Read Dagara, Northern Ɩzayi 1 Bible Online

Ɩzayi 1 - Dagara, Northern bible

Ɩzayi 1

¹Amɔtɩsɩ bidɛb, Ɩzayi, yel-nyɛra ʋ na nyɛ̃ càar'ɩ Zuda naalʋ-tẽw nɩ Zerizalɛm tẽ-kpɛ̃ɛ, a Zuda tẽw na-mɩnɛ Ozɩasɩ, Yotam, Akaazɩ nɩ Ezekɩasɩ daar a[1].

²Bɛrɛ wone, salom i! Tẽw i, ƴãw tobr! A Sore n'ʋ ƴɛ̀rɛ: “Ɩ̃ guol'ɩ bibiir bɛ bàa ɩ nɩ-bɛrɛ, ɛcɛ bɛ gaarɩ nɩ a ɩ̃ zu.

³Náab mɩ́ bãw nɩ a sob nɛ na so ʋ a, ɛ́ bõw bãw a dʋ̃-laa ʋl pʋɔ a ʋ sore na ƴãwnɛ ʋ a dɩb a. Ɛcɛ a Ɩsɩrayɛl bɛ bãw bom za ɩ, a ɩ̃ nɩ-bʋʋrɛ bɛ bãw bom za pɛr ɛ.”

⁴Nyɛ̃ baw-bio a! Nɩ-bʋʋr-yel-bebe dem, nɩ-bʋʋrɛ na tuo sãwna a, yel-fa-maalbɛ bʋʋrɛ, bibiir na sãw bɛ za a! Nyɩ̀ zawr'ɩ a Sore bɛr, nyɩ̀ jewr'ɩ a Ɩsɩrayɛl Naaŋmɩn na ɩ sõw a, nyɩ̀ lɩɛb'ɩ zikur cɔw ʋ.

⁵Nyɩn lowr'a bɛ na lɛb ŋmɛ nyɩ, nyɩɩm na cãà gaarɩ a? A zu ɩ n natɩɛ ʋ za, a socir za ɩ n bàal.

⁶A gbɛ́ɛ tɩ tɔ a zu a, zie za bɛ cɛ ɩ. Wʋlɛ n'ɩ a ziir za, ŋmɩɛrʋ ziir na sãá a nɩ na-tɩ-zɩɩr nɩr za na bɛ pɛ́w a, na bɛ 'lẽ a, na bɛ ɩ kãá sɔ a.

⁷A nyɩ tẽw sãw nɩ ʋ za, vũu dɩ n a nyɩ tẽ-bɛrɛ. Sãanbɛ báarɛ nɩ a nyɩ tẽsɔw bʋ̃-kʋ́ɔrɩ a nyɩ mimié. A nyɩ tẽsɔw gã nɩ zawla, ʋ sãw nɩ ʋ za, ɩ mɛ̃ a lɛ dɔ̃ dem na mɩ́ wa tɔl baarɩ ʋʋ ŋmɛ̃ a.

⁸A Sɩyɔ̃ tẽ-kpɛ̃ɛ yõ n'ʋ cãà be ɩ mɛ̃ sɛw divɛ̃ tɩɩr púo pʋɔ a, mɛ̃ gùr kɔ̃kɔ̃bʋr[2] púo pʋɔ, mɛ̃ tẽ-kpɛ̃ɛ bɛ na piw a.

⁹A Sore, a kpɛnʋ-za-sob, bɛ tɩ bɛr tɩ nɩbɛ blã bɛ cɩ̃ɛ a, tɩ nãà ɩ na mɛ̃ a Sodɔm tẽ-kpɛ̃ɛ a, tɩ nãà ŋmɛ̃ na taa nɩ Gomɔɔr[3].

¹⁰Nyɩ bɛrɛ wone a Sore ƴɛ̀rʋ, Sodɔm tẽw nɩ-bɛrɛ ɛ, nyɩ ƴãw tobr a tɩ Naaŋmɩn wulu ƴãw, Gomɔɔr tẽw nɩ-faar i[4]!

¹¹A Sore yere na: “Bʋ̃ʋ n'ʋ a nyɩ bàwr-yaga yaga ɩrɛ mɛ̃? Ɩ̃ sɛw na nɩ a pʋ́rɩ nyɩw-a-za-bagɛ nɩ a náli nɛn-kãánɩ! A nadɛɛ, a péli nɩ a bʋrali zɩ̃ɩ a, ɩ̃ bɛ cãà bɔbr a ɩ.

¹²Nyɩ na mɩ́ wa wa àr a ɩ̃ niŋé a, ãa n'ʋ yel kɛ́ nyɩ mɩ́ wa nɛbr a ɩ̃ yir davʋrɩ?

¹³Nyɩ ta cãà waar'ɩ de-kʋ̀b bome wa kʋ̀rɛ mɛ̃ zawlalɛ ɩ! A zʋ̀ʋ́r a, ɩ̃ bɛ nɔnɛ a towtow ɛ. Nyɩ ta cãà maalɛ a nyɩ cuw-paalɛ cuwr, a nyɩ pɩ̃ɛnʋ-bibie nɩ a nyɩ cuw-bɛrɛ ɩ, ɩ̃ bɛ sàwr puoru na lãwnɩ ɩ-faar a ɩ.

¹⁴Ɩ̃ bɛ nɔnɛ a nyɩ cuw-paalɛ cuwr nɩ a nyɩ cuw-bɛrɛ ɩ, a ɩ n tuor a ɩ̃ zie, ɩ̃ bàl'a nɩ a deb.

¹⁵Nyɩ na mɩ́ wa yɛ́r a nuru a puoru ƴãw a, ɩ̃ mɩ́ pàw nɩ a ɩ̃ mimie. Nyɩmɛ saa nɔnɛ nyɩɩm puore suwle taa, ɩ̃ bɛ bɛrɛ wone ɩ: a nyɩ nuru ɩ n zɩ̃ɩ tɛwr.

¹⁶Nyɩ pɛ́w nyɩ tʋɔra, nyɩ so a nyɩ dɛwr bɛr, nyɩ ír a nyɩ ɩ-faar bɛr a ɩ̃ niŋé, nyɩ bɛr a yel-faa maalʋ.

¹⁷Nyɩ zanɛ a vla maalʋ, nyɩ bɔbr a mɩnʋ. Nyɩ mɩ́ ɩ a sob nɛ na fɛrɛ dier a bome a, ʋ lɛb tuur a sɔr-vla. Nyɩ mɩ́ maalɩ a bi-kpieb a lɛ-na-tu-sɔr-a, nyɩ mɩ́ tu a pɔw-kʋɔr yel pùor.”

¹⁸“A Sore yere na: «Nyɩ wa tɩ ŋmɛ nɔkpɛn. A nyɩ yel-bebe wa mʋ̃ɔ̀ ɓõɓõ a, a na lɩɛb'a pɛlɩ parpar. Alɛ wa mʋ̃ɔ̀ cõcõ a, a na lɩɛb'a pɛlɩ mɛ̃ pi-kɔblʋ pɛn-pla a.

¹⁹Nyɩmɛ wa sàw bɛrɛ wone a, nyɩ na dɩrɛ nɩ a tẽw bʋ̃-nʋʋr.

²⁰Ɛcɛ nyɩmɛ wa zawrɩ a, nyɩmɛ wa cãà gaarɩ a, a zɛbr-sɔ-kpɛ̃ɛ n'ʋ na dɩ nyɩ.» À ŋá n'a a Sore ƴɛ̀r.

²¹Ŋmɩŋmɩn n'a a tẽ-kpɛ̃ɛ na bɛ lɛbr pùor a wa tɩ lɩɛbɩ pɔw-yɛm[5]? Maal-ɩb tɩ be n a yel-na-tu-sɔr-a ƴãw a Zerizalɛm pʋɔ, a mɩnʋ tɩ so a zie a ʋ pʋɔ. Ɛcɛ ƴɛrɛŋa a, nɩ-kʋrbɛ nɛbɛ paalɩ ʋ.

²²Zerizalɛm i, a fʋ salm-pla lɩɛb'ɩ kʋ̃ɔ-puuru, a fʋ divɛ̃-nʋ̃ɔ̀ nʋ̃ɔ̀ jɛrɩ kʋ̃ɔ.

²³A fʋ nɩ-bɛrɛ ɩ n nɩ-gaarɩ na lãwnɛ nɩ nyãnyuwr a. Bɛ za, bɛ nɔnɛ nɩ a bʋ̃-kʋ̀rɩ, bɛ go na gù a tɔnɛ. Bɛ bɛ maalɛ a bi-kpieb yele ƴãwn ɛ, ɛ́ bɛ ŋmɛlɛ kaar a pɔw-kʋɔr na tɛr yel a ɩ.

²⁴Alɛ so a Sore Naaŋmɩn, a kpɛnʋ-za-sob, a Ɩsɩrayɛl Naaŋmɩn na tɛr fãw a yere à ŋá: «Nyɛ̃ baw-bio a! Ɩ̃ na tʋ̃ɔ́ nɩ a nɩbɛ na àr a ɩ̃ ƴãw a yáa a san, ɩ̃ na yáa nɩ a san a ɩ̃ dɔ̃ dem zie!

²⁵Zerizalɛm i, ɩ̃ na lɩɛb'ɩ a fʋ ƴãw: ɩ̃ na ɩ na fʋ lɛb vɩɛl, mɛ̃ zɩ̃ɛ n'a ɩ̃ ɩ n a, ɩ̃ na ɩ n a fʋ dɛwr za a yi.

²⁶Ɩ̃ na ɩ n a fʋ ƴɛ̀r-dɩrbɛ bɛ lɛb ŋmɛ̃ mɛ̃ a dãwdãw a, ɛ́ a fʋ yã-wulbɛ ɩ mɛ̃ a koro za a. Ɛ́ a pùorí a, bɛ na tʋ̃ɔ́ na bʋɔlɛ fʋ “Mɩnʋ Tẽ-kpɛ̃ɛ” nɩ “Tẽ-kpɛ̃ɛ na bɛ lɛb pùor a”.»

²⁷A Sɩyɔ̃ tẽw wa ɩrɛ a lɛ-na-tu-sɔr-a, ʋ na nyɛ̃ nɩ a faafʋ, ɛ́ a mɩnʋ pùor tub'a na faa a ʋ nɩbɛ na na lɩɛbɩ a bɛ ɩb a.

²⁸Ɛcɛ a yele za na sãw nɩ a nɩ-gaarɩ nɩ a yel-bebe dem zie. Bɛlɩ dem za na zawrɛ a Sore bɛrɛ a na bɔr a.

²⁹Lɛ n'a vĩ na ɩrɛ nyɩ a tɩ-maalɩ nyɩ na tɩ nɔnɛ yaga za a ƴãw. Nyɩ na su n zuru a nyɩ zaadɛnɩ ƴãw nyɩ na tɩ kaa ír maalɛ a tɩbɛ a be a.

³⁰Nyɩ na ŋmɛ̃ na taa nɩ tɩɩr a váar na mɩ́ wa suori a, bɩɩ mɛ̃ zaadɛnɩ na bɛ mɩ́ wa cãà tɛr kʋ̃ɔ a.

³¹A nɩr na tɛr fãw a na lɩɛb'a ɩ mɛ̃ mʋ̃ɔ a, ɛ́ a ʋ ɩ-ɩrɩ ɩ vũu-zele. Bɛ za ayi na lãw na dɩrɛ, ɛ́ nɩr kʋ̃ tʋ̃ɔ́ kpiiri a vũu ŋa ɩ.