Read Dagara, Northern Ɩzayi 17 Bible Online

Ɩzayi 17 - Dagara, Northern bible

Ɩzayi 17

¹Ƴɛ̀rʋ na ƴɛ̀r a Damasɩ tẽw ƴãw a. A Damasɩ tẽw kʋ̃ yaa kɛ́ bɛ cãà ɩ tẽ-kpɛ̃ɛ ɩ, ʋ na lɩɛb'ɩ tãdɛgɛ na gbõ taa a.

²A nɩbɛ na zɔ na kɛ́ bɛr a tẽ-bɛrɛ ʋ na so a kʋralɛ. Dʋn n'a na so a, ganɛ a be, ɛ́ nɩr bɛ damnɛ a ɩ.

³Zɛbr-yir-kpɛ̃w kʋ̃ cãà a Efarayim[41] tẽw ɛ, nãà kʋ̃ cãà a Damasɩ ɛ. A Siiri tẽw dem na na cɛ a kʋ̃ sa a Ɩsɩrayɛl nɩbɛ ɩ. À à ŋá n'a a Sore, a kpɛnʋ-za-sob, yere.

⁴A ʋlɩ bibir nɛ a, a Ɩsɩrayɛl tɩbrʋ na siwri na, a ʋ po-bɛrʋ na ŋmɛr a.

⁵A na ɩ na mɛ̃ a bʋ̃-dieri na mɩ́ wa de baar'a, bɛ na mɩ́ wa wob a ble ɛ́ wob a ble zuru nɩ nuru ayi a. A na ɩ na mɛ̃ a Erefayitɩ mɩnɛ fʋɔla pʋɔ, a ble zuru na mɩ́ wa ŋma baar'a.

⁶A Ɩsɩrayɛl nɩbɛ na na cɛ a kʋ̃ saalɩ ɛ, a na ɩ na mɛ̃ olivʋ bɛ na dam'ɩ dàa a lo a: wɔmɛ ayi bɩɩ ata n'a cɛ a tɩɛ saa-zu za, wɔmɛ anaar bɩɩ anũu a wuli na wɔ̃ a zu. À à ŋá n'a a Sore, a Ɩsɩrayɛl Naaŋmɩn, yere.

⁷A ʋlɩ bibir nɛ a, a nɩsaal na jɩ́rɛ nɩ a ʋ Íre, a ʋ mimie na nyɛ̃ nɩ a Ɩsɩrayɛl Naaŋmɩn na ɩ sõw a.

⁸Ʋ kʋ̃ lɛb jɩ́r a bàwr-maal-kube na ɩ a ʋ nuru bʋ̃-maalɩ a ɩ, ʋ kʋ̃ lɛb nyɛ̃ a alɩ bome nɛ a ʋ nobie pie na maalɩ a ɩ: a dà-barɩ nɩ a parfɛ̃ bʋ̃-nyɩwrɩ.

⁹A ʋlɩ bibir nɛ a, a nɩbɛ na zɔ na kɛ́ bɛr a Ɩsɩrayɛl tẽw tẽ-bɛrɛ bɛ na cɔbrɩ a kpɛmɛ a zɛbr ƴãw a, mɛ̃ a koro za a nɩbɛ na tɩ zɔ kɛ́ bɛr a Hivitɩ mɩnɛ nɩ a Amoritɩ mɩnɛ tẽ-bɛrɛ, a lɛn daar a Ɩsɩrayɛl biir na tɩ tarɛ a. Wɛja-kpal-faa n'ʋ na cɛ gã.

¹⁰Ɩsɩrayɛl i, fʋ yiir'ɩ a Naaŋmɩn fʋ faarɛ bɛr, fʋ bɛ cãà bãwnɩ a Pìir na piw fʋ a ɩ. Alɛ so fʋ ɩrɛ va-vɩɛlɩ[42] a búle, ɛ́ bʋ̀rɛ bʋ̃-bi-sãanbɛ.

¹¹A ʋlɩ bibir fʋ na mɩ́ sɛl a a, fʋ mɩ́ nyɛ̃ a na a ìre, a bom fʋ na mɩ́ bʋ̀r a biɓaara a, fʋ mɩ́ ɩ na ʋ pu. Ɛcɛ a cɛb bɛ mɩ́ wa ka be ɩ, a bàalʋ wa ta a, ʋʋ mɩ́ ɩ n bàalʋ na bɛ tɛr tɩ̃ɩ a.

¹²Nyɛ̃ baw-bio a! Nɩ-bʋʋrɛ na yãwmɛ bɛ tɛr nʋɔr a gɔmɛ n'a, gɔmɛ na ɩ mɛ̃ a kʋ̃ɔ-kpɛ̃ɛ gɔmɛ a, nɩ-bʋʋrɛ damnʋ na ɩ mɛ̃ a kʋ̃ɔnɩ na damnɛ nɩ suur a.

¹³A nɩ-bʋʋrɛ damnʋ ɩ na mɛ̃ a kʋ̃ɔ-bɛrɛ damnʋ a. Ɛcɛ a Sore tanɛ bɛ na bɛ zɔrɛ zãánɛ. Bɛ diw bɛ na mɛ̃ ùr tan pʋɔ sɛsɛb na diw a, mɛ̃ pupun bie sɛsɛb-pɩl na ɓáw cen nɩ a.

¹⁴A zaanʋɔra a, a mɩ́ ɩ n a pʋl-vʋ̃ɔ, ɛ́ a biɓaara bɛ mɩ́ ta sɛr ɛ, ɛ́ bom bɛ cãà be ɩ. A bɛlɩ dem na dier a tɩ bome za a dem'ɩ à á ŋá, a bɛlɩ dem na fárɛ a tɩ bome a, à ŋá n'a a na ŋmɛ̃ bɛ.