Read Dagara, Northern Ɩzayi 32 Bible Online

Ɩzayi 32 - Dagara, Northern bible

Ɩzayi 32

¹Nãà na be n be dɩrɛ a naalʋ nɩ mɩnʋ. A nɩ-bɛrɛ na dɩrɛ nɩ a nɩ-kpɛ̃ɛnʋ a nɩbɛ zu mɛ̃ a lɛ a na tu sɔ́r a.

²A bɛ kãw za na ɩ na mɛ̃ pib zie a, a sɛsɛb ƴãw, mɛ̃ taw-lanʋ zie a, a saa ƴãw, mɛ̃ bàa kʋ̃ɔ na zɔrɛ tẽ-kõw pʋɔ a, mɛ̃ pì-kpɛ̃ɛ ɓaarʋ tẽ-tʋlʋ pʋɔ a.

³A bɛlɩ dem a na tɩ sɛw kɛ́ bɛ nyɛrɛ a mimie kʋ̃ cãà pàw ɛ, a bɛlɩ dem a na tɩ sɛw kɛ́ bɛ wone a tobe na bɛrɛ na wone vla.

⁴A nɩbɛ na ɩrɛ wàlwàl a, na mɩ́ tɩɛr'a bãw a bom pɛr, a bɛlɩ dem na bʋlɛ a na ƴɛ̀rɛ na páwr ɛ́ ƴɛ̀rɛ welwel.

⁵Bɛ kʋ̃ lɛb bʋɔlɩ a gẽgemi sob kɛ́ nɩ-yúor ɛ, nɩ a nɩ-bɛ-tɛr-bir kɛ́ nɩ-sɩza ɩ.

⁶Bʋ̃ʋ n'ʋ vɛ̃, a gẽgemi sob mɩ́ ƴɛ̀rɛ nɩ ƴɛ̀rʋ na bɛ tɛr pɛr a. Ʋ mɩ́ tɩ́ɛrɛ nɩ a faa ʋ na na maalɩ a, ʋ mɩ́ ɩrɛ nɩ nɩ-fa-ɩb ɛ́ tʋʋr a Sore zʋmɛ. Ʋ bɛ kʋ̀rɛ bʋ̃-dɩra a kɔ̃ sob ɛ, ʋ bɛ kʋ̀rɛ kʋ̃ɔ a kʋ̃ɔ-nyúur sob ɛ.

⁷A nɩ-bɛ-tɛr-bir ʋl a, a ʋ ɩ-ɩrɩ mɩ́ ɩ n nɩ-kʋ ɩ-ɩrɩ. Ʋ mɩ́ cɔbr'ɩ cɔbrʋ k'ʋʋ ŋma ziri kʋ n a nan dem. Ɛcɛ a bãbàalbɛ bɛ ŋa a, a alɩ bome nɛ ƴãw bɛ na tɛr sɔ́r a, al tɛwr'a bɛ mɩ́ yel kɛ́ bɛ kʋ̀ bɛ.

⁸Ɛcɛ a nɩ-yúor a, tɩɛrʋ na tori a tɛwr'a ʋ mɩ́ tɛr, ɩ-ɩrɩ na vɩɛl a tɛwr'a ʋ mɩ́ ɩrɛ.

⁹Pɔwbɛ bom na bɛ damnɛ a, nyɩ ìr, nyɩ bɛrɛ wone a ɩ̃ ƴɛ̀rʋ! Powli na ɓãa ƴãw bɛr tɩɛrʋ a, nyɩ cɛlɛ a lɛ ɩ̃ na yere a zie!

¹⁰Yũon-been nɩ bibie blã wa tɔl a, dɛ̃bɩ̃ɛ na ɩrɛ nyɩ na nyɩ màwr, nyɩɩm bom na bɛ damnɛ a. Bʋ̃ʋ n'ʋ vɛ̃, divɛ̃ tɩ-wɔmɛ pɔrʋ kʋ̃ ka be ɩ, bʋ̃-dieri-deb kʋ̃ be be ɩ.

¹¹Dɛ̃bɩ̃ɛ, a ɩrɛ nyɩ nyɩ màwr, nyɩɩm pɔwbɛ bom na bɛ damnɛ a, nyɩ màwr, nyɩɩm na ɓãa ƴãw bɛr tɩɛrʋ a. Nyɩ yaa a nyɩ bʋ̃-suuri bɛr, nyɩ gbol nyɩ tʋɔra ɛ́ sɛ gãw a sɩɛmɩ́.

¹²Nyɩ wul a nyɩ pʋ-sãwna, nyɩ kone ƴãwn a póru vɩɛlʋ nɩ a divɛ̃ tɩɩr na wɔ̃ a.

¹³Nyɩ kone ƴãwn a ɩ̃ nɩ-bʋʋrɛ tẽsɔw gɔ-tuwr na bule pàwr a, nyɩ kone ƴãwn a tẽ-kpɛ̃ɛ na maalɛ cuw a, yie za na be nʋ̃ɔ̀ pʋɔ a.

¹⁴Bɛ yi na kɛ́ bɛr a nãà yir, nɩr bɛ cãà a tẽ-kpɛ̃ɛ na tɩ ɩrɛ gɔmɛ a pʋɔ ɩ. A Ofɛl[69] nɩ a zie piwru yir-cõcowla lɩɛbɩ ziir na gã zawlɛ kʋralɛ ɩ a bòn gaarɩ nʋ̃ɔ̀ nɩ a dʋn mʋ̃ɔ 'wɔbrʋ zie a.

¹⁵Bibir kãw, a Sore na cir'ɩ a ʋ Vʋʋrʋ ƴãw a tɩ zu. Lɛ n'a a wɛja-kpalɛ na lɩɛbɩ tɩ-wɔnɩ zaadɛ̃, ɛ́ a tɩ-wɔnɩ zaadɛ̃ lɩɛbɩ tuw.

¹⁶A lɛ-na-tu-sɔr-a na ɩrɛ nɩ a wɛja-kpalɛ pʋɔ, ɛ́ a mɩnʋ be a tɩ-wɔnɩ zaadɛ̃ pʋɔ.

¹⁷A ƴã-ɓaarʋ na ɩ n a mɩnʋ bom, a mɩnʋ ton na ɩ n a zie na gã zoom kʋralɛ bɛ bãw damnʋ a.

¹⁸A Sore nɩbɛ na kpɩɛr'ɩ zie ƴã-ɓaarʋ na be a, bɛ na kpɩɛr'ɩ yie yel-faa na bɛ ka a, pɩ̃ɛnʋ ziir na bɛ bãw damnʋ a.

¹⁹Sa-bi-kube na lo n a tuw zu, ɛ́ a tẽ-kpɛ̃ɛ lo.

²⁰Ɛcɛ nyɩ na tɛr'ɩ zu-nʋ̃ɔ̀: nyɩ na tʋ̃ɔ́ na mɩ́ bʋ̀r zie za kʋ̃ɔ na be a, ɛ́ bɛr a náab nɩ a bõw a yʋ́ɔr mɛ̃ a lɛ a na bɔbr a.