Read Dagara, Northern Bɛn Sɩɩra 21 Bible Online

Bɛn Sɩɩra 21 - Dagara, Northern bible

Bɛn Sɩɩra 21

¹Zɔrɛ a yel-bier Ɩ̃ bie e, fʋ̃ʋ wa maalɩ yel-bier a, fʋ̃ʋ taa lɛb maalɛ ɩ, ɛ́ zɛlɛ a suur-dɩ-kʋ̀b a fʋ sãwna na tɔl a ƴãw.

²Zɔrɛ a yel-bier niŋé, mɛ̃ waab niŋé a. Bʋ̃ʋ n'ʋ vɛ̃, fʋ̃ʋ wa pɩɛlɛ ʋ a, ʋ na dʋ b'a. A yel-bier tɛr'ɩ nyɩmɛ, mɛ̃ gbẽw nyɩmɛ a: à kʋrɛ nɩ a nɩsaalbɛ.

³Naaŋmɩn wulu zawrʋ za ɩ na mɛ̃ zɛbr-sɔ-kpɛ̃ɛ na dɩrɛ a loge a za ayi a, a natɩr ʋ na mɩ́ ƴãw a bɛ tɛr tɩ̃ɩ ɛ.

⁴A po-to-fãw-ɩb nɩ a pɔ̀lʋ báarɛ nɩ tɛra, lɛ n'a a pɔ̀lʋ sob yir mɩ̀ na lo.

⁵A nã́w sob puoru mɩ́ lo n a Naaŋmɩn tobe pʋɔ, ʋ́ʋ̀ sɔw ʋ fɔ̃wlɛ.

⁶Sob nɛ na bɛ sàwr bɛ yere ʋ a tuur'ɩ a yel-bier sob gbɛ́ɛ. Ɛcɛ sob nɛ na zɔrɛ a Sore a na ciire nɩ a ʋ sãwna nɩ ʋ pʋɔ za.

⁷Nɩbɛ za mɩ́ bãw nɩ a ƴɛ̀r-bãw sob, ɛcɛ nɩr na tɛr tɩɛrʋ a mɩ́ nyɛ̃ nɩ a ʋ tulu.

⁸A fʋ yir fʋ na ŋmaarɛ nɩ nɩ-yoru libie a, kʋsɛbɛ n'a fʋ wobr ɓanɛ taa a fʋ mɩŋa yaa mɛb ƴãw.

⁹Nɩ-faar lãw ɩ na mɛ̃ mɔ̃-kon na ɓã taa a: vũu-kpɛ̃ɛ pʋɔ n'a bɛ na baarɩ.

¹⁰A yel-bebe dem sɔ́r mɩ́ man nɩ taa, ɛ́ bɛ tɛr kʋsɛbɛ ɩ, ɛcɛ a ʋ baarʋ zie mɩ́ n'ɩ a kpɩmɛ tẽw bɔw. A yã-bãwnɛ nɩ a dãbol

¹¹Sob nɛ na tuur a Wulu a, mɩ́ só nɩ a ʋ tɩɛrʋ, ɛ́ a Sore zɔba wɩɛr'ɩ ʋ a yã-bãwfʋ zie.

¹²Nɩr na bɛ cɩ bom za ƴãw a, ʋ bɛ tɛr wulu ɛ, ɛcɛ cɩbɛ kãw be n be waar'ɩ tuo yaga.

¹³A yã-bãwnɛ bãwfʋ ɩ na mɛ̃ man na paalɩ yi nɛ́ɛ a, ɛ́ a ʋ wulu ɩ mɛ̃ kʋ̃ɔ-bul-walwal a.

¹⁴A dãbol sob socir ɩ na mɛ̃ bʋ̃-ŋmɛrnyɛ̃ a, a zanʋ ʋ na zanɛ a, bom za bɛ ganɛ ɩ.

¹⁵Nɩr na zanɩ bãw a wa wõ yã-bãwfʋ ƴɛ̀rʋ a, ʋ mɩ́ sàw ʋ na, ɛ́ yel bom dɔwlɩ. Ɛcɛ a pɩ̃ɔ-yel-maalɛ bɛ mɩ́ nɔ̃w a ƴɛ̀rʋ ŋa ɩ, ɛ́ mɩ́ lɔb ʋ bɛr a ʋ zikurí.

¹⁶A dãbol sob ƴɛ̀rʋ mɩ́ tɩbrɛ na mɛ̃ tuor fʋ na tuo sɔ́r zu a. Ɛcɛ nɩr na tɛr yã a ƴɛ̀rʋ mɩ́ nʋmɛ nɩ kʋralɛ.

¹⁷A lãw pʋɔ a, bɛ mɩ́ bɛrɛ na wone nɩr na bãw yã a ƴɛ̀rʋ kʋralɛ, ɛ́ ŋa mɩ́ tɛr a yã-bãwnɛ ŋa ƴɛ̀rʋ tɩɛrɛ a ʋ socir pʋɔ.

¹⁸A dãbol sob zie a, a yã-bãwfʋ ɩ na mɛ̃ yir-zaw a, ɛ́ a nɩr na bɛ tɛr a yã a bãwfʋ ɩ ƴɛ̀rʋ na bɛ tɛr pɛr a.

¹⁹A dãbol sob zie a, a wulu ɩ na mɛ̃ gbɛ̀rɩ́ a gbɛ̃ɛ́ nɩ 'hãkobo a nurú a.

²⁰A dãbol sob wa laar a, ʋ mɩ́ la na cɩɩrɩ, ɛcɛ a yã-bãwnɛ mɩ́ laar'ɩ mʋwmʋwmʋw.

²¹A nɩr na bãw yã a zie a, a wulu mɩ́ ɩ na mɛ̃ salm-zɩɛ pɩ̃ɛmɛ a, mɛ̃ bãw ʋ na ƴãw a ʋ dʋrʋ nũú a.

²²A dãbol sob mɩ́ ŋmʋr'a kpɛ a yir pʋɔ, ɛcɛ a nɩr na bãw a mɩ́ ɩ n zoom zoom bɛ bãw nɩ ʋ.

²³Nɩr na bɛ bãw yã a mɩ́ àr'ɩ a dɩ̃dɔrɩ́ ɛ́ vuole a yir pʋɔ, ɛcɛ a nɩr bɛ na wul vla a mɩ́ àr'ɩ a yẽw.

²⁴Nɩr bɛ na bɛ wul vla a n'ʋ mɩ́ àr a dɩ̃dɛɛ ƴãw bɛrɛ wone, ɛcɛ a mɩ́ ɩrɛ nɩ nɩr na bãw yã a vĩ.

²⁵A ƴɛ̀r-yaga dem mɩ́ lɛb'a yere a lɛ a bɛ mɩnɛ na yel a, ɛcɛ a nɩbɛ na bãw yã a mɩ́ tɩɛrɩ na tɔ ɛ́ ƴɛ̀r.

²⁶A dãbol sob mɩ́ ƴɛ̀r'a ɛ́ bãw tɩɛrɩ, ɛ́ a yã-bãwnɛ tɩɛrɩ ɛ́ bãw ƴɛ̀r.

²⁷Nɩ-faa wa ŋmɩɛr ƴãwn a ʋ dɔ̃ sob a, a ʋl mɩŋa n'ʋ ʋ ŋmɩɛr ƴãwn.

²⁸Nɩr na manɛ a ʋ taabɛ yel-faar a lɛb'a ŋmɛlɩ dɛwr ʋ tʋɔra, ɛ́ mɩ́ ɩ a bɛlɩ dem na lãw kpɩɛr'ɩ ʋ a hɩ̃ɛn ʋ.