Read Dagara, Northern Levitɩ mɩnɛ 15 Bible Online

Levitɩ mɩnɛ 15 - Dagara, Northern bible

Levitɩ mɩnɛ 15

¹A Sore tɩ yel'ɩ a Moyiir nɩ a Aarɔ̃

²kɛ́ bɛ tɛr wulu á ŋá a Ɩsɩrayɛl nɩbɛ zie: «Dɛb na tɛr bàalʋ a ʋ yʋɔrɩ́ a, a kʋ̃ɔ na yire a ʋ yʋɔrɩ́ a ɩ na ʋ ɩ dɛwr sob.

³A kʋ̃ɔ á ŋá na tʋ̃ɔ́ na yire a yʋ̀ɔr pʋɔ bɩɩ fur a nʋɔr, ɛcɛ alɛ saa ɩ ŋmɩŋmɩn a a, a sob nɛ tɛr'ɩ dɛwr.

⁴A na ɩ à ŋá a, gado za zu a nɩr ŋa na gã a, nɩ kɔw za zu ʋ na zɩ̃ a, a tɛr'ɩ dɛwr.

⁵Nɩr wa tɔ a gado ŋa a, a fɛr'a k'ʋʋ pɛ́w a ʋ bʋ̃-suuri, ɛ́ a ʋl mɩŋa so kʋ̃ɔ. Ʋ ɩ n dɛwr sob tɩ ta a zaanʋɔra.

⁶Nɩr wa zɩ̃ kɔw zu a bàal na zɩ̃ wa ìr a, a fɛr'a k'ʋʋ pɛ́w a ʋ bʋ̃-suuri, ɛ́ a ʋl mɩŋa so kʋ̃ɔ. Ʋ ɩ n dɛwr sob tɩ ta a zaanʋɔra.

⁷Nɩr wa tɔ a bàal a, a fɛr'a k'ʋʋ pɛ́w a ʋ bʋ̃-suuri, ɛ́ a ʋl mɩŋa so kʋ̃ɔ. Ʋ ɩ n dɛwr sob tɩ ta a zaanʋɔra.

⁸A bàal wa cɩr mʋtaar ƴãw nɩr na vɩɛl a, a sob nɛ na pɛ́w nɩ a ʋ bʋ̃-suuri, ɛ́ a ʋl mɩŋa so kʋ̃ɔ. Ʋ ɩ n dɛwr sob tɩ ta a zaanʋɔra.

⁹Kɔw za zu a bàal na zɩ̃ cen nɩ zie a na tɛr'ɩ dɛwr.

¹⁰Nɩr za na tɔ bom bɛ na ƴãw a bàal pile a, ʋ na ɩ n dɛwr sob tɩ ta a zaanʋɔra. Sob nɛ na ɓáw a bom ŋa cen nɩ zie a, a fɛr'a k'ʋʋ pɛ́w a ʋ bʋ̃-suuri, ɛ́ a ʋl mɩŋa so kʋ̃ɔ. Ʋ ɩ n dɛwr sob tɩ ta a zaanʋɔra.

¹¹Sob nɛ a bàal na bɛ pɛ́w a ʋ nuru ɛ́ tɔ a, a fɛr'a k'ʋʋ pɛ́w a ʋ bʋ̃-suuri, ɛ́ a ʋl mɩŋa so kʋ̃ɔ. Ʋ ɩ n dɛwr sob tɩ ta a zaanʋɔra.

¹²Yawra bʋ̃-mɩɛra za a bàal na tɔ a, a fɛr'a kɛ́ bɛ ŋmɛ ʋ ŋmɛr bɛr, dàar bom wa n'ʋ a, a fɛr'a kɛ́ bɛ ƴãw kʋ̃ɔ yaga pɛ́w nɩ ʋ bɛr.»

¹³«A kʋ̃ɔ na yire a dɛb yʋɔrɩ́ ƴãw k'ʋ ɩ dɛwr sob a, alɛ wa baar'a, a fɛr'a k'aa sob maalɩ bibie ayopõi, ɛ́ bãw lɛb vɩɛl. Ʋ na pɛ́w nɩ a ʋ bʋ̃-suuri, ɛ́ a ʋl mɩŋa so kʋ̃ɔ, ʋʋ na lɛb'a vɩɛl.

¹⁴A bibie ani sob wa vɩɛ a, ʋ na nyɔw nɩ ŋmamɛ ayi bɩɩ naŋmamɛ ayi cen nɩ tɩ kʋ̀ a bàwr-maalɛ, a Sore niŋé, a tuor-taa pɛn-sɛw dɩ̃dɔr nʋɔr.

¹⁵A bàwr-maalɛ na de nɩ a lile kãw maal'ɩ yel-bier-ír-bɛrʋ bàwr, ɛ́ maal'ɩ a kãw nyɩw-a-za-bàwr, al pùorí, ʋ tu a tub na na ír a kʋ̃ɔ-ciru dɛwr bɛr a sob a.»

¹⁶«Dɛb yɔ-kʋ̃ɔ wa cir a, a fɛr'a k'ʋʋ so kʋ̃ɔ, ʋʋ na ɩ n dɛwr sob tɩ ta a zaanʋɔra.

¹⁷Bʋ̃-suura za bɩɩ gán bom za a yɔ-kʋ̃ɔ na tɔ a, a fɛr'a kɛ́ bɛ pɛ́w a, ɛ́ a na tɛr'ɩ dɛwr tɩ ta a zaanʋɔra.»

¹⁸«Dɛb nɩ pɔw wa páw taa a, a fɛr'a kɛ́ bɛ za ayi so kʋ̃ɔ. Bɛ na ɩ n dɛwr dem tɩ ta a zaanʋɔra.»

¹⁹«Pɔw wa lo sɩɛ ɛ́ zɩ̃ɩ yire a ʋ ƴã-ganɩ́ a, ʋ na ɩ n dɛwr sob bibie ayopõi. Nɩr wa tɔ ʋ a, ʋ na ɩ n dɛwr sob tɩ ta a zaanʋɔra.

²⁰Gado za zu ʋ na lo a sɩɛ ɛ́ gã a, nɩ dà-kɔw za zu ʋ na zɩ̃ a, a tɛr'ɩ dɛwr.

²¹Nɩr wa tɔ a gado ŋa a, a fɛr'a k'ʋʋ pɛ́w a ʋ bʋ̃-suuri, ɛ́ a ʋl mɩŋa so kʋ̃ɔ, ɛ́ ɩ dɛwr sob tɩ ta a zaanʋɔra.

²²Nɩr wa tɔ bʋ̃-zɩna a pɔw ŋa na zɩ̃ nɩ a, a fɛr'a k'ʋʋ pɛ́w a ʋ bʋ̃-suuri, ɛ́ a ʋl mɩŋa so kʋ̃ɔ, ɛ́ ɩ dɛwr sob tɩ ta a zaanʋɔra.

²³Nɩr wa tɔ bom na be a gado zu bɩɩ a bʋ̃-zɩna zu a pɔw na zɩ̃ a, ʋ na ɩ n dɛwr sob tɩ ta a zaanʋɔra.

²⁴A ʋ sɩɛ zɩ̃ɩ wa cir ƴãw dɛb na gã nɩ ʋ a, a dɛb ʋl mɩ̀ na ɩ n dɛwr sob bibie ayopõi, ɛ́ gado za zu ʋ na ganɛ a na tɛr'ɩ dɛwr.»

²⁵«Pɔw zɩ̃ɩ wa cire tɩ maalɩ bibi-yaga ɛ́ a bɛ ɩ sɩɛ n'ʋ ʋ lo a, bɩɩ a sɩɛ saa n'ʋ ʋ lo ɛ́ a zɩ̃ɩ cir tɩ dɔwlɩ a, ʋ na ɩ n dɛwr sob lɛn daar za a zɩ̃ɩ na cire a, mɛ̃ a ʋ sɩɛ loba daar a.

²⁶Gado za zu ʋ na ganɛ a, bɩɩ kɔw za zu ʋ na zɩnɛ a tɛr'ɩ dɛwr mɛ̃ a ʋ sɩɛ loba daar a.

²⁷Nɩr wa tʋɔr a gado ŋa bɩɩ a kɔw ŋa a, a fɛr'a k'ʋʋ pɛ́w a ʋ bʋ̃-suuri, ɛ́ a ʋl mɩŋa so kʋ̃ɔ, ɛ́ ɩ dɛwr sob tɩ ta a zaanʋɔra.»

²⁸«A zɩ̃ɩ wa ŋmãa a, a fɛr'a k'aa pɔw cãà maalɩ bibie ayopõi, ɛ́ bãw lɛb vɩɛl.

²⁹A bibie ani sob wa vɩɛ a, ʋ na nyɔw nɩ ŋmamɛ ayi bɩɩ naŋmamɛ ayi wa kʋ̀ a bàwr-maalɛ a tuor-taa pɛn-sɛw dɩ̃dɔr nʋɔr.

³⁰A bàwr-maalɛ na de nɩ a lile kãw maal'ɩ yel-bier-ír-bɛrʋ bàwr, ɛ́ maal'ɩ a kãw nyɩw-a-za-bàwr. Al pùorí, ʋ tu a tub na na ír a zɩ̃ɩ ciru dɛwr bɛr a pɔw a.»

³¹«Nyɩ na yel'ɩ a Ɩsɩrayɛl nɩbɛ kɛ́ bɛlɛ wa tɛr dɛwr a, bɛ taw zãa nɩ a zi-sõw. À ŋá n'a bɛ kʋ̃ dɛw a ɩ̃ kpɛb zie na be a bɛ sɔgɔ a bɛr, wa mab kpi ɛ.»

³²A wulu n'ɩ à á ŋá na càarɩ dɛb kʋ̃ɔ na yire a ʋ yʋɔrɩ́ a, bɩɩ a yɔ-kʋ̃ɔ na cire ƴãw k'ʋ ɩ dɛwr sob a.

³³A mɩ̀ càar'ɩ a pɔw a ʋ sɩɛ loba daar —bɩɩ sob nɛ za kʋ̃ɔ na yire a ʋ ƴã-ganɩ́ a—, nɩ dɛb na gã nɩ pɔw na tɛr dɛwr a.