Read Dagara, Northern Ɩzayi 45 Bible Online

Ɩzayi 45 - Dagara, Northern bible

Ɩzayi 45

¹À ŋá n'a a Sore ƴɛ̀rɛ a ʋ nɩ-kabra Siirisɩ zie: «Ɩ̃ tɩ̀ɛrɛ fʋ na k'ɩ̃ɩ ɩ fʋ so a nɩ-bʋʋrɛ, k'ɩ̃ɩ faa a na-mɩnɛ nɩ-kpɛ̃ɛnʋ, ɛ́ yuo a tẽ-bɛrɛ dɩ̃dɛɛ pamɛ na kpa kɛ́ jɩ̀r a, a fʋ niŋé.

²Mãa mɩŋa na de fʋ nɩ niwn, k'ɩ̃ɩ ɩrɛ a gbĩgbine a lɩɛbɛ tẽsɔw na man taa a, k'ɩ̃ɩ kárɛ a kur-zɩɛ pamɛ bɛrɛ, nɩ a kure bɛ na jɩ̀r'ɩ a pamɛ a.

³Ɩ̃ na kʋ̀ b'ɩ a libie na bin a lige pʋɔ a, nɩ a na-bome na sɔwlɩ a. Lɛ n'a fʋ na bãw kɛ́ mãa n'ɩ a Sore, a sob nɛ na yel a fʋ yúor bʋɔlɩ fʋ a, a mãa, a Ɩsɩrayɛl Naaŋmɩn.

⁴A ɩ̃ tõ-tõ-bie Zakɔb ƴãw n'a, ʋ̃ʋ, a Ɩsɩrayɛl ɩ̃ na kaa ír a ƴãw n'a ɩ̃ yel a fʋ yúor bʋɔlɩ fʋ. Ɩ̃ ƴãwnɛ fʋ na, ɛ́ fʋ bɛ bãw mɛ̃ ɩ.

⁵Mãa n'ɩ a Sore, kãw bɛ lɛb ka be ɩ. Mãa bɛ wa n'ʋ a, Naaŋmɩn bɛ ka be ɩ. Fʋ bɛ bãw mɛ̃ ɩ, ɛcɛ ɩ̃ kʋ̀rɛ fʋ a tome.

⁶À ŋá n'a a saa-pɛrɩ́ tɩ tɔ a mʋ̃tɔ̃w-kpɛb-lowr, bɛ na bãw kɛ́ mãa bɛ wa n'ʋ a, bom za bɛ ka be ɩ. Mãa n'ɩ a Sore, kãw bɛ lɛb ka be ɩ.

⁷Ɩ̃ mɩ́ maal'ɩ a cãà, ɛ́ ír lige. Ɩ̃ mɩ́ ƴãw nɩ a nʋ̃ɔ̀, ɛ́ ír a kpɩɛrʋ. A mãa, a Sore, mãa n'ʋ ɩrɛ à á ŋá za.

⁸Salom i, bɛr a mɩnʋ ʋ yi a saa-zu be siw mɛ̃ ɓɩɛlʋ a. A zũzuwe, a ɩ ʋ cir mɛ̃ a saa a! A tẽw, ʋ yuo, a faafʋ nyɛ̃ maalʋ ɛ́ a mɩnʋ bul! A mãa, a Sore, mãa n'ʋ ír a bome á ŋá za.»

⁹Baw-bio n'a, a nɩr fʋ na nyɛ̃ ʋ zɛbr'ɩ a sob nɛ na maalɩ ʋ a. A nɩsaal ɩ na mɛ̃ tanɛ laa a la-taabɛ pʋɔ a. A yawra na sowre nɩ a sob na mɩɛr'ɩ ʋ a: «Bʋ̃ʋ n'ʋ fʋ ɩrɛ ɛ? A fʋ laa bɛ tɛr pɛr ɛ.»

¹⁰Baw-bio n'a, a nɩr fʋ na nyɛ̃ ʋ sʋ̃ɔmɩ yere sãà kãw zie: «Bi-bʋ̃ʋ n'ɩ à ŋà fʋ na dɔw a?» Ɛ́ yere mã kãw zie: «Bʋ̃ʋ n'ʋ fʋ dɔw?»

¹¹À ŋá n'a a Sore yere, ʋl na cɔbrɩ a ʋ nɩ-bʋʋrɛ Ɩsɩrayɛl, ɛ́ ɩ a ʋ Naaŋmɩn na ɩ sõw a: «Nyɩmɛ nɛbɛ na tɛr sowru a ɩ̃ zie a ɩ̃ bibiir nɩdaar yele ƴãw, ɛ́ yere a lɛ a na fɛr k'ɩ̃ɩ ɩ a kʋ̀rɛ mɛ̃ bɩɩ?

¹²Mãa n'ʋ maalɩ a tẽw, ɛ́ ír a nɩsaalbɛ na kpɩɛr ʋ a. Mãa n'ʋ dɔl a salom nɩ a ɩ̃ nuru, ɛ́ mɩ́ yel a ŋmar-bi-pɩlwɩlɩ a lɛ a na fɛr k'aa ɩrɛ a.

¹³Mãa n'ʋ ɩ a nɩr[84] ŋa yi lo a sɔ́r, mɛ̃ a lɛ a mɩnʋ na tu a, ɩ̃ɩ na ɩ n a ʋ sɛ́ɛ za a man taa. Ʋlɛ n'ʋ na lɛb mɛ a ɩ̃ tẽ-kpɛ̃ɛ, a Zerizalɛm. Ʋ na bɛr'ɩ a ɩ̃ nɩbɛ bɛ na diw cen nɩ a, bɛ lɛb wa, ɛ́ bɛ bɛ yarɛ bom, bɛ tɩrɛ bom ɛ. A Sore, a kpɛnʋ-za-sob'ʋ yel.»

¹⁴À ŋá n'a a Sore yere: «Ɩsɩrayɛl i, a Eziptɩ tẽw dem tome tɔnɛ, a Etiopi tẽw dem yɛ-yɛrbɛ libie, a Seva tẽw dem, a nɩ-jarmam jarmam bɛ ŋa, a za na tɔl'ɩ a fʋ zie, ɛ́ fʋ̃ʋ na so a. A nɩbɛ bɛ ŋa na tuur fʋ na, ƴãw bamɛ. Bɛ na gbĩ n dume a fʋ niŋé, ɛ́ puori à ŋá a fʋ zie: “Fʋ zie yõ n'a a Naaŋmɩn be, kãw bɛ lɛb ka be ɩ.”»

¹⁵Ɩsɩrayɛl Naaŋmɩn i, fʋ̃ʋ na faarɛ a, fʋ sɩrɩ na ɩ Naaŋmɩn na sɔwlɩ a!

¹⁶Vĩ nɩ zʋmɛ n'a a bɛlɩ dem na maalɛ a tɩbɛ a zie. Bɛ cere nɩ bɛ za ɛ́ a zʋmɛ tuur bɛ.

¹⁷Ɛcɛ a Sore faa nɩ a Ɩsɩrayɛl faafʋ na be kʋralɛ a. Nyɩɩm na ɩ a ʋ nɩbɛ a, nyɩ bɛ be za na lɛb nyɛ̃ vĩ nɩ zʋmɛ ɩ, towtow!

¹⁸À ŋá n'a a Sore yere, ʋl na ír a salom a, ʋl na ɩ a Naaŋmɩn na maalɩ a tẽw a, na cɔbrɩ ʋ ɛ́ ɩ ʋ kpɛmɛ a. Ʋ bɛ ír ʋ ʋ ɩ vuo gã ɩ, ʋ maal'ʋ na kɛ́ bɛ kpɩɛr ʋ. A lɛ pʋɔ n'a ʋ yere à ŋá: «A Sore a, mãa n'ʋ, kãw bɛ lɛb ka be ɩ.

¹⁹Ɩ̃ bɛ sɔwlɩ ƴɛ̀r a tẽw zie kãw na liw a ɩ. Ɩ̃ bɛ yel a Zakɔb bʋʋrɛ: Nyɩ bɔbr mɛ̃ zi-vuo pʋɔ ɩ. A mãa Sore a, ɩ̃ yere nɩ bom na tu mɩnʋ a, ɩ̃ yere nɩ bom na ɩ sɩza a.»

²⁰Nyɩɩm na cɛ a nɩ-bʋʋrɛ sɔgɔ a, nyɩ ɓã taa wa, nyɩ lãw taw pɩɛlɩ. A bɛlɩ dem na tuo a bɛ dàa tɩɩb ɛ́ puore ŋmɩn na kʋ̃ tʋ̃ɔ́ faa bɛ a, bɛ bɛ bãw bom za ɩ.

²¹Nyɩ ƴɛ̀r, nyɩ manɩ a nyɩ yel-mɩŋa. Nyɩ lãw ƴɛ̀r. Ãa n'ʋ de niwn ɩ bɛ bãw a yel na ɩrɛ a ƴɛrɛŋa a? Ãa n'ʋ yel ʋ a koro kãw za? A mãa Sore bɛ n'ʋ ɛ? Naaŋmɩn bɛ lɛb ka be mãa bɛ wa n'ʋ a ɩ. Naaŋmɩn na tɛr yel-mɩŋa a, Naaŋmɩn na faarɛ a, ʋ bɛ ka be a bɛ ɩ a mãa ɩ.

²²Nyɩɩm na wɩɛr tɩ kpɩɛr a tẽw baarʋ zie a, nyɩ lɩɛbɩ cɔw mɛ̃, ɛ́ nyɩ na nyɛ̃ nɩ a faafʋ. Bʋ̃ʋ n'ʋ vɛ̃, mãa n'ɩ a Naaŋmɩn, kãw bɛ lɛb ka be ɩ.

²³Mãa mɩŋa n'ʋ ɩ̃ pɔrɛ nɩ, yel-mɩŋa n'a yire a ɩ̃ nʋɔrɩ́, ƴɛ̀rʋ na bɛ lɩɛbɛ bɛrɛ a: dun za na gbĩ n a ɩ̃ niŋé, nʋɔr za na pɔ n à ŋá:

²⁴«A Sore yõ zie n'a a mɩnʋ nɩ a kpɛnʋ be.» Bɛlɩ dem za na zɛb'ɩ mɛ̃ a na wa n a ɩ̃ zie, ɛ́ vĩ ɩrɛ bɛ.

²⁵Ɛcɛ a mãa zũú a, a Ɩsɩrayɛl bʋʋrɛ za na páw nɩ a mɩnʋ danɛ nɩ bɛ tʋɔra.