Read Dagara, Northern Bɛn Sɩɩra 40 Bible Online

Bɛn Sɩɩra 40 - Dagara, Northern bible

Bɛn Sɩɩra 40

¹A nɩsaal kpɩɛrʋ A Sore ír'ɩ niw-sʋba na ta al a, nɩsaal za ƴãw. Ʋ mɩ́ tuo nɩ a nɩsaalbɛ to-tɩbrʋ, a ʋlɩ bibir bɛ na mɩ́ yi a bɛ mã puori a tɩ ta n a lɛ bɛ na mɩ́ lɛb kpɛ a tẽsɔw pʋɔ na ɩ a bʋ̃-vʋʋrɩ za mã a.

²A ʋlɩ bom nɛ na n'ʋ mɩ́ so a bɛ tɩɛrʋ za ɛ́ ɩrɛ bɛ dɛ̃bɩ̃ɛ a, a ʋlɩ bom nɛ bɛ na mɩ́ pi pée gùre nɩ a, ʋlɛ n'ɩ a bɛ kũu bibir.

³A na tĩ a nãà na zɩ̃ a ʋ naalʋ-dà-kɔw-yúor zu, ɛ́ tɩ tɔ a bãbàal na zɩ̃ a tẽw, a tãpɛlʋ pʋɔ a,

⁴a na tĩ a sob nɛ na su a kpar-kpɛ̃ɛ zɩɛ, vɔblɩ nɩ a nãà-kpawʋɔ a, ɛ́ tɩ tɔ a sob nɛ na su pɛn-sãsaralɛ kparʋ a, bɛ za yele ɩ n been.

⁵Bɛ za bãw nɩ a su-yãyaar, a nyuur, a tɩɛrʋ na damnɛ fʋ a, nɩ a dɛ̃bɩ̃ɛ, a kũu dɛ̃bɩ̃ɛ, a pʋ-bier nɩ a zɛb-taa. Ɛ́ bɛlɛ wa gã kɛ́ bɛ pɩ̃ɛnɩ a, tɩɛrʋ a mɩnɛ mɩ́ damnɛ bɛ nɩ a bɛ gʋ̃ɔ pʋɔ.

⁶Bɛlɛ wa pɩ̃ɛnɩ zaa pʋrɩ a, bɛ mɩ́ tĩ na zanɛ, ɛ́ wone tuo mɛ̃ a mʋ̃tɔ̃w daarɩ́ a. Dɛ̃bɩ̃ɛ mɩ́ ɩrɛ bɛ na a ʋlɩ bom nɛ bɛ na mɩ́ nyɛ̃ a zánʋ pʋɔ a ƴãw, mɛ̃ sojarɩ na yi zɛbr zie zɔ a.

⁷A lɛn daar bɛ na na mɩ́ nyɛ̃ a faafʋ a, bɛ mɩ́ zaw na, ɛ́ a ɩ bɛ nɔ-ɓãan, bɛ na mɩ́ zɔ dɛ̃bɩ̃ɛ zawlalɛ a ƴãw.

⁸A alɩ bome nɛ na gùre a bʋ̃-vʋʋrɩ za, a dʋ̃w tɩ tɔ a nɩsaal a, ɛ́ na kpɛ faa gb'a ayopõi dɔwlɩ a yel-bebe dem ƴãw a,

⁹alɛ n'ɩ a kũu bɩɩ nɩr na kʋ ʋ tɔ a, zɛb-taa, zɛbr, tẽw na kàbr nyùur a, kɔ̃, ziir na sãw a, bàal-faar na yi a.

¹⁰A Naaŋmɩn ír'ɩ à á ŋá za a bɛlɩ dem na bɛ tuur a wulu a ƴãw, ɛ́ bɛlɛ nɛbɛ tɩ so a kʋ̃ɔ-paalʋ wa.

¹¹Bom za na yi tẽsɔw pʋɔ a, na lɛb'a kpɛ a tẽsɔw pʋɔ, ɛ́ bom za na yi kʋ̃ɔ pʋɔ a, na lɛb'a kpɛ a kʋ̃ɔ-kpɛ̃ɛ pʋɔ. A ɩ-ɩrɩ na bɛ tu a mɩnʋ a na baar'a

¹²A bʋ̃-kʋ̀rɩ bɛ na mɩ́ tɩr a tɔ nʋɔr ŋmɛb ƴãw a, a ɩ-ɩrɩ na bɛ tu a mɩnʋ a, à á ŋá za na bɔr'a, ɛcɛ a pùor-bɛ-lɛbrʋ na be n be kʋralɛ.

¹³A nɩ-faar na-bome na ɩ na mɛ̃ bàa na sɩr a. A na tɔl'a mɛ̃ saa na tanɩ wabapapa saa waa daar a.

¹⁴Nɩr na tɩrɛ a na tʋ̃ɔ́ na cɩlɛ. Ɛcɛ a bɛlɩ dem na zawrɛ a wulu a, na bɔr'ɩ bɛ za pap!

¹⁵A bɛlɩ dem na bɛ ƴãwnɛ a Sore a, yie pʋɔ a, a bibiir kʋ̃ yãwmɛ ɩ. Pì-kpam'ʋ na be be a nɩ-dɛgɛ bɛ ŋa nyɩgɛ tɛb ƴãw.

¹⁶A bàa-kɛkɛr na búle kʋ̃ɔ nʋɔr, man kõkowr zu a, bɛ de nɩ niwn vʋ̃ɔ ʋ mʋ̃ɔ za ƴãw.

¹⁷Ɛcɛ maalʋ mɩ́ ɩ na mɛ̃ zaadɛ̃-vla vla a, ɛ́ bom fʋ na kʋ̀ nɩ-kɔmɛ a bɛ tɛr yiiru towtow ɛ. A bom na vɩɛl a, nɩ a bom na vɩɛl gãw a

¹⁸Nɩr na so ʋ tʋɔra a, nɩ nɩr na tone a, a bɛ nyɔ-vʋʋrʋ mɩ́ nʋmɛ na. Ɛcɛ nɩr na nyɛ̃ na-bom a mɩ́ wone nɩ nʋ̃ɔ̀ zuo bɛ za ayi.

¹⁹Bibi-yaga tɛrʋ bɩɩ tẽ-kpɛ̃ɛ mɛb mɩ́ ɩ na nɩr tɛr yúor, ɛcɛ bɛ mɩ́ nɔ̃w nɩ pɔw na ɩ pɔw a gãw a yele ayi á ŋá.

²⁰A divɛ̃ nɩ a bʋ̃-ŋmɩɛrɩ ŋmɛb waar'ɩ nɩ su-nʋ̃ɔ̀, ɛcɛ a yã-bãwfʋ fʋ na nɔnɛ a waar'ɩ nɩ su-nʋ̃ɔ̀ gãw à á ŋá.

²¹A wele nɩ a korijom kɔkɛɛ mɩ́ vɩɛl'a, ɛcɛ ƴɛ̀r-bir-vla vɩɛl'a gãw a.

²²A pɔ̀lʋ nɩ a vɩɛlʋ a, alɛ n'a a mimir nɔnɛ a jɩ́rʋ, ɛcɛ ʋ nɔnɛ nɩ a póru ka-va-sɛbl jɩ́rʋ zuo a bome á ŋá ayi.

²³Bá nɩ tɔ sob tɛr'ɩ nyɛ̃-taa daar, ɛcɛ pɔw nɩ ʋ sir nyɛrɛ nɩ taa zuo lɛ.

²⁴Yɛbr bɩɩ nɩsaal-son mɩ́ sõw nɩ a kpɩɛrʋ daar, ɛcɛ a nɩ-kɔmɛ bom kʋb mɩ́ sõw na zuo lɛ.

²⁵A salm-zɩɛ nɩ a salm-pla tɛrʋ mɩ́ ɩ na fʋ bɛr tɩɛrʋ, ɛcɛ bɛ mɩ́ nɔ̃w nɩ yã-vla na wul a zuo a.

²⁶A naalʋ fʋ na kpɛ a, nɩ a fãw fʋ na tɛr a, a mɩ́ ɩ na fʋ bɛr tɩɛrʋ, ɛcɛ a Sore zɔba mɩ́ ɩ na fʋ bɛr tɩɛrʋ gãw lɛ. A Sore zɔba wa be be a, fʋ bɛ bɔbr bom guur ɛ, fʋ bɛ lɛb bɔbr sõwfʋ ɛ.

²⁷A Sore zɔba mɩ́ ɩ na fʋ ɩ mɛ̃ zaadɛ̃-vla vla a, ʋ mɩ́ gù fʋ nɩ vla zuo yúor za. A zɛ̀lʋ̀

²⁸Ɩ̃ bie e, ta ɩ zɛl-zɛlɛ zɛlɛ dɩrɛ ɩ. A kũu sa a zɛ̀lʋ̀.

²⁹Nɩr na mɩ́ nyɛ̃ a ʋ tɔ bʋ̃-dɩrɩ cen gù a, a ʋ nyɔ-vʋʋrʋ kʋ̃ tʋ̃ɔ́ ɩ nyɔ-vʋʋrʋ ɛ. Ʋ mɩ́ dɛwr'ɩ ʋ tʋɔra nɩ dɩb ʋ na bɛ bɔ páw a. Nɩr na bãw ɛ́ bɛ wul ʋ vla a, bɛ ɩrɛ à à ŋá ɩ.

³⁰A vĩ-bɛ-zɔrɛ zie a, bʋ̃-dɩra ʋ na zɛlɩ a mɩ́ nʋmɛ nɩ a ʋ nʋɔrɩ́, ɛcɛ ʋ mɩ́ dɩrɛ nɩ a ʋ puori mɛ̃ vũu a.