Read Dagara, Northern Levitɩ mɩnɛ 10 Bible Online

Levitɩ mɩnɛ 10 - Dagara, Northern bible

Levitɩ mɩnɛ 10

¹A Aarɔ̃ bidɛbr Nadavʋ nɩ Avihu tɩ de nɩ a bɛ parfɛ̃ nyɩwfʋ-koli, ŋa za nɩ ʋ dem, mʋ̃ɔ vũu bie ƴãw, ɛ́ ɩ parfɛ̃ ƴãw a vũu bie zu. À ŋá n'a bɛ tɩ kʋ̀ a Sore vũu sãsaralɛ na bɛ tu a lɛ ʋ na ƴãw a nʋɔr kʋ̀ bɛ a.

²Lɛ n'a vũu-zɛl tɩ ƴaw yi a Sore niŋé, dɩ bɛ, bɛ kpi a be[18].

³A Moyiir tɩ yel'ɩ a Aarɔ̃: «A Sore tɩ yel'ɩ a yel ŋa kʋ̀ nyɩ, a lɛn daar ʋ na tɩ ƴɛ̀r à ŋá a: “Ɩ̃ bɔbr'a k'aa bɛlɩ dem na tawr pɩɛlɛ mɛ̃ a mɩ́ wul a ɩ̃ sonu, ɛ́ íre a ɩ̃ yúor-vɩɛlʋ-danʋ a nɩbɛ za niŋé.”» A Aarɔ̃ tɩ ɩ n gbili.

⁴Ɛcɛ a Moyiir tɩ bʋɔl'ɩ a Aarɔ̃ sãà-yɛb Uzɩɛl bidɛbr, Mɩkayɛl nɩ Elisafan, wa yel bɛ: «Nyɩ cen tɩ wob a nyɩ yɛbr kũuni a zi-sõw pʋɔ yi zaa nɩ a laɩ pʋɔ.»

⁵Bɛ tɩ taw na ta wob bɛ nɩ a bɛ bàwr-maalbɛ bʋ̃-suuri yi zaa nɩ a laɩ pʋɔ, mɛ̃ a lɛ a Moyiir na tɩ yel a.

⁶Lɛ n'a a Moyiir tɩ yel a Aarɔ̃ nɩ a ʋ bidɛbr ayi na cɛ a, a Eleazaar nɩ a Itamaar: «Nyɩ taa bɛrɛ a nyɩ zukɔbr a ɩrɛ zarkpara ɩ, ɛ́ taa tawr a nyɩ kparɩ cɩɛrɛ a ɩ a ko-tuolu bãwfʋ ɛ, nyɩ nãà mab'a kpi, ɛ́ ɩ a Sore suur ír a Ɩsɩrayɛl nɩbɛ lãw za ƴãw. Nyɩ bɛr a nyɩ yɛbr Ɩsɩrayɛl nɩbɛ za bɛ kõ a bɛlɩ dem a Sore na kʋ n a vũu a.

⁷A nyɩɩm a, nyɩ bɛ tawr yire a tuor-taa pɛn-sɛw dɩ̃dɔr ƴãw ɛ, nyɩ nãà mab'a kpi, bʋ̃ʋ n'ʋ vɛ̃, a kãá bɛ na cir ƴãw nyɩ a zũú a, a ɩ na nyɩ be a Sore tome tob ƴãw.» A Aarɔ̃ nɩ a ʋ bidɛbr tɩ tu n a lɛ a Moyiir na yel a.

⁸A Sore tɩ yel'ɩ a Aarɔ̃ à ŋá:

⁹«Fʋ̃ʋ nɩ a fʋ bidɛbr a, nyɩ taa nyúur divɛ̃ nɩ dã-kpɛ̃w kãw, nyɩmɛ wa waar na kpɛ a tuor-taa pɛn-sɛw pʋɔ a ɩ, lɛ n'a nyɩ kʋ̃ kpi ɛ. Nʋɔr'ʋ ƴãw gã kʋralɛ, nyɩɩm nɩ a nyɩ bʋʋrɛ ƴãw.

¹⁰Nyɩ mɩ̀ ta mɩ́ nyũ a ɩ, tʋ̃ɔ́ mɩ́ bãw a bʋ̃-sõw nɩ a bʋ̃-zawla owri, a bom na vɩɛl a, nɩ a bom na tɛr dɛwr a,

¹¹bɩɩ mɩ́ tʋ̃ɔ́ wul a Ɩsɩrayɛl nɩbɛ a nɛ́ɛ ɩ̃ na ƴãw a Moyiir kʋ̀ bɛ a.»

¹²A Moyiir tɩ yel'ɩ a Aarɔ̃ nɩ a ʋ bidɛbr ayi na tɩ cɛ ʋ a, a Eleazaar nɩ a Itamaar: «Nyɩ de a de-kʋ̀b zɔ̃ bɛ na wa n a. Nyɩ ɩ a Sore dem. Al pùorí, nyɩ maalɩ dipɛ̃ na bɛ ƴãw dãbɩl a nɩ a zɔ̃ al na cɛ a, 'wɔb a a bàwr-maal-kuur pɛr, bʋ̃ʋ n'ʋ vɛ̃, bom na ɩ sõw yaga za a n'ʋ.

¹³Zie na ɩ sõw a n'a nyɩ na 'wɔb a. A bome bɛ na mɩ́ de kʋ̀ a Sore a pʋɔ a, a nyɩ dem'ɩ à á ŋá, a fʋ̃ʋ Aarɔ̃ nɩ a fʋ bidɛbr mɛ̃ a lɛ a Sore na yel kʋ̀ m a.

¹⁴A dʋn a Ɩsɩrayɛl nɩbɛ na mɩ́ maal'ɩ a lãw-taa bagɛ, ɛ́ bɛ de kʋ̀ a Sore tu n a bom de-tɩrʋ tub a, a dʋn á ŋá nyarʋ nɩ a pɛrɩ́ gbɛ́ɛ a, zie na vɩɛl a n'a a fɛr kɛ́ bɛ mɩ́ 'wɔb a. Nyɩ na mɩ́ 'wɔb'ɩ a nɛnɛ á ŋá, fʋ̃ʋ nɩ a fʋ bidɛbr nɩ a fʋ pɔwyaar, bʋ̃ʋ n'ʋ vɛ̃, nyɩmɛ so a.

¹⁵A fɛr'a k'aa Ɩsɩrayɛl nɩbɛ mɩ́ wa n a pɛrɩ́ gbɛ́r nɩ a nyãa, lãwnɩ a nɛn-kãánɩ bɛ na mɩ́ nyɩw a bàwr-maal-kuur zu a. Bɛlɛ wa tu a bom de-tɩrʋ tub baarɩ a Sore niŋé a, nyɩmɛ so a nɛnɛ á ŋá, mɛ̃ a lɛ a Sore na yel a, a nyɩ dem'ɩ à á ŋá kʋralɛ.»

¹⁶A Moyiir tɩ sowr'ɩ a yel-bier-ír-bɛrʋ bàwr bʋra yele. Ʋ tɩ wõ na kɛ́ bɛ nyɩw ʋ na bɛr. Ʋ tɩ nyɛ̃ nɩ nɩ a Aarɔ̃ bidɛbr na cɛ a suur, a Eleazaar nɩ a Itamaar, ɛ́ sowri bɛ:

¹⁷«Bʋ̃ʋ n'ʋ so nyɩ bɛ 'wɔb a bàwr ŋa nɛn zie na ɩ zi-sõw a pʋɔ, ʋ na ɩ bʋ̃-sõw yaga za a? A Sore tɩ kʋ̀ nyɩ nɩ a dʋ̃w ŋa kɛ́ nyɩ ír'ɩ a Ɩsɩrayɛl lãw nɩbɛ yel-bebe bɛr, ɛ́ tu a yel-bebe suur-dɩ-kʋ̀b tub a bɛ zu.

¹⁸Bɛ na bɛ tɩ de a dʋ̃w zɩ̃ɩ kpɛ n a zi-sõw pʋɔ a, a tɩ fɛr'a kɛ́ nyɩ 'wɔb a ʋ nɛn zie na ɩ sõw a pʋɔ, mɛ̃ a lɛ ɩ̃ na yel kʋ̀ nyɩ a.»

¹⁹A Aarɔ̃ tɩ sɔw nɩ a Moyiir: «Wone, a dɩ̃a bibir a ɩ̃ bidɛbr na maalɩ a bɛ yel-bebe-ír-bɛrʋ bàwr nɩ a bɛ nyɩw-a-za-bàwr kʋ̀ a Sore a, fʋ mɩŋa za bãw nɩ a lɛ a na ŋmɛ̃ m'a[19]. Ɩ̃ nãá tʋ̃ɔ́ na 'wɔb yel-bier-ír-bɛrʋ bàwr nɛn a dɩ̃a bibir i? A nãá tʋ̃ɔ́ na pɛlɩ a Sore pʋɔ ɔ?»

²⁰A Moyiir tɩ nyɛ̃ nɩ a sɔwfʋ ŋa k'ʋ sɛw.