Read Dagara, Northern Bɛn Sɩɩra 45 Bible Online

Bɛn Sɩɩra 45 - Dagara, Northern bible

Bɛn Sɩɩra 45

¹A Moyiir'ʋ. A Naaŋmɩn nɩ a nɩsaalbɛ za tɩ nɔ̃w ʋ na. Bɛlɛ wa tɩ́ɛrɛ a ʋ yele a, bɛ mɩ́ puor'ɩ a Naaŋmɩn barka.

²A Sore tɩ kʋ̀ ʋ nɩ yúor-vɩɛlʋ-danʋ na sɛw a malkɩ mɩnɛ dem a, ɛ́ ɩ k'ʋ ɩ kpɛ̃ɛ, ɩrɛ a Ɩsɩrayɛl dɔ̃ dem dɛ̃bɩ̃ɛ.

³A Moyiir na mɩ́ tɩ yel kɛ́ nɔ-ɓãa-yele na maal'a a, a Sore mɩ́ tɩ maalɩ a nɩ daadaalɛ, ɛ́ kʋ̀ ʋ fãw a na-mɩnɛ niŋé. Ʋ tɩ kʋ̀ ʋ nɩ a ʋ nɛ-ƴãwnɩ a ʋ nɩ-bʋʋrɛ ƴãw, ɛ́ wul ʋ a ʋ yúor-vɩɛlʋ-danʋ blã.

⁴A Moyiir tɩ ɩ n nɩr na bɛ lɛbr pùor ɛ́ ɩ nɩsaal-baalʋ a. Alɛ n'a so a Sore ka nũu ƴãw ʋ, ɛ́ kaa ír ʋ a nɩsaalbɛ za pʋɔ.

⁵Ʋ tɩ ɩ na a Moyiir wõ a ʋ kɔkɔr, ʋ tɩ tɛr ʋ na kpɛ n a zũzuwr sɛbla pʋɔ. Bɛ tɩ tori nɩ taa a be, ʋ kʋ̀ ʋ a nɛ-ƴãwnɩ, a wulu na ɩrɛ bɛ vʋʋrɛ a, ʋʋ tɩrɛ yã a. À ŋá n'a a Sore tɩ wul a wõ-taa tub a Zakɔb bʋʋrɛ, ɛ́ wul a Ɩsɩrayɛl nɩ-bʋʋrɛ a lɛ ʋ na yel a. Aarɔ̃

⁶Ʋ̀ zɛw nɩ Aarɔ̃, nɩ-sõw na ɩ mɛ̃ a Moyiir a, a ʋ yɛb na yi Levi dɔwlʋ pʋɔ a.

⁷Ʋ maal'ɩ ʋ nɩ wõ-taa na be be kʋralɛ a, ƴãw ʋ ɩ a ʋ nɩbɛ bàwr-maalɛ. A Sore ɩ na k'ʋ su kpar-son vɩɛlɩ vɩɛlɩ, nʋ̃ɔ̀ ɩrɛ ʋ, ʋ su ʋ nɩ dɛpaal-kparʋ.

⁸Ʋ su ʋ nɩ kpar-mawra, ɛ́ ƴãw ʋ a ʋ nɩ-kpɛ̃ɛnʋ bãwfʋ bome: lɛ̃ pɛn bʋ̃-suuri na mɩ́ be a pile a, kpar-wogo nɩ bàwr-maal-kara nyãa-kpale.

⁹Ʋ tɩ ƴãw nɩ bome kãw a ʋ kparʋ ƴãw viiri koli, a ɩ mɛ̃ girenadɩ tɩɛ wɔmɛ a, nɩ salm-zɩɛ gbelsɩ-cãpili na yãwmɛ a, a Aarɔ̃ wa gél gbɛ́r cen a, ãa ŋmɩɛr. À ŋá n'a a mɩ́ tɩ kone a Ŋmɩn-yir-kpɛ̃ɛ pʋɔ, sɩ̃wnɛ a Sore tɩ̀ɛrʋ a ʋ nɩbɛ na be a be a ƴãw.

¹⁰A Aarɔ̃ mɩ́ tɩ su n a kpar-sõw, kpar-bãw-mawrɛ na wob'ɩ salm-zɩɛ fomiwr, fomi-zɩɩr-mʋɔlɛ nɩ fomi-zɩɩr-ɓõɓõ a. Ɛ́ a ƴɛ̀rʋ-dɩb nyãa-zu-zʋbɛ be a zu-sɔw, tɛr a Uurim nɩ a Tumim[19].

¹¹Pɛn-mawrɛ n'ʋ tɩ wob a nyãa-zu-zʋbɛ ŋa nɩ fomi-zɩɩr-mʋɔlɛ. Bɛ tɩ ƴãw ʋ nɩ kʋsɛ-bi-nyɩlɩ pɩ̃ɛmɛ. A kʋsɛ-bi-nyɩlɩ á ŋá zu a, bɛ tɩ wi n a Ɩsɩrayɛl dɔwlʋ pie nɩ ayi yée mɛ̃ ŋmaarʋ-bʋ̃-ƴãwnɩ a, k'aa Naaŋmɩn tʋ̃ɔ́ mɩ́ cãà bãwnɩ a dɔwlʋ á ŋá. Kʋsɛ-bi-nyɩla za tɩ sawl'ɩ sawlʋ zie bãw-bãw-kara na maal'ɩ salm-zɩɛ a.

¹²A Aarɔ̃ zu-pɛn-vila ʋl zu a, salm-zɩɛ pɩ̃ɛmɛ kãw tɩ be n be, bɛ wi a ƴɛ̀r-bie á ŋá ƴãw: «Sore nɩ-sora». Ƴãwfʋ bãwfʋ tɩ n'ʋ, tõ-vla vla, mimie nʋ̃ɔ̀, pɩ̃ɛmɛ na vɩɛl ʋ za a.

¹³Nɩr bɛ de niwn nyɛ̃ a kpar-vɩɛlɩ á ŋá taabɛ a Aarɔ̃ ƴãw ɛ. Nɩr kãw za bɛ su a, a bɛ ɩ a ʋ bidɛbr nɩ a bɛ bʋʋrɛ na tɛr sɔ́r na suur a kʋralɛ a ɩ.

¹⁴A bàgɛ ʋ na mɩ́ tɩ maalɩ gb'a ayi a bibir za, ɛ́ a na ɩrɛ kʋralɛ a, a mɩ́ tɩ fɛr'a k'aa bàwr-maal-bome dɩ vũu pelẽpelẽ.

¹⁵Moyiir'ʋ tɩ cir a kãá-sõw ƴãw ʋ a zũú, ƴãw ʋ a Sore tome pʋɔ. Wõ-taa na be kʋralɛ a tɩ n'ʋ, a Aarɔ̃ nɩ a ʋ bʋʋrɛ ƴãw, wõ-taa na na cɛlɩ lɛn daar za a salom na be be a. A tɩ fɛr'a kɛ́ bɛ tone a Sore tome, bɛ na ɩ bàwr-maalbɛ a, ɛ́ mɩ́ ƴɛ̀r nɔ-vla kʋ̀ a nɩbɛ a ʋ yúor ƴãw.

¹⁶A Sore kaa na ír a Aarɔ̃ a nɩ-vʋʋrɩ za pʋɔ, k'ʋʋ mɩ́ maalɩ a nyɩw-a-za-bàwr kʋ̀ ʋ, k'ʋʋ mɩ́ de a tɩ-suur-zɔ̃-na-nyùur-vla-vla-a nɩ a parfɛ̃ kʋ̀ ʋ, ɛ́ tu a yel-bebe suur-páwfʋ tub a nɩbɛ ƴãw.

¹⁷Ʋ kʋ̀ n a Aarɔ̃ a fãw, a ʋ nɛ-ƴãwnɩ pɛ́ɛ íru ƴãw, k'ʋʋ mɩ́ wul a Ɩsɩrayɛl a lɛ a ʋl Sore na bɔbr a, ɛ́ caalɩ a nɩbɛ nɩ a ʋl Sore wulu.

¹⁸A wɛja-kpalɛ pʋɔ a, nɩbɛ na bɛ ɩ a ʋ yir dem a, tɩ ìr'ɩ a ʋ ƴãw, nyuur'ɩ ʋ, ɩ suur, su-yãyaar tɛwr. Datan nɩ Abiram nɩ a bɛ nɩbɛ tɩ nɛbɛ, de nɩ Koore nɩbɛ.

¹⁹A Sore tɩ nyɛ̃ a na, a bɛ pɛlɩ a ʋ pʋɔ ɩ, ʋ tɩ kʋ bɛ na pàw pɛr a ʋ su-yãyaar pʋɔ, maalɩ nɔ-ɓãa-yele ƴãw a ʋ vũu dɩ bɛ.

²⁰Ɛcɛ ʋ tɩ cãà na lɛb maalɩ a Aarɔ̃ ƴãw pʋɔ: ʋ tɩ kʋ̀ n ʋlɛ nɩ a ʋ bidɛbr a tẽsɔw bʋ̃-dan, bɛ na mɩ́ wa n a ɩ de-kʋ̀b bome a. A na ɩ à ŋá a, ʋ kʋ̀ ʋ nɩ bʋ̃-dɩrɩ yaga za.

²¹Bʋ̃ʋ n'ʋ vɛ̃, a bàwr-maalbɛ bʋ̃-dɩrɩ tɩ n'ɩ a bome bɛ na maal'ɩ a bàwr kʋ̀ a Sore a. Ʋlɛ n'ʋ kʋ̀ a a Aarɔ̃ nɩ a ʋ bʋʋrɛ.

²²Ɛcɛ bɛ bɛ tɩ tɛr tẽsɔw a Ɩsɩrayɛl tẽw pʋɔ ɩ, bɛ bɛ tɩ tɛr zi-sóra mɛ̃ a nɩbɛ a ɩ, bʋ̃ʋ n'ʋ vɛ̃, a Sore tɩ yel'ɩ a Aarɔ̃: «Mãa n'ɩ a fʋ bom, a fʋ zi-sóra.[20]» Pɩnasɩ

²³Eleazaar bidɛb, Pɩnasɩ, n'ɩ a sãàkʋm-kore ata sob a yúor na yi a, ʋ na bɛ tɩ ƴãw dɩ̃ɛnʋ a Sore zɔba tɛrʋ ƴãw a zũú. A lɛ a nɩbɛ na tɩ gaarɩ a, ʋ bɛ tɩ sàw a lɛ kʋ̀ bɛ ɩ, ɛ́ tɩ tɛr soci-kpɛ̃w vla, ɛ́ à à ŋá n'a ʋ tɩ páw a Sore suur-dɩ-kʋ̀b kʋ̀ a Ɩsɩrayɛl nɩbɛ.

²⁴Alɛ n'a so a Sore tɩ maal'ɩ ʋ ƴã-ɓaarʋ wõ-taa: ʋ ɩ a zi-sõw nɩ-kpɛ̃ɛ nɩ a ʋ nɩ-bʋʋrɛ lɩɛrɛ. À ŋá n'a ʋ tɩ kʋ̀ a bàwr-maal-kara ton a Pɩnasɩ nɩ a ʋ bʋʋrɛ a nʋɔr kʋ.

²⁵Ʋ̀ mɩ̀ tɩ maalɩ wõ-taa, ʋlɛ nɩ Daviir, Zese bidɛb, na yi Zuda dɔwlʋ pʋɔ a. Ʋ tɩ yel'a kɛ́ a naalʋ na mɩ́ yi n sãà lʋ̃ɔ a bidɛb, bidɛb-been yõ! Ɛcɛ a Aarɔ̃ gbã-dɩrʋ ʋl na mɩ́ lʋ̃ɔ nɩ a ʋ bʋʋrɛ za.

²⁶Ɛ́ a nyɩɩm, Aarɔ̃ bʋʋrɛ ɛ, ɩ̃ zɛlɛ nɩ a Sore k'ʋʋ paalɩ a nyɩ socie nɩ yã-bãwfʋ, kɛ̀ nyɩ mɩ́ dɩ a ƴɛ̀rʋ nɩ mɩnʋ kʋ̀ a ʋ nɩ-bʋʋrɛ. Ɛ́ a yel-vɩɛlɩ na ɩ nyɩɩm yõ dem a, nɩ a ƴãwfʋ nyɩ na so a, nyɩ taa wa bɔrɛ a bɛrɛ towtow a nɩdaar ɛ.