Read Dagara, Northern Levitɩ mɩnɛ 17 Bible Online

Levitɩ mɩnɛ 17 - Dagara, Northern bible

Levitɩ mɩnɛ 17

¹A Sore tɩ yel'ɩ a Moyiir

²k'ʋʋ ƴãw nɛ́ɛ á ŋá kʋ̀ a Aarɔ̃, a ʋ bidɛbr nɩ a Ɩsɩrayɛl nɩbɛ za:

³«Ɩsɩrayɛl nɩr wa bɔbr k'ʋʋ kʋ náab, pɛ́rʋ bɩɩ bʋɔ a laɩ pʋɔ bɩɩ a yẽw a,

⁴a fɛr'a k'ʋʋ de niwn tɛr a dʋ̃w wa n a tuor-taa pɛn-sɛw dɩ̃dɔr nʋɔr, wa de ʋ kʋ̀ a Sore a ʋ zi-sõw niŋé. Ʋlɛ bɛ wa ɩ a lɛ a, ʋ na ɩ n sãwna sob, ʋ na ɩ bʋ̃-vʋʋra zɩ̃ɩ cir a ƴãw, ɛ́ bɛ na ír ʋ na bɛr a Ɩsɩrayɛl nɩ-bʋʋrɛ pʋɔ.

⁵A nʋɔr ŋa fɛrɛ nɩ a Ɩsɩrayɛl nɩbɛ kɛ́ bɛ mɩ́ tɛr a dʋn wa n a bàwr-maalɛ zie a tuor-taa pɛn-sɛw dɩ̃dɔr nʋɔr wa maal'ɩ lãw-taa bàwr kʋ̀ a Sore, ɛ́ ta cãà kʋrɛ a a wɩ̀ɛ pʋɔ ɩ.

⁶A bàwr-maalɛ na mɩ́ mɩr'ɩ a Sore bàwr-maal-kuur na àr a tuor-taa pɛn-sɛw niŋé a, nɩ a dʋ̃w zɩ̃ɩ, ɛ́ nyɩw a nɛn-kãánɩ a bàwr-maal-kuur ŋa zu, a ɩrɛ zʋ̀ʋ́r a Sore na nɔnɛ a nyũu a.

⁷À ŋá n'a a Ɩsɩrayɛl nɩbɛ kʋ̃ cãà maalɛ bagɛ kʋ̀rɛ a tɩbɛ na mɩ́ ŋmɛ̃ taa nɩ bʋrɩ a ɩ. Nʋɔr'ʋ ƴãw gã kʋralɛ a Ɩsɩrayɛl nɩbɛ na dɔwr lɩɛrɛ taa a na tuur.»

⁸Fʋ mɩ̀ na cãà na lɛb yel kʋ̀ bɛ: «Ɩsɩrayɛl nɩr, bɩɩ nʋʋra na kpɩɛr a Ɩsɩrayɛl nɩbɛ sɔgɔ a wa bɔbr k'ʋʋ maalɩ nyɩw-a-za-bàwr bɩɩ bàwr yũo a,

⁹a fɛr'a k'ʋʋ wa n a dʋ̃w a tuor-taa pɛn-sɛw dɩ̃dɔr nʋɔr wa de ʋ kʋ̀ a Sore. Ʋlɛ bɛ wa ɩ a lɛ a, bɛ na ír ʋ na bɛr a Ɩsɩrayɛl nɩ-bʋʋrɛ pʋɔ.»

¹⁰«Ɩsɩrayɛl nɩr, bɩɩ nʋʋra na kpɩɛr a Ɩsɩrayɛl nɩbɛ pʋɔ wa 'wɔb zɩ̃ɩ za a, a zɩ̃ɩ saa ŋmɛ̃ ŋmɩn ʋ 'wɔb a, a Sore na ìr'ɩ a ʋ ƴãw, ɛ́ ír ʋ bɛr a Ɩsɩrayɛl nɩ-bʋʋrɛ pʋɔ.

¹¹Bʋ̃ʋ n'ʋ vɛ̃, a zɩ̃ɩ pʋɔ n'a a bʋ̃-íra nyɔ-vʋʋrʋ be. A Sore sàw na kɛ́ nyɩ mɩ́ de a zɩ̃ɩ tu n a yel-bebe suur-dɩ-kʋ̀b tub a nyɩ ƴãw a bàwr-maal-kuur zu. A zɩ̃ɩ mɩ́ sɩrɩ na ɩ a nɩr páw a yel-bebe suur-dɩ-kʋ̀b, a nyɔ-vʋʋrʋ na be a zɩ̃ɩ pʋɔ a ƴãw.

¹²Alɛ n'a so a Sore yel a Ɩsɩrayɛl nɩbɛ à ŋá: “A nyɩ kãw za nɩ nʋʋra kãw za na kpɩɛr a nyɩ pʋɔ a, bɛ tɛr sɔ́r na 'wɔb zɩ̃ɩ ɛ.”»

¹³«Ɩsɩrayɛl nɩr kãw, bɩɩ nʋʋra na kpɩɛr a Ɩsɩrayɛl nɩbɛ sɔgɔ a, wa kpɛ wɩ̀ɛ tɩ nyɔw dʋ̃w bɩɩ lile bɛ na 'wɔbr a, ʋ na ɩ na a zɩ̃ɩ cir a tẽsɔw, ʋʋ ga tanɛ pàw.

¹⁴Bʋ̃ʋ n'ʋ vɛ̃, bʋ̃-íra na cãà mimir a, a ʋ nyɔ-vʋʋrʋ be n a ʋ zɩ̃ɩ pʋɔ. Alɛ n'a so a Sore yel a Ɩsɩrayɛl nɩbɛ à ŋá: “Nyɩ bɛ 'wɔbr bʋ̃-íra kãw za zɩ̃ɩ ɛ, a bʋ̃-íra za nyɔ-vʋʋrʋ na be a ʋ zɩ̃ɩ pʋɔ a ƴãw. Nɩr wa 'wɔb zɩ̃ɩ a, bɛ na ír ʋ na bɛr a Ɩsɩrayɛl nɩ-bʋʋrɛ pʋɔ[32].”»

¹⁵«Ɩsɩrayɛl nɩr, bɩɩ nʋʋra wa 'wɔb dʋ̃-kũu bɩɩ dʋ̃w wɛ-dʋ̃w na nyɔw a nɛn a, a fɛr'a k'ʋʋ pɛ́w a ʋ bʋ̃-suuri, ɛ́ a ʋl mɩŋa so kʋ̃ɔ, ɛ́ ɩ dɛwr sob tɩ ta a zaanʋɔra. Al pùorí, ʋ na lɛb'a vɩɛl.

¹⁶Ʋlɛ bɛ wa pɛ́w a ʋ bʋ̃-suuri ɛ́ so kʋ̃ɔ a, ʋlɛ na so a ʋ sãwna.»