Read Dagara, Northern Bɛn Sɩɩra 47 Bible Online

Bɛn Sɩɩra 47 - Dagara, Northern bible

Bɛn Sɩɩra 47

¹Naaŋmɩn-ƴɛ̀r-manɛ Natan nɩ nãà Daviir A Samɩɛl pùorí a, Natan n'ʋ tɩ ɩ a naaŋmɩn-ƴɛ̀r-manɛ a Daviir daar.

²Mɛ̃ a lɛ bɛ na mɩ́ ír a nɛn-vɩɛlɩ zie na ɩ a nɛn-kãánɩ lãw-taa bàwr maalʋ daar a, lɛ n'a bɛ mɩ́ tɩ ír a Daviir a Ɩsɩrayɛl nɩbɛ pʋɔ, ʋ be ʋ tʋɔra.

³Ʋl zie a, gbẽw nyɔwfʋ tɩ ɩ n dɩ̃ɛnʋ, mɛ̃ bʋle nyɔwfʋ a, ɛ́ wɛ-dʋ̃-faa kãw bɛ na bʋɔlɛ ursɩ a nyɔwfʋ ɩ mɔlɛ, mɛ̃ péli-cãpile nyɔwfʋ a.

⁴Ʋ tɩ cãà na ɩ bi-pɔl lɛ, ɛ́ kʋ nɩ-kɛra-jarmam kãw[26], ír a Ɩsɩrayɛl nɩbɛ vĩ bɛr. Ʋ tɩ viir'ɩ a ʋ kpàlá ʋ na ƴãw kʋsɩɛr a, lɔb'ɩ a Golɩatɩ na tɩ ɩrɛ pɔ̀lʋ a lɔb.

⁵Bʋ̃ʋ n'ʋ vɛ̃, a Daviir tɩ zɛlɩ nɩ a Sore, a Naaŋmɩn-na-do-saa-bɛ-pɩɛl-a, ʋ ɩ a ʋ dʋrʋ nũu ʋ kpɛmɛ, k'ʋʋ ír zɛbr-nɩr na bãw zɛbr a bɛr, ɛ́ ɩ a ʋ nɩ-bʋʋrɛ lɛb tɛr fãw.

⁶Alɛ so bɛ tɩ ɩ ʋ tɛr yúor, dɔ̃ dem tùr-pie ʋ na kʋ a ƴãw. Bɛ tɩ danɩ ʋ na puori nɩ a Sore barka, ɛ́ ƴãw ʋ vɔblɩ a nãà-kpawʋɔ.

⁷Bʋ̃ʋ n'ʋ vɛ̃, ʋ tɩ kʋ n dɔ̃ dem na viiri koli ʋ a pàw pɛr, ʋ tɩ baar'ɩ a Filisɩtɛ̃ mɩnɛ, a ʋ dɔ̃ dem, ɛ́ sãw a bɛ kpɛnʋ bɛr wa tɔ dĩa.

⁸A ʋ tome za pʋɔ a, ʋ tɩ danɩ nɩ a Naaŋmɩn na ɩ sõw a, a Naaŋmɩn-na-do-saa-bɛ-pɩɛl-a, ɛ́ ír a ʋ yúor-vɩɛlʋ-danʋ. Ʋ tɩ yiel'ɩ yielu nɩ a ʋ pʋɔ za, ɛ́ nɔ̃w a ʋ Íre.

⁹Ʋ tɩ ƴãw nɩ yiel-yielbɛ a bàwr-maal-kuur niŋé, kɛ́ bɛ mɩ́ yiele yiel-vɩɛlɩ bɛ wone.

¹⁰Ʋ tɩ ɩ na a cuwr mɩ́ dɩ n dɛpaalʋ, ʋ tɩ cɔbrɩ a nɩ vla vla, kɛ́ bɛ tʋ̃ɔ́ mɩ́ danɩ a Sore yo-sõw, ɛ́ a zie wa dɛ wɛlɛ a, bɛ̃ɛ wone yielu nɩ bʋ̃-ŋmɩɛrɩ a zi-sõw pʋɔ.

¹¹A Sore de nɩ a Daviir sãwna bɛr a baarɩ, ɛ́ ɩ a ʋ kpɛnʋ kɛrɩ a nʋɔr kʋ. Ʋ maal'ɩ ʋ nɩ wõ-taa a naalʋ-dɩb ƴãw, ɛ́ kʋ̀ ʋ naalʋ-dà-kɔw-yúor a Ɩsɩrayɛl tẽw pʋɔ. Salomɔ̃

¹²A Daviir pùorí a, a ʋ bidɛb tɩ n'ʋ, nɩr a bãwfʋ na tɩ ɩ kpɛ̃ɛ a. A Daviir zũú a, a Sore tɩ ɩ na a ʋ nyɔ-vʋʋrʋ bɛ bãw damnʋ ɛ.

¹³A Salomɔ̃ naalʋ-dɩb daar a, ƴã-ɓaarʋ tɩ be n be. Naaŋmɩn tɩ ɩ na a ʋ tẽw tʋr-bɔwrɩ za gã zoom. À ŋá n'a a Salomɔ̃ tɩ tʋ̃ɔ́ ŋmãa Ŋmɩn-yir-kpɛ̃ɛ a Sore ƴãw, ʋ tɩ cɔbrɩ zi-sõw a ʋ ƴãw, ʋ be be kʋralɛ.

¹⁴Salomɔ̃ ɔ, nyɛ̃ fʋ na tɩ bãw yã a fʋ pɔ̀lʋ daar a, a yã tɩ paalɩ fʋ na mɛ̃ kʋ̃ɔ na paalɩ man a!

¹⁵A fʋ bãwfʋ tɩ pàw nɩ a tẽw, fʋ tɩ paalɩ ʋ na nɩ zʋkpaɩ a pɛ́ɛ na sɔwlɩ a.

¹⁶A fʋ yúor tɩ yi na tɩ ta a kʋ̃ɔ-kpɛ̃ɛ-sɔgɔ-tẽ-zãánɩ, ɛ́ a nɩbɛ nɔnɛ fʋ a ƴã-ɓaarʋ fʋ na tɩ tɩrɛ a ƴãw.

¹⁷A tẽ-daa za tɩ nɔnɛ nɩ a fʋ yielu, a fʋ zʋkpaɩ, a fʋ ƴɛ̀rʋ nɩ a fʋ sɔwfʋ.

¹⁸A Sore Naaŋmɩn yúor ƴãw, a ʋl bɛ na bʋɔlɛ a Ɩsɩrayɛl Naaŋmɩn a, fʋ bɔ n a salm-zɩɛ gbõ taa mɔlɛ lɛ mɛ̃ kur-pla mɔrmɔr a, ɛ́ bɔ a salm-pla ɓã taa mɔlɛ lɛ mɛ̃ kur-mɔrmɔr a.

¹⁹Ɛcɛ fʋ bɛr'ɩ a fʋ ƴã-gan kʋ̀ a pɔwbɛ, ʋ ɩ fʋ lɩɛbɩ a bɛ gbãgbaa.

²⁰Fʋ ɩ n à à ŋá sãw a fʋ yúor nɩ a fʋ bʋʋrɛ yúor, ɩ a Naaŋmɩn suur ìr a bɛ ƴãw. Bɛ kõ n a fʋ yãya-ɩb.

²¹Bʋ̃ʋ n'ʋ vɛ̃, a fʋ naalʋ-tẽw wa tɩ põ nɩ ziir ayi: naalʋ-tẽ-gaara yi a Efarayim dɔwlʋ pʋɔ.

²²Ɛcɛ a Sore bɛ tɩ lɛb bɛr a ʋ su-ɓaarʋ ɛ, ʋ bɛ tɩ bɛr a ʋ ƴɛ̀rʋ kãw za ʋ bɛ tu ɛ. Ʋ bɛ tɩ bɛr a ʋ nɩ-kaa-íra bʋʋrɛ bɛ baarɩ ɛ, ʋ bɛ tɩ bɛr a sob nɛ na tɩ nɔ̃w ʋ a bibiir bɛ kpi baarɩ ɛ. Mɛ̃ a lɛ ʋ na tɩ bɛr nɩbɛ bɛ cɛ a Zakɔb bʋʋrɛ pʋɔ a, lɛ n'a ʋ mɩ̀ tɩ kʋ̀ lɩɛrbɛ a Daviir, lɩɛrbɛ na yi a ʋ bʋʋrɛ pʋɔ a. Orobowam nɩ Zerobowam

²³Al pùorí, a Salomɔ̃ tɩ kpi na cen tɩ páw a ʋ sãà mɩnɛ, ɛ́ bɛr a ʋ bʋʋrɛ kãw a ʋ pùorí, nɩr na ɩ yãyabul a nɩbɛ pʋɔ ɛ́ bɛ tɛr yã zaa pʋrɩ a: bʋ̃ʋ n'ʋ vɛ̃, a Orobowam'ʋ tɩ yel a lɛ ʋ na na ɩ a, ƴãw a nɩbɛ gaarɩ. Ɛ́ Nevatɩ bidɛb, Zerobowam'ʋ tɩ ɩ a Saa-pɛrɩ́-gʋba-lowr dɔwlʋ maalɩ a yel-bier. Ʋ tɩ wul'ɩ a yel-bier sɔ́r a Efarayim[27] naalʋ-tẽw nɩbɛ.

²⁴A bɛ yel-bebe tɩ yãwmɛ yãwmɛ na tɩ sɛwnɩ a íru, bɛ ír bɛ a bɛ tẽw pʋɔ.

²⁵Bɛ tɩ ɩ n a ɩ-fa-bʋʋrɛ za, a dɔwrʋ wa tɩ lo a bɛ zu.