Read Dagara, Northern Ɩzayi 51 Bible Online

Ɩzayi 51 - Dagara, Northern bible

Ɩzayi 51

¹A Sore yere na: «Nyɩ bɛrɛ wone a ɩ̃ ƴɛ̀rʋ, nyɩɩm na bɔbr a faafʋ a, nyɩɩm na bɔbr kɛ́ nyɩ bãw mɛ̃ a. Nyɩ bɛl nyɛ̃ a pìir ʋl pʋɔ bɛ na cɩ̀ nyɩ ír a, a kʋsɛ-bɔw ʋl pʋɔ bɛ na tuw nyɩ ír a.

²Nyɩ bɛl nyɛ̃ a nyɩ sãà Abraham a, nɩ a Saara na dɔw nyɩ a. A Abraham bɛ tɩ tɛr bie a lɛn daar ɩ̃ na tɩ bʋɔl'ʋ a ɩ. Ɛcɛ ɩ̃ maal'ʋ na, ɛ́ ɩ k'ʋ ɩ nɩ-bʋʋr-yaga sãà.»

³A Sore zɔrɛ nɩ a Sɩyɔ̃ nɩbaalʋ, ʋ zɔrɛ nɩ a ʋ deboru nɩbaalʋ. Ʋ na ɩ n a zie ŋa bɛ na bɛ cãà kpɩɛr a, ʋ lɩɛbɩ zi-vla vla. Ʋ na ɩ n a zi-kõw ŋa ʋ lɩɛbɩ Edɛn zaadɛ̃[87]. Cɩlʋ nɩ nʋ̃ɔ̀ cɛlsɩ n'a na be a be, lãwnɩ danʋ yielu nɩ bʋ̃-ŋmɩɛrɩ ŋmɛb.

⁴A Sore yere na: «Nyɩɩm, ɩ̃ nɩbɛ ɛ, nyɩ bɛrɛ wone a ɩ̃ ƴɛ̀rʋ, nyɩɩm, ɩ̃ tẽw dem i, nyɩ cɛlɛ be! Bʋ̃ʋ n'ʋ vɛ̃, mãa zie n'a a wulu na yi, ɛ́ a lɛ ɩ̃ na dɩ a ƴɛ̀rʋ bin a n'a na ɩ a cãà na caalɛ a nɩ-bʋʋrɛ a.

⁵A mɩnʋ ɩ̃ na tɩrɛ a pɩɛl'a, a faafʋ waar'a. Ɩ̃ na dɩ n nɩ a nɩ-bʋʋrɛ ƴɛ̀rʋ nɩ kpɛnʋ. A nɩ-bʋʋrɛ na zãá a na ƴãw nɩ a bɛ tɩɛrʋ a ɩ̃ ƴãw, bɛ na gùre nɩ a ɩ̃ nɩ-kpɛ̃ɛnʋ dɩb.

⁶Nyɩ úori a salom nyɛlɛ, al pùorí nyɩ jɩ́r a tẽw a pile ka: a salom na bɔr a mɛ̃ zʋ̀ʋ́r a, a tẽw na zaw na mɛ̃ kparʋ a, ɛ́ a ʋ nɩbɛ kpiir mɛ̃ nazʋʋr a. Ɛcɛ a ɩ̃ faafʋ na be n be kʋralɛ, ɛ́ a mɩnʋ ɩ̃ na waar'ɩ a kʋ̃ tɛr baarʋ daar ɛ.

⁷Nyɩ bɛrɛ wone a ɩ̃ ƴɛ̀rʋ, nyɩɩm na bãw a yel na tu a mɩnʋ a, nyɩɩm na tɛr a ɩ̃ wulu a nyɩ socie pʋɔ a: nyɩ ta zɔrɛ a nɩsaalbɛ ɩ-lab ɛ, a bɛ zʋmɛ, a taa wa tʋ̃ɔ́nɛ nyɩ ɛ.

⁸Bʋ̃ʋ n'ʋ vɛ̃, a zãzule na dɩ bɛ na mɛ̃ mɔwr na mɔw kparʋ a, ɛ́ a gùme dɩ bɛ mɛ̃ píir kɔblʋ pɛn a. Ɛcɛ a mɩnʋ ɩ̃ na waar'ɩ a kʋ̃ tɛr baarʋ ɛ, ɛ́ a ɩ̃ faafʋ be be yome yome za.»

⁹Ìr, Sore e, ìr! Wul a fʋ kpɛnʋ! Ìr mɛ̃ a koro za a, mɛ̃ a koro za dem daar a. Fʋ̃ʋ bɛ n'ʋ tɩ cɛ̀ a Arahab ɓar ɛ? Fʋ̃ʋ bɛ n'ʋ tɩ cɔ̀r a kʋ̃ɔ-kpɛ̃ɛ wa-bɩɛ[88] col ɛ?

¹⁰Fʋ̃ʋ mɩ̀ bɛ n'ʋ tɩ ɩ a kʋ̃ɔ-kpɛ̃ɛ, a kʋ̃ɔ-kpɛ̃ɛ-zulu zulu ʋ kò ɩ? Fʋ̃ʋ cãà bɛ n'ʋ tɩ puo sɔ́r a kʋ̃ɔ-kpɛ̃ɛ pɛrɩ́, k'aa fʋ nɩbɛ fʋ na ya de a tɔl ɛ?

¹¹A nɩbɛ a Sore na na ɩ bɛ lɛb so bɛ tʋɔra a na lɛb'a wa. Bɛ na cáarɛ na wa kpɛ n a Sɩyɔ̃ tẽw pʋɔ. Nʋ̃ɔ̀ na bɛ tɛr baarʋ a na caal'ɩ a bɛ niŋe, cɩlʋ nɩ nʋ̃ɔ̀ cɛlsɩ na paalɩ bɛ na, ɛ́ kpɩɛrʋ nɩ kon bɔr.

¹²A Sore yere na: «Mãa n'ʋ mɔwlɛ nyɩ, ʋ̃ʋ, mãa n'ʋ. Ɩ̃ nɩbɛ ɛ, bʋ̃ʋ n'ʋ so nyɩ zɔrɛ a nɩsaal na ɩ bʋ̃-kpiira a, a nɩsaal na ɩ mɛ̃ mʋ̃ɔ a?

¹³Nyɩ yiir'ɩ a Sore bɛr, ʋl na ír nyɩ a, ʋl na dɔl a salom ɛ́ bin a tẽw pɛr a. Bibie za, nyɩ mɩ́ màwr'ɩ a sob nɛ na dɔwrɛ nyɩ a niŋé, a lɛ a ʋ su-yãyaar na mɩ́ ìr, mɛ̃ ʋ cɔbr'a baarɩ na sãw nyɩ bɛr a. Ɛcɛ ƴɛrɛŋa a, nyɩnɛ n'a a ʋ su-yãyaar be?

¹⁴A gaso nɩr a kpɩɛrʋ na dĩ a kʋ̃ yaa kɛ́ lɛb so ʋ tʋɔra ɩ. Ʋ bɛ kpiir a ʋ gaso pʋɔ ɩ, ɛ́ kʋ̃ lɛb bɔ bʋ̃-dɩra gù ɛ.

¹⁵Mãa n'ɩ a Sore, a nyɩ Naaŋmɩn. Ɩ̃ mɩ́ dam'ɩ a kʋ̃ɔ-kpɛ̃ɛ, ɩ a ʋ kʋ̃ɔ-mie ɩrɛ gɔmɛ. A ɩ̃ yúor'ɩ: “a Sore, a kpɛnʋ-za-sob”.

¹⁶Ɩ̃ lɛb'a dɔlɛ a salom, ɩ̃ lɛb'a bine a tẽw pɛr ɛ́ yere a Sɩyɔ̃ tẽw: “Fʋ̃ʋ n'ɩ a ɩ̃ nɩ-bʋʋrɛ, ɩ̃ ƴãwnɛ nɩ a ɩ̃ ƴɛ̀rʋ a fʋ nʋɔrɩ́, ɩ̃ piwr fʋ na tɛrɛ nɩ a ɩ̃ nũu ɓaarʋ.”»

¹⁷Ìr, Zerizalɛm i, ìr àr saaƴẽwn! A Sore ƴãw na fʋ nyũ a ʋ suur koli-nyúura. Fʋ fuori ʋ na, ʋ ƴãw fʋ nĩw-viir.

¹⁸A fʋ bibiir za fʋ na dɔw a pʋɔ a, kãw za bɛ wul fʋ a sɔ́r ɛ. A bibiir za fʋ na guoli a pʋɔ a, kãw za bɛ tɩɛ fʋ ɛ.

¹⁹Yele á ŋá wa n a fʋ zu ayiri yiri: po-to-fãw-ɩb nɩ zie na sãw a, kɔ̃ nɩ zɛbr. Ɛcɛ ãa n'ʋ na kone fʋ? Ãa n'ʋ na mɔwlɩ fʋ?

²⁰A fʋ bibiir gã nɩ tẽw, a sɛ́ɛ gõgone za pʋɔ. Bɛ gã nɩ a be, bɛ tɛr fãw ɛ, mɛ̃ muli bɛrɩ na nyɔw a, a Sore su-yãyaar ìr a bɛ ƴãw, nɩ a yelu a fʋ Naaŋmɩn na yere bɛ a.

²¹A na ɩ à ŋá a, bɛrɛ wone, fʋ̃ʋ Zerizalɛm na ɩrɛ nɩbaalʋ a, fʋ̃ʋ na kuoli ɛ́ a bɛ ɩ divɛ̃ n'a a:

²²À ŋá n'a a Sore, a fʋ Zu-sob, a fʋ Naaŋmɩn, yere, ʋl na ƴɛ̀rɛ kpɩɛr a fʋ nɩbɛ a: «Ɩ̃ na lɛb'a de a nĩw-viir koli-nyúura a fʋ nuru pʋɔ, a ɩ̃ suur koli-nyúura. Fʋ kʋ̃ lɛb nyũ ʋ towtow ɛ.

²³Ɩ̃ na ƴãw ʋ nɩ a bɛlɩ dem na dɔwrɛ fʋ a nuru pʋɔ, bɛl na tɩ yere a fʋ zie: “Gã vɔblɩ muru tɩ tɔl a fʋ zu” a! Lɛ n'a fʋ tɩ ɩ a fʋ zikur ʋ lɩɛbɩ tẽsɔw, ʋ lɩɛbɩ sɔ́r a sɔr-tɔlbɛ ƴãw.»