Read Dagara, Northern Ɩzayi 5 Bible Online

Ɩzayi 5 - Dagara, Northern bible

Ɩzayi 5

¹Nyɩ vɛ̃ ɩ̃ yieli yielu a ɩ̃ bá ƴãw. A ɩ̃ bá nɩ a ʋ divɛ̃ tɩɩr púo yielu n'ʋ. A ɩ̃ bá tɩ tɛr'ɩ divɛ̃ tɩɩr púo tãle na kpɛ pʋɔrʋ a zu.

²Ʋ tɩ buw nɩ a tẽsɔw, tuuri a kʋsɛbɛ bɛr, ɛ́ sɛl divɛ̃ tɩ-vɩɛlɩ bʋʋrɛ. Ʋ tɩ mɛ n bʋ̃-gùre yir-cõcowla a púo sɔwlɩsɔw, ɛ́ tuw bɔw a wɔmɛ nɛbrʋ ƴãw. Ʋ tɩ gùre na k'aa ʋ divɛ̃ tɩɩr wa wɔ̃ wɔ̃-vɩɛlɩ, ɛ́ a wa wɔ̃ wɔ̃-faar tɛwr.

³A ɩ̃ bá yere na: «Ƴɛrɛŋa a, Zerizalɛm tẽw dem nɩ Zuda nɩbɛ ɛ, nyɩ dɩ a ƴɛ̀rʋ na be mãa nɩ a ɩ̃ divɛ̃ tɩɩr púo cara pʋɔ a.

⁴Bʋ̃ʋ n'ʋ ɩ̃ nãá tʋ̃ɔ́ lɛb ɩ a ɩ̃ divɛ̃ tɩɩr púo[8] ƴãw ɛ́ bɛ ɩ? Ɩ̃ tɩ gùre nɩ wɔ̃-vɩɛlɩ a ʋ zie, bʋ̃ʋ n'ʋ so ʋ wa wɔ̃ wɔ̃-faar?

⁵Ƴɛrɛŋa a, ɩ̃ na yel'ɩ ʋlɩ bom nɛ ɩ̃ na na ɩ a ɩ̃ divɛ̃ tɩɩr púo a kʋ̀ nyɩ: ɩ̃ na ír'ɩ a dàbáw bɛr a dʋn 'wɔb a tɩɩr váar. Ɩ̃ na dáa nɩ a dacin na viiri koli ʋ a lɔb, a sɔr-tɔlbɛ nɛb ʋ.

⁶Ɩ̃ na ɩ na ʋ lɩɛbɩ kár: nɩr bɛ ɓɛlɛ a wuli-ɓɛrmɛ bɛrɛ ɩ, nɩr bɛ dɔrɛ ʋ ɛ. Gɔ-tuwr'a na búle a be, ɩ̃ɩ na yel'ɩ a zũzuwe à ta ɩ saa wa ƴãw ʋ ɛ.»

⁷A Sore, a kpɛnʋ-za-sob, divɛ̃ tɩɩr púo n'ɩ a Ɩsɩrayɛl yir dem, ɛ́ a Zuda nɩbɛ n'ɩ a divɛ̃ tɩɛ bʋʋrɛ ʋ na tɩ nɔnɛ a. A Sore tɩ gùre nɩ a lɛ na mɩ́ tu sɔ́r a, a bɛ zie, ɛ́ a ziir za a wa ɩ yel na bɛ mɩ́ tu a mɩnʋ a. Ʋ tɩ gùre nɩ a mɩnʋ, ɛ́ a ziir za a wa ɩ nɩbɛ bɛ na dɔwrɛ a cɛlsɩ.

⁸Baw-bio páw nɩ a bɛlɩ dem na mɩ́ tɛr yir ƴãw pʋɔ yir ƴãw a, na mɩ́ de púo ƴãw pʋɔ púo ƴãw a, ɛ́ mɩ́ tɛr tɩ faa a zie za ɛ́ cɛ bɛ tɛwr kpɩɛr a tẽw a.

⁹A Sore, a kpɛnʋ-za-sob pɔb ŋa lo n a ɩ̃ tobe pʋɔ: «Yir-yaga, yir-bɛrɛ nɩ yir-vɩɛlɩ na lo na, nɩr kʋ̃ cãà kpɩɛr a ɩ.

¹⁰Ɛtaar[9] ata divɛ̃ tɩɩr púo wɔmɛ divɛ̃ kʋ̃ mɩ́ ta litɩr lɩz'a ayi nɩ pie ɩ. Ɛ́ nɩr wa bʋ̀r kilo[10] kʋba ble a, ʋ na cɛ n kilo pie tɛwr.»

¹¹Baw-bio páw nɩ a bɛlɩ dem na mɩ́ cɔ̃w ìr tu a dã-kpɛn pùor, a zie mɩ́ tɩ libre, ɛ́ bɛ nyúur a divɛ̃ a damnɛ bɛ a!

¹²A pɛ̀nɛ́ nɩ a korijom, a gãgali nɩ a weli kon n'a bɛ mɩ́ bɩɛlɛ nɩ a bɛ dã-nyũ. Ɛcɛ bɛ bɛ mɩ́ nyɛ̃ a ʋlɩ bom nɛ a Sore na ɩrɛ a ɩ, bɛ bɛ mɩ́ jɩ́rɛ a ʋlɩ bom nɛ ʋ na maalɛ a ɩ.

¹³Alɛ n'a so a Sore yere: «Bɛ na ír'ɩ a ɩ̃ nɩ-bʋʋrɛ a bɛ tẽw pʋɔ, bɛ na bɛ sàw bãw bom a ƴãw. A bɛ nɩ-yée na kpi n kɔ̃, ɛ́ a zu-sɛbla kpi kʋ̃ɔ-nyúur.»

¹⁴Lɛ n'a a Kpɩmɛ-tẽw na yuo 'hee! Ʋ na háa nɩ a ʋ nɔ-gbayala. A nɩ-yée nɩ a zu-sɛbla na lãw na siw a be, a bɛ cuw gɔmɛ pʋɔ.

¹⁵A na fɛr'a a nɩsaalbɛ za gũu zuru, ɛ́ siwri bɛ tʋɔra, a na fɛr'a a pɔ̀lʋ dem su zuru.

¹⁶A Sore, a kpɛnʋ-za-sob, na dɩ n a ƴɛ̀rʋ wul ʋ na ɩ kpɛ̃ɛ a. A Naaŋmɩn na ɩ sõw a na tu n a mɩnʋ, wul a ʋ sonu.

¹⁷A tẽ-kpɛ̃ɛ debuo zu a, píir na 'wɔbr'ɩ mʋ̃ɔ mɛ̃ a mʋ̃ɔ 'wɔbrʋ ziir a a, ɛ́ a bʋli, bɛ na guole k'aa 'wɔr a, 'wɔbr a mʋ̃ɔ a be.

¹⁸Baw-bio páw nɩ a bɛlɩ dem a zir-ŋma mie na mɩ́ 'lẽ ƴãw a bɛ sãwna ƴãw a. Bɛ mɩ́ tawr'ɩ a bɛ yel-bier mɛ̃ torko fʋ na tawr a.

¹⁹Bʋ̃ʋ n'ʋ vɛ̃, bɛ mɩ́ yere na: «A Sore, ʋ ɩ fɔ̃w, ʋ paw tõ a ʋ ton kɛ̀ tɩ nyɛ̃ ʋ! A lɛ a Ɩsɩrayɛl Naaŋmɩn na ɩ sõw a, na tɩɛrɩ bin a, ʋ ta ɛ́ maalɩ, ɛ́ tɩ na bãw ʋ na!»

²⁰Baw-bio páw nɩ a bɛlɩ dem na mɩ́ bʋɔlɛ a faa vla, ɛ́ bʋɔlɛ a vla faa a. Bɛ mɩ́ de nɩ a lige bʋɔlɛ cãà ɛ́ de a cãà bʋɔlɛ lige. Bɛ mɩ́ de nɩ a bʋ̃-nʋ̃ɔ̀ bʋɔlɛ bʋ̃-tuo, ɛ́ de a bʋ̃-tuo bʋɔlɛ bʋ̃-nʋ̃ɔ̀.

²¹Baw-bio páw nɩ a bɛlɩ dem na mɩ́ de bɛ tʋɔra bʋɔlɛ yã-bãwnbɛ, ɛ́ tɩ́ɛrɛ kɛ́ bɛ tɛr'ɩ yã a!

²²Baw-bio páw nɩ a bɛlɩ dem na ɩ dã-nyũ-karɩ, ɛ́ kpɛmɛ yaga mɩ́ nyàw a dã-kpɛn taa a!

²³Bɛ mɩ́ lɛb'a bɛr a sãwna sob, nʋɔr ʋ na ŋmɛ bɛ a ƴãw, ɛ́ zawrɩ na kʋ̀ a nɩr na bɛ tɛr sãwna a a ʋ yel-mɩŋa.

²⁴Alɛ so bɛ na ɩ mɛ̃ mʋ̃ɔ vũu na dɩ a, bɩɩ mɛ̃ a mɔ̃-kon na bɔr vũu-zɛlɛ pʋɔ a. A nyɩgɛ ƴãw n'a bɛ na tĩ pʋ̃ɔ́, ɛ́ a bɛ puuru lɩɛbɩ uuru ìr do. Bʋ̃ʋ n'ʋ vɛ̃, bɛ zawr'ɩ a Sore, a kpɛnʋ-za-sob, wulu bɛr, bɛ bɛ ŋmɛlɩ kaa a Ɩsɩrayɛl Naaŋmɩn na ɩ sõw a ƴɛ̀rʋ ɛ.

²⁵Alɛ n'a so a Sore suur ìr a ʋ nɩ-bʋʋrɛ ƴãw. Ʋ̀ zɛw nɩ a nũu ŋmɛ n bɛ. A tan gbiwri na, a kũuni gã nɩ a sɛ́ɛ pʋɔ mɛ̃ sagɛ a. Ɛcɛ a na saa ɩ à ŋá a, a Sore suur bɛ ɓãa ɩ, ɛ́ a ʋ nũu cãà zɛw.

²⁶A Sore zɛwr'ɩ dɩrapo nɩ-bʋʋrɛ na zãá[11] a ƴãw, ʋ fuole na bʋɔlɛ bɛ a tẽw baarʋ zie. Bɛlɛ n'ɩ bɛ ŋa na páwr a, bɛ tarɛ nɩ fɔ̃w fɔ̃wlɛ.

²⁷Nɩr kãw za bɛ bàl a bɛ pʋɔ ɩ, kãw za bɛ cere titibr ɛ, kãw za bɛ gúre sʋ̃ɔ-gʋ̃ɔ ɩ, kãw za bɛ gúr ɛ. Kãw za bɛ fór a ʋ kpàwr ɛ, kãw za nafawr bʋ̃-'leni bɛ cɛ̀r ɛ.

²⁸A bɛ pime kàr'a, a bɛ tamɛ za dúor'a. A bɛ wie nafɩlɛ kpɛmɛ na mɛ̃ kʋsɛ-cɩlsɩ a, ɛ́ a bɛ zɛbr-torkori gbɛ́ɛ lɩɛbɛ mɛ̃ sɛsɛb-pɩl a.

²⁹Bɛ ùore na mɛ̃ gben a, bɛ kone na mɛ̃ gbẽw-bili a. Bɛ kone na mɛ̃ wɛ-dʋn na sɛ̀m bom a na nyɔw a, cere nɩ ɛ́ nɩr kʋ̃ tʋ̃ɔ́ faa ʋ a zie a.

³⁰Ɛcɛ bibir kãw a, a saa na tanɩ nɩ a nɩ-bʋʋrɛ bɛ ŋa ƴãw, mɛ̃ a lɛ a saa-sɛsɛb na mɩ́ wa cɛ̀r a kʋ̃ɔ-kpɛ̃ɛ ɩrɛ gɔmɛ a. Bɛ na mɩ́ jɩ́r'ɩ a tẽw, ɛcɛ lige nɩ kpɩɛrʋ n'a na pili pàw ʋ. Zũzu-sɛblɛ na ɩ na a bibir liw.