Read Dagara, Northern Ɩzayi 44 Bible Online

Ɩzayi 44 - Dagara, Northern bible

Ɩzayi 44

¹Ɛcɛ ƴɛrɛŋa a, bɛrɛ wone, ɩ̃ tõ-tõ-bie Zakɔb i, fʋ̃ʋ Ɩsɩrayɛl ɩ̃ na kaa ír a.

²À ŋá n'a ɩ̃ yere, a mãa Sore na maalɩ fʋ a, na cɔbrɩ fʋ ɛ́ fʋ bɛ dɔw sɛr ɩ̃ɩ waar a fʋ sõwfʋ a: Ta zɔrɛ dɛ̃bɩ̃ɛ ɩ, ɩ̃ tõ-tõ-bie Zakɔb i, fʋ̃ʋ Yesurun[82] ɩ̃ na kaa ír a.

³Bʋ̃ʋ n'ʋ vɛ̃, ɩ̃ na cir'ɩ kʋ̃ɔ ƴãw a tẽsɔw kʋ̃ɔ-nyúur na kpɛ a, ɛ́ ɩ bàrʋ zɔ pàw a tẽ-kõw. Ɩ̃ na pɛbl'ɩ a ɩ̃ Vʋʋrʋ a fʋ bibiir zu, ɛ́ ɩ a ɩ̃ maalʋ siw a fʋ bʋʋrɛ zu.

⁴Bɛ na bul'a ɛ́ kɛrɛ mɛ̃ mɔ̃-ɓaar púo pʋɔ a, mɛ̃ tɩɩr na àr bàa nʋɔr a.

⁵Kãw na yel a: “A Sore so m”, kãw na bɔbr'a k'ʋʋ tɛr a Zakɔb yúor. Ŋa sob na sɛb'ɩ a ʋ nũu zu: “A Sore bʋ̃-sora nɛ m”, ɛ́ de a Ɩsɩrayɛl yúor.»

⁶À ŋá n'a a Sore, a Ɩsɩrayɛl Nãà, a ʋl na yarɛ dier ʋ a, a Sore kpɛnʋ-za-sob, yere: «Mãa n'ɩ a niw-diere, mãa n'ɩ a po-pàwrɛ. Mãa bɛ wa n'ʋ a, Naaŋmɩn bɛ ka be ɩ.

⁷Ãa n'ʋ ɩ mɛ̃ a mãa a? Ʋ yel a lɛ na be be a, ɛ́ man ʋ kʋ̀ m! Ʋ yel a yele na ɩ a lɛ ɩ̃ na tĩ kɛ́ cɔbrɩ a nɩ-bʋʋr-dãw-niwn sob a, ʋ yel a yele al na na ɩ a!

⁸Nyɩɩm, ɩ̃ nɩ-bʋʋrɛ ɛ, nyɩ ta zɔrɛ dɛ̃bɩ̃ɛ màwr ɛ. Ɩ̃ bɛ yel a yel ŋa kʋ̀ nyɩ koro za ɛ́ ɩ nyɩ bãw ʋ ɛ? Nyɩmɛ bɛ n'ɩ a ɩ̃ dãsɩɛ dem ɛ? Mãa bɛ wa n'ʋ a, Naaŋmɩn lɛb'a be be e? Ʋ̃ʋ'hʋ̃, Pìir kãw bɛ lɛb ka be ɩ, ɩ̃ bɛ bãw a kãw za ɩ.»

⁹A bɛlɩ dem na maalɛ a tɩbɛ a, bɛ za bɛ ɩ bom za ɩ, ɛ́ a bɛ bʋ̃-vɩɛlɩ bɛ tɛr yel-ɩra kãw za ɩ. A ɩ n a bɛ dãsɩɛ dem, ɛ́ ɩ dãsɩɛ dem na bɛ nyɛrɛ bom za a, na bɛ bãw bom za ɛ́ na ƴãw bɛ vĩ a.

¹⁰Fʋ maal'ɩ ŋmɩn, fʋ nyɩl'ɩ kure maal'ɩ tɩɩb na kʋ̃ tɛr yel-ɩra kãw za a, nyɛ̃ dãbolu a!

¹¹Bɛlɩ dem za na tu a a, bɛ na nyɛ̃ nɩ vĩ. A nuru tõ-tonbɛ na maalɛ a a, bɛ ɩ n nɩsaalbɛ tɛwr! Bɛ ɓã taa bɛ za, bɛ yi àr: dɛ̃bɩ̃ɛ na nyɔw bɛ na ɛ́ vĩ ɩrɛ bɛ za.

¹²A sãa-kpɩɛrɛ kpaalɛ nɩ lɛr vũu-bi-cõcole zu. 'Hama n'ʋ ʋ pɔbr'ɩ ʋ nɩ a ʋ kpãkpã-kpɛ̃w maalɛ nɩ ʋ. Ɛcɛ kɔ̃ wa dɛ nyɔw a, ʋ bɛ mɩ́ cãà tɛr fãw ɛ. Ʋlɛ bɛ wa nyũ kʋ̃ɔ a, ʋlɛ mɩ́ n'ɩ ŋan bàl.

¹³A dà-pɛnɛ de nɩ miwr manɩ nɩ a ʋ dàa. Ʋ tʋ̃ɔ̀ nɩ a tɩɩb dasule nɩ gʋɔr-pla. Ʋ pɛnɩ nɩ a dàa nɩ lɛr ɛ́ sal ʋ nɩ kara. Ʋ ɩ na ʋ ŋmɛ̃ taa nɩ nɩr, nɩr na pɔ̀l yaga ɛ́ na be zi-sõw kãw pʋɔ a.

¹⁴Ʋ cɛ n tɩɛ na vɩɛl mɛ̃ a sɛɛdɩr tɩɛ a, ʋ kaa na ír tɩ-kpɛ̃w mɛ̃ a sɛn tɩɛ, bɩɩ tɩ-kpɛ̃w-yũo kãw a. Ʋ bɛr a na a kɛrɩ a tuw pʋɔ. Bɩɩ ʋ sɛl'ɩ tɩ-kpɛ̃ɛ kãw mɛ̃ a pɛ̃ tɩɛ a, a saa waar ƴãwn ʋ kɛrɩ.

¹⁵A dàar na tɛr'ɩ yel-ɩra a nɩsaalbɛ zie, a vũu gbɔwfʋ ƴãw. A nɩbɛ mɩ́ de a na gbɔw nɩ vũu kɛ́ bɛ ʋʋrɩ, bɩɩ kɛ́ bɛ dʋw nɩ a bʋ̃-dɩrɩ. Bɩɩ bɛ mɩ́ cãà na maal'ɩ ŋmɩn, lore gbine dume a ʋ pile, bɛ mɩ́ maal'ɩ tɩɩb gũune a ʋ niŋé.

¹⁶Bɛ mɩ́ de nɩ a dàar ŋmãa gbɔw nɩ vũu, ƴãw a nɛn a be sɛ̃ 'wɔb tɩw. Bɩɩ bɛ mɩ́ ʋʋrɛ nɩ a vũu yere nɩ: «Ʋ̃'hʋ̃ʋ, ɩ̃ ʋʋrɛ nɩ vũu, nyɛ̃ a vũu nyɛ́b na nʋmɛ a!»

¹⁷A dàar na cɛ a, bɛ mɩ́ maal'ɩ nɩ ŋmɩn, tɩɩb. Bɛ mɩ́ gũune na ɛ́ gbine dume a ʋ niŋé, ɛ́ puore ʋ à ŋá: «Fʋ̃ʋ n'ɩ a ɩ̃ ŋmɩn, faa mɛ̃!»

¹⁸A nɩbɛ bɛ ŋa bɛ bãw bom za ɩ, bɛ bɛ bãw bom za pɛr ɛ. Bʋ̃ʋ n'ʋ vɛ̃, dɛwr paal'ɩ a bɛ mimie bɛ bɛ cãà nyɛrɛ ɩ, a bɛ tɩɛrʋ ɩ n ŋmãa zuo bɛ kʋ̃ tʋ̃ɔ́ bãw bom pɛr ɛ.

¹⁹Kãw za bɛ mɩ́ lɛb tɩɛrɩ ɛ, kãw za bɛ tɛr a yã nɩ a tɩɛrʋ na mɩ́ yel ʋ tʋɔra à ŋá ɩ: «Ɩ̃ nyɩw nɩ a dàar ŋmãa, ɩ̃ dʋw nɩ a ɩ̃ bʋ̃-dɩrɩ a vũu-bie zu, ɛ́ sɛ̃ a nɛn ɩ̃ na 'wɔbr a. Ɛ́ na de a ŋmãa maal'ɩ tɩɩb-faa faa, gũune dà-ŋmãa niŋé!»

²⁰A nɩbɛ bɛ ŋa tu n bom na ɩ tãpɛlʋ tɛwr a. A bɛ tɩɛrʋ be n tulu pʋɔ, ɛ́ bɛ tɩ́ɛrɛ a bɛ tore ɩ. Bɛ kʋ̃ faa a bɛ nyɔ-vʋʋrʋ ɛ. A bɛ kãw za kʋ̃ yel: «A bom ɩ̃ na tɛr a nũú a ɩ n ŋmɩn-bɛlɛbɛlɛ, a sãá na» ɩ.

²¹«Bãwnɩ a yel ŋa, Zakɔb i, nɩ fʋ̃ʋ Ɩsɩrayɛl i, bʋ̃ʋ n'ʋ vɛ̃, fʋ ɩ n a ɩ̃ tõ-tõ-bie. Ɩ̃ cɔbrɩ fʋ na kɛ́ fʋ ɩ a ɩ̃ tõ-tõ-bie. Ɩsɩrayɛl i, ɩ̃ bɛ yiire fʋ bɛrɛ ɩ.

²²A fʋ nɩ-gaara ɩ-ɩrɩ a, ɩ̃ ɩ na a bɔr mɛ̃ zũzuwr a, ɛ́ a fʋ sãwna baarɩ mɛ̃ ulu a. Lɛb wa a ɩ̃ zie, ɩ̃ ɩ n a fʋ ya-diere.»

²³Salom i, lɔbr nʋ̃ɔ̀ cɛlsɩ, bʋ̃ʋ n'ʋ vɛ̃, a Sore ɩrɛ nɩ bom! Tẽsɔw pʋ̃ɔmɩ za a, cáarɛ, nyɩɩm, tan nɩ tuwr tɩɩr i, nyɩ ŋmɩɛr nʋ̃ɔ̀ cɛlsɩ. Bʋ̃ʋ n'ʋ vɛ̃, a Sore ya na de a ʋ nɩ-bʋʋrɛ, ʋ wul'ɩ a ʋ vɩɛlʋ a Ɩsɩrayɛl tẽw pʋɔ.

²⁴Ɩsɩrayɛl i, a Sore, a fʋ ya-diere na cɔbrɩ fʋ a fʋ mã puori a, ƴɛ̀rɛ nɩ a fʋ zie à ŋá: «Mãa n'ɩ a Sore na maalɛ bom za a. Mãa n'ʋ dɔl a salom, mãa ɩ̃ yõ tẽtẽ, ɩ̃ yɛ́r'ɩ a tẽw ɛ́ nɩr za bɛ sõw mɛ̃ ɩ.

²⁵Ƴɛrɛŋa a, ɩ̃ ɩrɛ na a bàwr-bʋwrbɛ ƴɛ̀rʋ bɛ cãà tɛr pɛr ɛ. Ɩ̃ ɩrɛ na a bɛlɩ dem na yere a nɩdaar yele a, bɛ bʋ̀nɛ ƴɛ̀rɛ. Ɩ̃ fɛrɛ nɩ a yã-bãwnbɛ bɛ lɛbr pùor, ɩ̃ mɩ́ wul'ɩ a lɛ a bɛ bãwfʋ na ɩ gẽgemi a.

²⁶Ɛcɛ ɩ̃ mɩ́ ɩ n a ɩ̃ tõ-tõ-bie ƴɛ̀rʋ tu, ɛ́ ɩ a lɛ a ɩ̃ nɩ-toni na yel a maalɩ. Ɩ̃ yere nɩ a Zerizalɛm ƴãw: “Nɩbɛ na lɛb'a kpɛ ʋ, bɛ na lɛb a libri a ʋ deboru”. Ɩ̃ yere nɩ a Zuda tẽ-bɛrɛ ƴãw: “Bɛ na lɛb'a mɛ a”.

²⁷Ɩ̃ yere nɩ a kʋ̃ɔ-kpɛ̃ɛ na zulme a: “Ko gã, ɩ̃ na ɩ n a fʋ mamɛ a sɩr”.

²⁸Ɩ̃ yere nɩ à ŋá a Siirisɩ ƴãw: “A cɩ̃ɩnɛ[83] ɩ̃ na kaa ír a n'ʋ. Ʋ na ɩ n a lɛ za ɩ̃ na bɔbr a tu. ʋ na tɩr'ɩ nʋɔr ɛ́ a Zerizalɛm lɛb mɛ, ɛ́ a Ŋmɩn-yir-kpɛ̃ɛ lɛb mɛ àr.”»