Read Dagara, Northern Bɛn Sɩɩra 50 Bible Online

Bɛn Sɩɩra 50 - Dagara, Northern bible

Bɛn Sɩɩra 50

¹A bàwr-maal-kara Sɩmʋ̃ A bàwr-maal-kara Sɩmʋ̃ na tɩ ɩ Onɩasɩ bidɛb a n'ʋ tɩ maalɩ a Sore yir ƴãw, a ʋ nyɔ-vʋʋrʋ daar. A ʋ daar'a ʋ tɩ ɩ a Ŋmɩn-yir-kpɛ̃ɛ ʋ kpɛmɛ dɔwlɩ.

²Ʋ tɩ ƴãw na bɛ bin a dacin na kɛrɩ gb'a ayi a pɛr, a dacin na viiri koli a Ŋmɩn-yir-kpɛ̃ɛ pɛr na sʋ̃ɔ́ do a.

³A ʋ daar'a bɛ tɩ tuw a kʋ̃ɔ ƴãwfʋ zie, bɔw na ɩ kpɛ̃ɛ sɛw a Ŋmɩn-yir-kpɛ̃ɛ-kʋra sɩ̃w-kpɛ̃ɛ a.

⁴A na tɩ ɩ ʋ tɩɛrʋ k'ʋʋ piw a ʋ nɩbɛ tɛr a loba ƴãw a, ʋ tɩ cɔbr'ɩ a tẽ-kpɛ̃ɛ ʋ kpɛmɛ, bɛ nãà wa piw ʋ a ƴãw.

⁵Nyɛ̃ ʋ na mɩ́ tɩ vɩɛl vɩɛl a, a lɛn daar ʋ na mɩ́ tɩ yi a zi-sõw-za-zi-sõw pʋɔ cere viire kole a ŋmɩn-yir-kpɛ̃ɛ a!

⁶Ʋ mɩ́ tɩ ŋmɛ̃ na taa nɩ a biɓaara ŋmar-bir na nyɩwrɛ a zũzuwe pʋɔ a, mɛ̃ a cuw a lɛn daar ʋ na mɩ́ ɩ a ɓil a.

⁷Ʋ mɩ́ tɩ ɩ na mɛ̃ a mʋ̃tɔ̃w na mɩ́ caalɛ a Naaŋmɩn-na-do-saa-bɛ-pɩɛl-a yir-kpɛ̃ɛ a, bɩɩ a sa-gõguo na mɩ́ nyɩwrɛ a zũzuwe pʋɔ a.

⁸Ʋ mɩ́ tɩ ŋmɛ̃ na taa nɩ váar kãw bɛ na bʋɔlɛ loriye-oroozʋ a puuru, a sɩ̃ɛ-kpɛ-paala, ŋmɛ̃ taa nɩ lisi na búle bul-nʋɔr ƴãw a, ŋmɛ̃ taa nɩ Libã tɩɩr a tʋlʋ daar.

⁹Ʋ mɩ́ tɩ ɩ na mɛ̃ a tɩ-suur-zɔ̃-na-nyùur-vla-vla-a na dɩrɛ a bàwr-maal-kuur zu a, mɛ̃ salm-zɩɛ koli-nyúura na ƴãw kʋsɛ-bi-nyɩlɩ bʋʋrɛ bʋʋrɛ pɩ̃ɛmɛ a.

¹⁰Ʋ mɩ́ tɩ ɩ na mɛ̃ olivʋ tɩɛ na ɩ wɔmɛ tɛwr a, bɩɩ mɛ̃ sɩpɩrɛ tɩɛ[37] na kɛrɩ do tɩ tɔ a zũzuwe a.

¹¹Ʋ na mɩ́ tɩ su a ʋ bàwr-maal-kara kparʋ a, ʋ na mɩ́ tɩ su a ʋ dɛpaal bome dúor'ɩ a Naaŋmɩn bàwr-maal-kuur pɛr a, ʋ mɩ́ tɩ paal'ɩ a Ŋmɩn-yir-kpɛ̃ɛ davʋrɩ nɩ vɩɛlʋ.

¹²Ʋ mɩ́ àr'ɩ ƴẽwn a bàwr-maal-kuur vũu pɛr dier a bàwr-maal nɛn-kaa-íri a bàwr-maalbɛ nuru pʋɔ. A ʋ yɛbr bàwr-maalbɛ mɩ́ tɩ ŋmãa nɩ gʋɔ jil ʋ, mɛ̃ Libã tẽw sɛɛdɩr tɩ-sɛlɩ a, mɛ̃ kpãkparmɛ tɩɩr sɩɩr na jil koli ʋ a.

¹³A bàwr-maalbɛ na ɩ a Aarɔ̃ bʋʋrɛ a, tɩ be n be bɛ za, su a bɛ kpar-vɩɛlɩ vɩɛlɩ, ƴãw a de-kʋ̀b bom a bɛ nuru pʋɔ a Sore ƴãw, a Ɩsɩrayɛl nɩbɛ lãw za niŋé.

¹⁴A Sɩmʋ̃ mɩ́ tɩ báa na tõ a bàwr-maal-tome a bàwr-maal-kuur pɛr, cɔbrɩ a de-kʋ̀b bome a Naaŋmɩn-na-do-saa-bɛ-pɩɛl-a ƴãw, a kpɛnʋ-za-sob.

¹⁵Ʋ mɩ́ tɩ dɔl'ɩ a nũu cɔw a koli-nyúura, cir a divɛ̃ na ɩ a divɛ̃ tɩɛ wɔmɛ zɩ̃ɩ a ƴãw, ɛ́ cir a ƴãw a bàwr-maal-kuur sɩɛ ƴãw, a ɩ parfɛ̃ na nyùur vla vla a, a Naaŋmɩn-na-do-saa-bɛ-pɩɛl-a ƴãw, a tẽ-daa Nãà ƴãw.

¹⁶Lɛ n'a a bàwr-maalbɛ mɩ́ tɩ ŋmɩɛr cɛlsɩ, pɛblɛ a bɛ kure wɩɩr, ɛ́ ɩrɛ gɔmɛ na yire kpɛ̃w kpɛ̃w za a, k'aa nɩ-bʋʋrɛ cãà bãwnɩ a Naaŋmɩn-na-do-saa-bɛ-pɩɛl-a.

¹⁷Daadaalɛ, a nɩbɛ za mɩ́ tɩ lãw na lo gbĩ dume gũu tɩ tɔ tẽw, puori a Sore, a kpɛnʋ-za-sob, a Naaŋmɩn-na-do-saa-bɛ-pɩɛl-a.

¹⁸Al pùorí, a yiel-yielbɛ mɩ́ tɩ cɛ n danʋ yielu. Yielu na yiele kpɛ̃w kpɛ̃w za, ɛ́ yiele bàalʋ bàalʋ a mɩ́ tɩ paal'ɩ a Ŋmɩn-yir-kpɛ̃ɛ.

¹⁹A nɩbɛ mɩ́ tɩ zɛlɛ nɩ a Sore yãayãa, a Naaŋmɩn-na-do-saa-bɛ-pɩɛl-a, tɛr'ɩ a puoru a Su-ɓaarʋ-za-sob niŋé, ɛ́ gù a yele tɩ baarɩ, ɛ́ gù a tome na tõ a Sore puoru ƴãw a nʋɔr tɩ kʋ.

²⁰Lɛ n'a a Sɩmʋ̃ mɩ́ tɩ yi a bàwr-maal-kuur pɛr siw. Ʋ mɩ́ tɩ zɛw nɩ a nuru a Ɩsɩrayɛl nɩbɛ lãw za zu, ƴɛ̀r'ɩ a ʋ nʋɔr kʋ̀ bɛ a Sore maalʋ. À à ŋá n'a a mɩ́ tɩ ɩ ʋ yúor, a Sore yúor bʋɔlʋ ƴãw[38].

²¹A lãw nɩbɛ mɩ́ tɩ lɛb'a maal lo gbĩ dume gũu tɩ tɔ tẽw, kɛ́ bɛ de a Naaŋmɩn-na-do-saa-bɛ-pɩɛl-a maalʋ. Puor-pɛ-baara

²²Ƴɛrɛŋa a, nyɩ puori a tẽ-daa Naaŋmɩn yãanɩ, ʋl na maalɛ yel-bɛrɛ a ziir za a. Tɩ na dɔw wa tɔ dɩ̃a a, ʋ ɩ na tɩ kɛ̀rɩ, ʋʋ ɩrɛ a tɩ zie tu n a ʋ su-ɓaarʋ.

²³Ʋ̀ kʋ̀ tɩ soci-nʋ̃ɔ̀, ɛ́ a tɩ nyɔ-vʋʋrʋ daar a ƴã-ɓaarʋ be be, mɛ̃ a koro za a Ɩsɩrayɛl tẽw a!

²⁴Ʋ́ tɛr a ʋ su-ɓaarʋ a tɩ ƴãw kʋralɛ, ɛ́ faarɛ tɩ a tɩ bibi-vɩɛrɩ za nyɔ-vʋʋrʋ pʋɔ! Nɩ-bʋʋrɛ ata kãw bɛ na bɛ nɔnɛ a

²⁵Nɩ-bʋʋrɛ ayi kãw be n be ɩ̃ bɛ nɔnɛ towtow ɛ, ɛ́ a ata sob bɛ ɩ nɩ-bʋʋrɛ mɩ́ ɛ.

²⁶Bɛlɛ n'ɩ a bɛl na kpɩɛr a Seyiir tãw zu a, nɩ a Filisɩtɛ̃ mɩnɛ, nɩ a dãbole bɛl na kpɩɛr a Sɩsɛm a[39]. A Bɛn Sɩɩra nɩ a ʋ sɛbɛ

²⁷Yeezu na yi Zerizalɛm, ɛ́ ɩ Sɩɩrakɩ bidɛb nɩ Eleazaar yãw a n'ʋ sɛb wulu na tɛr yã-bãwfʋ nɩ bãwfʋ yaga a, ƴãw a sɛbɛ ŋa pʋɔ. A yã-bãwfʋ na paalɩ a ʋ socir a, ʋ ɩ na a cir mɛ̃ saa a.

²⁸Zu-nʋ̃ɔ̀ sob'ɩ sob nɛ na na tɛr a wulu á ŋá kanɛ kʋralɛ a! Sob nɛ na na ƴãw a a ʋ socir pʋɔ a na lɩɛb'ɩ yã-bãwnɛ.

²⁹Ʋlɛ wa tuur a a, ʋ na tɛr'ɩ fãw a yele za pʋɔ, a Sore zɔba na na ɩ a ʋ sɔ́r a ƴãw.