Read Dagara, Northern Bɛn Sɩɩra 51 Bible Online

Bɛn Sɩɩra 51 - Dagara, Northern bible

Bɛn Sɩɩra 51

¹YEL-DƆWLƖ Sɩɩrakɩ bidɛb Yeezu puoru Ɩ̃ bɔbr'a k'ɩ̃ɩ puori fʋ a barka, Sore e, fʋ̃ʋ na ɩ Nãà a. Ɩ̃ bɔbr'a k'ɩ̃ɩ danɩ fʋ, Naaŋmɩn ɩ̃ faarɛ ɛ. Fʋ̃ʋ n'ʋ ɩ̃ puore a barka,

²bʋ̃ʋ n'ʋ vɛ̃, fʋ gù m a, fʋ sõw mɛ̃ na, ɛ́ faa mɛ̃ a kũu pʋɔ. Fʋ ír mɛ̃ na bɛr a gɛgɛrɩ bɛra pʋɔ, a zir-ŋmarbɛ nɛ̃ɛ́. A ɩ̃ dɔ̃ dem niŋé a, fʋ sõw mɛ̃ na ɛ́ faa mɛ̃.

³Fʋ wul'ɩ a fʋ su-ɓaarʋ na bɛ dɩ vuo a, fʋ tu n a lɛ a fʋ yúor na yi a, faa mɛ̃ a nɩbɛ bɛ ŋa na tɩ bɔbr kɛ́ bɛ kʋ m a nuru pʋɔ. Fʋ faa mɛ̃ nɩ kpɩɛrʋ yaga na tɩ ta m a pʋɔ,

⁴vũu na tɩ jil koli mɛ̃ ɩ̃ bɛ tʋɔr vʋʋrɛ a pʋɔ, vũu ɩ̃ na bɛ tɩ gbɔw a pʋɔ.

⁵Fʋ ɩ na ɩ̃ bɛ siw a kpɩmɛ tẽ-zulu pʋɔ ɩ, fʋ faa mɛ̃ nɩ a ƴɛ̀r-faar ƴãw, a ƴɛ̀r-ziri ƴãw,

⁶a nɔ-faa pime ƴãw. Ɩ̃ tɩ pɩɛl'ɩ a kũu, ɩ̃ tɩ siw na tɩ ta a kpɩmɛ tẽw dɩ̃dɔrɩ́.

⁷A ɩ̃ dɔ̃ dem tɩ jil mɛ̃ nɩ a ziir za, ɛ́ nɩr za bɛ tɩ ka be na sõw mɛ̃ ɩ. Ɩ̃ tɩ tɩɛrɛ na ƴãwn a nɩsaalbɛ sõwfʋ ƴãw, ɛcɛ a bɛ tɩ ka be ɩ!

⁸Lɛ n'a ɩ̃ tɩ lɛb tɩɛrɩ a fʋ su-ɓaarʋ, Sore e, nɩ a fʋ nɔ̃wfʋ ɩb a koro kãw za: kɛ́ fʋ mɩ́ faa nɩ a bɛlɩ dem na tɩ́ɛrɛ fʋ a, kɛ́ fʋ mɩ́ ír bɛ na bɛr a po-to-dem nuru pʋɔ.

⁹Ɩ̃ɩ tɩ ɩ na a ɩ̃ yãayãa zɛlʋ yi a tẽw ŋa zu do wa a fʋ zie, ɩ̃ zɛlɩ fʋ na kɛ́ fʋ faa mɛ̃ a kũu pʋɔ.

¹⁰Ɩ̃ bʋɔlɩ fʋ na yel: «Sore e, fʋ̃ʋ n'ɩ a ɩ̃ sãà, taa zawrɛ mɛ̃ bɛrɛ a kpɩɛrʋ bibir, ɩ̃ na be a pɔ̀lʋ dem niŋé, bɛ tɛr sõwfʋ a ɩ.

¹¹Ɩ̃ na sʋ̃ɔ̀nɛ nɩ a fʋ yúor, ɛ́ kʋ̃ bɛr ɛ, ɩ̃ na yiele na puore nɩ fʋ barka.» Lɛ n'a fʋ tɩ sàw de a ɩ̃ puoru,

¹²ɛ́ faa mɛ̃ a wɛb ɩ̃ nãà wɛ a pʋɔ, ɛ́ bɛ sàw ɩ̃ nyɛ̃ a kpɩɛrʋ daar ŋa ɩ. Alɛ n'a so ɩ̃ bɔbr k'ɩ̃ɩ puori fʋ a barka, Sore e, ɛ́ danɩ fʋ, ɛ́ manɩ a vla za fʋ na maalɩ mɛ̃ a. A yã-bãwfʋ bɔb

¹³Ɩ̃ na tɩ cãà ɩ a pɔlbile, bɛ yɔ sɛr a, ɩ̃ tɩ càar'a bɔ a yã-bãwfʋ a ɩ̃ puoru pʋɔ.

¹⁴Ɩ̃ puor'ɩ a ŋmɩn-yir-kpɛ̃ɛ niŋé a ʋ ƴãw, ɩ̃ɩ na bɔ ʋ na tɩ ta a ɩ̃ nyɔ-vʋʋrʋ baarʋ daar.

¹⁵Ʋ na wa kɛ̀rɩ baarɩ mɛ̃ divɛ̃ tɩɛ wɔm na mʋ̃ɔnɛ a, ʋ ɩ n a ɩ̃ nʋ̃ɔ̀ yib zie. Ɩ̃ lo n a sɔr-vla, ɩ̃ tu n a ʋ gbɛ́ɛ a ɩ̃ pɔ̀lʋ daar za.

¹⁶A blãlɛ ɩ̃ na bɛr wõ ʋ a, ɩ̃ páw ʋ na, ɩ̃ɩ páw nɩ wulu yaga a ɩ̃ ƴãw.

¹⁷A yã-bãwfʋ zũú n'a ɩ̃ cen tɔl nidaa, alɛ so ɩ̃ na ír a sob nɛ na kʋ̀ m a yã-bãwfʋ a yúor.

¹⁸Ɩ̃ yel'a k'ɩ̃ɩ na tu n a yã-bãwfʋ pùor, ɩ̃ mʋ̃ɔ nɩ mimir bɔ a vla, ɩ̃ɩ bɛ be za na yel kɛ́ mãa tɩ bãw kɛ́ lɛ ɩ.

¹⁹Ɩ̃ mɔ̃ nɩ kpɛ̃w kpɛ̃w za k'ɩ̃ɩ tʋ̃ɔ́ tɛr a yã-bãwfʋ, ɩ̃ cɛlɩ nɩ be vla tu a wulu pùor. Ɩ̃ zɛw nɩ a nuru cɔw a salom, ɛ́ a sãwna ɩ̃ na sãw ʋ, ɛ́ bɛ bãwnɩ a a, ɩ m kpɩɛrʋ yaga.

²⁰Ɩ̃ lɩɛb'ɩ niwn cɔw a yã-bãwfʋ, ɩ̃ɩ na maal tɛr ɩ̃ tʋɔra vɩɛl a, ɩ̃ nyɛ̃ ʋ na. Ʋlɛ n'ʋ ɩ ɩ̃ tɛr a yã a pɛr-tib daar za. A na ɩ lɛ a, ʋ kʋ̃ zawrɩ mɛ̃ bɛr towtow ɛ.

²¹A ʋ páwfʋ vʋla tɩ tɛr mɛ̃ nɩ yaga za, alɛ so ɩ̃ páw a bʋ̃-vla vla ŋa.

²²A Sore ɩ na k'ɩ̃ bãw a ƴɛ̀rʋ, a ɩ a ɩ̃ tɔnɛ, ɛ́ a bãwfʋ ŋa n'ʋ ɩ̃ bɔbr k'ɩ̃ɩ danɛ nɩ ʋ.

²³Nyɩ taw pɩɛlɩ mɛ̃, nyɩɩm na bɛ bãw bom za a, nyɩ kpɛ a yã-bãwfʋ nakoli.

²⁴Bʋnʋ ƴãw n'a nyɩ na cãà cɛlɩ ɛ́ bɛ tɛr ʋ, ɛ́ a ʋ vʋla kʋrɛ nyɩ?

²⁵Ɩ̃ yere nɩ kpɛ̃w kpɛ̃w za à ŋá: «Nyɩ dà a yã-bãwfʋ, ɛ́ ta dà n libir ɛ.

²⁶Nyɩ sàw a ʋ dàa dĩ a nyɩ nyuru, ɛ́ nyɩ de a ʋ wulu. Nyɩ na nyɛ̃ ʋ na ʋ pɩɛlɩ nyɩ yɩ̃ɛlɛ.

²⁷Nyɩ nyɛ̃ nɩ nɩ mimir, k'ɩ̃ɩ bɛ hanɩ yaga ɛ́ bãw nyɛ̃ pɩ̃ɛnʋ na ɩ kpɛ̃ɛ a ɩ.

²⁸Nyɩ de a ɩ̃ wulu, nyɩ dà ʋ nɩ libi-bɛrʋ, ʋʋ na ɩ na nyɩ páw salm-zɩɛ yaga.»

²⁹Nyɩ cɩlɛ a Sore su-ɓaarʋ ƴãw, nyɩ ta zɔrɛ vĩ a ʋ danʋ ƴãw ɛ.

³⁰Nyɩ tõ a nyɩ ton ɛ́ a daar na ƴãw a bãw ta, a Sore na kʋ̀ nyɩ nɩ a nyɩ sã-ya a daar wa ta a.