Read Dagara, Northern Levitɩ mɩnɛ 18 Bible Online

Levitɩ mɩnɛ 18 - Dagara, Northern bible

Levitɩ mɩnɛ 18

¹A Sore tɩ yel'ɩ a Moyiir

²k'ʋʋ tɛr wulu á ŋá a Ɩsɩrayɛl nɩbɛ zie: «Mãa n'ɩ a Sore nyɩ Naaŋmɩn!

³Nyɩ taa ɩrɛ mɛ̃ a lɛ a nɩbɛ na ɩrɛ a Eziptɩ tẽw a ɩ, a be nyɩ na tɩ kpɛ a. Nyɩ taa ɩrɛ mɛ̃ a lɛ a nɩbɛ na ɩrɛ a Kanãa tẽw a ɩ, a be ɩ̃ na tɛr nyɩ wɩɛr'ɩ a. Nyɩ taa tuur a nɩ-bʋʋrɛ bɛ ŋa ɩ-ɩrɩ ɛ.

⁴Nyɩ tɛr a ɩ̃ tub tuur ɛ́ sàwr a ɩ̃ nɛ́ɛ, bʋ̃ʋ n'ʋ vɛ̃, mãa n'ɩ a Sore nyɩ Naaŋmɩn.»

⁵«A na ɩ à ŋá a, nyɩ tɛr a ɩ̃ nɛ́ɛ nɩ a ɩ̃ tub. Sob nɛ na sàwr a a, a na ɩ na ʋ vʋʋrɛ[33]. Mãa n'ɩ a Sore.»

⁶«Ɩsɩrayɛl nɩr kãw za bɛ ganɛ nɩ a ʋ nɩr kãw pɔw ɛ. Mãa n'ɩ a Sore.»

⁷«Fʋ bɛ ganɛ nɩ a fʋ mã ɩ, fʋ na ƴãw nɩ a fʋ sãà vĩ, ɛ́ mɩ̀ ƴãw a fʋ mã vĩ, ʋ na ɩ a fʋ mã a ƴãw.»

⁸«Fʋ bɛ ganɛ nɩ a fʋ sãà pɔw kãw ɛ, fʋ na ƴãw nɩ a fʋ sãà vĩ[34].»

⁹«Fʋ bɛ ganɛ nɩ a fʋ yeepuule ɩ, a fʋ sãà bɩɩ a fʋ mã pɔwyaa kãw na n'ʋ a, ʋlɛ saa bàa a yir pʋɔ bɩɩ bàa yẽw a[35].»

¹⁰«Fʋ bɛ ganɛ nɩ a fʋ bidɛb pɔwyaa bɩɩ a fʋ pɔwyaa pɔwyaa ɩ, fʋ na ƴãw nɩ fʋ tʋɔra vĩ.»

¹¹«Fʋ bɛ ganɛ nɩ a fʋ sãà pɔw kãw pɔwyaa ɩ, a fʋ sãà n'ʋ dɔw ʋ, a lɛ pʋɔ a, fʋ yeepuule n'ʋ.»

¹²«Fʋ bɛ ganɛ nɩ a fʋ sãà yeepuule kãw ɛ, a fʋ sãà nɩr na n'ʋ a ƴãw.»

¹³«Fʋ bɛ ganɛ nɩ a fʋ mã yɛb kãw ɛ, a fʋ mã nɩr na n'ʋ a ƴãw.»

¹⁴«Fʋ bɛ ƴãwnɛ a fʋ sãà yɛb kãw vĩ, ganɛ nɩ a ʋ pɔw ɛ, a fʋ mã na n'ʋ a ƴãw.»

¹⁵«Fʋ bɛ ganɛ nɩ a fʋ bie-pɔw ɛ, ʋ na ɩ a fʋ bidɛb pɔw a ƴãw.»

¹⁶«Fʋ bɛ ganɛ nɩ a fʋ yɛb kãw pɔw ɛ, fʋ na ƴãw nɩ a fʋ yɛb vĩ.»

¹⁷«Fʋ bɛ ganɛ nɩ pɔw nɩ a ʋ pɔwyaa, bɩɩ a ʋ yãw na ɩ a ʋ bidɛb pɔwyaa bɩɩ a ʋ pɔwyaa pɔwyaa a ɩ. Bɛlɛ nɩ a pɔw ŋa na lãw zɩ̃ɩ a ƴãw, a na ɩ n vĩ-yele.»

¹⁸«Fʋ bɛ kule a fʋ pɔw na cãà vʋʋrɛ a yɛb ɛ, a na tʋ̃ɔ́ na wa n nyu-yele.»

¹⁹«Fʋ bɛ ganɛ nɩ pɔw na lo sɩɛ a ɩ, bʋ̃ʋ n'ʋ vɛ̃, ʋ ɩ n dɛwr sob.»

²⁰«Fʋ bɛ ganɛ nɩ a fʋ tẽ-bi-tɔ kãw pɔw ɛ, a na ɩ na fʋ tɛr dɛwr.»

²¹«Fʋ kʋ̃ de a fʋ bie kãw tɩr bɛ nyɩw a ŋmɩn Molɛkɩ[36] ƴãwfʋ ƴãw ɛ, a ɩ̃ yúor'ʋ fʋ na sãw a lɛ. Mãa n'ɩ a Sore, a nyɩ Naaŋmɩn.»

²²«Fʋ kʋ̃ gã nɩ dɛb mɛ̃ a lɛ bɛ na mɩ́ gã nɩ pɔw a ɩ, faalʋ na bɛ maal'ɩ wob a n'ʋ.»

²³«Fʋ kʋ̃ do dʋ̃w ɛ, a na ɩ na fʋ ɩ dɛwr sob. Pɔw mɩ̀ kʋ̃ ɩ dʋ̃w do ʋ ɛ, ɩ-faa na bɛ tu sɔ́r towtow a n'ʋ.»

²⁴«Nyɩ taa wa dɛwr nyɩ tʋɔra nɩ a ɩ-ɩrɩ á ŋá kãw za ɩ, a nɩ-bʋʋrɛ ɩ̃ na diwr a nyɩ niŋé a, a ɩ-ɩrɩ á ŋá n'a ɩ bɛ tɛr a dɛwr.

²⁵A Kanãa tẽw tɔr za lɩɛb'ɩ tẽ-dɛwr a yel-sãwnɩ á ŋá ƴãw, ɩ̃ dɔwrɩ ʋ, ʋ zawrɩ a ʋ nɩbɛ bɛr.»

²⁶«A nyɩɩm Ɩsɩrayɛl nɩbɛ bɩɩ a nʋʋrɩ na kpɩɛr a Ɩsɩrayɛl nɩbɛ sɔgɔ a, nyɩ tɛr a ɩ̃ nɛ́ɛ nɩ a ɩ̃ tub tuur, ɛ́ taa ɩrɛ a ɩ-faar á ŋá kãw za na bɛ maal'ɩ wob a ɩ.

²⁷A nɩbɛ na de niwn kpɛ a tẽw a nyɩ ƴãw a ɩ n a ɩ-faar á ŋá a tẽw tɛr dɛwr.

²⁸Nyɩ taa ɩrɛ ʋ lɛb tɛrɛ dɛwr, wa zawrɛ nyɩ bɛrɛ mɛ̃ a lɛ ʋ na zawrɩ a bɛl na de nyɩ niwn a bɛr a ɩ.

²⁹Bʋ̃ʋ n'ʋ vɛ̃, bɛlɩ dem za na tɛr a ɩ-ɩrɩ á ŋá na bɛ maal'ɩ wob a, bɛ na ír bɛ na bɛr a Ɩsɩrayɛl bʋʋrɛ pʋɔ.»

³⁰«Nyɩ tuur a ɩ̃ nɛ-ƴãwnɩ, nyɩ taa ɩrɛ a ɩ-faar á ŋá na bɛ maal'ɩ wob, bɛ na tɩ ɩrɛ ɛ́ nyɩ wa bãw wa a ɩ. Nyɩ taa dɛwr nyɩ tʋɔra nɩ a ɩ-ɩrɩ á ŋá ɩ. Mãa n'ɩ a Sore nyɩ Naaŋmɩn.»