Read Dagara, Northern Bɛn Sɩɩra 48 Bible Online

Bɛn Sɩɩra 48 - Dagara, Northern bible

Bɛn Sɩɩra 48

¹Eli Lɛ n'a a naaŋmɩn-ƴɛ̀r-manɛ Eli tɩ ìr mɛ̃ vũu a, ɛ́ a ʋ ƴɛ̀rʋ dɩrɛ mɛ̃ mɔ̃-'lena vũu a.

²Ʋ tɩ ɩ na kɔ̃ lo a Ɩsɩrayɛl tẽw[28], ɛ́ a Sore ʋ na nɔnɛ vũuvũu a zũú, ʋ tɩ ɩ na a nɩbɛ siwri tɩ cɛ zaa blã.

³A Sore na yel a zũú a, a Eli tɩ piw nɩ a saa tɛr ʋ bɛ wa ɩ, ɛ́ mɩ́ ɩ a vũu yi a salom zu siw gb'a ata[29].

⁴Yúor bɛ n'ʋ fʋ páw ɛ, Eli i, nɩ a fʋ nɔ-ɓãa-yele fʋ na maalɩ a! Ãa n'ʋ na tʋ̃ɔ́ pɔrɛ k'ʋʋ ŋmɛ̃ na taa nɩ fʋ?

⁵A Naaŋmɩn-na-do-saa-bɛ-pɩɛl-a ƴɛ̀rʋ zũú a, fʋ ɩ n kũu ʋ lɛb vʋʋrɛ, ʋ yi a kpɩmɛ tẽw pʋɔ.

⁶A fʋ zũú n'a na-mɩnɛ yele sãw. Fʋ ír'ɩ nɩ-tɩbrɛ, bàalbɛ gadori zu, ɛ́ lɔb bɛ ƴãw a yàa-bɔw pʋɔ.

⁷A Sinayi a, a Orɛb tãw zu a, fʋ wõ n a Sore na yere fʋ ɛ́ ƴɛ̀rɛ ƴɛ̀rʋ-dɩb na kpɛmɛ a ƴɛ̀rʋ a.

⁸Fʋ cir'ɩ kãá ƴãw nãà zũú, k'ʋʋ tʋ̃ɔ́ tu a ƴɛ̀rʋ na dɩ a pùor, fʋ cir'ɩ kãá ƴãw naaŋmɩn-ƴɛ̀r-manɛ zũú, k'ʋʋ ɩ a fʋ lɩɛrɛ.

⁹Bɛ ɓáw fʋ na do n a salom zu, vũu sɛsɛb-pɩl pʋɔ, torko, wie na ɩ vũu a na tawr a zu.

¹⁰Mɛ̃ a lɛ a sɛb-sõw na yel a, fʋ cɔbr'a gù a bibir ʋl fʋ na na ɓãa a Sore suur, ʋʋ wa bãw ìr a. A fɛr'a kɛ́ fʋ ɩ sãà nɩ bidɛb lɛb kpɛ taa, ɛ́ fʋ lɛb cɔbrɩ a Zakɔb dɔwlʋ ƴãw.

¹¹Zu-nʋ̃ɔ̀ dem'ɩ a bɛlɩ dem na na nyɛ b a nɩ a bɛlɩ dem na na nɔ̃w a Sore gúr'ɩ a kũu gʋ̃ɔ a. Bʋ̃ʋ n'ʋ vɛ̃, a tɩɩm mɩ̀ a, tɩ nãà vʋʋrɛ na, bʋnʋ bɛ ka be ɩ. Elize

¹²A Eli na tɩ bɔr a sɛsɛb-pɩl pʋɔ baar'a, a ʋ vʋʋrʋ tɩ paal'ɩ a Elize. A Elize nyɔ-vʋʋrʋ daar a, ʋ bɛ tɩ màw nɩ-kpɛ̃ɛ kãw za niŋé ɩ, ɛ́ nɩr za bɛ tɩ tʋ̃ɔ́ ƴãw ʋ dɛ̃bɩ̃ɛ ɩ.

¹³Bom za bɛ tɩ be be kpɛmɛ zuo ʋ ɛ. A ʋ kũu gʋ̃ɔ tɛɛ za pʋɔ a, a ʋ ƴã-gan tɩ tõ n naaŋmɩn-ƴɛ̀r-manɛ ton.

¹⁴A ʋ nyɔ-vʋʋrʋ daar a, ʋ maal'ɩ yel-bɛ-dãw-nyɛrɩ, ɛ́ wa kpi baarɩ a ʋ tome ɩ nɔ-ɓãan.

¹⁵A na saa tɩ ɩ à à ŋá a, a Ɩsɩrayɛl nɩbɛ bɛ tɩ lɩɛbɩ a bɛ ɩb ɛ. Bɛ bɛ tɩ bɛr a bɛ yel-bebe maalʋ ɛ, wa tɩ ta a lɛ bɛ na ír bɛ a bɛ tẽw pʋɔ, ɛ́ diw bɛ yaarɩ a tẽ-daa za zu a. Nɩbɛ zaa pʋrɩlɛ tɛwr nɛbɛ tɩ cɛ, nɩ nãà na yi a Daviir yir pʋɔ a.

¹⁶A Zuda tẽw na-mɩnɛ bɛ mɩnɛ tɩ ɩ n a lɛ na pɛlɩ a Naaŋmɩn pʋɔ a, ɛ́ bɛ mɩnɛ maalɩ a yel-bebe dɔwlɩ dɔwlɩ taa. A nãà Ezekɩasɩ nɩ a naaŋmɩn-ƴɛ̀r-manɛ Ɩzayi

¹⁷A Ezekɩasɩ tɩ mɛ n dacine viiri koli a Zerizalɛm, ɛ́ taw a kʋ̃ɔ wa n a tẽ-kpɛ̃ɛ pʋɔ. Ʋ tɩ ƴãw na bɛ tuw a pìir nɩ kure tõ-tõ-bome, ɛ́ mɛ a kʋ̃ɔ ƴãwfʋ ziir.

¹⁸A ʋ daar, a nãà Senakerib tɩ wa na wa zɛb'ɩ a Zerizalɛm. Ʋ tɩ tõ n a sojarɩ nɩ-kpɛ̃ɛ na mɩ́ be a ʋ zie a, ʋ tɩ gùr nũu cɔw a Sɩyɔ̃, ɛ́ ɩ pɔ̀l-ɩb bɛ dɩ vuo ɩ.

¹⁹Lɛ n'a a socie nɩ a nuru tɩ màwr a Zerizalɛm tẽw pʋɔ ɛ́ 'wɔbrʋ 'wɔbr a nɩbɛ mɛ̃ pɔw na ta dɔwfʋ a.

²⁰Bɛ tɩ zɛlɩ nɩ a Sore na ɩ su-ɓaarʋ tɛwr a sõwfʋ, bɛ tɩ tur'ɩ a nuru cɔw ʋ[30]. A Naaŋmɩn na ɩ sõw, be a salom zu a, tɩ sɔw bɛ nɩ fɔ̃wlɛ, ʋ tɩ tu n Ɩzayi faa bɛ.

²¹A Sore tɩ zɛb'ɩ nɩ a Asiiri tẽw dem a bɛ zɛbr-laɩ pʋɔ, ɛ́ a ʋ malkɩ kʋ bɛ pàw pɛr.

²²Bʋ̃ʋ n'ʋ vɛ̃, a Ezekɩasɩ tɩ ɩ n a lɛ na pɛlɩ a Sore pʋɔ a, ɛ́ tɩ tuur a ʋ sãàkʋm-kʋra Daviir sɔ́r bɛ lɛbr pùor ɛ, mɛ̃ a lɛ a naaŋmɩn-ƴɛ̀r-man-kpɛ̃ɛ Ɩzayi, a bʋ̃-nyɛrɩ na bɛ tɛr bʋnʋ a, na tɩ yel kʋ̀ ʋ a.

²³A ʋlɩ daar nɛ, a Ɩzayi tɩ ɩ na a mʋ̃tɔ̃w tɩ̃wnɩ pùor, ʋʋ ɩ a nãà vʋʋrɩ tɔl yɩ̃ɛ́.

²⁴A Vʋʋrʋ kpɛnʋ zũú a, ʋ tɩ de nɩ niwn nyɛ̃ a zie baarʋ, ɛ́ mɔwlɩ a Sɩyɔ̃ tẽw wahala dem.

²⁵Ʋ tɩ de nɩ niwn yel a ʋlɩ bom nɛ na na ɩ, ɛ́ a zie bãw baarɩ a, nɩ a yele na cãà sɔwlɩ, ɛ́ a wa bãw ta a.