Read Dagara, Northern Bɛn Sɩɩra 36 Bible Online

Bɛn Sɩɩra 36 - Dagara, Northern bible

Bɛn Sɩɩra 36

¹Puoru a Ɩsɩrayɛl bʋʋrɛ ƴãw Zu-sob, tẽ-daa za Naaŋmɩn i, zɔ tɩ nɩbaalʋ!

²Ɩ a nɩ-bʋʋrɛ za zɔrɛ fʋ!

³Zɛw a fʋ nũu a nɩ-bʋʋr-yoru ƴãw, bɛ tʋ̃ɔ́ nyɛ̃ a fʋ kpɛnʋ!

⁴Fʋ dɔwrɩ tɩ nɩ a tɩ sãwna ƴãw wul bɛ fʋ na ɩ sõw a. Mɩ̀ ŋmɛ bɛ wul tɩ fʋ na ɩ kpɛ̃ɛ a.

⁵Bɛ nyɛ̃ bãw, mɛ̃ a tɩɩm tɛɛ za na nyɛ̃ bãw a, kɛ́ Naaŋmɩn bɛ be be pʋɔ a fʋ ƴãw ɛ, Sore e!

⁶Lɛb maalɩ a yele na ɩ bãwfʋ sãá a, maalɩ nɔ-ɓãa-yele a mɩnɛ.

⁷Wul a fʋ dʋrʋ nũu, nɩ a fʋ dʋrʋ kpãkpãw yúor-vɩɛlʋ-danʋ tome.

⁸Ɩ a fʋ su-yãyaar ʋ ìr, ɩ ʋ be a ziir za.

⁹Kʋ a tɩ dɔ̃ dem ír bɛr, kʋ bɛ pàw pɛr.

¹⁰Ɩ a yele baarʋ daar ʋ ta fɔ̃w, bãwnɩ a fʋ̃ʋ mɩŋa na n'ʋ ƴãw ʋ a. Lɛ n'a bɛ na manɛ a fʋ gãda-tome.

¹¹A fʋ suur vũu, ʋ dɩ a bɛlɩ dem nãà wa cãà vʋʋrɛ a. A bɛlɩ dem na dɔwrɛ a fʋ nɩ-bʋʋrɛ a, a ɩ a bɛ wɛb.

¹²Ŋmɛr a dɔ̃ dem nɩ-bɛrɛ zuru, bɛl na yere à ŋá a: «Nɩr bɛ ka be ɩ mɛ̃ a tɩɩm'a ɩ!»

¹³Lɛb ɓã a Zakɔb dɔwlʋ za taa,

¹⁴ɩ kɛ̀ bɛ lɛb so a tẽw, fʋ na kʋ̀ bɛ a pɛr-tib daar a.

¹⁵Sore e, zɔ a fʋ nɩ-bʋʋrɛ nɩbaalʋ, bɛl na dɩ a fʋ yúor a, zɔ a Ɩsɩrayɛl nɩbaalʋ, ʋl na ɩ bidɛb-dãw a fʋ zie a.

¹⁶Tɛr nɩbaal-zɔba a fʋ zi-sõw tẽ-kpɛ̃ɛ ƴãw, a Zerizalɛm na ɩ a fʋ kpɛb zie a ƴãw.

¹⁷Paalɩ a Sɩyɔ̃ tẽw nɩ a fʋ gãda-tome manʋ, paalɩ a fʋ Ŋmɩn-yir-kpɛ̃ɛ nɩ a fʋ yúor-vɩɛlʋ-danʋ.

¹⁸Wul k'aa Ɩsɩrayɛl'ɩ a fʋ nɩ-bʋʋrɛ fʋ na ír a pɛr-tib daar za a. Ɛ́ maalɩ a alɩ bome nɛ fʋ na ƴãw a fʋ ƴɛ̀r-manbɛ yel kɛ́ fʋ na maalɩ na a.

¹⁹Kʋ̀ a ʋlɩ bom nɛ fʋ na yel a a bɛlɩ dem na gùre fʋ a, a fʋ ƴɛ̀r-manbɛ tʋ̃ɔ́ sãà ɩ nɩbɛ na yere yel-mɩŋa a.

²⁰Sore e, sàw de a fʋ tõ-tõ-biir puoru, fʋ̃ʋ na ɩ nɩ-vla a fʋ nɩ-bʋʋrɛ zie a. Lɛ n'a a nɩbɛ za a tẽw zu na bãw kɛ́ fʋ ɩ n a Sore, a Naaŋmɩn na be kʋralɛ a. A yele bãw-jielu

²¹A púor dier'ɩ bʋ̃-dɩ-pɛ-bʋʋrɛ za, ɛcɛ bʋ̃-dɩrɩ a mɩnɛ nʋmɛ na zuo a mɩnɛ.

²²Mɛ̃ a lɛ a nʋɔr na mɩ́ bãw wɛ-nɛn ŋa bʋʋrɛ nʋ̃ɔ̀ a, lɛ n'a nɩr na tɛr tɩɛrʋ a mɩ́ bãw a ƴɛ̀rʋ na ɩ ziri a.

²³Tɩɛr-gõlõgõlõ sob ƴãwnɛ nɩ pʋ-sãwna, ɛcɛ nɩr na bãw a, na lɛb'a kʋ̀ ʋ a ʋlɩ bom nɛ ʋ na sɛw taa nɩ a. A pɔw kaa-íru yele

²⁴Pɔw zie a, dɛb'ɩ dɛb, ɛcɛ pɔwsɩrali bɛ mɩnɛ sa n bɛ mɩnɛ.

²⁵Pɔw na pɔ̀l a, a ʋ sɩr mɩ́ jɩ́rɛ ʋ na wone nʋ̃ɔ̀, ɛ́ bɛ lɛb bɔbr bom zuo ʋ ɛ.

²⁶Ʋlɛ wa ƴɛ̀rɛ bàalʋ bàalʋ nɩ su-nʋ̃ɔ̀ a, a ʋ sɩr'ʋ na wone nʋ̃ɔ̀ zuo a nɩsaalbɛ za.

²⁷Sob nɛ na de pɔw a páw nɩ a tɛra tib zie, ʋ páw nɩ sõwne na ŋmɛ̃ taa nɩ ʋ a, nɩ tɩɛrɛ na kpɛmɛ a.

²⁸Zie bɛ na bɛ ŋmãa pàw a, a nɩbɛ mɩ́ za ʋ na. Zie pɔw na bɛ ka be a, a mɩ́ wone nɩ a dɛb, ʋʋ bɛ bãw be ʋ na cere a ɩ.

²⁹Ãa n'ʋ ƴãwnɛ ʋ tɩɛrʋ nyãnyuge na kpɛ yã a ƴãw, na mɩ́ yi tẽ-kpɛ̃ɛ ŋa tɩ sãá tẽ-kpɛ̃ɛ ŋa a? Lɛ n'a nɩr mɩ̀ bɛ ƴãwnɛ ʋ tɩɛrʋ nɩr na bɛ tɛr kpɛb zie a ƴãw ɛ, nɩr na mɩ́ gã a be a zie na sɔb páw ʋ a ɩ.