Read Dagara, Northern Bɛn Sɩɩra 28 Bible Online

Bɛn Sɩɩra 28 - Dagara, Northern bible

Bɛn Sɩɩra 28

¹Sob nɛ na mɩ́ yáa a faa san a, na bãw nɩ a Sore san-yaafʋ a ʋ zu. A Sore na sɔr'ɩ a ʋ sãwna vla vla bin.

²Dɩ suur kʋ̀ a fʋ tɔ na sãw fʋ a. Lɛ n'a, fʋ̃ʋ wa puore a lɛn daar a, a Sore na de a fʋ sãwna bɛr a baarɩ.

³Nɩr wa tɛr'ɩ a ʋ nɩsaal-tɔ suur a, ŋmɩŋmɩn n'a ʋ na tʋ̃ɔ́ zɛlɩ a sanʋ a Sore zie?

⁴Ʋ bɛ tɛr nɩbaal-zɔba kãw za a ʋ nɩsaal-tɔ zie ɩ, ŋmɩŋmɩn n'a ʋ na tʋ̃ɔ́ puore a ʋl mɩŋa yel-bebe ƴãw?

⁵A ʋl na ɩ bʋ̃-kpiira a, ʋlɛ mɩ́ wa tɛr a pʋ-bier a, ãa n'ʋ na páw a ʋl mɩŋa yel-bebe suur-dɩ-kʋ̀b kʋ̀ ʋ?

⁶Tɩ́ɛrɛ a fʋ nyɔ-vʋʋrʋ baarʋ, ɛ́ bɛr a hɩ̃ɛnʋ. Tɩ́ɛrɛ a kũu fʋ na na kpi wɛ a, ɛ́ tuur a Sore nɛ-ƴãwnɩ.

⁷Bãwnɩ a nɛ-ƴãwnɩ á ŋá, ɛ́ ta tɛr'ɩ a fʋ tɔ pʋ-bier ɛ. Bãwnɩ a Naaŋmɩn-na-do-saa-bɛ-pɩɛl-a wõ-taa, ɛ́ mɩ́ de a sãwna bɛr a baarɩ. A zɛb-taa

⁸Àr zãá nɩ a zɛb-taa ɛ́ fʋ kʋ̃ maal tɛr sãwna ɩ. Bʋ̃ʋ n'ʋ vɛ̃, suur sob mɩ́ ɩ na a zɛbr ìr.

⁹A yel-bier sob mɩ́ ƴãw nɩ damnʋ bárɩ cara pʋɔ, ʋ mɩ́ ƴãw nɩ taw-taa be wõ-taa na tɩ be a.

¹⁰Vũu mɩ́ cãà na dɩrɛ bɛlɛ wa suur a daar ƴãwnɛ ʋ a, ɛ́ zɛb-taa kpɩɛr faa dɔwlɛ, ʋlɛ wa cɛlɛ a. A lɛ nɩr fãw na zɛ̃ a n'a ʋ mɩ́ nyɛ̃ a suur ta, ɛ́ a ʋ suur ìr tɩ ta a naalʋ ʋ na kpɛ a.

¹¹Taw-taa bɛ na bɛ bãwnɩ a mɩ́ gbɔw nɩ a vũu, ɛ́ zɛb-taa na ur be be a ɩ a zɩ̃ɩ cir.

¹²Pɛblɩ vũu-bir zu, ɛ́ ʋ na 'le na, ɛcɛ pʋʋrɩ mʋtaar ƴãw ʋ, ɛ́ ʋ na kpiiri na. A fʋ nʋɔr na tʋ̃ɔ́ na ɩ a za ayi. A nʋɔr na bɛ vɩɛl a yel-faar

¹³Ŋmɛ-ƴãw, a tuur a nɩr na waalɛ a nɩ a nɩr na tɛr zɛl-ɓɛra a! Bɛ sãw nɩ nɩ-yaga na tɩ wone taa vla a yele.

¹⁴A nɛ́ɛ na bɛ vɩɛl a ƴɛ̀rʋ dam'ɩ nɩbɛ yaga, a diw bɛ nɩ tẽw tɩ lʋ̃ɔ nɩ tẽw, a dá n tẽ-bɛrɛ bɛ na cɔbrɩ a kpɛmɛ a zɛbr ƴãw a lɔb, ɛ́ lɔb a nɩ-bɛrɛ yie.

¹⁵A nɛ́ɛ na bɛ vɩɛl a ƴɛ̀rʋ ɩ na bɛ bɛr pɔwbɛ na ɩ pɔwbɛ a, ɛ́ ɩ kɛ́ bɛ bɛ páw a bɛ tome tɔnɛ ɩ.

¹⁶Sob nɛ na cɛlɛ a nɛ́ɛ na bɛ vɩɛl a ƴɛ̀rʋ zie a kʋ̃ lɛb nyɛ̃ pɩ̃ɛnʋ ɛ, ɛ́ kʋ̃ lɛb tʋ̃ɔ́ tɛr ƴã-ɓaarʋ ɛ.

¹⁷Fʋba mɩ́ fɔb'a ƴãw natɩr, ɛcɛ ƴɛ̀rʋ ƴɛ̀r sãw a nɩr fʋ na ɩ a bɛr.

¹⁸Nɩbɛ yaga kpi n a zɛbr zie, ɛcɛ bɛ bɛ ta a bɛl a nɛ́ɛ na bɛ vɩɛl a ƴɛ̀rʋ na kʋ a ɩ.

¹⁹Zu-nʋ̃ɔ̀ sob'ɩ sob nɛ a nɛ́ɛ na bɛ vɩɛl a ƴɛ̀rʋ na bɛ tʋ̃ɔ́ páw a, sob nɛ a nɛ́ɛ na bɛ vɩɛl a suur na bɛ ìr a ʋ ƴãw a. Zu-nʋ̃ɔ̀ sob mɩ̀ n'ɩ sob nɛ na bɛ de a nɛ́ɛ na bɛ vɩɛl a ƴɛ̀rʋ nyũ-dàa a, ɛ́ a bamɛ mɩ̀ bɛ 'lẽ ʋ a.

²⁰Bʋ̃ʋ n'ʋ vɛ̃, a fɛrʋ a nɛ́ɛ na bɛ vɩɛl a ƴɛ̀rʋ na waar'ɩ a kpɛmɛ na mɛ̃ kure a, ɛ́ a bamɛ ɩ kur-zɩɛ bamɛ.

²¹Kũu-faa faa n'ʋ a nɛ́ɛ na bɛ vɩɛl a ƴɛ̀rʋ ƴãwnɛ, a kpɩmɛ tẽw beba sa.

²²Ɛcɛ a bɛlɩ dem na tu a Sore a, a nɛ́ɛ na bɛ vɩɛl a ƴɛ̀rʋ kʋ̃ tʋ̃ɔ́ ɩ bɛ bom za ɩ, a vũu bɛ dɩrɛ bɛ ɩ.

²³A bɛlɩ dem na mɩ́ zawrɩ a Sore bɛr a, a nɛ́ɛ na bɛ vɩɛl a ƴɛ̀rʋ mɩ́ tʋ̃ɔ́ bɛ na. A na gbɔw nɩ vũu na bɛ kpiire a a bɛ pʋɔ, a na ta na tu bɛ mɛ̃ gbẽw a, a na taw bɛ na ɓɛl mɛ̃ nyũo a.

²⁴Fʋ̃ʋ wa baw a fʋ púo pàw nɩ gʋʋr a, fʋ̃ʋ mɩ̀ ƴãw kpàrá a fʋ nʋɔr dɩ̃dɔr ƴãw. Fʋ̃ʋ wa maal bin a fʋ salm-pla nɩ a fʋ salm-zɩɛ a, fʋ̃ʋ mɩ̀ mɩ́ tɩɛrɩ a fʋ ƴɛ̀rʋ vla.

²⁶Gù vla a fʋ zɛl taa ɩrɛ fʋ ŋmɩɛr gbɛ́r ɛ, fʋ̃ʋ bɛ wa bɔbr kɛ́ fʋ lo a sob nɛ na jɩɛrɛ fʋ a nuru pʋɔ a.