ ɩ kɛ̀ bɛ nɔ̃w ʋ, ɛcɛ zawlalɛ n'a a dãbol sob mɩ́ ƴɛ̀rɛ a nɔ̃wfʋ ƴɛ̀rʋ.

¹⁴A dãbol sob na kʋ̀ b bom a, a bɛ waar'ɩ tɔnɛ kãw za a fʋ zie ɩ, bʋ̃ʋ n'ʋ vɛ̃, ʋ gùre na kɛ́ fʋ wa kʋ̀ ʋ yaga zuo a lɛ lɩɛr'ɩ.

¹⁵Ʋ mɩ́ tɩr'ɩ blãlɛ, ɛ́ yere fʋ yaga, cɩɩrɛ mɛ̃ nɩr na hiere ƴɛ̀rʋ dàa pʋɔ a. Ʋ na pɛ̃w fʋ nɩ a bom a dɩ̃a, ɛ́ lɛb sowre a bio daarɩ́. A nɩr ŋa tɔ ɩ n nɩ-hɩ̃ɛna.

¹⁶A dãbol sob yere na: «Ɩ̃ bɛ tɛr bá ɩ, nɩr za bɛ bãwnɩ a ɩ̃ yel-vɩɛlɩ ɛ. A bɛlɩ dem na mɩ́ dɩrɛ a ɩ̃ bʋ̃-dɩrɩ a, ɩ n nɩbɛ na bɛ mɩ́ bãwnɩ a maalʋ fʋ na maalɩ bɛ a.»

¹⁷Ɛcɛ a nɩbɛ za mɩ́ ɩrɛ nɩ a dãbol sob laar. A ƴɛ̀rʋ bãw-ƴɛ̀rʋ

¹⁸A sɔ́r zu fʋ na sar a sa n a ƴɛ̀rʋ fʋ na ƴɛ̀r sãw a. À ŋá n'a a nɩ-faar mɩ̀ mɩ́ wa ur lo.

¹⁹Nɩr bɛ na bɛ wul vla a, ɩ na mɛ̃ kɔkɔ-yel dãbole na tɛr suole kʋralɛ a.

²⁰Nɩr bɛ dier zʋkpar dãbol sob na lɔb a ɩ, bʋ̃ʋ n'ʋ vɛ̃, ʋ bɛ mɩ́ lɔb ʋ a ʋ daar ɛ.

²¹Nɩbɛ bɛ mɩnɛ be n be, a nã́w mɩ́ piw bɛ tɛr a yel-bier ƴãw. Bɛ na tʋ̃ɔ́ na gúre, ɛ́ a bɛ tɩɛrʋ bɛ zɛbr'ɩ bɛ ɩ.

²²Ɛcɛ bɛ mɩnɛ be n be, mɩ́ bɔr a bɛ nyɔ-vʋʋrʋ bɛr dãbol ƴãw. Bɛ bɛ mɩ́ sàw yel kɛ́ ʋ̃ʋ'hʋ̃ a ʋ niŋé ɩ.

²³Bɛ mɩnɛ be n be, a vĩ zũú, bɛ mɩ́ ƴãw nʋɔr kʋ̀ a bɛ bá, ɛ́ mɩ́ ɩ k'ʋ lɩɛbɩ a bɛ dɔ̃ sob, ɛ́ a bɛ tɛr pɛr ɛ.

²⁴A nɩsaal zie a, a ziri ɩ n dɛwr na ɩrɛ vĩ a, bɛ mɩ́ nyɛ̃ ʋ nɩ kʋralɛ a dãbole nɛ̃ɛ́.

²⁵Nyãnyuge sa a nɩr na ŋmarɛ a ziri kʋralɛ a, ɛcɛ bɛ za ayi wɩɛr'ɩ a loba zie.

²⁶A zir-ŋma-mili mɩ́ ɩ na fʋ bɛ cãà nyɛrɛ ƴãwfʋ ɛ, ʋ mɩ́ ƴãwnɛ nɩ a zir-ŋmarɛ vĩ kʋralɛ. A yã-bãwnɛ tɔnɛ nɩ a ʋ tõ-fɛrɩ

²⁷Ƴɛ̀rʋ blãlɛ mɩ́ man nɩ a yã-bãwnɛ, ʋ̀ ɩ a nɩbɛ nɔ̃w a ʋ yele. Nɩr na bãw yã a mɩ́ pɛlɩ nɩ a nɩ-bɛrɛ pʋɔ.

²⁸Sob nɛ na kʋ́ɔr a ʋ púo vla a mɩ́ cɛ n vla, ɛ́ sob nɛ na mɩ́ pɛlɩ a nɩ-bɛrɛ pʋɔ a, na tʋ̃ɔ́ na maalɩ yel na sãw a ƴãw.

²⁹A bʋ̃-kʋ̀rɩ nɩ a bʋ̃-mɔlɛ mɩ́ pàw nɩ a yã-bãwnbɛ mimie, à mɩ́ pàw bɛ nɩ a nʋɔr, bɛ sàw bɛ na yel a lɛ na be be a ɩ.

³⁰Yã-bãwfʋ na sɔwlɩ a, nɩ na-bom bɛ na tuw ũù a, a yel-ɩra n'ɩ bo?

³¹Nɩr na sɔwlɛ a ʋ dãbolu a sa n nɩr na sɔwlɛ a ʋ yã-bãwfʋ a.