Read Dagara, Northern Bɛn Sɩɩra 31 Bible Online

Bɛn Sɩɩra 31 - Dagara, Northern bible

Bɛn Sɩɩra 31

¹A na-bome yele A bɛ-gʋ̃ɔ a tɛra na waar'ɩ a sãwnɛ nɩ a ƴã-ɓaarʋ, a tɩɛrʋ a na ƴãwnɛ a mɩ́ ɩ na fʋ kʋ̃ gúr ɛ.

²A tɩɛrʋ na bɛ mɩ́ sàw fʋ na gúr a, ɩ na mɛ̃ bàal-faa a: a mɩ́ diw nɩ a gʋ̃ɔ ɛ́ kʋ̃ sàw fʋ pɩ̃ɛnɩ ɛ.

³A tɛra sob mɩ́ bàlɛ nɩ ʋ tʋɔra, bɔbr bome gbone taa, ʋlɛ wa yel k'aa zɩ̃-pɩ̃ɛnʋ n'a a, a nʋ̃ɔ̀ n'a ʋ mɩ́ wõ tɩ tɩw.

⁴A nã́w sob mɩ́ bàlɛ nɩ ʋ tʋɔra, ɛ́ bɛ mɩ́ páw a saalɩ ɛ, ɛ́ ʋlɛ wa yel k'ʋʋ zɩnɛ na pɩ̃ɛnɛ a, a wʋ̀ʋr'a ʋ mɩ́ ɩrɛ.

⁵Sob nɛ na nɔnɛ a salm-zɩɛ a kʋ̃ tʋ̃ɔ́ ɩ nɩ-mɩŋa kʋralɛ ɩ, sob nɛ na zɔrɛ tuur a tɔnɛ a na bɛr'a a tɔnɛ tuli ʋ.

⁶A salm-zɩɛ ɩ na nɩ-yaga lo, a bɛ loba bɛ tɩ tɛr à ŋá ɩ.

⁷Bʋ̃ʋ n'ʋ vɛ̃, a salm-zɩɛ ɩ n bɛra a bɛlɩ dem na kpiir lore a ʋ ƴãw a zie. Bɛlɩ dem za na gem a mɩ́ bɛr'a ʋ nyɔw bɛ.

⁸Zu-nʋ̃ɔ̀ sob'ɩ a tɛra sob na bɛ tɛr sãwna bɛ yere, ʋʋ bɛ zɔrɛ tuur a salm-zɩɛ pùor a.

⁹Ãa n'ʋ? Tɩ tʋ̃ɔ́ mʋʋrɩ ʋ, bʋ̃ʋ n'ʋ vɛ̃, ʋ maal'ɩ yel-bɛ-dãw-nyɛra a ʋ nɩ-bʋʋrɛ sɔgɔ.

¹⁰Ãa n'ʋ bɛ ɩ a ka lowr kaa, ʋʋ bɛ faa lo? Ʋ na tʋ̃ɔ́ na nyʋʋr a al ƴãw. Ãa n'ʋ nãá tʋ̃ɔ́ zawrɩ a nʋɔr, ɛ́ bɛ zawrɩ? Nãá tʋ̃ɔ́ maalɩ a yel-faa, ɛ́ bɛ maalɩ?

¹¹A sob ŋa na nyɛ̃ nɩ a ʋ bʋ̃-tɛrɩ a dɔwlɩ, ɛ́ a ʋ lãw nɩbɛ manɛ a ʋ yel-vɩɛlɩ. A cuwr dɩb

¹²Fʋ̃ʋ wa zɩ̃ cuw dɩb zie a, ta háa a nʋɔr cɔw a bʋ̃-dɩrɩ ɛ́ yere: «Nyɛ̃ bʋ̃-dɩrɩ na sɛw a!»

¹³Bãwnɩ a, a vɔl-jɩ́rʋ ɩ n bʋ̃-faa. Bom bɛ be be kpɛ faa zuo a mimir ɛ. Alɛ só ʋ mɩ́ kone a kʋralɛ.

¹⁴Ta cen nɩ a fʋ nũu bom ƴãw nɩ-yũo na jɩ́rɛ a ɩ, alɛ bɛ ɩ lɛ, a nyɩ nuru na tɔ n taa a laa pʋɔ.

¹⁵Bãw fʋ̃ʋ mɩŋa a ʋlɩ bom nɛ na na tʋ̃ɔ́ nʋmɛ a fʋ tɔ zie a, ɛ́ mɩ́ de niwn tɩɛrɩ a lɛ fʋ na ɩrɛ a.

¹⁶Mɩ́ dɩrɛ mɛ̃ nɩr bɛ na wul vla a, ta mɩ́ 'wɔbr a ŋmab ŋmab, ƴãw bɛ bɛ nɔnɛ fʋ ɛ.

¹⁷Wul kɛ́ fʋ ɩ n nɩr bɛ na wul vla a: Mɩ́ de niwn bɛr a dɩb, ta ɩ nɩr na bɛ tɛr tɩwfʋ daar a ɩ, à taa wa mab ƴãwnɛ a nɩbɛ vĩ ɛ.

¹⁸Fʋ̃ʋ nɩ nɩ-yaga wa lãw dɩrɛ a, ta de niwn tõ a nũu a laa pʋɔ a fʋ taabɛ ƴãw ɛ.

¹⁹À nɩr bɛ na wul vla a, a dɩb blãlɛ mɩ́ man ʋ na. Ʋlɛ wa gã a lɛn daar a, ʋ bɛ mɩ́ vʋʋrɛ gúur ɛ.

²⁰Sob nɛ na mɩ́ dɩ a man a mɩ́ gúr'ɩ vla, ʋ mɩ́ dãwnɩ nɩ ìru ɛ́ a ƴã-gan sɛw ʋ taa. À bɛ-gʋ̃ɔ, a tiiru na ɩrɛ a, a pʋ-'wɔbɛ: a dɩ-gbogbo sob só a.

²¹Bɛlɛ wa fɛr ƴãw fʋ dɩ zuo a, ìr yi tɩ ti bɛr, ɛ́ a na sa fʋ na.

²²Ɩ̃ bie e, bɛrɛ wone mɛ̃, ta nyɛ̃ a ɩ̃ ƴɛ̀rʋ a bɛ ɩ bom ɛ: fʋ na bãw nɩ a ɩ̃ ƴɛ̀rʋ pɛr a pùorí. Bom za fʋ na ɩrɛ a, mɩ́ ɩ man nɩ, ɛ́ bàalʋ za bɛ páwr fʋ ɛ.

²³Nɩr na mɩ́ de nɩbɛ a sãanʋ a bʋ̃-dɩrɩ ʋr a, a nɩbɛ za mɩ́ mʋʋrɛ ʋ na: a mɩ́ sɩrɩ na wul k'ʋʋ ɩ n nɩr na tɩrɛ a.

²⁴Ɛcɛ nɩr na bɛ mɩ́ sàw bɛ na dɩ ʋ a, a tẽw dem za mɩ́ ƴɛ̀rɛ nɩ a ʋ ƴɛ̀rʋ: à mɩ́ wul'a k'ʋʋ sɩrɩ na kpɛ mimir. A divɛ̃ yele

²⁵A divɛ̃ nyub ƴãw a, ta yel kɛ́ fʋ̃ʋ n'ʋ bɛ wõ ɩ, bʋ̃ʋ n'ʋ vɛ̃, a divɛ̃ sãw nɩ nɩ-yaga yele.

²⁶A vũu mɩ́ ɩ na bɛ bãw a sãa-kpɩɛrɛ bʋ̃-maalɩ vɩɛlʋ, lɛ n'a a divɛ̃ mɩ̀ mɩ́ wul a pɔ̀lʋ dem na zɛbr taa a ŋmɛ̃a.

²⁷A nɩsaalbɛ zie a, a divɛ̃ ɩ na mɛ̃ a nyɔ-vʋʋrʋ n'ʋ, fʋ̃ʋ wa nyúur ʋ man a. Bʋ̃ʋ nyɔ-vʋʋrʋ n'ʋ fʋ na vʋʋrɛ, divɛ̃ bɛ wa ka be a? A Naaŋmɩn ír ʋ nɩ a pɛr-tib daar a nɩsaalbɛ nʋ̃ɔ̀ ƴãw.

²⁸A divɛ̃ waar'ɩ nɩ pʋ-pɩɛlʋ nɩ su-nʋ̃ɔ̀, fʋ̃ʋ mɩ́ wa nyũ ʋ a lɛn daar a na sɛw kɛ́ fʋ̃ nyũ a, ɛ́ nyũ man a.

²⁹Ɛcɛ fʋ̃ʋ wa nyũ zuo a, a mɩ́ ɩ na a fʋ suur bɛ nʋmɛ ɩ, a mɩ́ waar'ɩ nɩ nɔhaarʋ nɩ cen-dẽderu.

³⁰Nɩr na bɛ bãw yã a wa kuoli a, a mɩ́ ɩ na a ʋ suur kɛrɩ, wa n ʋ faa, a ʋ fãw mɩ́ siwri na, ɛ́ ɩ ʋ nyɛ̃ ŋmɩɛrʋ.

³¹Cuw dɩb zie nɩbɛ na nyúur divɛ̃ a, ta nyɔw a sob nɛ na zɩ̃ kɔwlɩ fʋ a yere ɩ, ta ɩrɛ ʋ laar, ʋlɛ wa nyũ zuo a ɩ, ta ƴɛ̀rɛ sãwnɛ a ʋ suur ɛ, ɛ́ ta sɔbr ʋ niwn, sowre zarɛ a libir a na fɛr k'ʋʋ kʋ̀ b a ɩ.