Read Dagara, Northern Ɩzayi 33 Bible Online

Ɩzayi 33 - Dagara, Northern bible

Ɩzayi 33

¹Baw-bio wɛ! fʋ̃ʋ na sãwnɛ bom za[70] ɛ́ nɩr bɛ sãw fʋ bɛr a, fʋ̃ʋ na mɩlɛ a nɩbɛ ɛ́ nɩr bɛ mɩl fʋ a. Fʋ̃ʋ wa sãw bom za bɛr baar'a, bɛ mɩ́ na sãw fʋ na bɛr. Fʋ̃ʋ wa mɩl baar'a, bɛ mɩ̀ na mɩl fʋ na.

²Sore e, zɔ tɩ nɩbaalʋ! Tɩ ƴãw nɩ a tɩ tɩɛrʋ a fʋ ƴãw. Ɩ̀ a tɩ fãw biɓaara za, nɩ a tɩ faarɛ a kpɩɛrʋ daar.

³A nɩbɛ wa wone a fʋ kɔkɔr a, bɛ mɩ́ zɔrɛ na. Fʋ̃ʋ dɛ wa ìre àrɛ a, a nɩ-bʋʋr-yoru mɩ́ zɔrɛ na yàarɛ.

⁴Lɛ n'a a mɩ́ ɩ a zab: à mɩ́ ɩ na mɛ̃ sãso-nãá-nʋrɩ n'a fʋ nyɛ̃ a. Bɛ mɩ́ lore na nyɩɛr a zɛbr na-bome mɛ̃ sãsoge na yãwmɛ bɛ dɩ vuo a.

⁵A Sore zɛw na do, bʋ̃ʋ n'ʋ vɛ̃, ʋ kpɩɛr'ɩ a saa-zu. Ʋ paal'ɩ a Zerizalɛm nɩ a lɛ-na-tu-sɔr-a, nɩ a mɩnʋ.

⁶Ɛ́ nyɩɩm, Sore nɩ-bʋʋrɛ ɛ, nyɩ nãà wa tʋ̃ɔ́ na kpɩɛr ɛ́ bom bɛ damnɛ nyɩ ɛ. A yã-bãwfʋ nɩ a bãwfʋ ɩ n na-bome na faarɛ a. A Sore zɔba a, ʋlɛ n'ɩ a fʋ na-bom.

⁷A Arɩɛl[71] nɩbɛ n'ɩ bɛ ŋan kone a sɛ́ɛ pʋʋr. A nɩbɛ bɛ na tõ a ƴã-ɓaarʋ ƴãw a kone nɩ mʋta-zɩ̃ɩ.

⁸A sɛ́ɛ gã nɩ zawlɛ, nɩr bɛ cãà tuur a soli tɔlɛ ɩ. A wõ-taa na maalɩ a sãw na, bɛ zawr'ɩ a dãsɩɛ dem bɛr, bɛ bɛ cãà ŋmɛlɛ kaar nɩr za ɩ.

⁹A tẽw tɛr'ɩ wahala, kpiir. Vĩ nyɔw nɩ a Libã tãw, ʋ kore na. A Saron zi-tɩ̃tal ŋmɛ̃ na taa nɩ wɛja-kpalɛ. A Basan nɩ a Karmɛl tan bɛ cãà tɛr tɩɩr ɛ.

¹⁰A Sore yere na: «Ƴɛrɛŋa a, ɩ̃ na dam'a, ƴɛrɛŋa a, ɩ̃ na ìr'a, ɩ̃ na wul'a ɩ̃ na ɩ kpɛ̃ɛ a.

¹¹A lɛ nyɩ na tɩɛrɩ kɛ́ nyɩ ɩ a, ɩ n dʋn mʋ̃ɔ tɛwr, ɛ́ alɛ wa maalɩ a lɛn daar a, ãá ɩ mɔ̃-kon tɛwr.

¹²A nyɩ mɩŋa nʋɔr pɩɛlʋ na dɩ nyɩ na mɛ̃ vũu a. Vũu na dɩ n a nɩ-bʋʋrɛ bɛ lɩɛbɩ tãpɛlʋ. Bɛ na lɔb bɛ na ƴãw vũumí mɛ̃ wuli-gʋ̀ʋ́r bɛ na cɛ ŋma a.

¹³Nyɩɩm na zãá a, nyɩ wõ a ʋlɩ bom nɛ ɩ̃ na ɩ a. Ɛ́ nyɩɩm na pɩɛlɩ a, nyɩ nyɛ̃ a ɩ̃ kpɛnʋ bãw.»

¹⁴Pʋl-vʋ̃ɔ nyɔw nɩ a yel-bebe dem a Sɩyɔ̃ tẽw pʋɔ, dɛ̃bɩ̃ɛ ɩrɛ nɩ a nɩ-faar bɛ màwr. Bɛ sowre na: «A tɩ buor'ʋ na tʋ̃ɔ́ àr a vũu ŋa na dɩrɛ a pɛr? A tɩ buor ʋ na tʋ̃ɔ́ àr a vũu-zɛlɛ á ŋá na bɛ kpiire a pɛr?»

¹⁵— Sob nɛ na tuur a mɩnʋ ɛ́ yere a yel-mɩŋa a n'ʋ. Ʋ mɩ́ zawr'ɩ a tɔnɛ bɛ na mɩ́ ɩ a po-to-fãw-ɩb páw a, ʋ bɛ sàwr a bɛlɩ dem na bɔbr kɛ́ bɛ ŋmɛ ʋ nʋɔr a ɩ. Ʋ mɩ́ pàw nɩ a tobe tɛr, k'ʋʋ ta wõ nɩ-kʋ ƴɛ̀rʋ ɛ. Ʋ mɩ́ pàw nɩ a ʋ mimie, k'ʋʋ ta jɩ́r a yel-faa ɩ.

¹⁶A nɩr ŋa na kpɩɛr'ɩ ziir na kɛrɩ a. Pìe na ɩ zɛbr-yir-kpɛn a n'a na ɩ a ʋ sɔwlʋ zie. Ʋ na mɩ́ nyɛ̃ nɩ bʋ̃-dɩra, ʋ kʋ̃ mɩ́ bɔ kʋ̃ɔ gù ɛ.

¹⁷Fʋ na jɩ́r'ɩ a nãà na dɩ dɛpaalʋ a, fʋ na nyɛ̃ nɩ a tẽw yɛ̀lʋ tɩ tɔ.

¹⁸Fʋ na tɩɛr'ɩ a ʋlɩ bom nɛ na tɩ ɩrɛ fʋ dɛ̃bɩ̃ɛ a, ɛ́ fʋ na sowre na: «Nyɩnɛ n'a a bɛlɩ dem na sɔrɛ ɛ́ jiele a zuru-yar a be? Nyɩnɛ n'a a bɛlɩ dem na jɩ́rɛ a ziir na cɔbrɩ kpɛmɛ a zɛbr ƴãw a be?»

¹⁹Fʋ kʋ̃ cãà nyɛrɛ a nɩ-bʋʋrɛ bɛ ŋa na ɩrɛ pɔ̀l-ɩb a ɩ, nɩ-bʋʋrɛ fʋ na kʋ̃ wõ a ƴɛ̀rʋ a, ƴɛ̀r-sãan nɩr za na bɛ wone a ɩ.

²⁰Jɩ́r a Zerizalɛm kaa, nyɛ̃ a Sɩyɔ̃ tẽw a, a tẽ-kpɛ̃ɛ tɩ na maalɛ a tɩ cuwr a. Ʋ na sãá nɩ a fʋ zie mɛ̃ zie na ɩ zoom a, mɛ̃ pɛn-sɛw bɛ na kʋ̃ lɛb wɩl a. Bɛ kʋ̃ lɛb vɔ̃ a ʋ kpawbie ɩ, bɛ kʋ̃ lɛb cɛ̀r a ʋ míe bɛr ɛ.

²¹Be n'a a Sore na wul tɩ a ʋ vɩɛlʋ na bɛ tɛr tɔ a. Ʋ na ɩ n bàrʋ nɩ man-bɛrɛ zie a zɛbr gbor-bɛrɛ na bɛ tɔlɛ a, a gbor-bɛrɛ na bɛ tuur tɔlɛ a.

²²A Sore n'ɩ a tɩ nɩ-kpɛ̃ɛ, ʋlɛ n'ʋ de tɩ a niwn. A Sore n'ɩ a tɩ nãà, ʋlɛ n'ɩ a tɩ faarɛ.

²³A fʋ míe yɔl'a, a bɛ cãà nyɔw a dà-wogo tɛr ɛ, bɛ bɛ dúore a dɩrapo ɩ. Lɛ n'a bɛ na põ a zɛbr na-bʋ̃-yaga. A gbɛɛ tɛɛ za na pʋɔ nɩ a zab pʋɔ.

²⁴A Zerizalɛm nɩr kãw za kʋ̃ lɛb yel: «Ɩ̃ ɩ n bàal» ɛ. A tẽ-kpɛ̃ɛ ŋa nɩbɛ na páw nɩ a bɛ yel-bebe suur.