Read Dagara, Northern Bɛn Sɩɩra 23 Bible Online

Bɛn Sɩɩra 23 - Dagara, Northern bible

Bɛn Sɩɩra 23

¹Sore ɩ̃ nyɔ-vʋʋrʋ Sãà nɩ ɩ̃ nyɔ-vʋʋrʋ Sob i, ta bɛr a ɩ̃ ƴɛ̀rʋ a só m ɛ, ɛ́ ta sàw a ɩ m ɩ̃ lo ɩ.

²Kpãànɛ a ɩ̃ tɩɛrʋ ɛ́ wule a ɩ̃ socir tuur'ɩ a yã-bãwfʋ. Lɛ n'a ɩ̃ kʋ̃ bɛr a ɩ̃ tulu a tɔl ɛ, ɩ̃ kʋ̃ ƴãw gaafara a sãwna ɩ̃ na bɛ bãwnɩ kɛ́ sãw a ɩ.

³À ŋá n'a ɩ̃ kʋ̃ cãà tule cere nɩ ɛ́ sãwnɛ dɔwlɛ cere nɩ ɛ. Ɩ̃ kʋ̃ lo a ɩ̃ dɔ̃ dem niŋé ɩ, bɛ kʋ̃ ɩ m la ɩ.

⁴Sore ɩ̃ nyɔ-vʋʋrʋ Sãà nɩ ɩ̃ nyɔ-vʋʋrʋ Naaŋmɩn i, ɩ k'ɩ̃ ta mɩ́ jɩ́r a nɩr mɛ̃ ɩ̃ zuo nɩ za a ɩ.

⁵Ɩ a bom na bɛ vɩɛl a vʋla ta waar a ɩ̃ zie ɩ.

⁶A ƴã-gan nʋ̃ɔ̀-faar bɔb nɩ a pɩ̃ɔ-yele, a ta tʋ̃ɔ́ mɛ̃ ɩ. Ta bɛr mɛ̃ kʋ̀ a pɩ̃ɔ-yele tɩɛrʋ ɛ. A pɔ́b yele

⁷Ɩ̃ bibiir i, nyɩ zanɛ a nyɩ nʋɔr maal-tɛrʋ. Sob nɛ na tuur a wulu ŋa a, bɛ bɛ nyɔwr ʋ sãwna pʋɔ ɩ.

⁸A yel-bier sob ƴɛ̀rʋ mɩ́ nyɔw ʋ na, a mɩ́ ɩ na a nɩ-ɩ-laarɛ nɩ a pɔ̀lʋ sob bɛ lo.

⁹Ta mili nɩ a pɔ́b ɛ, nɩ a Naaŋmɩn na ɩ sõw a yúor póru kʋralɛ ɩ.

¹⁰A gbãgbaa bɛ na piwre kʋralɛ a, mɩ́ tɛr'ɩ a ŋmɩɛrʋ bãwfʋ kʋralɛ. Lɛ n'a, sob nɛ na mɩ́ só a pɔ́b pɔrɛ, pore nɩ a Naaŋmɩn yúor a, a bɛ tɛr ʋ na kʋ̃ tɛr yel-bier a ɩ.

¹¹Nɩr na pɔrɛ yaga a mɩ́ gãwnɛ nɩ a Naaŋmɩn wulu kʋralɛ, ɛ́ a dɔwrʋ bɛ tawr zãánɛ nɩ a ʋ yir ɛ. Ʋlɛ bɛ wa bãw kɛ́ pɔ a, ʋ tɛr'ɩ sãwna. Ʋlɛ bɛ wa tɩɛrɩ tɔ ɛ́ pɔ a, ʋ maal'ɩ yel-bier gb'a ayi. Ʋlɛ wa pɔ pɔ-ziri a, ʋ na páw nɩ a ƴɛ̀rʋ-dɩb dɔwrʋ, ɛ́ kpɩɛrʋ yaga na páw nɩ a ʋ yir. A ƴɛ̀rʋ na bɛ sɛw taa nɩ a

¹²A ƴɛ̀rʋ na mɩ́ ƴɛ̀r a, a kãw be n be ŋmɛ̃ taa nɩ a kũu, ʋ ta ƴɛ̀rɛ a Zakɔb bʋʋrɛ pʋɔ ɩ! Bʋ̃ʋ n'ʋ vɛ̃, a bɛlɩ dem na tu a Naaŋmɩn a mɩ́ zãá nɩ nɩ a yele á ŋá taabɛ, bɛ bɛ mɩ́ ɓiile a yel-bebe á ŋá pʋɔ ɩ.

¹³Ta mili nɩ a fʋ nʋɔr a kɔkɔ-ƴɛ̀rʋ ɛ: bʋ̃ʋ n'ʋ vɛ̃, a mɩ́ ɩ na fʋ maalɛ yel-bier a fʋ nʋɔr ƴɛ̀rʋ pʋɔ.

¹⁴Fʋ̃ʋ mɩ́ wa zɩ̃ a nɩ-bɛrɛ pʋɔ a, fʋ̃ʋ mɩ́ lɛb tɩɛrɩ a fʋ sãà nɩ a fʋ mã, alɛ bɛ ɩ lɛ, fʋ nãà mab'a lɔb fʋ tʋɔra bɛr a bɛ niŋé, ɛ́ a milu zũú, fʋ ƴɛ̀r dãbol-ƴɛ̀rʋ. A lɛ pʋɔ a, fʋ na bɔbr'a kɛ́ fʋ kʋ̃ʋ tɩ dɔw towtow ɛ, ɛ́ ŋmɩɛr ƴãwn a fʋ dɔwfʋ bibir.

¹⁵Nɩr na mili nɩ a ƴɛ̀rʋ na bɛ sɛw taa nɩ a kʋ̃ tʋ̃ɔ́ lɛb bɛr a a ʋ cãafʋ daar za ɩ. A dɛb-pɩ̃ɔ-yel-maalɛ

¹⁶Nɩ-bʋʋrɛ ayi kãw maalɛ nɩ a yel-bebe gbone taa, ɛ́ a ata sob bʋɔlɛ a Naaŋmɩn suur. A dãw-niwn dem'ɩ a bɛl vʋla kãw na mɩ́ dɩrɛ mɛ̃ vũu a. A bɛ vʋla bɛ kpiire ɩ, bɛlɛ bɛ wa tɩ páw a bɛ bʋ̃-bɔbra a ɩ. A bɛ pùorí, a mɩ́ ɩ n a sob nɛ na de a ʋ ƴã-gan tu n a pɩ̃ɔ-yele a. Ʋ na ɩrɛ na cere nɩ a ʋ vʋla tɩ baarɩ ʋ mɛ̃ vũu a.

¹⁷Ʋl zie a, pɔw za ɩ n pɔw, a ʋ kũu daar'a ʋ na bàl.

¹⁸A dɛb na bɛ̀lɛ a ʋ pɔw a mɩ̀ pãa n'ɩ ŋa. Ʋ mɩ́ tɩɛrɛ nɩ ʋ pʋɔ: «Ãa n'ʋ na tʋ̃ɔ́ nyɛ̃ m? Zie sɔb'a pàw mɛ̃, ɛ́ dacine piw mɛ̃, nɩr za bɛ nyɛrɛ mɛ̃ ɩ. Bʋnʋ ƴãw n'a ɩ̃ na tɩɛrɛ a? A Naaŋmɩn-na-do-saa-bɛ-pɩɛl-a kʋ̃ cãà bãwnɩ a ɩ̃ yel-bebe ɩ!»

¹⁹Nɩsaalbɛ mimie n'a a nɩr ŋa zɔrɛ. Ʋ bɛ bãw k'aa Sore mimie cãà caalɛ na zuo a mʋ̃tɔ̃w gb'a a mɩ̃ɔ ɛ, nɩ k'aa jɩ́rɛ nɩ bom za a nɩsaalbɛ na ɩrɛ a, ɛ́ mɩ́ nyɛ̃ tɩ tɔ a zi-sɔwlɩ za ɩ.

²⁰A Sore tɩ bãw nɩ a bome za ɛ́ bɛ ír a sɛr ɛ, ʋ na cãà na bãw a, alɛ bɛ wa cãà a.

²¹Bɛ na nyɔw nɩ a nɩr ŋa a lɛn daar ʋ na bɛ cɛlɛ be a, ʋ na nyɛ̃ nɩ dɔwrʋ a nɩ-yaga tuor-taa zie. A pɔw-pɩ̃ɔ-yel-maalɛ

²²Lɛ n'a a mɩ̀ na ŋmɛ̃ a pɔw na bɛr a ʋ sɩr a zie, ɛ́ dɔw gbã-dɩrɛ nɩ nɩ-yũo kʋ̀ ʋ a.

²³Ʋ de nɩ niwn zawrɩ a Naaŋmɩn-na-do-saa-bɛ-pɩɛl-a wulu, al pùorí ʋ sãw a ʋ sɩr, a ata sob a, ʋ maal'ɩ pɩ̃ɔ-yele, tõ pɔw-yɛm tome, dɔw bibiir nɩ dɛb-yũo.

²⁴A na ɩ lɛ a, bɛ na tɛr ʋ na cen nɩ a lãw niŋé, ɛ́ sowri bãw a ʋ bibiir yele.

²⁵A ʋ bibiir kʋ̃ cɛlɩ ɛ, bɛ kʋ̃ nyɛ̃ vuo dɔw bibiir ɛ.

²⁶A pɔw ŋa vĩ bɛ tɛr nãà baarɩ ɛ, ɛ́ ʋlɛ wa kpi a, a nɩbɛ nãà mɩ́ wa tɩɛr'ɩ a ʋ yele ŋmɛ ƴãw ʋ.

²⁷À ŋá n'a a bɛlɩ dem na cãà be a na bãwnɩ a kɛ́ bom bɛ vɩɛl man a Sore zɔba ɩ, nɩ k'aa ʋ nɛ-ƴãwnɩ sàwfʋ n'a nʋmɛ zuo bom za.