Read Dagara, Northern Bɛn Sɩɩra 33 Bible Online

Bɛn Sɩɩra 33 - Dagara, Northern bible

Bɛn Sɩɩra 33

¹Sob nɛ na zɔrɛ a Sore a kʋ̃ bãw a yel-faa ɩ. A kpɩɛrʋ tɛɛ za pʋɔ a, bɛ na mɩ́ faa ʋ na.

²Yã-bãwnɛ kʋ̃ tʋ̃ɔ́ hɩ̃ɛn a Wulu ɛ, ɛcɛ sob nɛ na mɩ́ bɛlɩ tuur ʋ a, ɩ na mɛ̃ gbor saa-sɛsɛb na pili pàw a.

³A nɩr na tɛr yã a mɩ́ ƴãw nɩ a ʋ tɩɛrʋ a Sore Wulu ƴãw. Ʋl zie a, a Wulu bɛ tɛr bʋnʋ mɛ̃ a bàwr-maalɛ ƴɛ̀rʋ a ɩ[14]. A dãbol sob nɩ a nɩr na ɩrɛ nɩbɛ laar a

⁴Fʋ̃ʋ wa bɔbr kɛ́ bɛ bɛr wo b a, fʋ̃ʋ cɔbrɩ a ʋlɩ bom nɛ fʋ na na yel a. Wob a fʋ bãwfʋ ɓã taa ɛ́ bãw sɔw.

⁵A dãbol sob tɩɛrʋ nɩ a lɛ ʋ na mɩ́ jiele a yele a mɩ́ lɩɛbɛ nɩ kʋralɛ. A mɩ́ lɩɛbɛ na mɛ̃ torko gbɛ́ɛ a.

⁶Bá na nɔnɛ nɩbɛ ɩ-lab a, ŋmɛ̃ na mɛ̃ wur-daa na mɩ́ kõ nɩr za wa zɔmnɛ ʋ a. A yele za bɛ ɩ been ɛ

⁷Nyɩnɛ n'a a yi, bibir kãw mɩ́ ɩ kpɛ̃ɛ zuo a kãw, a mʋ̃tɔ̃w cãà na n'ʋ caalɛ a yũon bibie za a?

⁸A Sore n'ʋ tɩɛrɩ a a ɩ dẽdeni, ʋlɛ n'ʋ ƴãw a cuwr dàrʋ.

⁹Ʋ maal'ɩ a bibie a mɩnɛ a ɩ bibi-bɛrɛ, ɩ a ʋ bibi-sori, ɛ́ ƴãw a mɩnɛ a ɩ bibi-zawlɛ.

¹⁰À ŋá n'a a nɩsaalbɛ za yi a tẽsɔw pʋɔ, mɛ̃ a Adama a Naaŋmɩn na mɛ n a tanɛ a.

¹¹Ɛcɛ a Sore yã-bãwfʋ na ɩ kpɛ̃ɛ a zũú, ʋ maalɩ bɛ na bɛ ɩ dẽdeni, ʋʋ ƴãw bɛ tuur sɛ́ɛ na ɩ tɛɛtɛɛ a.

¹²Ʋ maal'ɩ bɛ mɩnɛ, zɛw bɛ, ʋ ɩ n bɛ mɩnɛ bɛ ɩ son, kɛ́ bɛ mɩ́ taw pɩɛlɩ ʋ. Ɛcɛ ʋ ŋmɛ na ƴãw bɛ mɩnɛ, siwri bɛ, ʋ cã bɛ nɩ a bɛ beba zie lɔb.

¹³Mɛ̃ a lɛ a yawra na be a mɩɛ-mɩɛrɛ nuru pʋɔ ʋ ɩrɛ ʋ lɛ za ʋ na bɔbr a, lɛ n'a a mɩ̀ ŋmɛ̃ a nɩsaalbɛ na be a bɛ Íre nuru pʋɔ a zie: ʋ mɩ́ kʋ̀ n ŋa za lɛ ʋ na bɔbr a.

¹⁴A faa niŋé a, a vla be n be, ɛ́ a kũu niŋé a nyɔ-vʋʋrʋ be be. Lɛ n'a a bɛlɩ dem na tu a Sore a niŋé a yel-bier sob be be.

¹⁵A na ɩ lɛ a, jɩ́rɛ a alɩ bome nɛ za a Naaŋmɩn-na-do-saa-bɛ-pɩɛl-a na maalɩ a: a za cere nɩ ayiri yiri, ɛ́ bɛ mɩ́ de taa ɩ. A sɛ-sɛbrɛ tɩɛrɛ nɩ a ʋ ton

¹⁶Mãa a, ɩ̃ ɩ n a pɛ-baara sob na dier a ton a, mɛ̃ nɩr na yiire a divɛ̃ tɩɩr wɔmɛ, a divɛ̃ tɩɩr wɔ̃-pɔrbɛ na pɔr baarɩ a.

¹⁷Ɛcɛ a Sore na maalɩ mɛ̃ a zũú, ɩ̃ diw na páw bɛ, ɩ̃ɩ paal'ɩ a ɩ̃ divɛ̃ tɩɩr wɔmɛ nɛbrʋ zie, mɛ̃ divɛ̃ tɩɩr wɔ̃-pɔrɛ za a.

¹⁸Nyɩ nyɛ̃, mãa yõ ƴãw bɛ n'a ɩ̃ hanɩ ɛ, a bɛlɩ dem za na bɔbr a bãwfʋ a ƴãw n'a. Ta sàw nɩr za só b ɛ

¹⁹Nyɩ bɛrɛ wone mɛ̃, nyɩɩm, nɩbɛ kaarbɛ ɛ, nyɩ ƴãw tobr vla, nyɩɩm lãw nɩ-bɛrɛ ɛ!

²⁰A fʋ cãafʋ daar a, ta ɩ a fʋ bidɛb, a fʋ pɔw, a fʋ yɛb bɩɩ a fʋ bá só fʋ ɛ. Ta de a fʋ bʋ̃-tɛrɩ kʋ̀ nɩ-yũo ɩ, fʋ nãà mab'a yel kɛ́ fʋ̃ʋ tɩ bãw kɛ́ lɛ, ɛ́ yere k'ʋʋ lɛb kʋ̀ b.

²¹Fʋ na dɛ cãà vʋʋrɛ bɛ kpi a, ta sàw nɩr za só b ɛ.

²²Bʋ̃ʋ n'ʋ vɛ̃, a fʋ bibiir zie a, alɛ sa kɛ́ fʋ mɩ́ kʋ̀ bɛ bom, ɛ́ ta mɩ́ zɛlɛ bom a bɛ zie ɩ.

²³Só fʋ tʋɔra ɩrɛ a fʋ yele za pʋɔ, taa wa sãwnɛ a fʋ yúor ɛ.

²⁴A fʋ nyɔ-vʋʋrʋ wa tarɛ a baarʋ a, a fʋ kũu daar a, põ a gbã-dɩ-bome fʋ na bɛrɛ a. A gbãgbaar yele

²⁵Mɔ̃-kon, dabɔl ŋmɩɛrʋ nɩ to-tɩbrɛ: bõw dem'ɩ á ŋá. Bʋ̃-dɩrɩ, kpãàfʋ nɩ tome: gbãgbaa dem'ɩ á ŋá.

²⁶Fʋ̃ʋ wa kʋ̀ a fʋ gbãgbaa tome ʋ tone a, fʋ na pɩ̃ɛnɩ na. Fʋ̃ʋ wa bɛr ʋ ʋ ɩrɛ lɛ ʋ na bɔbr a, ʋ na bɔbr'a k'ʋʋ zɔ.

²⁷Bɛ mɩ́ gʋɔ nɩ náab nyũu nɩ dàa nɩ mie, tõ-tõ-bi-faa ƴãw a, a 'wɔbrʋ nɩ a dabɔl ŋmɩɛrʋ be n be.

²⁸Ƴãw ʋ ʋ cen tome, ʋ ta zɩ̃ zawla ɩ:

²⁹bʋ̃ʋ n'ʋ vɛ̃, nɩr na zɩnɛ zawla a mɩ́ zanɛ nɩ yel-faar yaga.

³⁰Ƴãw ʋ tome, al ƴãw na n'a ʋ be be a. Ʋlɛ bɛ wa sàwr nʋɔr a, fʋ̃ʋ ƴãw ʋ bamɛ a gbɛ̃ɛ́. Ɛcɛ taa wa fɛrɛ nɩr kãw za zuo ɩ, ɛ́ taa ɩrɛ bom na bɛ tu a mɩnʋ a ɩ.

³¹Fʋ̃ʋ wa tɛr gbãgba-been yõ a, ɩrɛ ʋ mɛ̃ a fʋ̃ʋ mɩŋa a, bʋ̃ʋ n'ʋ vɛ̃, fʋ da ʋ nɩ daarʋ na ɩ kpɛ̃ɛ a. Fʋ̃ʋ wa tɛr gbãgba-been yõ a, ɩrɛ ʋ mɛ̃ a fʋ yɛb a, bʋ̃ʋ n'ʋ vɛ̃, fʋ tɛr'ɩ a ʋ yel-ɩra, mɛ̃ fʋ na tɛr a fʋ nyɔ-vʋʋrʋ yel-ɩra a.

³²Fʋ̃ʋ wa dɔwrɛ ʋ, ʋ wa zɔ a,

³³sɔr-buor'ʋ fʋ na tu bɔ ʋ?