Read Dagara, Northern Bɛn Sɩɩra 8 Bible Online

Bɛn Sɩɩra 8 - Dagara, Northern bible

Bɛn Sɩɩra 8

¹A maal-ɩrɛ Ta zɛbr'ɩ nɩr na dɩ nɩ-kpɛ̃ɛnʋ a ɩ, fʋ nãà mab'a lo a ʋ nuru pʋɔ.

²Ta tɛr ƴɛ̀rʋ nɩ nɩr na kpɛ naalʋ a ɩ, fʋ nãà mab'a bɛ tɛr bir a ʋ zie ɩ. Bʋ̃ʋ n'ʋ vɛ̃, a salm-zɩɛ ɩ na nɩbɛ yaga bɔr, ʋ mɔ̃ mɩ̀ sãw nɩ na-mɩnɛ bɛ mɩnɛ socie.

³Ta zɛbr'ɩ ƴɛ̀r-yaga sob ɛ, ta suur dàar ƴãwn a ʋ vũumí ɛ.

⁴Ta dɩ̃ɛnɛ nɩ nɩr bɛ na bɛ wul vla a ɩ, ʋ nãà mab'a tʋ a fʋ sãàkʋm-kore.

⁵Ta yere nɩr na sàw a ʋ sãwna a ɩ. Bãwnɩ a tɩ za na ɩ sãwnɩ dem a.

⁶Ta jewre nɩr, ʋ na kor a ƴãw ɛ, bʋ̃ʋ n'ʋ vɛ̃, bɛ mɩnɛ mɩ̀ kòre nɩ a tɩ pʋɔ.

⁷Ta cɩlɛ nɩr na kpi a ƴãw ɛ, bãwnɩ a tɩ za na na kpi a.

⁸Ta jewre a yã-bãwnbɛ wulu ɛ, tɛr a bɛ zʋkpaɩ zanɛ. Bʋ̃ʋ n'ʋ vɛ̃, bɛl zie n'a tɩ páwr a wulu, ɛ́ zanɛ a nɩ-bɛrɛ tome tob.

⁹Taa zawrɛ a dɛb-nyamɛ wulu ɛ, a bɛl mɩ̀ a, a bɛ sãà mɩnɛ zie n'a bɛ pàw ʋ. A bɛ zie n'a fʋ na zanɩ a bome bãwfʋ, ɛ́ mɩ́ tɛr sɔwfʋ gù n a daar.

¹⁰Taa damnɛ a nɩsaal-faa ɩ, fʋ nãà mab'a gbɔw vũu na na tʋ̃ɔ́ dɩ b a.

¹¹Ta bà gbɛ́r nɩr na bɛ ƴãwnɛ nɩbɛ a niŋé ɩ, ʋ nãà mab'a ƴãw fʋ ƴɛ̀r dãbol-ƴɛ̀rʋ.

¹²Ta pɛ̃w libir nɩr na kpɛmɛ zuo fʋ a ɩ, ɛ́ fʋ̃ʋ wa pɛ̃w ʋ a, sàw k'aa libir ŋa wɛ na.

¹³Ta yel kɛ́ fʋ na lɩɛrɩ na ya san na gãw a fʋ fãw a ɩ, ɛ́ fʋ̃ʋ wa ɩ a lɛ a, fʋ̃ʋ gù a yab.

¹⁴Ta tɛr ƴɛ̀rʋ nɩ ƴɛ̀r-dɩrɛ ɩ, bʋ̃ʋ n'ʋ vɛ̃, a ƴɛ̀rʋ na dɩ na kpɛ ʋ, a ʋ tõ-nʋɔr zũú.

¹⁵Ta lãw lo n pʋra-sob sɔ́r ɛ, ʋ nãà mab'a ƴãw fʋ kpɩɛrʋ yaga. Bʋ̃ʋ n'ʋ vɛ̃, ʋ na ɩrɛ nɩ lɛ za ʋ na bɔbr a, ɛ́ a ʋ yãya-ɩb ɩ fʋ lãwnɩ ʋ kpi.

¹⁶Ta zɛbr'ɩ po-to-fãw nɩr ɛ, ta páw ʋ cen zie nɩr za na bɛ ka be a ɩ. Bʋ̃ʋ n'ʋ vɛ̃, ʋl zie a, nɩr kʋb bɛ ɩ bom ɛ. Ʋ na tɩ lo n a fʋ zu, a be fʋ na kʋ̃ tʋ̃ɔ́ kõ bʋɔlɩ nɩr a.

¹⁷Ta ɩ fʋ̃ʋ nɩ gẽgemi sob wõ taa bom ƴãw ɛ, bʋ̃ʋ n'ʋ vɛ̃, ʋ kʋ̃ tʋ̃ɔ́ sɔwlɩ a nyɩ ƴɛ̀rʋ ɛ.

¹⁸Ta maalɩ yel-sɔwla kãw za sãan niŋé ɩ, bʋ̃ʋ n'ʋ vɛ̃, fʋ bɛ bãw a lɛ ʋ na na ɩ a ɩ.

¹⁹Ta dɛ mɩ́ wul nɩr za a fʋ pʋɔ ɩ, nɩr bɛ puore fʋ yãanɩ a al ƴãw ɛ.