Read Dagara, Northern Levitɩ mɩnɛ 11 Bible Online

Levitɩ mɩnɛ 11 - Dagara, Northern bible

Levitɩ mɩnɛ 11

¹A Sore tɩ yel'ɩ a Moyiir nɩ a Aarɔ̃

²kɛ́ bɛ tɛr wulu á ŋá a Ɩsɩrayɛl nɩbɛ zie: «A tẽw zu dʋn za pʋɔ a, nyɛ̃ a al nyɩ na na tʋ̃ɔ́ mɩ́ 'wɔb a[20]:

³a al a nafɩlɛ na car, ɛ́ a owr 'wɔbr a.

⁴Ɛcɛ nyɩ bɛ 'wɔbr a dʋn al a nafɩlɛ na car a tɛwr ɛ, bɩɩ a al na owr 'wɔbr a tɛwr ɛ. A na ɩ à ŋá a, dʋn á ŋá n'a na ɩ dʋ̃-dɛgɛ a nyɩ zie: — a nyɔ̃wmɛ, ʋ owr'a 'wɔbr ɛ́ bɛ tɛr nafɩlɛ ɩ: dʋ̃-dɛwr'ʋ a nyɩ zie,

⁵— a tasɩr, ʋ owr'a 'wɔbr, ɛ́ bɛ tɛr nafɩlɛ ɩ: dʋ̃-dɛwr'ʋ a nyɩ zie,

⁶— a sɔ̃w, ʋ owr'a 'wɔbr, ɛ́ bɛ tɛr nafɩlɛ ɩ: dʋ̃-dɛwr'ʋ a nyɩ zie,

⁷— a dobaa, ʋ tɛr'ɩ nafɩlɛ na car a, ɛ́ bɛ owr 'wɔbr ɛ: dʋ̃-dɛwr'ʋ a nyɩ zie.

⁸Nyɩ taa 'wɔbr a dʋn á ŋá nɛnɛ ɩ, nyɩ taa tʋɔr a kũuni ɛ, a ɩ n dʋ̃-dɛgɛ a nyɩ zie.»

⁹«A dʋn al na kpɩɛr a kʋ̃ɔmɩ́ a pʋɔ a, a gbãtaɩ pʋɔ, a kʋ̃ɔ-bɛrɛ nɩ a mamɛ pʋɔ a, nyɛ̃ a al nyɩ na na tʋ̃ɔ́ mɩ́ 'wɔb a: a al na tɛr zʋm-vue nɩ pɛgɛ a, nyɩ na tʋ̃ɔ́ na mɩ́ 'wɔb a.

¹⁰Ɛcɛ a al na bɛ tɛr zʋm-vue bɩɩ bɛ tɛr pɛgɛ a, a dʋ̃-cãcãpili bɩɩ a dʋ̃-yoru al na be a kʋ̃ɔmɩ́ a, nyɩ ciir a.

¹¹Nyɩ ciir a: nyɩ taa 'wɔbr a nɛnɛ ɩ, ɛ́ taa tʋɔr a kũuni ɛ.

¹²A na ɩ à ŋá a, nyɩ ciir kʋ̃ɔmɩ́ dʋ̃w za na bɛ tɛr zʋm-vue bɩɩ pɛgɛ a.»

¹³«A bʋ̃-pɩgɛ pʋɔ a, nyɩ nyɛ̃ a al nyɩ na na ciir a, a al nyɩ na kʋ̃ 'wɔbr a: a sɩla, a sɩl-pla nɩ a kʋ̃ɔ-kpɛ̃ɛ sɩla,

¹⁴a tuw, a sidum pɛ-bʋʋrɛ bʋʋrɛ,

¹⁵nɩ a gbagba bʋʋrɛ bʋʋrɛ za,

¹⁶a kʋlãdisowle, a vìí-kpãakpul, a zʋm-yaarɛ, a sɩl-pɛ-bʋʋrɛ bʋʋrɛ,

¹⁷a vìí, a zʋm-yaarɛ, a vii-kpãapkul,

¹⁸a dãdãmul, a bãdaa-zɩɛra, a dũw,

¹⁹a gʋ̃ɔnagʋ̃ɔna, a cãcãpɛlɛ bʋʋrɛ bʋʋrɛ, a lili-kpa-cowr nɩ a zãzã-cile.»

²⁰«Nyɩ ciir dʋ̃-cãcãpili za na tɛr pɩgɛ ɛ́ tɛr gbɛ́ɛ a.

²¹Ɛcɛ nyɩ na tʋ̃ɔ́ na 'wɔbr a al na tɛr gbɛ́ɛ mɩ́ tʋ̃ɔ́ ƴaw ìr'ɩ a tẽw a,

²²a pɛr lɛ k'aa sãsowe nɩ a sãsow-nãa-nʋrɩ bʋʋrɛ za.

²³A dʋ̃-cãcãpili al za na cɛ tɛr pɩgɛ nɩ gbɛ́ɛ a, nyɩ ciir a.»

²⁴«Lɛb waar, a dʋn a mɩnɛ mɩ́ ɩ na nyɩ tɛr dɛwr: nɩr wa tɔ a dʋn á ŋá kãw na kpi a, ʋ na tɛr'ɩ dɛwr tɩ ta n a zaanʋɔra.

²⁵Ɛ́ nɩr wa tuo a dʋn á ŋá kũuni a, a fɛr'a k'ʋʋ pɛ́w a ʋ bʋ̃-suuri, ʋʋ na ɩ n dɛwr sob tɩ ta n a zaanʋɔra.

²⁶Nyɛ̃ a dʋn al na ɩ dʋ̃-dɛgɛ a nyɩ zie a: — a al a nafɩlɛ na bɛ car a, nɩ a al na bɛ owr 'wɔbr a: sob nɛ za na tʋɔr a a na ɩ n dɛwr sob. — A gbɛ́ɛ anaɩ al za na cere nɩ a gbɛsalɛ̃pʋɔ a: sob nɛ za na tʋɔr a bʋ̃-kũu a na ɩ n dɛwr sob tɩ ta n a zaanʋɔra. Sob nɛ za na tuo a bʋ̃-kũu a, a fɛr'a k'ʋʋ pɛ́w a ʋ bʋ̃-suuri. Ʋ na ɩ n dɛwr sob tɩ ta n a zaanʋɔra.»

²⁹«A dʋ̃-cãcãpili na yãwmɛ vure a tẽsɔw a pʋɔ a, nyɛ̃ a al na ɩ dʋ̃-dɛgɛ a nyɩ zie a: a mã'lɛr, a jɩkɔl, a tasʋɔl-bʋʋrɛ za,

³⁰a kórmé, a ta'lere, a tasʋɔl, a pĩipĩi-zɩɛ nɩ a gbʋlãtɩɩb.

³¹A dʋn á ŋá na ɩ n dʋ̃-dɛgɛ a nyɩ zie, sob nɛ za na tɔ a bʋ̃-kũu a, ʋ ɩ n dɛwr sob tɩ ta a zaanʋɔra.

³²A dʋn á ŋá kãw wa lo kpi bom za zu a, bome bʋ̃-ƴãwna bɛ na maal'ɩ dàa a, bʋ̃-suura, gán bɩɩ vʋɔra a, bom za na tɛr yel-ɩra a, a fɛr'a kɛ́ bɛ pɛ́w a ʋlɩ bom nɛ. Ʋ na ɩ n bʋ̃-dɛwr tɩ ta a zaanʋɔra, a al pùorí, ʋ na lɛb'a vɩɛl.

³³A dʋn á ŋá kãw wa lo yawra bʋ̃-mɩɛra pʋɔ a, a alɩ bome nɛ na be a ʋ pʋɔ a tɛr'ɩ dɛwr, ɛ́ bɛ na ŋmɛr'ɩ a bʋ̃-mɩɛra nɛ bɛr.

³⁴Bɛlɛ wa cir a bʋ̃-mɩɛra nɛ pʋɔ kʋ̃ɔ ƴãw bʋ̃-dɩra a na tɛr sɔ́r kɛ́ bɛ dɩ a pʋɔ a, a bʋ̃-dɩra nɛ lɩɛbɩ bʋ̃-dɩ-dɛwr. Bʋ̃-nyúura a na tɛr sɔ́r kɛ́ bɛ nyũ a pʋɔ a wa n'a a, ʋ mɩ̀ lɩɛbɩ bʋ̃-dɛwr, a bʋ̃-ƴãwna nɛ pʋɔ ʋ na be a saa ɩ ŋmɩŋmɩn a.

³⁵A dʋn á ŋá kãw bʋ̃-kũu wa lo bom za zu a, a bom nɛ ɩ n bʋ̃-dɛwr: dam-tʋlʋ bɩɩ kure-dam wa n'a a, nyɩ na ŋmɛr a na bɛr, a ɩ n bʋ̃-dɛgɛ, ɛ́ a fɛr'a k'aa ɩ bʋ̃-dɛgɛ a nyɩ zie.

³⁶Ɛcɛ a bʋ̃-kũu wa lo bule pʋɔ bɩɩ sa-bie-kʋ̃ɔ-bɔw pʋɔ a, a kʋ̃ɔ na cãà na vɩɛl, ɛcɛ a sob nɛ na ír a dʋ̃-kũu a kʋ̃ɔ pʋɔ a, na lɩɛb'ɩ dɛwr sob.

³⁷A bʋ̃-kũu wa lo bʋ̃-bie bɛ na waar na bʋ̀r a pʋɔ a, a bʋ̃-bie cãà na vɩɛl.

³⁸Ɛcɛ ʋlɛ wa lo bʋ̃-bie bɛ na bùr a dʋwfʋ ƴãw a pʋɔ a, a bʋ̃-bie al na ɩ n bʋ̃-bi-dɛgɛ a nyɩ zie.»

³⁹«Dʋ̃w nyɩ na tɛr sɔ́r na 'wɔb a wa kpi a, sob nɛ za na tʋɔr ʋ a, na ɩ n dɛwr sob tɩ ta a zaanʋɔra:

⁴⁰sob nɛ za na 'wɔb a dʋ̃-kũu ŋa a, a fɛr'a k'ʋʋ pɛ́w a ʋ bʋ̃-suuri ɛ́ ɩ dɛwr sob tɩ ta a zaanʋɔra. Sob nɛ mɩ̀ na tuo a dʋ̃-kũu ŋa a, a fɛr'a k'ʋʋ mɩ̀ pɛ́w a ʋ bʋ̃-suuri, ɛ́ ɩ dɛwr sob tɩ ta a zaanʋɔra.»

⁴¹«Nyɩ ciir a dʋ̃-cãcãpili na yãwmɛ vure a tẽsɔw a: nyɩ bɛ 'wɔbr a ɩ.

⁴²Nyɩ bɛ 'wɔbr a al na vure nɩ púor a ɩ, nɩ a al na cere nɩ gbɛ́ɛ anaar bɩɩ gbɛ́ɛ anaar nɩ dɔwlɛ a ɩ, nyɩ na ciir a na.

⁴³Nyɩ taa tʋɔr a dʋ̃-cãcãpili á ŋá bɔbr dɛwr ƴãwn nyɩ tʋɔra ɩ. Nyɩ taa sàwr a tʋɔr nyɩ ɛ, alɛ bɛ ɩ lɛ, nyɩ na lɩɛb'ɩ dɛwr dem.

⁴⁴A mãa a, ɩ̃ ɩ n a Sore nyɩ Naaŋmɩn: nyɩ ɩrɛ mɛ̃ nɩ-son a, ɩ̃ na ɩ sõw a ƴãw. A na ɩ à ŋá a, nyɩ ta tʋɔr a dʋ̃-cãcãpili á ŋá na damnɛ a tẽsɔw zu a, dɛwr nyɩ tʋɔra ɩ.

⁴⁵Mãa n'ɩ a Sore na ɩ kɛ̀ nyɩ yi a Eziptɩ tẽw pʋɔ, k'ɩ̃ɩ tʋ̃ɔ́ ɩ a nyɩ Naaŋmɩn a. Nyɩ ɩ son, ɩ̃ na ɩ sõw a ƴãw.»

⁴⁶A wulu n'ɩ à á ŋá na càarɩ a dʋn, a bʋ̃-pɩgɛ nɩ a bʋ̃-vʋʋrɩ za na damnɛ a kʋ̃ɔnɩ pʋɔ, bɩɩ yãwmɛ vure a tẽsɔw a.

⁴⁷A wulu á ŋá sõwne nɩ a dʋ̃-vɩɛlɩ nɩ a dʋ̃-dɛgɛ owru ƴãw, a al bɛ na na mɩ́ 'wɔb nɩ a al bɛ na kʋ̃ mɩ́ 'wɔb a.