Read Dagara, Northern Levitɩ mɩnɛ 16 Bible Online

Levitɩ mɩnɛ 16 - Dagara, Northern bible

Levitɩ mɩnɛ 16

¹Aarɔ̃ bidɛbr ayi tɩ kpi n a lɛn daar bɛ na tɩ wa n de-kʋ̀b bome a Sore niŋé a[27]. Al pùorí a Sore tɩ yel'ɩ a Moyiir à ŋá:

²«Yel a fʋ yɛb Aarɔ̃ k'ʋʋ taa bʋ̀nɛ kpɩɛr a zi-sõw-za-zi-sõw pʋɔ ɩ, a pɛn-yawla na bʋ́r a diru a pùorí ɛ, a be a wõ-taa daga nɩ a ʋ pàwra na be a. Lɛ n'a ʋ kʋ̃ kpi mãa wa sãá a zũzuwr pʋɔ a daw-pàwra zu-sɔw a ɩ[28].»

³«A Aarɔ̃ wa cere a zi-sõw pʋɔ a, a fɛr'a k'ʋʋ mɩ́ tɛr nadɛr yel-bier-ír-bɛrʋ-bàwr maalʋ ƴãw, nɩ pʋ́ra nyɩw-a-za-bàwr maalʋ ƴãw.

⁴A fɛr'a k'ʋʋ mɩ́ su lɛ̃ pɛn kparʋ, ɛ́ sɛ lɛ̃ pɛn tɔ̃tɔl, ɛ́ sɛ lɛ̃ pɛn kpàwr ɛ́ vili a zu nɩ lɛ̃ pɛn. Ɛcɛ a bʋ̃-suuri á ŋá na ɩ bʋ̃-son a, a fɛr'a k'ʋʋ mɩ́ so kʋ̃ɔ ɛ́ bãw su a.

⁵A fɛr'a k'aa Ɩsɩrayɛl nɩbɛ lãw mɩ́ kʋ̀ ʋ bʋrɩ ayi a yel-bier-ír-bɛrʋ bàwr maalʋ ƴãw, nɩ pʋ́ra nyɩw-a-za-bàwr maalʋ ƴãw.»

⁶«A Aarɔ̃ na mɩ́ maal'ɩ nɩ a nadɛr a bàwr, a ʋl mɩŋa yel-bier-ír-bɛrʋ ƴãw, ɛ́ tu a suur-dɩ-kʋ̀b tub a ʋl mɩŋa ƴãw nɩ a ʋ yir dem ƴãw.

⁷Al pùorí, ʋ wa n a bʋrɩ ayi a Sore niŋé, a tuor-taa pɛn-sɛw dɩ̃dɔr nʋɔr,

⁸wa lɔb a bie[29], bãw buor'ʋ ɩ a Sore dem, ɛ́ buor ɩ a Azazɛl[30] dem.

⁹A bʋra ʋl a gbã-bir na wul ʋ ɩ a Sore dem a, ʋ na de ʋ na kʋ̀ a Sore, ɛ́ maal'ɩ ʋ a yel-bier-ír-bɛrʋ bàwr.

¹⁰A Azazɛl bʋra n'ʋ bɛ tuur'ɩ a yel-bebe suur-dɩ-kʋ̀b tub: bɛ na ƴãw na ʋ àr a mimir a Sore niŋé, ɛ́ bɛ bãw tɩr ʋ kʋ̀ a Azazɛl a wɛja-kpalɛ pʋɔ.»

¹¹«A na ɩ à ŋá a, a Aarɔ̃ na tĩ na maal'ɩ a nadɛr a bàwr a ʋl mɩŋa yel-bier-ír-bɛrʋ ƴãw, ɛ́ tu a suur-dɩ-kʋ̀b tub a ʋl mɩŋa ƴãw nɩ a ʋ yir dem ƴãw. Ʋlɛ wa ŋmãa a nadɛr kɔkɔr a ʋl mɩŋa yel-bier-ír-bɛrʋ ƴãw baarɩ a,

¹²ʋ na mʋ̃ɔ nɩ vũu bie a bàwr-maal-kuur na be a zi-sõw pʋɔ a zu, paalɩ a parfɛ̃ nyɩwfʋ-kole. Ʋ na 'wɔ̃w nɩ parfɛ̃-zɔ̃ nũ-kue ayi, ɛ́ kpɛ n a za a zi-sõw-za-zi-sõw pʋɔ, a pɛn-yawla na bʋ́r a diru a pùorí.

¹³Ʋ na ɩ n a parfɛ̃ ƴãw a vũu bie zu a Sore niŋé. A zʋ̀ʋ́r[31] na ír'a do pàw a daga na tɛr a wõ-taa kʋsɛ-pamɛ a pàwra, ɛ́ à à ŋá n'a a Aarɔ̃ kʋ̃ kpi ɛ.

¹⁴Ʋ na tõ n a ʋ nobir a nadɛr zɩ̃ɩ pʋɔ mɩr'ɩ gb'a been a daw-pàwra saa-pɛrɩ́ lowr, ɛ́ mɩr a daga niŋé gb'a ayopõi.

¹⁵Al pùorí, ʋ ŋmãa a nɩbɛ yel-bebe-ír-bɛrʋ bàwr bʋra kɔkɔr, ɩ a zɩ̃ɩ kpɛ n a pɛn-yawla na bʋ́r a diru a pùorí, tɩ ɩ n a zɩ̃ɩ á ŋá mɛ̃ a lɛ ʋ na ɩ n a nadɛr zɩ̃ɩ a: ʋ na mɩr'ɩ a daw-pàwra ɛ́ mɩ̀ mɩr a daga niŋé.

¹⁶Ʋ na tu n a dɛwr-so-bɛrʋ tub a zi-sõw-za-zi-sõw zu, ír a dɛwr bɛr a Ɩsɩrayɛl nɩbɛ na ƴãw ʋ nɩ a bɛ nɛ́ɛ-zawrʋ nɩ a bɛ yel-sãwnɩ a. Ʋ mɩ̀ na ɩ n a lɛ a pùorí a tuor-taa pɛn-sɛw zie ʋl na cɛ a ƴãw, ʋ na àr nɩbɛ na tɛr dɛwr a sɔgɔ a ƴãw.

¹⁷Nɩr za bɛ bere a tuor-taa pɛn-sɛw pʋɔ, a lɛn daar a Aarɔ̃ na kpɩɛr a zi-sõw-za-zi-sõw pʋɔ k'ʋʋ tɩ tu a dɛwr-so-bɛrʋ tub a ɩ, ɛ́ tɩ ta a lɛ ʋ na na lɛb yi a ɩ. A Aarɔ̃ wa tu a suur-dɩ-kʋ̀b tub a ʋl mɩŋa ƴãw, a ʋ yir dem ƴãw nɩ a Ɩsɩrayɛl nɩbɛ za ƴãw baar'a,

¹⁸ʋ na yi na cen a bàwr-maal-kuur na be a Sore niŋé a pɛr, tɩ tu a dɛwr-so-bɛrʋ tub a bàwr-maal-kuur zu. Al pùorí, ʋ ɩ a nadɛr nɩ a bʋra zɩ̃ɩ blã ƴãw a bàwr-maal-kuur ɩ́lɛ́ zu.

¹⁹Ʋ na tõ n nobir a zɩ̃ɩ pʋɔ mɩr'ɩ a bàwr-maal-kuur gb'a ayopõi. À ŋá n'a ʋ na ír a Ɩsɩrayɛl nɩbɛ yel-bebe dɛwr bɛr a bàwr-maal-kuur ƴãw, ɛ́ ɩ ʋ ɩ sõw.»

²⁰«A Aarɔ̃ wa tu a dɛwr-so-bɛrʋ tub a zi-sõw-za-zi-sõw ƴãw, a tuor-taa pɛn-sɛw na baa cɛ a ƴãw nɩ a bàwr-maal-kuur ƴãw a, ʋ na ƴãw na bɛ tɛr a bʋra-mimir wa n.

²¹Ʋ na ír'ɩ a ʋ nuru a za ayi dɔwlɩ a dʋ̃w zũú, ɛ́ wo a Ɩsɩrayɛl nɩbɛ yel-bebe za, a bɛ nɛ́ɛ-zawrʋ za, a bɛ yel-sãwnɩ za dɔwlɩ a ʋ zu. Al pùorí ʋ ƴãw nɩr na cɔbrɩ gù a tɛr ʋ kpɛ n a wɛja-kpalɛ pʋɔ.

²²À ŋá n'a a bʋra na tuo a Ɩsɩrayɛl nɩbɛ yel-bebe za cen nɩ zie nɩr na kʋ̃ tʋ̃ɔ́ ta a.» «A Aarɔ̃ wa tɩr a bʋra bɛr a wɛja-kpalɛ pʋɔ baar'a,

²³ʋ na lɛb'a kpɛ a tuor-taa pɛn-sɛw pʋɔ tɩ yaarɩ a lɛ̃ pɛnɛ bome ʋ na su kpɛ n a zi-sõw-za-zi-sõw pʋɔ a bin a be.

²⁴Ʋ na so n kʋ̃ɔ a zi-sõw zie kãw na be be a al ƴãw a pʋɔ, al pùorí, ʋ su a ʋ kparɩ yi n tɩ maal'ɩ a nyɩw-a-za-bàwr a ʋl mɩŋa ƴãw, ɛ́ mɩ̀ maalɩ a nyɩw-a-za-bàwr a nɩbɛ ƴãw. Al pùorí ʋ tu a suur-dɩ-kʋ̀b tub a ʋl mɩŋa ƴãw nɩ a nɩbɛ ƴãw.

²⁵Al pùorí, ʋ nyɩw a yel-bier-ír-bɛrʋ bàwr dʋn nɛn-kãánɩ a bàwr-maal-kuur zu.»

²⁶«A sob nɛ na tɛr a Azazɛl bʋra kpɛ n a wɛja-kpalɛ pʋɔ a na pɛ́w nɩ a ʋ bʋ̃-suuri ɛ́ so kʋ̃ɔ, ɛ́ pãa bãw lɛb kpɛ a laɩ pʋɔ.

²⁷A nadɛr nɩ a bʋra bɛ na kʋ maal'ɩ a yel-bier-ír-bɛrʋ bàwr, ɛ́ de a zɩ̃ɩ tu n a dɛwr-so-bɛrʋ tub a zi-sõw-za-zi-sõw pʋɔ a, a fɛr'a kɛ́ bɛ de a yi zaa nɩ a laɩ pʋɔ, tɩ nyɩw a bɛr, lãwnɩ a gámɛ, a nɛnɛ nɩ a nyagɛ.

²⁸A fɛr'a k'aa sob nɛ na nyɩw a bɛr a pɛ́w a ʋ bʋ̃-suuri ɛ́ so kʋ̃ɔ, ɛ́ pãa bãw lɛb kpɛ a laɩ pʋɔ.»

²⁹«Nyɛ̃ nʋɔr a na fɛr kɛ́ nyɩ sàwr kʋralɛ a: a cuwr ayopõi sob, a bibie pie sob, nyɩ na mɩ́ tɛr'ɩ mʋta-tuo ɛ́ kʋ̃ tõ ton ɛ, a nyɩɩm Ɩsɩrayɛl nɩbɛ nɩ a nʋʋrɩ na kpɩɛr a nyɩ pʋɔ a.

³⁰Bʋ̃ʋ n'ʋ vɛ̃, a ʋlɩ bibir nɛ n'a bɛ na mɩ́ tu a yel-bebe suur-dɩ-kʋ̀b tub a nyɩ ƴãw, nɩ a dɛwr-so-bɛrʋ tub a nyɩ yel-bebe za ƴãw a Sore niŋé.

³¹Ʋ na ɩ n pɩ̃ɛnʋ-bibir a nyɩ zie, bibir nyɩ na bɛ tone towtow ɛ́ tɛr mʋta-tuo a. Nʋɔr na ƴãw gã kʋralɛ a n'ʋ.»

³²«A sob nɛ nãà mɩ́ wa tu a suur-dɩ-kʋ̀b nɩ a dɛwr-so-bɛrʋ tub a pùorí a, ʋ na ɩ n a bàwr-maalɛ ʋl bɛ na cir a kãá ƴãw a zũú, ɛ́ ƴãw k'ʋ ɩ a bàwr-maal-kara lɩɛrɩ a ʋ sãà a. Ʋ na mɩ́ su n a lɛ̃ pɛnɛ kpar-son

³³tu n a dɛwr-so-bɛrʋ tub a zi-sõw-za-zi-sõw ƴãw, a tuor-taa pɛn-sɛw nɩ a bàwr-maal-kuur ƴãw. Ʋ mɩ̀ na tu n a suur-dɩ-kʋ̀b tub a bàwr-maalbɛ nɩ a Ɩsɩrayɛl nɩbɛ za ƴãw.»

³⁴«Nʋɔr'ʋ ƴãw gã kʋralɛ, a fɛr'a kɛ́ nyɩ tuur ʋ, mɩ́ tʋ̃ɔ́ páw a Ɩsɩrayɛl nɩbɛ yel-bebe za suur-dɩ-kʋ̀b, gb'a been a yũon pʋɔ.» A Aarɔ̃ tɩ ɩ n a lɛ za a Sore na tɩ yel kʋ̀ a Moyiir a.