Read Dagara, Northern Ɩzayi 66 Bible Online

Ɩzayi 66 - Dagara, Northern bible

Ɩzayi 66

¹À ŋá n'a a Sore yere: «A salom ɩ n a ɩ̃ naalʋ-dà-kɔw ɛ́ a tẽsɔw ɩ a ɩ̃ gbɛ́ɛ dɔwlʋ zie. Yir bʋ̃ʋ n'ʋ nyɩ na tʋ̃ɔ́ ŋmãa kʋ̀ m? A zie n'ɩ buor ɩ na na tʋ̃ɔ́ kpɩɛr a?

²A bome á ŋá za a, ɩ̃ nuru n'a maalɩ a, mãa so a, a mãa Sore, mãa n'ʋ yere. Ɛcɛ a ʋlɩ sob ɩ̃ na mɩ́ jɩ́rɛ a, ʋlɛ n'ɩ a bãbàal, a pʋ-sãwna sob, a sob nɛ ɩ̃ na mɩ́ ƴɛ̀r ʋ màwr a.

³Ɛcɛ a bagɛ maalʋ ƴãw a, a nɩbɛ mɩ́ kʋ n náab, ɛ́ mɩ̀ kʋ nɩr. Bɛ mɩ́ ŋmaar'ɩ pɛ́rʋ kɔkɔr, ɛ́ mɩ̀ ŋmɛ baa kʋ. Bɛ mɩ́ de nɩ de-kʋ̀b bom tɩr, ɛ́ mɩ̀ de dobaa zɩ̃ɩ tɩr. Bɛ mɩ́ nyɩw nɩ tɩ-suur-zɔ̃-na-nyùur-vla-vla-a, ɛ́ mɩ̀ maalɩ tɩɩb na bɛ vɩɛl a. A nɩbɛ bɛ ŋa kaa na ír a bɛ sɛ́ɛ, ɛ́ a bɛ ɩ-faar na bɛ maal'ɩ wob a ɩrɛ bɛ nʋ̃ɔ̀.

⁴A na ɩ à ŋá a, a mãa mɩ̀, ɩ̃ na kaa na ír bɛr bɛ kʋ̀ a alɩ bome nɛ bɛ na mɩ́ wa ùr ɩrɛ a lɛ bɛ na nɔnɛ a na waar'ɩ a. Ɩ̃ na ɩ na a ʋlɩ bom nɛ na ɩrɛ bɛ dɛ̃bɩ̃ɛ a wa a bɛ zu. Bʋ̃ʋ n'ʋ vɛ̃, ɩ̃ bʋɔl'a ɛ́ nɩr za bɛ sɔw ɛ, ɩ̃ ƴɛ̀r'a, ɛ́ nɩr za bɛ bɛr wõ ɩ. Bɛ ɩ n a ʋlɩ bom nɛ na bɛ vɩɛl a a ɩ̃ zie, bɛ kaa na ír a ʋlɩ bom nɛ na bɛ nʋmɛ a ɩ̃ zie a.»

⁵Nyɩ bɛrɛ wone a Sore ƴɛ̀rʋ, nyɩɩm ʋ na mɩ́ ƴɛ̀r nyɩ màwr a: A nyɩ yɛbr bɛ mɩnɛ hɩ̃ɛn nyɩ na, ɛ́ íre nyɩ bɛrɛ a bɛ pʋɔ a mãa ƴãw. Bɛ mɩ́ ɩrɛ nyɩ na laar yere nɩ: «A Sore, ʋ wul a ʋ yúor-vɩɛlʋ-danʋ tɩ tʋ̃ɔ́ nyɛ̃ a nyɩ cɩlʋ!» Ɛcɛ bɛlɛ nɛbɛ na nyɛ̃ vĩ.

⁶Nyɩ wone a gɔmɛ na yire a tẽ-kpɛ̃ɛ pʋɔ a, a gɔmɛ na yire a Ŋmɩn-yir-kpɛ̃ɛ pʋɔ a. A Sore n'ʋ yarɛ a dɔ̃ dem a lɛ a na sɛwnɩ bɛ a.

⁷A pʋɔ bɛ 'wɔb a Zerizalɛm sɛr ɛ, ʋʋ dɔw, ʋ bɛ tĩ wone a dɔwfʋ 'wɔbrʋ sɛr ɛ, ɛ́ dɔw dɛble.

⁸Ãa n'ʋ dãw wõ a yel ŋa tɔ? Ãa n'ʋ dãw nyɛ̃ ʋ? Bɛ mɩ́ dɔw nɩ tẽw bibi-been yõ o? Nɩ-bʋʋrɛ na tʋ̃ɔ́ na nyɛ̃ cãà daƴen daadaa a? Ɛcɛ lɛ n'a a ɩ a Zerizalɛm zie: a 'wɔbrʋ tɩ tine ʋ na wa báarɛ, ʋʋ dɔw a ʋ bibiir!

⁹A Sore sowre na: «Mãa wa ɩ pɔw tɛr pʋɔ tɩ ta a dɔwfʋ a, a bie ta yi ƴãw n'a bɩɩ? A fʋ Naaŋmɩn n'ʋ yere.»

¹⁰Nyɩ lãwnɩ a Zerizalɛm cɩlɛ, nyɩ cɩlɛ ƴawr'ɩ a ʋ ƴãw, nyɩɩm za na nɔnɛ ʋ a. Nyɩɩm na tɩ be a wahala pʋɔ a ʋ ƴãw a, nyɩ lãwnɩ ʋ ƴɛrɛŋa a nʋ̃ɔ̀ na kpɛ ʋ bol bɛr a pʋɔ.

¹¹Lɛ n'a ʋ na lɛb ƴãw nyɩ kanyir. Nyɩ na tɩw na mɛ̃ bi-pɩɩlɛ na ƴɛnɛ a bɛ mã bɩrɛ na paalɩ bʋ̀r-kʋ̃ɔ wone nɩ nʋ̃ɔ̀ a.

¹²Bʋ̃ʋ n'ʋ vɛ̃, à ŋá n'a a Sore yere: «Ɩ̃ na ɩ n a ƴã-ɓaarʋ gbɔlɛ cere a Zerizalɛm mɛ̃ man kʋ̃ɔ a, ɛ́ a nɩ-bʋʋrɛ na-bome gbɔlɛ cere mɛ̃ bàa na paalɩ yi nɛ́ɛ a. Ɩ̃ na kaa nɩ a nyɩ zie mɛ̃ a lɛ mã na mɩ́ ɩrɛ bie ʋ na ƴɛnɛ a, ʋ na mɩ́ pɛ̀w ɛ́ ƴãw gbɛ́ɛ zu dɩ̃ɛnɛ nɩ a.

¹³Sɩza, mɛ̃ a lɛ mã na mɩ́ mɔwlɩ a ʋ bie a, a mãa mɩ̀, ɩ̃ na mɔwlɩ nyɩ na. Nyɩ na nyɛ̃ nɩ mɔwlʋ a Zerizalɛm.

¹⁴Nyɩ na nyɛ̃ na, a nyɩ socir na cɩlɛ na, a nyɩ kɔbɛ na lɛb'a kpɛmɛ mɛ̃ mʋ̃ɔ saa na wa ƴãw a.» A Sore na ɩ n a ʋ tõ-tõ-biir bãw a ʋ kpɛnʋ, ɛcɛ ʋ na wul'ɩ a ʋ suur a ʋ dɔ̃ dem.

¹⁵A Sore sɩrɩ n'ɩ ŋan: vũu pʋɔ n'a ʋ waar, a ʋ zɛbr-torkori ɩ na mɛ̃ sɛsɛb-pɩl a. Ʋ waar'a k'ʋʋ wa wul a ʋ suur na bɛ tɛr dɩ̃ɛnʋ a, ɛ́ fuw a nɩbɛ nɩ vũu-zɛlɛ.

¹⁶Sɩza, a vũu nɩ a zɛbr-sɔ-kpɛ̃ɛ n'a a Sore na dɩ n a nɩsaalbɛ za a ƴɛ̀rʋ. A kũuni na yãwmɛ na.

¹⁷A nɩbɛ bɛl na mɩ́ sʋ̃ɔmɩ bul so a bɛ dɛwr bɛr, kɛ́ bɛ tʋ̃ɔ́ kpɛ zaadɛnɩ a mɩnɛ kãw pʋɔ a nɛbɛ ɩ̃ yere a ka. Bɛ mɩ́ àr'a tu nɩr na be a zaadɛ̃ sɔwlɩsɔw a.[97] Bɛ mɩ́ 'wɔbr'ɩ dobaa bɩɩ jɩkɔl, bʋ̃-faar na bɛ maal'ɩ wob a. A nɩbɛ bɛ ŋa na lãw na kpi bɛ za. A Sore n'ʋ yere.

¹⁸A Sore yere na: «Ɩ̃ bãw nɩ a alɩ bome nɛ bɛ na ɩrɛ a, nɩ a alɩ bome nɛ bɛ na tɩɛrɛ a. Ɩ̃ waar'a k'ɩ̃ɩ wa ɓã a nɩ-bʋʋrɛ za na ƴɛ̀rɛ ƴɛ̀r-pɛ-bʋʋrɛ za a taa.

¹⁹Ɩ̃ na ƴãw nɩ bãwfʋ a bɛ sɔgɔ. A bɛlɩ dem nãà wa cãà vʋʋrɛ a ɩ̃ ƴɛ̀rʋ-dɩb pùorí a, ɩ̃ na tõ bɛ nɩ a Tarsisɩ, a Putɩ nɩ a Ludɩ nɩbɛ zie, nɩbɛ na ɩ tã-tɛbrbɛ a. Ɩ̃ na tõ bɛ nɩ a Tubal, a Yavan[98] nɩ a kʋ̃ɔ-kpɛ̃ɛ-sɔgɔ-tẽ-zãánɩ nɩbɛ zie, a be nɩr na bɛ dãw wõ bɛ por a ɩ̃ yúor a, a be nɩr na bɛ dãw nyɛ̃ a ɩ̃ yúor-vɩɛlʋ-danʋ a. Ɛ́ bɛ na tɩ ɩ na a nɩbɛ bɛ ŋa bãw a ɩ̃ yúor-vɩɛlʋ-danʋ.

²⁰A nɩbɛ bɛ ŋa na tɛr'ɩ a nyɩ yɛbr za na tɩ be a bɛ zie a lɛb wa n. Wie zu, zɛbr-torkori pʋɔ, torkori na pàw ɓaarʋ a pʋɔ, mílɛ̀[99] nɩ nyɔ̃wmɩ zu n'a bɛ na tɛr bɛ lɛb wa n a ɩ̃ tãw-sõw zu a Zerizalɛm. A Sore n'ʋ yel. A na ɩ n a bɛ de-kʋ̀b bom a ɩ̃ ƴãw. Ɩ̃ na sàw na de ʋ mɛ̃ a de-kʋ̀b bom ʋl a Ɩsɩrayɛl nɩbɛ na mɩ́ wa n a ɩ̃ Yir laar na bɛ tɛr dɛwr a pʋɔ a.

²¹Ɩ̃ mɔ̃ mɩ̀ na kaa na ír bàwr-maalbɛ nɩ levitɩ mɩnɛ a nɩ-bʋʋrɛ bɛ ŋa pʋɔ. A Sore n'ʋ yel.»

²²A Sore yere na: «Mɛ̃ a lɛ a salom-paala nɩ a tẽsɔw-paala ɩ̃ na ír na kpɛmɛ àr a ɩ̃ niŋé a, lɛ n'a a nyɩ yúor nɩ a nyɩ bʋʋrɛ na be a ɩ̃ niŋé kʋralɛ.

²³À ŋá n'a, cuw-paala za nɩ pɩ̃ɛnʋ-bibir za, a nɩbɛ za na mɩ́ wa wa gbĩ dume a ɩ̃ niŋé.

²⁴A nɩbɛ wa yire a tẽ-kpɛ̃ɛ pʋɔ a, bɛ na tʋ̃ɔ́ na nyɛ̃ a nɩbɛ na gaarɩ a ɩ̃ ƴãw a ƴã-gamɛ. A zãzule na dɩrɛ a a, bɛ kpiir ɛ, ɛ́ a vũu na dɩrɛ a a, bɛ kpiire ɩ. A na ɩ n pʋl-vʋ̃ɔ a nɩsaalbɛ za zie.»