Read Dagara, Northern Bɛn Sɩɩra 4 Bible Online

Bɛn Sɩɩra 4 - Dagara, Northern bible

Bɛn Sɩɩra 4

¹Ɩ̃ bie e, ta sɩb a nã́w sob a ʋ nʋɔr-dɩb ɛ, ta ɩ a nɩ-kɔmɛ gùre a fʋ sõwfʋ ɛ.

²Ta bɛr a kɔ̃ sob ʋ wone tuo ɩ, ta ɩ a wʋ̀ʋr nɩr ʋ nyɛ̃ suur ɛ.

³Ta ɩ a bɛ kpɩɛrʋ a dɔwlɩ ɛ, bɛ tɛr'ɩ bom kãw yel-ɩra, kʋ̀ bɛ, ɛ́ ta bɛr bɛ cɛlɛ ɩ.

⁴Ta zawrɩ a zɛ̀lɛ̀ na be kpɩɛrʋ pʋɔ a sõwfʋ ɛ, ta lɩɛbɩ kpaar cɔw a nã́w sob ɛ.

⁵Ta lɩɛbɩ kpaar cɔw nɩr na bɛ tɛr bom za a ɩ, ta ɩ ʋ wa ŋmɩɛr ƴãwn fʋ ɛ.

⁶Bʋ̃ʋ n'ʋ vɛ̃, ʋlɛ wa ŋmɛ ƴãw fʋ a kpɩɛrʋ pʋɔ a, a ʋ Íre na wõ n a ʋ puoru.

⁷Ɩ a lãw nɩbɛ nɔnɛ a fʋ yele, mɩ́ su a zu a nɩ-kpɛ̃ɛ niŋé.

⁸Bɛr wõ a nã́w sob ƴɛ̀rʋ, sɔw ʋ bàalʋ bàalʋ nɩ ƴã-ɓaarʋ ƴɛ̀r-bie.

⁹Faa a sob nɛ bɛ na dɔwrɛ a, a dɔwr-dɔwrɛ nuru pʋɔ. Ta kpɛ dɛ̃bɩ̃ɛ a ƴɛ̀rʋ-dɩb pʋɔ ɩ.

¹⁰Ɩ mɛ̃ sãà a, a bi-kpebe zie, ɛ́ ɩ mɛ̃ sɩr a, a bɛ mã zie. A lɛn daar a, fʋ na ɩ na mɛ̃ a Naaŋmɩn-na-do-saa-bɛ-pɩɛl-a bidɛb a, ʋʋ na nɔ̃w fʋ na zuo a fʋ mã na nɔnɛ fʋ a. A yã-bãwfʋ na ɩ wul-wule a

¹¹A Yã-bãwfʋ mɩ́ zɛw nɩ a ʋ bibiir, ɛ́ kaarɛ a bɛlɩ dem na bɔbr ʋ a zie.

¹²Nɩr na nɔnɛ a yã-bãwfʋ a nɔnɛ nɩ a nyɔ-vʋʋrʋ, nʋ̃ɔ̀ na paal'ɩ sob nɛ na cɔ̃w ìr bɔbr ʋ a.

¹³Sob nɛ na tɛr ʋ a yúor na yi na. A Sore na maalɛ ʋ nɩ zie nɛ za ʋ na cere a.

¹⁴Bɛlɩ dem na tone a yã-bãwfʋ tome a, puore nɩ a Naaŋmɩn na ɩ sõw a. A Sore nɔnɛ nɩ a bɛlɩ dem na nɔnɛ a yã-bãwfʋ a.

¹⁵Sob nɛ na bɛrɛ wone a yã-bãwfʋ a na ɩ n ƴɛ̀r-dɩrɛ na tuur a mɩnʋ a, ɛ́ sob nɛ na tu ʋ a, kʋ̃ bãw damnʋ ɛ.

¹⁶Ʋlɛ wa ƴãw a ʋ tɩɛrʋ a ʋ ƴãw a, ʋ na só nɩ a ʋ bome, a ʋ bibiir mɩ̀ lɛb wa só a a pùorí.

¹⁷A yã-bãwfʋ na tĩ na bɩɛlɛ ʋ sɛ́ɛ na gõgoli a zu, ʋ na ƴãwnɛ ʋ nɩ dɛ̃bɩ̃ɛ nɩ pʋl-vʋ̃ɔ. Ʋ na kpãanɛ ʋ na nɩ a ʋ wulu, ɛ́ gù ʋ wa tɩ tʋ̃ɔ́ bɛr tɩɛrʋ a ʋ ƴãw. Ʋ na ɩ ʋ na kaa nɩ a ʋ yel-fɛrɩ.

¹⁸Al pùorí, ʋ na de nɩ sɔ́r na ɩ daadaa a, lɛb wa a ʋ zie. Ʋ na ɩ na nʋ̃ɔ̀ kpɛ ʋ, ʋʋ wul ʋ a ʋ yel-sɔwlɩ.

¹⁹Ɛcɛ ʋlɛ wa bɛr a yã-bãwfʋ sɔ́r a, a yã-bãwfʋ na jɛ ʋ na bɛr, ɛ́ bɛr ʋ ʋ bɔr. A vĩ zɔba yele

²⁰Jɩ́rɛ a lɛ a yele na ɩ a, gù fʋ tʋɔra a yel-faa ƴãw, ɛ́ ta zɔrɛ a fʋ mɩŋa vĩ ɛ.

²¹Vĩ kãw be n be wɩɛr'ɩ fʋ a yel-bier pʋɔ, ɛ́ kãw be be waar'ɩ yúor nɩ maalʋ.

²²Ta sãw niwn ƴãw fʋ tʋɔra ɩ, ta zɔ a vĩ nɩ̃ɛ tɩ lo ɩ.

²³Ta bʋ́nɛ nɩ a ƴɛ̀rʋ ɛ, alɛ wa fɛr kɛ́ fʋ ƴɛ̀r a.

²⁴A fʋ yã-bãwfʋ na sãá nɩ a fʋ ƴɛ̀rʋ pʋɔ ɛ́ a fʋ bãwfʋ sãá a lɛ fʋ na yere a pʋɔ.

²⁵Ta ŋmɛ a yel-mɩŋa lɔb ɛ, ɛcɛ a fʋ zɔnʋ, a ɩrɛ fʋ vĩ.

²⁶Bɛ kʋ̃ tʋ̃ɔ́ piw man kʋ̃ɔ tɛr a ta zɔrɛ ɩ, a lɛ pʋɔ a, ta zɔrɛ vĩ a fʋ yel-bebe yelu ƴãw ɛ.

²⁷Ta bɛr dãbol sob nɛb fʋ ɛ, ta sàw kpɛnʋ sob só fʋ ɛ.

²⁸Zɛb a yel-mɩŋa ƴãw tɩ kpi n, ɛ́ a Sore Naaŋmɩn na zɛb'ɩ a fʋ ƴãw.

²⁹Ta kpɛ socir a fʋ ƴɛ̀rʋ pʋɔ, ɛ́ a fʋ ɩ-ɩrɩ ƴãw fʋ kpɛ ƴã-tuo, ɛ́ kpɛ salala ɩ.

³⁰Ta ɩ gbẽw a fʋ yir dem zie, ɛ́ a fʋ tõ-tõ-biir zie a fʋ pɛr bɛ tone mur ɛ.

³¹Ta mɩ́ yuo a nũu de a bom, ɛ́ a lɛb-tɩrʋ daar fʋ pàw tɛr ɛ.