Read Dagara, Northern Ɩzayi 63 Bible Online

Ɩzayi 63 - Dagara, Northern bible

Ɩzayi 63

¹Ãa n'ɩ a sob ŋa na yi a Edɔm tẽ-kpɛ̃ɛ, Bɔsɩra, waar a? A ʋ kparɩ mar'ɩ bʋ̃-zɩɩr. Ʋ su n dɛpaal bʋ̃-suuri, ʋ nàw nɩ nyãá waar'ɩ, ɛ́ bãwnɩ a ʋ fãw. A Sore yere na: “Mãa n'ʋ. Ɩ̃ dɩrɛ nɩ a ƴɛ̀rʋ nɩ mɩnʋ, ɩ̃ tɛr'ɩ a fãw na faa nyɩ.

²Bʋ̃ʋ n'ʋ so a fʋ bʋ̃-suuri mar bʋ̃-zɩɩr, ɛ́ a fʋ kparɩ ɩ mɛ̃ nɩr na nɛb divɛ̃ tɩ-wɔmɛ a nɛbrʋ zie a?

³Yel-mɩŋa n'a, ɩ̃ nɛb'ɩ a divɛ̃ tɩɩr wɔmɛ ɩ̃ yõ. A nɩ-bʋʋrɛ pʋɔ a, nɩr za bɛ tɩ lãw nɩ mɛ̃ ɩ. Lɛ n'a a ɩ̃ suur nɩ a ɩ̃ su-yãyaar pʋɔ ɩ̃ nɛb bɛ ŋmɛr, ɩ̃ nɛb'ɩ bɛ gbɛ́ɛ. A bɛ zɩ̃ɩ ƴaw na waarɩ a ɩ̃ kparɩ, a ɩ̃ bʋ̃-suuri mar a za.

⁴Ɩ̃ tɩ tɛr'ɩ a san-yaafʋ tɩɛrʋ, a ɩ̃ nɩ-bʋʋrɛ ya-deb yũon tɩ vɩɛ na.

⁵Ɩ̃ tɩ jɩ́r'a, bɛ nyɛ̃ sõwne za ɩ! A tɩ ɩ n uru yaga a ɩ̃ zie, nɩr za na bɛ tɩ tɩ̀ɛ mɛ̃ a! Lɛ n'a a ɩ̃ kpãkpãw tɩ ɩ ɩ̃ zɛb tʋ̃ɔ́, ɛ́ a ɩ̃ su-yãyaar ɩ a ɩ̃ tɩɛrɛ.

⁶Ɩ̃ ƴɛ́r'ɩ nɩ-bʋʋrɛ ŋmɛr a ɩ̃ suur pʋɔ, ɩ̃ ɩ na a ɩ̃ su-yãyaar kuoli bɛ, ɛ́ ɩ a bɛ zɩ̃ɩ a cir tẽw.

⁷Ɩ̃ na lɛb'a sɩ̃w a Sore ɩ-vɩɛlɩ tɩɛrʋ, a alɩ bome nɛ na n'a so tɩ danɛ ʋ a: a alɩ bome nɛ za a Sore na ɩ a tɩ ƴãw a, a ʋ nɔ̃wfʋ na ɩ kpɛ̃ɛ a Ɩsɩrayɛl nɩbɛ ƴãw a, a alɩ bome nɛ za ʋ na ɩ a ʋ nɔ̃wfʋ zũú a, nɩ a ʋ ɩ-vɩɛlɩ na bɛ tɛr vuo a.

⁸Ʋ yel'ɩ à ŋá a Ɩsɩrayɛl nɩbɛ ƴãw: «Bɛ ɩ n a ɩ̃ nɩbɛ, a ɩ̃ bibiir nɛbɛ, bɛ kʋ̃ bɛlɩ mɛ̃ ɩ.» Ʋʋ tɩ ɩ n a bɛ Faarɛ.

⁹A bɛ kpɩɛrʋ za pʋɔ a, nɩ-tona kãw bɩɩ malkɩ kãw bɛ n'ʋ faa bɛ ɩ, a Sore mɩŋa n'ʋ. Ʋ ya na de bɛ a ʋ nɔ̃wfʋ nɩ a ʋ nɩbaal-zɔba pʋɔ. Ʋ tɛr bɛ na ɛ́ tɩ̀ɛ bɛ a bɛ yele pʋɔ a koro za.

¹⁰Ɛcɛ a bɛl a, bɛ tɩ gaarɩ na, ɩ a ʋ Vʋʋrʋ Sõw ʋ tɛr pʋ-sãwna. Lɛ n'a a Sore tɩ lɩɛbɩ a bɛ dɔ̃ sob zɛb'ɩ bɛ.

¹¹Lɛ n'a a ʋ nɩbɛ tɩ lɛb tɩɛrɩ a Moyiir daar: «Nyɩnɛ n'a a sob nɛ na ɩ a ʋ nɩbɛ bɛ yi a kʋ̃ɔ-kpɛ̃ɛ pʋɔ lɛb do a be? Nyɩnɛ n'a a ʋ dʋn lãwnɩ a cɩ̃ɩnbɛ be? Nyɩnɛ n'a a sob nɛ na ƴãw a ʋ Vʋʋrʋ Sõw a tɩ sɔgɔ a be?

¹²A cenu daar a, ʋlɛ n'ʋ tɩ̀ɛ a Moyiir nɩ a ʋ kpãkpã-kpɛ̃w. Ʋ ɓar'ɩ a kʋ̃ɔ-kpɛ̃ɛ kʋ̃ɔ a bɛ niŋé, k'ʋʋ tʋ̃ɔ́ páw yúor na be kʋralɛ a.

¹³Ʋlɛ n'ʋ ɩ bɛ cen tɔl a kʋ̃ɔ-kpɛ̃ɛ-zulu pʋɔ mɛ̃ wur na cen tɔl wɛja-kpalɛ pʋɔ a, ɛ́ bɛ̀ bɛ lo ɩ.

¹⁴Bɛ tɩ ɩ na mɛ̃ dʋn na siwr fʋɔla pʋɔ a. A Sore Vʋʋrʋ tɩ tɛr bɛ na cere nɩ a pɩ̃ɛnʋ zie.» À à ŋá n'a fʋ tɩ tɛr a fʋ nɩbɛ cen nɩ, kɛ́ fʋ páw yúor-vɩɛlʋ-danʋ.

¹⁵Sore e, be a salom zu, a zi-sõw-vla vla fʋ na kpɩɛr a, ɛ́ jɩ́r a ʋlɩ bom nɛ na ɩrɛ tɩ a nyɛ̃. Nyɩnɛ n'a a fʋ nɔ̃wfʋ na dɩrɛ a tɩ ƴãw mɛ̃ vũu a cen? Nyɩnɛ n'a a fʋ kpɛnʋ be? Tɩ bɛ mɩ́ cãà nyɛ̃ a fʋ ƴã-cɩrʋ nɩ a fʋ nɔ̃wfʋ a tɩ ƴãw ɛ.

¹⁶Ɛcɛ fʋ̃ʋ n'ɩ a tɩ sãà, a tɩ sãàkʋm-kʋra Abraham bɛ bãw tɩ yele ɩ, a Zakɔb bɛ bãw tɩ ɛ. Ɛcɛ fʋ̃ʋ a, Sore e, fʋ ɩ n a tɩ sãà, a “tɩ ya-diere”, a fʋ yúor'ɩ à ŋà a koro kãw za.

¹⁷Sore e, bʋ̃ʋ n'ʋ so fʋ bɛr tɩ tɩ bɔr zãá nɩ a fʋ sɔ́r, tɩ kpawlɩ a tɩ socie a bɛ zɔrɛ fʋ? Lɛb wa, fʋ na nɔnɛ tɩ a zũú, tɩɩm na ɩ a fʋ tõ-tõ-biir a, a nɩ-bʋʋrɛ fʋ na so a.

¹⁸A tɩɩm, fʋ nɩ-bʋʋr-sõw a, blãlɛ n'a tɩ kpɛ so a tẽw. A tɩ dɔ̃ dem ŋmɛr'ɩ a fʋ zi-sõw bɛr.

¹⁹A cɛlɩ nɩ yaga tɩ na bɛ cãà ɩ a nɩ-bʋʋrɛ bɛl zu fʋ na dɩrɛ a naalʋ a, a nɩ-bʋʋrɛ bɛl na bɛ cãà dɩ a fʋ yúor a! Áa! fʋ̃ʋ tori ɩ mɛ̃ fʋ cɩɛr'ɩ a salom ɛ́ siw a! A tan nãá dam'ɩ a fʋ niŋé!