Read Dagara, Northern Ɩzayi 54 Bible Online

Ɩzayi 54 - Dagara, Northern bible

Ɩzayi 54

¹Zerizalɛm i, lɔbr nʋ̃ɔ̀ cɛlsɩ, fʋ̃ʋ na bɛ tɩ cãà tɛr bibiir a. Lɔbr nʋ̃ɔ̀ cɛlsɩ cɩlɛ nɩ, fʋ̃ʋ na bɛ tɩ cãà dɔwr a. Bʋ̃ʋ n'ʋ vɛ̃, a Sore yere nɩ à ŋá a fʋ zie: «Fʋ̃ʋ, pɔw-zawr-bɛra a, fʋ tɛr'ɩ bibiir ƴɛrɛŋa zuo a pɔw na tɛr sɩr a.»

²Yɛ̀lɩ a fʋ pɛn-sɛw, ɩ a fʋ kpɛb zie pɛnɛ a yɛlmɛ dɔwlɩ, ta ƴɛ̀rɛ libie ƴɛ̀rʋ ɛ. Ɩ a míe a wõwme dɔwlɩ, ɛ́ fʋ kpa a kpawbie a kpɛmɛ.

³Bʋ̃ʋ n'ʋ vɛ̃, fʋ na yɛ́r'a pàw a ziir za, a fʋ bibiir na so nɩ a tẽ-kpɔwlɩ, ɛ́ lɛb kpɩɛr a tẽ-bɛrɛ bɛ na bɛ tɩ cãà kpɩɛr a.

⁴Ta zɔrɛ dɛ̃bɩ̃ɛ ɩ, vĩ kʋ̃ cãà ɩrɛ fʋ ɛ. A fʋ tɩɛrʋ, ʋ ta damnɛ fʋ ɛ, bɛ kʋ̃ cãà tʋʋr fʋ ɛ. Fʋ na yiir'ɩ a fʋ pɔ̀lʋ daar vĩ bɛr, fʋ kʋ̃ cãà bãwnɩ a fʋ pɔw-kʋɔlʋ zʋmɛ ɩ.

⁵Bʋ̃ʋ n'ʋ vɛ̃, a sob nɛ na ír fʋ a n'ʋ na ɩ a fʋ sɩr, a sob nɛ a yúor na dɩ k'aa Sore, a kpɛnʋ-za-sob a. A sob nɛ na yarɛ dier fʋ a, a Ɩsɩrayɛl Naaŋmɩn na ɩ sõw a n'ʋ, a sob nɛ bɛ na bʋɔlɛ a “tẽ-daa Sore” a.

⁶A fʋ pʋɔ za tɩ sãw na, mɛ̃ pɔw bɛ na zawrɩ bɛr a. Ɛcɛ a Sore lɛb'a de b. A fʋ Naaŋmɩn yere na: Nɩr na tʋ̃ɔ́ na sɩrɩ zawrɩ a pɔ̀lʋ daar pɔw bɛr ɩ?

⁷Ɩ̃ tɩ zawr fʋ na bɛr blãlɛ tɛwr, ɛcɛ ɩ̃ lɛb'a dier fʋ nɩ su-ɓaarʋ na ɩ kpɛ̃ɛ a.

⁸Ɩ̃ tɩ nyɛ̃ nɩ fʋ nɩ suur yaga za, zawrɩ na nyɛ b zaa pʋrɩ. Ɛcɛ nɔ̃wfʋ na bɛ tɛr baarʋ a n'ʋ ɩ̃ wule nɩ fʋ a ɩ̃ su-ɓaarʋ. A mãa, a Sore, mãa n'ʋ yere à á ŋá kʋ̀rɛ fʋ, mãa na yarɛ dier fʋ a.

⁹«Ɩ̃ na ɩ na mɛ̃ a Nowe daar a. Ɩ̃ tɩ pɔ na k'aa kʋ̃ɔ-paalʋ kʋ̃ɔ kʋ̃ lɛb paalɩ pàw a tẽw ɛ. Lɛ mɩ̀ n'a ɩ̃ pɔrɛ yere kʋ̀rɛ fʋ a dɩ̃a, k'ɩ̃ɩ kʋ̃ lɛb nyɛ̃ nɩ fʋ suur ɛ, k'ɩ̃ɩ kʋ̃ lɛb tanɩ fʋ ɛ.

¹⁰A tan saa na ìr tɩ àr zi-yoru, ɛ́ a tãli damnɛ a, a nɔ̃wfʋ ɩ̃ na nɔnɛ fʋ a bɛ lɩɛbɛ towtow ɛ, a wõ-taa ɩ̃ na maal'ɩ fʋ a fʋ nʋ̃ɔ̀ ƴãw a, kʋ̃ bãw damnʋ towtow ɛ. A mãa, a Sore, mãa n'ʋ yere a lɛ kʋ̀rɛ fʋ, mãa na tɛr a ɩ̃ su-ɓaarʋ a fʋ zie a.»

¹¹Zerizalɛm baw-bio na páw a, saa waar'a lãwnɩ sɛsɛb ŋmɩɛr fʋ, ɛ́ nɩr za bɛ be be na mɔwlɩ fʋ ɛ. «A mãa, a Sore, ɩ̃ na lɛb'a mɛ b nɩ kʋsɛbɛ bɛ na ƴãw bʋ̃-ƴãwnɩ a vɩɛl a. Kʋsɛ-bi-nyɩlɩ bɛ na bʋɔlɛ safɩɩr a n'a ɩ̃ na bin nɩ a fʋ pɛr.

¹²A dacine saa-zu na ɩ n kʋsɛ-bi-nyɩlɩ bɛ na bʋɔlɛ iribi a, a fʋ dɩ̃dɛɛ na ɩ n kʋsɛbɛ na mɩ́ cuoli cuoli a. A fʋ dacine za na viiri koli fʋ a na ɩ n kʋsɛ-bi-nyɩlɩ vɩɛlɩ vɩɛlɩ.

¹³Ɩ̃ na wule nɩ a fʋ bibiir za, ɛ́ bɛ na tɛr'ɩ ƴã-ɓaarʋ yaga.

¹⁴A mɩnʋ n'a na tɩɛ fʋ. Fʋ kʋ̃ cãà zɔrɛ bom za dɛ̃bɩ̃ɛ ɩ, fɛrʋ za na na zãá nɩ fʋ a ƴãw. A dɛ̃bɩ̃-kpɛ̃ɛ na zãá nɩ fʋ na, ʋ kʋ̃ lɛb ta b ɛ.

¹⁵Bɛlɛ wa wa ŋmãa nɩ fʋ zɛbr a, a kʋ̃ yi mãa zie ɩ. Nɩr wa ŋmãa nɩ fʋ zɛbr a, ʋ na lo n a fʋ niŋé.

¹⁶Nyɛ̃, mãa n'ʋ ír a sãa-kpɩɛrɛ, ʋl na mɩ́ zuwr a sãa-vũu ƴãwn maalɛ nɩ zɛbr-bʋ̃-pɛ-bʋʋrɛ za a. Mãa mɩ̀ n'ʋ ír a nɩr ʋl na na tʋ̃ɔ́ sãw a zɛbr bome á ŋá bɛr a.

¹⁷Zɛbr bom kãw za bɛ na maalɩ a fʋ ƴãw a, kʋ̃ tʋ̃ɔ́ ɩ b faa ɩ. Nɩr za nãà wa yere a fʋ sãwna a ƴɛ̀rʋ-dɩb zie a, fʋ na tʋ̃ɔ́ na ƴɛ̀r wul k'ʋʋ sãw na. A bom ɩ̃ na bin gùre nɩ a ɩ̃ tõ-tõ-biir a n'ɩ à ŋà, à ŋá n'a ɩ̃ wule a bɛ mɩnʋ, a Sore n'ʋ yere.»