Read Dagara, Northern Bɛn Sɩɩra 32 Bible Online

Bɛn Sɩɩra 32 - Dagara, Northern bible

Bɛn Sɩɩra 32

¹A lɛ a na sɛw kɛ́ bɛ mɩ́ ɩrɛ a cuwr dɩb zie a Bɛlɛ wa kaa ír fʋ kɛ́ fʋ ɩ cuw dɩb nɩ-kpɛ̃ɛ a, ta wule kɛ́ fʋ̃ʋ n'ʋ ɛ, ɩrɛ a fʋ taabɛ zie mɛ̃ a bɛ ƴen sob kãw a. Kaa a bɛ zie bɛ zɩ̃, al pùorí, cen tɩ zɩ̃.

²Fʋ̃ʋ wa kaa a bɛ zie baar'a, cen a fʋ zɩma zie. Nʋ̃ɔ̀, a ɩrɛ fʋ fʋ na nyɛ̃ nʋ̃ɔ̀ kpɩɛr bɛ a, sàw a mʋʋrʋ bɛ na mʋʋrɛ fʋ a yele na cɔbrɩ vla a ƴãw a.

³Fʋ̃ʋ wa n'ʋ kor zuo bɛ za a, fʋ̃ʋ de a ƴɛ̀rʋ, bʋ̃ʋ n'ʋ vɛ̃, fʋ̃ʋ n'ʋ a fɛr kɛ́ fʋ ƴɛ̀r. Ɛcɛ yel a lɛ tɔr za fʋ na bãw a, ɛ́ ta piw a yielu nɩ a bʋ̃-ŋmɩɛrɩ ɛ.

⁴A nɩbɛ wa bɛrɛ wone a yielu nɩ a bʋ̃-ŋmɩɛrɩ a, fʋ̃ʋ ta tɛr ƴɛ̀rʋ ɛ, a fʋ yã-bãwfʋ wulu daar bɛ n'ɩ a lɛ ɩ.

⁵Yielu bɛ na yiele ŋmɩɛr'ɩ bʋ̃-ŋmɩɛrɩ cuw dɩb zie a ɩ na mɛ̃ kʋsɛ-bi-nyɩla na ƴãw salm-zɩɛ nũ-tʋʋr zu a.

⁶A bʋ̃-ŋmɩɛra kɔkɔr bɛ na bɛrɛ wone nyúur'ɩ divɛ̃ a, ɩ na mɛ̃ bãwfʋ-bʋ̃-ƴãwna na maal'ɩ kʋsɛ-bi-nyɩla bɛ na bʋɔlɛ emerodɩ, ʋʋ sawlɩ salm-zɩɛ nũ-tʋʋr bɔw pʋɔ a.

⁷Fʋ̃ʋ wa n'ɩ a bile a bɛ za pʋɔ a, fʋ̃ʋ de a ƴɛ̀rʋ alɛ wa fɛrɛ a, ɛcɛ a ta zuo gb'a ayi ɛ, ɛ́ a ɩ bɛlɛ wa sowre fʋ a.

⁸Fʋ̃ʋ wa ƴɛ̀rɛ a, fʋ̃ʋ ƴɛ̀r ŋmãa ŋmãa, yel yel-yaga nɩ ƴɛ̀r-bie blãlɛ. Wul kɛ́ fʋ wõ a na, ɛ́ mɩ̀ mɩ́ tʋ̃ɔ́ ɩ a gbili.

⁹Fʋ̃ʋ wa be nɩ-bɛrɛ sɔgɔ a, ta bɔbr kɛ́ fʋ wul kɛ́ nyɩ ɩ n been ɛ. Be dɛb-nyamɛ na be a, ta tɛr ƴɛ̀r-yaga ɩ.

¹⁰Mɛ̃ a lɛ a saa na mɩ́ de niwn nyɩwrɩ, ɛ́ bãw tanɩ a, lɛ n'a a nɩbɛ tɩɛr-vɩɛlɩ mɩ̀ mɩ́ de a nɩr na bɛ ƴɛ̀rɛ a niwn.

¹¹A tɛm wa ta a, ìr, ɛ́ ta cɛlɛ ɩ, zɔ kul a fʋ yir, ɛ́ ta nɩɩnɛ a sɔ́r zu ɛ.

¹²Fʋ na tʋ̃ɔ́ na tɩ dɩ̃ɛnɛ a be, ɩrɛ lɛ na pɛlɩ a fʋ pʋɔ a, ɛcɛ taa ƴɛ̀rɛ mɛ̃ pɔ̀lʋ sob a ɩ, wa maalɛ yel-bier ɛ.

¹³A nʋ̃ɔ̀ á ŋá ƴãw a, puore a fʋ Íre barka, ʋl na mɩ́ kʋ̀ b ʋ yel-maalɩ a ʋr a. WULU NA ƁÃ TAA A ZIIR ANAAR SOB A Naaŋmɩn zɔba

¹⁴Sob nɛ na zɔrɛ a Sore a mɩ́ sàw na bɛ wul ʋ. Bɛlɩ dem na mɩ́ cɔ̃w ìr bɔbr ʋ a, ʋ mɩ́ ŋmɛlɩ na kaa bɛ.

¹⁵Sob nɛ na zanɛ a Wulu a, ƴãw na ɓãá ʋ na, ɛcɛ sob nɛ na bɛlɩ ɩ mɛ̃ ʋ tuur ʋ na a, a Wulu na ɩ n bɛra a ʋ zie.

¹⁶Bɛlɩ dem na zɔrɛ a Sore a mɩ́ bãw nɩ a ʋlɩ bom nɛ ʋ na bɔbr a, a bɛ ɩ-vɩɛlɩ mɩ́ nyɩwrɛ na mɛ̃ a cãà a.

¹⁷A yel-bier sob bɛ mɩ́ sàw bɛ na yel ʋ ɛ, ɛ́ mɩ́ wõ a Wulu tu n lɛ ʋ na bɔbr a.

¹⁸Nɩr na ɩ tɩɛrʋ sob a bɛ yiire a tɩɛrʋ towtow ɛ, ɛcɛ a sãan nɩ a pɔ̀lʋ sob bɛ zɔrɛ bom za ɩ.

¹⁹Taa ɩrɛ bom ɛ́ bɛ tɩɛrɩ ɛ, ɛ́ fʋ kʋ̃ mɩ́ yel kɛ́ fʋ̃ʋ tɩ bãw kɛ́ lɛ ɩ.

²⁰Ta tu sɔ́r na bɛ vɩɛl a ɩ, fʋ nãà mab'a ŋmɛ gbɛ́r kʋsɛbɛ ƴãw.

²¹Ta bɛr yã cere sɔ́r na man taa a zu ɛ.

²²Gùre fʋ tʋɔra a fʋ bibiir ƴãw.

²³Gùre fʋ tʋɔra yel za fʋ na ɩrɛ a pʋɔ, a Sore nɛ-ƴãwnɩ tub mɩ̀ n'ɩ a lɛ.

²⁴Sob nɛ na ƴãw a ʋ tɩɛrʋ a Wulu ƴãw a sàwr'ɩ a nɛ-ƴãwnɩ. Sob nɛ na ƴãw a ʋ tɩɛrʋ a Sore ƴãw a, bɛ nyɛrɛ faa kãw za ɩ.