Read Dagara, Northern Levitɩ mɩnɛ 1 Bible Online

Levitɩ mɩnɛ 1 - Dagara, Northern bible

Levitɩ mɩnɛ 1

¹A Sore tɩ be n a tuor-taa pɛn-sɛw pʋɔ ɛ́ bʋɔlɩ a Moyiir yel ʋ

²k'ʋʋ wul a Ɩsɩrayɛl bibiir à ŋá: «A nyɩ kãw wa bɔbr k'ʋʋ ír dʋ̃w maal'ɩ bàwr kʋ̀ a Sore a, ʋ kaa ír ʋ a nĩi, a píir bɩɩ a bʋʋr pʋɔ.»

³«Náab wa n'ʋ ʋ maalɛ nɩ a nyɩw-a-za-bàwr a, a fɛr'a k'ʋʋ ír nadɛr a ƴã-gan zie kãw za na bɛ sãw a. Ʋ na cen nɩ ʋ nɩ a tuor-taa pɛn-sɛw dɩ̃dɔr nʋɔr, a Sore tɩ sàw de ʋ.

⁴Ʋ na ír'ɩ nũu dɔwlɩ a dʋ̃w zũú, ɛ́ a lɛ pʋɔ a, a Sore na sàw nɩ a ʋ bàwr-maal-bom ɛ́ dɩ a ʋ yel-bebe suur kʋ̀ ʋ.

⁵Ʋ na ŋmãa nɩ a dʋ̃w kɔkɔr a Sore niŋé. A bàwr-maalbɛ na ɩ a Aarɔ̃ bidɛbr a na de nɩ a dʋ̃w zɩ̃ɩ tur kʋ̀ a Sore, al pùorí, bɛ de a mɩr'ɩ a bàwr-maal-kuur na be a tuor-taa pɛn-sɛw dɩ̃dɔr nʋɔr a kõkowe.

⁶Ʋ na sɩ n a nadɛr ɛ́ wɛl a nɛn.

⁷A bàwr-maalbɛ na gbɔw nɩ dà-ŋmaarɛ vũu a bàwr-maal-kuur zu.

⁸Bɛ na de nɩ a nɛn-gbile lãwnɩ a zu nɩ a ziir al na tɛr a kãá a, dɔwlɩ a dà-ŋmaarɛ zu.

⁹Bɛ na pɛ́w nɩ a dʋ̃w púor nɩ a nyagɛ nɩ a gbɛ́ɛ, ɛ́ bàwr-maalɛ kãw nyɩw a za a bàwr-maal-kuur zu. Nyɩw-a-za-bàwr a Sore na nɔnɛ a zʋ̀ʋ́r nyũu a n'ʋ.»

¹⁰«Bʋɔ bɩɩ pɛrʋ wa n'ʋ ʋ maalɛ nɩ a nyɩw-a-za-bàwr a, a fɛr'a k'ʋʋ ír pʋ́ra bɩɩ bʋra a ƴã-gan zie kãw za na bɛ sãw a:

¹¹ʋ na ŋmãa nɩ a dʋ̃w kɔkɔr a Sore niŋé, a bàwr-maal-kuur saa-pɛrɩ́-gʋba-lowr. A bàwr-maalbɛ na ɩ a Aarɔ̃ bibiir a na mɩr'ɩ a bàwr-maal-kuur kõkowe nɩ a dʋ̃w zɩ̃ɩ.

¹²Bɛ na wɛl'ɩ a dʋ̃w nɛn, lãwnɩ a zu nɩ a ziir al na tɛr a kãá a. Bàwr-maalɛ kãw na de nɩ a nɛnɛ á ŋá za dɔwlɩ a dàar na dɩrɛ a bàwr-maal-kuur zu a zu.

¹³Bɛ na pɛ́w nɩ a púor nɩ a nyagɛ nɩ a gbɛ́ɛ. Lɛ n'a bàwr-maalɛ na de a tur kʋ̀ a Sore, al pùorí ʋ nyɩw a za a bàwr-maal-kuur zu. Nyɩw-a-za-bàwr a Sore na nɔnɛ a zʋ̀ʋ́r nyũu a n'ʋ.»

¹⁴«Bʋ̃-pɩgɛ wa n'ʋ ʋ maalɛ nɩ a nyɩw-a-za-bàwr a, a fɛr'a k'ʋʋ de ŋmam bɩɩ naŋmam.

¹⁵A bàwr-maalɛ na de nɩ a bʋ̃-pɩgɛ tur kʋ̀ a Sore a bàwr-maal-kuur pɛr, ɛ́ ŋmãa a zu nyɩw ʋ a bàwr-maal-kuur zu, al pùorí, ʋ ɩ a zɩ̃ɩ cir vʋɔrɩ a bàwr-maal-kuur kõkowe.

¹⁶Ʋ na ír'ɩ a kpʋ̃lãyuor lãwnɩ a bome na be a ʋ pʋɔ a lɔb bɛr a bàwr-maal-kuur saa-pɛrɩ́, a be bɛ na mɩ́ wob a tãpɛl-kãánɩ bin a.

¹⁷Ʋ na mɩ́ nyɔw nɩ a bʋ̃-pɩgɛ a bɩgɛ ƴãw ɛ́ ɓar, ɛ́ ta taw ɓɛl ziir ayi ɛ. Al pùorí, ʋ nyɩw ʋ bɛr a vũu na dɩrɛ a bàwr-maal-kuur zu a pʋɔ. Nyɩw-a-za-bàwr a Sore na nɔnɛ a zʋ̀ʋ́r nyũu a n'ʋ.»