Read Dagara, Northern Bɛn Sɩɩra 29 Bible Online

Bɛn Sɩɩra 29 - Dagara, Northern bible

Bɛn Sɩɩra 29

¹A bom fʋ na na pɛ̃w a fʋ tɔ a yele Sob nɛ na maalɛ a nan dem a, mɩ̀ na mɩ́ sàw na pɛ̃w bom a ʋ tɔ. A ʋ tɔ sõwfʋ ɩ n a Naaŋmɩn nɛ-ƴãwnɩ ʋ tuur.

²Mɩ́ pɛ̃w a fʋ bom a fʋ tɔ a na fɛrɛ a, ɛcɛ mɩ̀ mɩ́ lɛb tɩr a bʋ̃-pɛ̃wna a daar ʋl na ƴãw a.

³Mɩ́ tu a lɛ fʋ na yel a, a nɩbɛ tʋ̃ɔ́ mɩ́ sàw a fʋ ƴɛ̀rʋ: lɛ n'a fʋ na mɩ́ páw a ʋlɩ bom nɛ fʋ na bɔbr a kʋralɛ.

⁴Nɩbɛ yaga mɩ́ de nɩ a bom bɛ na pɛ̃w bɛ a, ʋ ɩ mɛ̃ bʋ̃-piira bɛ na na tʋ̃ɔ́ tɛr a, mɩ́ ƴãw a bɛlɩ dem na sõw bɛ a fɛrʋ pʋɔ.

⁵A nɩbɛ na bɛ mɩ́ páw a bʋ̃-pɛ̃wna sɛr a, bɛ mɩ́ mɔwrɛ nɩ a bʋ̃-pɛ̃wnɛ nũu[13], bɛ mɩ́ maal'a ƴɛ̀rɛ a ʋ bʋ̃-tɛrɩ ƴɛ̀rʋ. Ɛcɛ a bʋ̃-pɛ̃wna lɛb-tɩrʋ daar a, bɛ mɩ́ lɛb'a dɔwlɛ dàa, a bɛ kpɩɛrʋ kon n'ɩ a tɩrʋ bɛ na mɩ́ lɛb tɩr a, bɛ mɩ́ yere na bom ŋa nɩ bom ŋa na n'a só a.

⁶A sob nɛ na zɛlɛ a pɛ̃wfʋ a wa tʋ̃ɔ́ na ya a ʋ san a, a sob nɛ na pɛ̃w ʋ a, na páw na a kʋ̃ maal ta a põ-zɛ̃-taa ɩ, ʋʋ na cãà na yel k'ʋʋ tɛr'ɩ zu-nʋ̃ɔ̀. Alɛ bɛ ɩ lɛ a, bɛ de nɩ a ʋ bom, ʋʋ páw dɔ̃ sob zawla. Ŋmɛ-ƴãw nɩ zʋmɛ n'a bɛ na ya ʋ, bɛ-ƴãwfʋ n'a bɛ na tɛr a ʋ zie lɩɛr'ɩ a ƴãwfʋ.

⁷Alɛ n'a nɩbɛ yaga bɛ mɩ́ sàwr pɛ̃wn ɛ, ɛ́ a bɛ ɩ po-tuo n'a ɩ, ɛ́ ɩ bɛ na zɔrɛ dɛ̃bɩ̃ɛ bɛ na na fa a bɛ bʋ̃-tɛrɩ zawla a. A nan dem sõwfʋ

⁸Ɛcɛ mɩ́ nyɔw fʋ tʋɔra a nã́w sob ƴãw, ɛ́ ta mɩ́ ɩ ʋ gù a bom fʋ na na kʋ̀ ʋ a cɛlɩ zuo ɩ.

⁹Sõw a nã́w sob a Naaŋmɩn nɔ-ƴãwna sàwfʋ zũú, ʋʋ na be fɛrʋ pʋɔ a, ta bɛr ʋ ʋ cen nũ-zawlɛ ɩ.

¹⁰Sàw a fʋ libir wɛ yɛb bɩɩ bá ƴãw, alɛ sa ʋ na na gã kʋsɩɛr pile lo bazɩ̃ɩ wɛ a.

¹¹Ɩrɛ nɩ a fʋ bʋ̃-tɛrɩ mɛ̃ a lɛ a Naaŋmɩn-na-do-saa-bɛ-pɩɛl-a na ƴãw a nʋɔr a: a na tɛr fʋ nɩ tɔnɛ zuo a salm-zɩɛ.

¹²A nan dem fʋ na sõwne a, a ɩ a fʋ na-bom: ʋ na gù b'ɩ yel-faa za ƴãw.

¹³Fʋ̃ʋ wa càarɩ dɔ̃ sob a, ʋ na zɛb'ɩ a fʋ ƴãw vla zuo zɛbr-kur-pãgala na kpɛmɛ a, nɩ kafin-tɩbrʋ. A taabɛ samɛ fʋ na mɩ́ sàw só a

¹⁴Nɩ-vla na sàw na só a ʋ tɔ sob san, ɛcɛ sob nɛ na lɔb ʋ tʋɔra bɛr a na zawr'ʋ na bɛr.

¹⁵Nɩr wa sàw só a fʋ san a, taa yiire a ʋ yel-vla ŋa bɛrɛ ɩ. Bʋ̃ʋ n'ʋ vɛ̃, fʋ̃ʋ ƴãw n'a ʋ de ʋ tʋɔra tɩr.

¹⁶A yel-bier sob mɩ́ sãwnɛ nɩ a sob nɛ na sàw só a ʋ san a bome bɛrɛ.

¹⁷Nɩr na sɩrɩ bɛ tɛr vla bɛ na maalɩ ʋ a tɩɛrʋ a mɩ́ zawr'ɩ a sob nɛ na faa ʋ a bɛr.

¹⁸Ɛcɛ a taabɛ san fʋ na sàw só a, ɩ na nɩ-vɩɛlɩ yaga lo, ʋ dam bɛ na mɛ̃ a kʋ̃ɔ-kpɛ̃ɛ kʋ̃ɔ-mie a. Ʋ ɩ na nɩbɛ na tɛr fãw a bɛr a bɛ tẽw, ɛ́ cen tɩ ɩ nɩ-yʋɔrɩ nɩ-bʋʋr-yoru pʋɔ.

¹⁹Yel-bier sob wa maw yel k'ʋʋ só nɩ a ʋ tɔ san a, ʋlɛ wa tɩɛrɛ tɔnɛ a pʋɔ a, ƴɛ̀rʋ-dɩb'a ʋ tuore.

²⁰Sõw a fʋ tɔ sob mɛ̃ a lɛ a fʋ fãw na ta a, ɛcɛ gùre fʋ tʋɔra, a fʋ̃ʋ mɩŋa taa lore a bɛra pʋɔ ɩ. A yã-bãwnɛ só nɩ ʋ tʋɔra

²¹A nyɔ-vʋʋrʋ yel-fɛrɩ na de niwn a, alɛ n'ɩ a kʋ̃ɔ, a bʋ̃-dɩrɩ, a bʋ̃-suuri nɩ yir fʋ na na kpɩɛr pĩ a nɩbɛ mimie ƴãw a.

²²Fʋ na ɩrɛ fʋ nãw-ɩb ɛ́ kpɩɛr fʋ tʋɔra yir a, alɛ sa fʋ na dɩrɛ bʋ̃-dɩ-vɩɛlɩ nɩ-yũo yir a.

²³Fʋ tɛr a nɩ blãlɛ bɩɩ yaga a, á man fʋ, ɛ́ fʋ kʋ̃ wõ bɛ yere fʋ fʋ na ɩ sãan a ɩ.

²⁴Yi yir ŋa tɩ sãá yir ŋa ɩ n nyɔ-vʋʋrʋ na bɛ nʋmɛ a. Fʋ kʋ̃ tʋ̃ɔ́ háa nʋɔr ɛ, a na bɛ ɩ a fʋ yir a.

²⁵Fʋ mɩ́ tɩr'a bɛ dɩ kɛ́ nyũ, ɛ́ nɩr za bɛ puore fʋ barka ɩ, ɛ́ a cãà mɩ́ lɛb fɛr fʋ wõ ƴɛ̀r-bie á ŋá taabɛ na buore a:

²⁶«Wa ka, sãan i, cɔbrɩ a bʋ̃-dɩrɩ zɩ̃-dɩb zie! Fʋ̃ʋ wa tɛr bom a, fʋ̃ʋ kʋ̀ m ɩ̃ dɩ.

²⁷Yi, sãan i! Bɛr a zie kʋ̀ nɩ-ƴãwna na zuo fʋ a! A ɩ̃ yɛb waar'ɩ a ɩ̃ zie, ɩ̃ tɛr'ɩ a yir yel-ɩra.»

²⁸A nɩr na bãw yã a zie a, yele na mɩ́ buore a n'ɩ bɛ na de fʋ bʋɔlɛ a sãan a, nɩ a san-sowre zʋm-bie.