Read Dagara, Northern Bɛn Sɩɩra 37 Bible Online

Bɛn Sɩɩra 37 - Dagara, Northern bible

Bɛn Sɩɩra 37

¹Bá be na, bá be Bá za mɩ́ yel'a: «A mãa mɩ̀, ɩ̃ ɩ n a fʋ bá.» Ɛcɛ kãw n'ɩ ŋan ɩ a fʋ bá nɩ yúor tɛwr.

²Nyɛ̃ pʋ-sãwna na mɩ́ cɛ blã na kʋ a: a tɔ bɩɩ a bá na mɩ́ wa lɩɛbɩ dɔ̃ sob a!

³A tɩ nɩɩlʋ na mɩ́ cɩɩlɛ cere a faa lowr a, a ʋ yib zie n'ɩ nyɩn, ʋl na paalɩ a tẽw nɩ a bɛlʋ a?

⁴Kãw nɩ ŋan ɩ a fʋ bá a nʋ̃ɔ̀ daar, ɛ́ a kpɩɛrʋ daar ʋ ír àr a fʋ ƴãw.

⁵Bá kãw lãw nɩ fʋ na wone a tuo, lɛn daar za fʋ na kʋ̀rɛ ʋ ʋ dɩrɛ a, ɛcɛ a zɛbr daar a, ʋ pine nɩ zɛbr-kur-pãgala.

⁶Taa yiire a fʋ bá bɛrɛ fʋ̃ʋ wa be a zɛbr zie a ɩ, ɛ́ mɩ̀ cãà tɛr a ʋ tɩɛrʋ fʋ̃ʋ wa páw a zɛbr na-bome a. A yã-wulbɛ yele

⁷Yã-wule za mɩ́ yel'a k'aa ʋ yã n'a vɩɛl, ɛcɛ bɛ mɩnɛ a, a bɛ tɔnɛ n'a bɛ mɩ́ bɔbr.

⁸Gùre fʋ tʋɔra a yã-wule ƴãw. De niwn sowri fʋ tʋɔra nyɛ̃, a ʋ bʋ̃-bɔbra n'ɩ bʋnʋ. Bʋ̃ʋ n'ʋ vɛ̃, a ʋ bʋ̃-bɔbra lowr'a ʋ na ƴɛ̀r tu n. A mɩnɛ kãw, ʋ bɔbr'a k'ʋʋ de bom fʋ na só a,

⁹yere à ŋá kʋ̀rɛ fʋ: «A sɔr-vla n'ʋ fʋ lo», al pùorí ʋ àr zãá k'ʋʋ nyɛ̃ a ʋlɩ bom nɛ na na ta b a.

¹⁰Ta bɔbr yã nɩr a ɩb na bɛ ɩ cãà a fʋ zie a zie ɩ. Sɔwlɩ a lɛ fʋ na tɩɛrɛ kɛ́ fʋ ɩ a, a bɛlɩ dem na nyuur'ɩ fʋ a zie.

¹¹Taa sowre pɔw a lɛ ʋ na tɩɛrɛ a ʋ yẽtaa ƴãw a ɩ, taa sowre dɛ̃bɩ̃ɛ sob a zɛbr ƴãw ɛ, taa sowre yɛ-yɛrɛ bʋ̃-daara ƴãw ɛ. Taa sowre nyuur sob a lɛ ʋ na tɩɛrɛ a vla bɛ na maalɩ fʋ a, tɩɛrʋ tɛrʋ ƴãw ɛ, nɩr na bɛ zɔrɛ nɩbaalʋ a, a su-baalʋ ƴãw ɛ. Taa sowre ƴã-tuo sob a lɛ ʋ na tɩɛrɛ ton ƴãw a ɩ, tõ-tõ-bie na dier yũon sã-ya a, a ʋ tome baarʋ ƴãw ɛ, tõ-tõ-bie na ɩrɛ salala a, tõ-kpɛ̃ɛ ƴãw ɛ. Taa bɔbr yã kãw za a nɩbɛ bɛ ŋa zie ɩ.

¹²Nɩ̃ɛ cere kʋralɛ tɩ nyɛrɛ nɩr na tu a Sore pùor a, nɩr fʋ na bãw k'ʋʋ tuur'ɩ a nɛ-ƴãwnɩ ɛ́ tɩɛrɛ mɛ̃ a fʋ̃ʋ a. Fʋ̃ʋ wa tɔl gù a, ʋ na lãw nɩ fʋ nɩ a fʋ kpɩɛrʋ pʋɔ.

¹³Mɩ́ tu a lɛ a fʋ socir na mɩ́ tɩɛrɩ a yele bin a, bʋ̃ʋ n'ʋ vɛ̃, yã-wule bɛ ka be tu fʋ zuo ʋ ɛ.

¹⁴A mɩnɛ kãw, a nɩsaal tɩ̀ɛrʋ mɩ́ ɩ na k'ʋ bãwnɩ a yel vla za zuo zi-gùrbɛ ayopõi bɛ na ƴãw zi-kɛra zu, bɛ piwre a zie a.

¹⁵Ɛcɛ zuo a za, zɛlɛ a Naaŋmɩn-na-do-saa-bɛ-pɩɛl-a, k'ʋʋ ɩ a fʋ sɔ́r tuur a yel-mɩŋa. A yã-bãwfʋ na ɩ sɩza a, nɩ a yã-bãwfʋ na ɩ ziri a

¹⁶Mɩ́ de niwn ŋmɛ nɔkpɛn a ton ƴãw ɛ́ bãw tĩ ʋ, mɩ́ tɩɛrɩ a bom ɛ́ bãw ɩ.

¹⁷A socir pʋɔ n'a a tɩɛrʋ nyɩwr be.

¹⁸A socir na tʋ̃ɔ́ na ɩ bome anaar yi a ʋ pʋɔ: a vla nɩ a faa, a nyɔ-vʋʋrʋ nɩ a kũu, ɛcɛ a nʋɔr'ʋ mɩ́ yel a lɛ na n'a a kʋralɛ.

¹⁹Nɩr'ɩ ŋan, bãw a, wule nɩ-yaga, ɛ́ a ʋl mɩŋa ƴãw ʋ bɛ tɛr pɛr ɛ.

²⁰Kãw n'ɩ ŋan bãw ƴɛ̀rʋ, ƴãw a nɩbɛ bɛ nɔnɛ ʋ towtow ɛ, ʋ kʋ̃ tɛr bʋ̃-dɩra kãw za ɩ.

²¹Bʋ̃ʋ n'ʋ vɛ̃, a Sore bɛ tɛr'ɩ ʋ pʋ-pɩɛlʋ ɛ, alɛ so ʋ bɛ tɛr a yã-bãwfʋ towtow ɛ.

²²Kãw n'ɩ ŋan ɩ yã-bãwnɛ ʋl ʋ yõ tɔnɛ ƴãw, ɛ́ ʋl yõ n'ʋ a ʋ yã bʋ̃-páwrɩ maalɛ.

²³Ɛcɛ yã-bãwnɛ mɩ́ wule nɩ a ʋ nɩ-bʋʋrɛ, ɛ́ bɛ mɩ́ bɛr tɩɛrʋ a ʋ yã bʋ̃-páwrɩ ƴãw.

²⁴Maalʋ mɩ́ paal'ɩ a yã-bãwnɛ, ɛ́ a bɛlɩ dem za na nyɛrɛ ʋ a, yere k'ʋʋ wone nɩ nʋ̃ɔ̀.

²⁵Nɩsaal nyɔ-vʋʋrʋ bibie tɛr'ɩ sɔ́rʋ, ɛcɛ a Ɩsɩrayɛl bʋʋrɛ dem bɛ tɛr sɔ́rʋ ɛ.

²⁶Sob nɛ na ɩ yã-bãwnɛ a ʋ nɩ-bʋʋrɛ sɔgɔ a, a nɩbɛ na ƴãw nɩ a bɛ tɩɛrʋ a ʋ ƴãw, ɛ́ a ʋ yúor na pore nɩ kʋralɛ. A dɩrɛ zʋmnɛ nɩ

²⁷Ɩ̃ bie e, a fʋ nyɔ-vʋʋrʋ daar a, ɩ fʋ mɩŋa kaa, nyɛ̃ a ʋlɩ bom nɛ na bɛ vɩɛl a fʋ zie a, ɛ́ mɩ́ zawrɩ ʋ bɛr.

²⁸Bʋ̃ʋ n'ʋ vɛ̃, a bome za bɛ dier a nɩbɛ za ɩ, ɛ́ a nɩbɛ za bɛ nɔnɛ a bome za ɩ.

²⁹Ta wone a nʋ̃ɔ̀ za bɛ sɛwr ɛ, ta ŋmʋrɛ a dɩb ƴãw ɛ.

³⁰Bʋ̃ʋ n'ʋ vɛ̃, a dɩ-zuo waar'ɩ nɩ bàalʋ, ɛ́ a dɩ-gbogbo waar'ɩ pʋ-'wɔbɛ.

³¹Nɩ-yaga kpi n a dɩ-zuo kũu, ɛcɛ sob nɛ na maal ɩrɛ a mɩ́ vʋʋrɩ na tɔl nidaa.