Read Dagara, Northern Bɛn Sɩɩra 44 Bible Online

Bɛn Sɩɩra 44 - Dagara, Northern bible

Bɛn Sɩɩra 44

¹A SÃÀKƲM-KORE DANƲ Tɩ danɩ a tɩ sãàkʋm-kore, a nɩ-yée bɛ ŋa, mɛ̃ a lɛ bɛ na dɔw tu taa a.

²A Sore kʋ̀ bɛ nɩ yúor-vɩɛlʋ-danʋ na ɩ kpɛ̃ɛ a, a nɩ-bɛrɛ na zuo bɛ za a dɩta-pɛ-yome za a nɛbɛ. A koro za nɩ-bɛrɛ

³Na-mɩnɛ tɩ be n be so a bɛ naalʋ ten, nɩbɛ bɛ na tɩ bãwnɩ bɛ tɛr kpɛnʋ a, yã-wulbɛ na tɛr yúor a bɛ yã zũú a, yel-nyɛrbɛ a yée na yi a Naaŋmɩn ƴɛ̀rʋ bɛ na mɩ́ ƴɛ̀r a zũú a.

⁴Nɩ-bɛrɛ tɩ be n be, na bãw a bɛ nɩbɛ wulu a, na-biir na tɩ tɛr yã yaga za a, yã-bãwnbɛ na sɛb a bɛ tɩɛrʋ a, wul-wul-karɩ, a bãwfʋ gùrbɛ.

⁵Yiel-maalbɛ tɩ be n be, nɩbɛ na sɛb yielu ƴɛ̀r-bie a.

⁶Nɩbɛ tɩ be n be, a bɛ naalʋ na ɩ bɛ tɛr kpɛnʋ a, ɛ́ kpɩɛr a bɛ yie pʋɔ nɩ ƴã-ɓaarʋ a.

⁷Bɛ za tɩ nyɛ̃ nɩ ƴãwfʋ a bɛ daar, ɛ́ a nɩbɛ mʋʋrɛ bɛ a bɛ cãafʋ daar.

⁸Bɛ mɩnɛ yúor cãà na yi, a nɩbɛ cãà danɛ bɛ.

⁹Bɛ mɩnɛ mɩ̀ be n be, nɩr bɛ cãà tɛr a bɛ tɩɛrʋ ɛ. Bɛ na kpi wa tɔ ka a, a ɩ na mɛ̃ bɛ bɛ dãw be a. Bɛ vʋʋrɩ na ɛ́ bɛ bɛr bãwfʋ kãw ɛ, ɛ́ lɛ n'a a mɩ̀ ŋmɛ̃ a bɛ bibiir zie, a bɛ pùorí. A Ɩsɩrayɛl nɩbɛ nɩ-kore

¹⁰Ɛcɛ nyɛ̃ a tɩ sãàkʋm-kore a, a nɩ-vɩɛlɩ bʋʋrɛ bɛ ŋa a, nɩr bɛ yiiri a bɛ ɩ-vɩɛlɩ bɛr ɛ.

¹¹A bɛ bʋ̃-tɛrɩ lʋ̃ɔ nɩ a bɛ bʋʋrɛ, bɛ bɛr'ɩ gbã-dɩ-bom kʋ̀ a bɛ bibiir.

¹²A bɛ bʋʋrɛ tu n a wõ-taa, nɩ a bɛ bibiir mɩ̀, a bɛl zũú.

¹³A bɛ bʋʋrɛ na be n be kʋralɛ, bɛ na tɛr'ɩ yúor kʋralɛ.

¹⁴A bɛ ƴã-gamɛ gã nɩ nɩ ƴã-ɓaarʋ a bɔw pʋɔ, ɛcɛ a bɛ yúor na be n be kʋralɛ.

¹⁵Nɩ-bʋʋr-yoru na ƴɛ̀rɛ nɩ a bɛ yã-bãwfʋ ƴɛ̀rʋ, ɛ́ a lãw nɩbɛ danɛ bɛ. Enɔkɩ

¹⁶Enɔkɩ tɩ pɛlɩ nɩ a Sore pʋɔ, ʋ ɩ ʋ do a ʋ zie. Ʋ ɩ n nyɔ-vʋʋrʋ na lɩɛbɩ cɔw Naaŋmɩn a bãwfʋ, a nɩbɛ nãà wa dɔwr lɩɛrɛ taa a pùorí a ƴãw. Nowe

¹⁷Naaŋmɩn tɩ nyɛ̃ nɩ Nowe ʋ ɩ nɩ-mɩŋa mɩŋa. Bom za na tɩ sãw a lɛn daar a, a Nowe n'ʋ tɩ ɩ a nɩsaalbɛ bʋʋrɛ nɩ-pɛr. Ʋl zũú n'a nɩbɛ tɩ cãà cɛ a tẽw zu, a kʋ̃ɔ-paalʋ pùorí.

¹⁸A Sore tɩ maal'ɩ ʋ nɩ wõ-taa a nʋɔr kʋ, kɛ́ kʋ̃ɔ-paalʋ taa lɛb sãwnɛ bʋ̃-vʋʋra za ɩ. Abraham

¹⁹Abraham tɩ n'ɩ nɩ-bʋʋr-yaga yaga sãàkʋm-kpɛ̃ɛ, nɩr bɛ tɩ tɛr yúor man ʋ ɛ.

²⁰Ʋ tu n a Naaŋmɩn-na-do-saa-bɛ-pɩɛl-a wulu, ɛ́ sàw a wõ-taa ʋ na maal'ɩ ʋ a. Ʋ ƴãw nɩ a wõ-taa bãwfʋ a ʋ ƴã-ganɩ́, na ɩ a yʋɔr-ŋmãafʋ a. A Sore na tɩ ɩ ʋ kaa a lɛn daar a, ʋ nyɛ̃ na ʋ bɛ lɛb pùor ɛ.

²¹Alɛ n'a so ʋ tɩ pɔ yel ʋ, k'ʋʋ na maal'ɩ a nɩ-bʋʋrɛ a ʋ bʋʋrɛ ƴãw, k'ʋʋ na ɩ na a ʋ bʋʋrɛ yɛ̀r yãwmɛ mɛ̃ a tẽsɔw tanɛ a, k'ʋʋ na zɛw nɩ a ʋ bʋʋrɛ yúor, mɛ̃ a lɛ a ŋmar-bie na do saa, nɩ k'aa bɛ tẽw na yi n a Kʋ̃ɔ-kpɛ̃ɛ-kũu tɩ tɔ a Mediterane kʋ̃ɔ-kpɛ̃ɛ, ʋ na yi n a Efaratɩ man tɩ tɔ a tẽw baarʋ zie. Ɩzaakɩ nɩ Zakɔb

²²A Sore mɩ̀ tɩ ƴãw nɩ a nɔ-been nɛ kʋ̀ a Ɩzaakɩ, a ʋ sãà Abraham zũú. Al pùorí ʋ kaa ír Zakɔb, tu n ʋ a ʋ wõ-taa nɩ a ʋ maalʋ, a nɩsaalbɛ za maalʋ ƴãw. A Sore tɩ ɩ na ʋ bãwnɩ a ʋ na na maalɩ ʋ a. Ʋ tɩ kʋ̀ ʋ nɩ a tẽw ʋ na na so a, ʋ ŋma ʋ põ ziir pie nɩ ayi kʋ̀ a dɔwlʋ pie nɩ ayi. Moyiir

²³A Zakɔb bʋʋrɛ pʋɔ a, a Sore tɩ ɩ na nɩ-vla na pɛlɩ a nɩbɛ za pʋɔ a, yi.