Read Dagara, Northern Bɛn Sɩɩra 42 Bible Online

Bɛn Sɩɩra 42 - Dagara, Northern bible

Bɛn Sɩɩra 42

¹Nyɩ zɔrɛ vĩ a bom nyɩ na wõ a yelu ƴãw, nɩ a yel-sɔwlɩ nyɩ na ɩ a yi a ƴãw. À ŋá n'a nyɩ na bãw a vĩ na ɩ a vĩ a, ɛ́ a nɩbɛ za na yel'a kɛ́ nyɩ tɛr'ɩ yel-mɩŋa. A vĩ na bɛ ɩ vĩ a Ɛcɛ ta zɔrɛ vĩ yele á ŋá ƴãw ɛ, ɛ́ ta yel kɛ́ nɩbɛ ƴãw ɛ́ maalɩ yel-bier ɛ:

²Ta zɔrɛ vĩ a Naaŋmɩn-na-do-saa-bɛ-pɩɛl-a wulu nɩ a wõ-taa sàwfʋ ƴãw ɛ, nɩ a ƴɛ̀rʋ fʋ na na dɩ n mɩnʋ kʋ̀ a nɩr na bɛ ƴãwnɛ a Sore a ɩ.

³Ta zɔrɛ vĩ a libir sɔ́rʋ ƴãw fʋ̃ʋ nɩ a fʋ bá kãw ɛ, bɩɩ fʋ̃ʋ nɩ nɩr na lãw lo sɔ́r a ɩ, nɩ a fʋ gbã-dɩ-bom pób ƴãw fʋ̃ʋ nɩ nɩbɛ bɛ mɩnɛ kãw ɛ.

⁴Ta zɔrɛ vĩ bʋ̃-kera nɩ tɩbrʋ bʋ̃-mánɩ na tu sɔ́r a ƴãw ɛ, nɩ tɔnɛ fʋ na páw blã bɩɩ yaga a ƴãw ɛ,

⁵nɩ dɔwlɛ fʋ na páw yɛ̀rʋ́ bome kʋɔrʋ pʋɔ a ƴãw ɛ. Ta zɔrɛ vĩ a fʋ bibiir kpãàfʋ yaga ƴãw ɛ, nɩ tõ-tõ-bi-faa lõbowe fʋ na na fɔb a tɩ ɩ zɩ̃ɩ a ƴãw ɛ.

⁶Fʋ̃ʋ wa tɛr pɔw ʋ mɩ́ bɔbr a yele za bãwfʋ a, bɩɩ nɩ-yaga wa be a fʋ yir, fʋ bɛ ƴãw a fʋ tɩɛrʋ a bɛ ƴãw a, fʋ̃ʋ mɩ́ ƴãw a bome zie ɛ́ kpà.

⁷Fʋ̃ʋ wa kʋ̀rɛ libie nɩr k'ʋʋ bin a, mɩ́ ƴãw bɛ sɔ́r ɛ́ ker. A bom fʋ na tɩrɛ a, nɩ a bom fʋ na páwr a, mɩ́ sɛb a za ƴãw sɛbɛ pʋɔ.

⁸Ta zɔrɛ vĩ a gẽgemi sob nɩ a dãbol sob kpãàfʋ ƴãw ɛ, bɩɩ a dɛb-nyãw bɛ na yel k'ʋʋ ɩrɛ nɩ pɩ̃ɔ-ɩb a ƴãw ɛ. À ŋá n'a fʋ na wul kɛ́ fʋ ɩ n nɩr bɛ na sɩrɩ wul vla a, ɛ́ a nɩbɛ za na yel'a kɛ́ fʋ tɛr'ɩ yel-mɩŋa. Tɩ̀ɛrʋ pɔwyaa na mɩ́ ƴãwnɛ a sãà a

⁹Powle mɩ́ so nɩ a ʋ sãà bɛ-gʋ̃ɔ ɛ́ bɛ bãwnɩ a ɩ, a tɩ̀ɛrʋ ʋ na mɩ́ ƴãwnɛ ʋ a mɩ́ diw nɩ a gʋ̃ɔ. Ʋ na ɩ a pɔwsɩrale a, a sãà mɩ́ zɔrɛ nɩ dɛ̃bɩ̃ɛ ʋ nãà wa col a sɩr kulu a. Ʋʋ na wa kul a sɩr a, ʋ mɩ́ zɔrɛ nɩ dɛ̃bɩ̃ɛ, a sɩr nãà bɛ wa cãà nɔnɛ ʋ a.

¹⁰Ʋ na cãà ɩ a pɔwsɩrale a, a sãà mɩ́ zɔrɛ nɩ dɛ̃bɩ̃ɛ dɛb nãà wa gã nɩ ʋ, ƴãw ʋ pʋɔ a sãà yir a. Ʋ na kul a sɩr a, ʋ nãà mab'a sãw, ʋ na kpɩɛr a ʋ sɩr zie a, ʋ nãà mab'a ɩ pɔw-ãan.

¹¹A fʋ pɔwyaa bɛ wa bãw ʋ tʋɔra nyɔwfʋ a, fʋ̃ʋ lɛb bãw ƴãw fãw a ʋ piwru ƴãw. Alɛ bɛ ɩ lɛ, ʋ na ɩ na a fʋ dɔ̃ dem ɩrɛ fʋ laar, a tẽ-kpɛ̃ɛ nɩbɛ ƴɛ̀rɛ a fʋ ƴɛ̀rʋ, ʋʋ so a nɩbɛ mɩ́ gbone taa. Ɛ́ a fʋ̃ʋ a, ʋ na ɩ na fʋ nyɛ̃ vĩ a lãw-kpɛ̃ɛ sɔgɔ.

¹²A fʋ pɔwyaa bɛ tɛr sɔ́r k'ʋʋ wul a ʋ vɩɛlʋ dɛb kãw za ɩ, bɩɩ k'ʋʋ ƴɛ̀rɛ nɩ a pɔwbɛ ɩ.

¹³Bʋ̃ʋ n'ʋ vɛ̃, mɛ̃ a lɛ a cibe na mɩ́ yire a bʋ̃-suuri pʋɔ a, lɛ n'a pɔw po-tuolu mɩ́ yire a pɔw pʋɔ.

¹⁴A dɛb po-to-ɩb sa n a pɔw ɩ-vla! Pɔw ƴãwnɛ nɩ vĩ, ɛ́ ɩrɛ bɛ tʋʋr zʋmɛ. WULU NA ƁÃ TAA A ZIIR ANŨU SOB A bome za Íre ɩ n kpɛ̃ɛ

¹⁵Ƴɛrɛŋa a, ɩ̃ na lɛb'a sɩ̃w a tɩɛrʋ a Sore tome ʋ na tõ a ƴãw. A ʋlɩ bom ɩ̃ na nyɛ̃ a, ɩ̃ na man ʋ na. A Sore ƴɛ̀rʋ n'a ʋ ír'ɩ bom za. A lɛ na yel a maal'a mɛ̃ a lɛ ʋ na bɔbr a.

¹⁶A mʋ̃tɔ̃w na nyɩwrɛ a jɩ́rɛ nɩ a bome za, ɛ́ a Sore bʋ̃-maalɩ paalɩ nɩ a ʋ yúor-vɩɛlʋ-danʋ.

¹⁷A Sore malkɩ mɩnɛ tɛɛ za kʋ̃ tʋ̃ɔ́ manɩ a ʋ nɔ-ɓãa yel-maalɩ ɛ: a al a Sore kpɛnʋ-za-sob na ɩ a be be kpɛmɛ, k'aa tẽ-daa tʋ̃ɔ́ kpɛmɛ be a ʋ yúor-vɩɛlʋ-danʋ pʋɔ a.

¹⁸A Sore mɩ́ jɩ́r'a tɩ tɔ a kʋ̃ɔ-kpɛ̃ɛ pɛr, nɩ a socir pʋ̃ɔmɩ za, ɛ́ ɩ a yel-sɔwlɩ na be a pʋɔ a, a sãá. Yel-mɩŋa za, a Naaŋmɩn-na-do-saa-bɛ-pɩɛl-a na tʋ̃ɔ́ na bãw bom za. A ʋ mimir be n a bãwfʋ na wule a daar a zu.

¹⁹Ʋ mɩ́ ɩ na bɛ bãw a daar na tɔl a nɩ a nɩdaar, ɛ́ ɩ a yel-sɔwlɩ pɛr ʋ sãá.

²⁰Tɩ̀ɛrʋ kãw za bɛ yire zaarɛ a ʋ zie ɩ, ƴɛ̀rʋ za bɛ sɔwlɛ a ʋ zie ɩ.

²¹A yel-bɛrɛ a ʋ yã-bãwfʋ na tɩ tɩɛrɩ a, ʋ cɔbrɩ a na ƴãw. Ʋlɛ n'ʋ a dɩta-pɛ-yome za. A ʋ yel-maalɩ za pʋɔ a, bom bɛ ƴãwnɛ dɔwlɛ ɩ, bom bɛ íre bɛrɛ ɩ, ʋʋ bɛ tɩ tɛr yã-wule kãw za yel-ɩra ɩ.

²²Nyɛ̃ a ʋ tõ-toni za na sɛwnɩ nɔ̃wfʋ a, tɩ lãwnɩ a vũu-zɛl pʋrɩ na sãá a!

²³À á ŋá za vʋʋrɛ na, ɛ́ na be kʋralɛ, sàwr a nʋɔr, bɛlɛ wa tɛr a yel-ɩra a.

²⁴A bome za cere nɩ ayiri yiri, a kãw nɩ a kãw mɩ́ de taa. A Sore bɛ maalɩ bom za ʋ tɩ cɛ ɩ,

²⁵bom ŋa mɩ́ ɩ n bom ŋa vɩɛlʋ ʋ sãá. Ãa n'ʋ na tʋ̃ɔ́ jɩ́r a ʋ yúor-vɩɛlʋ-danʋ tɩ sɛw?