Read Dagara, Northern Levitɩ mɩnɛ 23 Bible Online

Levitɩ mɩnɛ 23 - Dagara, Northern bible

Levitɩ mɩnɛ 23

¹A Sore tɩ yel'ɩ a Moyiir

²k'ʋʋ tɛr wulu á ŋá a Ɩsɩrayɛl nɩbɛ zie: «Nyɩmɛ mɩ́ wa maalɛ cuw-bɛrɛ a ɩ̃ ƴãwfʋ ƴãw a, nyɩ na mɩ́ ɓã n taa kɛ́ nyɩ puori mɛ̃ nɩ nyɩ tʋɔra-siwru. A cuw-bɛrɛ al dàrʋ n'ɩ á ŋá.

³A dàa tɛr'ɩ bibie ayʋɔb a tome tob ƴãw, ɛcɛ a bibie ayopõi sob ɩ n a pɩ̃ɛnʋ-bibir. Bɛ bɛr'ɩ a bibir ŋa kɛ́ nyɩ mɩ́ ɓã taa tɛr a ɩ̃ ƴãwfʋ. Nyɩ bɛ tone ton za a pɩ̃ɛnʋ-bibir ɛ, nyɩ na mɩ́ de ʋ na kʋ̀ m zie nɛ za nyɩ na kpɩɛr a.

⁴A cuw-bɛrɛ al nyɩ na na mɩ́ ɓã taa a ɩ̃ ƴãwfʋ ƴãw a dàrʋ n'ɩ á ŋá:

⁵“A yũon cuw-dãw-niwn sob bibie pie nɩ anaar sob, a mʋ̃tɔ̃w kpɛb daar a, nyɩ na mɩ́ maal'ɩ a Tɔl-gãw cuw a ɩ̃ ƴãwfʋ ƴãw.

⁶A cuw ŋa bibie pie nɩ anũu sob ɩ n a Dipɛ̃ na bɛ ƴãw dãbɩl a cuw, a ɩ̃ ƴãwfʋ ƴãw. Nyɩ na mɩ́ 'wɔb'ɩ dipɛ̃ na bɛ ƴãw dãbɩl a bibie ayopõi.

⁷Nyɩ na mɩ́ ɓã n taa a dàa ŋa bibi-dãw-niwn sob a ɩ̃ ƴãwfʋ ƴãw. Nyɩ bɛ tone tõ-kpɛ̃w a ʋlɩ bibir nɛ ɩ.

⁸A dàa ŋa bibir za a, nyɩ na mɩ́ maal'ɩ nyɩw-a-za-bàwr kʋ̀ m. A bibie ayopõi sob mɩ̀ a, nyɩ na mɩ́ ɓã n taa a ɩ̃ ƴãwfʋ ƴãw. A ʋlɩ bibir nɛ mɩ̀ a, nyɩ bɛ tone tõ-kpɛ̃w ɛ.”

⁹A Sore tɩ yel'ɩ a Moyiir

¹⁰k'ʋʋ tɛr wulu á ŋá a Ɩsɩrayɛl nɩbɛ zie: “Nyɩmɛ wa kpɛ a tẽw ɩ̃ na na kʋ̀ nyɩ a pʋɔ, ɛ́ wa dier a bome a, nyɩ na mɩ́ wa n nɩ a kajin-dãw-niwn[41] sob nyɩ na ŋma a, wa kʋ̀ a bàwr-maalɛ.

¹¹A bàwr-maalɛ na de ʋ na kʋ̀ m tu n a bom de-tɩrʋ tub, a pɩ̃ɛnʋ-bibir dãw bio, k'aa ɩ̃ pʋɔ tʋ̃ɔ́ pɛlɩ a nyɩ ƴãw.

¹²A ʋlɩ bibir nɛ a, nyɩ mɩ̀ na maal'ɩ nyɩw-a-za-bàwr kʋ̀ m nɩ yũon-been péle a ƴã-gan zie kãw za na bɛ sãw a.

¹³Nyɩ na lãw nɩ nɩ kilo[42] ayʋɔb zɔ̃ bɛ na naw nɩ kãá a de-kʋ̀b ɩ̃ na na nɔ̃w a zʋ̀ʋ́r nyũu a, de nɩ divɛ̃ litɩr been nɩ ŋmãa de-kʋ̀b.

¹⁴Nyɩ bɛ 'wɔbr dipɛ̃, ka-zu-sɩ̃ɛnɩ nɩ bʋ̃-bi-paala ɩ, ɛ́ gù a bibir ŋa tɔr za nyɩ na na wa n a kajin wa kʋ̀ m a. Nʋɔr'ɩ à ŋà na ƴãw gã kʋralɛ a, a nɩbɛ na dɔwr lɩɛrɛ taa a ƴãw. Nyɩ na sàwr ʋ na zie nɛ za nyɩ na kpɩɛr a.”

¹⁵“Nyɩ na tĩ nɩ a pɩ̃ɛnʋ-bibir bio daarɩ́, ɛ́ sɔ́r da-ɓile ayopõi, a pɛr lɛ k'aa na tĩ a bibir ʋl nyɩ na na wa n a kajin-dãw-niwn sob wa tu n a bom de-tɩrʋ tub a.

¹⁶A na ɩ à ŋá a, nyɩ na sɔr'ɩ bibie lɩz'a ayi nɩ pie tɩ tɔ n a pɩ̃ɛnʋ-bibie ayopõi sob bio daarɩ́. A ʋlɩ bibir nɛ a, nyɩ na de nɩ a nyɩ bʋ̃-de-paalɛ kʋ̀ m.

¹⁷Nyɩ na yi n a nyɩ yie pʋɔ wa n dipɛ̃ ayi wa tu a bom de-tɩrʋ tub de a kʋ̀ m. Kilo ata zɔ̃ n'a nyɩ na mɩ́ maal'ɩ dipɛ̃ za, ɛ́ sɛ̃ ʋ lãwnɩ dãbɩl. A bʋ̃-bie al nyɩ na na de niwn cɛ̀ a, al pʋɔ n'a a de-kʋ̀b bom ŋa na yi.

¹⁸Nyɩ na wa n nɩ yũon-been péli ayopõi a ƴã-gamɛ zie kãw za na bɛ sãw a, nadɛr nɩ pʋ́rɩ ayi, wa ƴãw a dipɛ̃ de-kʋ̀b ƴãw kʋ̀ m. Nyɩ na maal'ɩ a nɩ nyɩw-a-za-bàwr kʋ̀ m, lãwnɩ a zɔ̃ nɩ a dipɛ̃ de-kʋ̀b na pʋɔ a. Bàwr bome bɛ na mɩ́ nyɩw a zʋ̀ʋ́r nyũu nʋmɛ a ɩ̃ zie a n'a.

¹⁹Nyɩ mɩ̀ na maal'ɩ yel-bier-ír-bɛrʋ bàwr kʋ̀ m nɩ bʋra, ɛ́ maalɩ lãw-taa bagɛ nɩ yũon-been péli ayi.

²⁰A bàwr-maalɛ na tu n a bom de-tɩrʋ tub de a tɩr. Ʋ na de nɩ a péli ayi lãwnɩ a dipɛ̃ tɩr. A bàwr-maalɛ na so a de-kʋ̀b bome á ŋá, bɛ na de a kʋ̀ m a zũú.

²¹Nyɩ na ɓã n taa a ʋlɩ bibir nɛ tɔr za a ɩ̃ ƴãwfʋ ƴãw. Nyɩ kʋ̃ tõ ton na ɩ tõ-kpɛ̃w a ɩ. Nʋɔr'ʋ ƴãw gã kʋralɛ, a nɩbɛ na dɔwr lɩɛrɛ taa a ƴãw. Nyɩ na sàwr ʋ na zie nɛ za nyɩ na kpɩɛr a.

²²Nyɩmɛ wa dier a nyɩ bʋ̃-dieri a, nyɩ kʋ̃ ŋma a bʋ̃-zuru tɩ lãwnɩ a púo nʋɔr dem ɛ, ɛ́ nyɩ kʋ̃ lɛb wa a pùorí wa yiiri ɛ, nyɩ na bɛr a na kʋ̀ a nan dem nɩ a nʋʋrɩ. Mãa n'ɩ a Sore nyɩ Naaŋmɩn.”

²³A Sore tɩ yel'ɩ a Moyiir

²⁴k'ʋʋ tɛr wulu á ŋá a Ɩsɩrayɛl nɩbɛ zie: “A cuwr ayopõi sob bibi-dãw-niwn sob na ɩ n zɩ̃-pɩ̃ɛnʋ bibir a nyɩ zie, cãà-bãwnɩ[43] nɩ nʋ̃ɔ̀-cɛlsɩ ŋmɛb bibir nyɩ na na mɩ́ ɓã taa a ɩ̃ ƴãwfʋ ƴãw a.

²⁵Nyɩ bɛ tone tõ-kpɛ̃w kãw za ɩ, ɛ́ nyɩ na nyɩw nɩ de-bʋ̀b bom kʋ̀ a Sore.”

²⁶A Sore tɩ yel'ɩ a Moyiir à ŋá:

²⁷“A cuwr ayopõi sob bibie pie sob na ɩ n a yel-bebe suur-dɩ-kʋ̀b bibi-kpɛ̃ɛ. Nyɩ na mɩ́ ɓã n taa a ɩ̃ ƴãwfʋ ƴãw, nyɩ na mɩ́ tɛr'ɩ mʋta-tuo ɛ́ nyɩw de-kʋ̀b bom kʋ̀ a Sore.

²⁸Nyɩ bɛ tone ton za a ʋlɩ bibir ɛ, bʋ̃ʋ n'ʋ vɛ̃, a ʋlɩ bibir'a bɛ na mɩ́ tu a suur-dɩ-kʋ̀b tub a nyɩ ƴãw, a ɩ̃ niŋé, a mãa Sore nyɩ Naaŋmɩn.

²⁹Sob nɛ za bɛ wa tɛr a mʋta-tuo a ʋlɩ bibir a, bɛ na ír ʋ na bɛr a Ɩsɩrayɛl nɩbɛ lãw pʋɔ.

³⁰Ɛ́ mãa mɩŋa na ír'ɩ nɩr za nãà wa tõ ton kãw za a ʋlɩ bibir a bɛr a Ɩsɩrayɛl bʋʋrɛ pʋɔ.

³¹Nyɩ bɛ tone ton kãw za a ʋlɩ bibir ɛ. Nʋɔr'ʋ ƴãw gã kʋralɛ, a nɩbɛ na dɔwr lɩɛrɛ taa a ƴãw. Nyɩ na sàwr ʋ na zie nɛ za nyɩ na na kpɩɛr a.

³²Zɩ̃-pɩ̃ɛnʋ-bibir'ʋ a nyɩ zie mɛ̃ a pɩ̃ɛnʋ-bibir a, ɛ́ nyɩ na mɩ́ tɛr'ɩ mʋta-tuo. A pɩ̃ɛnʋ-bibir pɩ̃ɛnʋ ŋa a, nyɩ na mɩ́ tɛr ʋ nɩ a cuw bibie piwaɩ sob zaanʋɔra tɩ ta n a bibie pie sob zaanʋɔra.”

³³A Sore tɩ yel'ɩ a Moyiir

³⁴k'ʋʋ tɛr wulu á ŋá a Ɩsɩrayɛl nɩbɛ zie: “A cuwr ayopõi sob, a bibie pie nɩ anũu sob a, nyɩ na maal'ɩ a Sɛwr cuw bibie ayopõi, a ɩ̃ ƴãwfʋ ƴãw.

³⁵A bibi-dãw-niwn sob a, nyɩ na ɓã n taa a ɩ̃ ƴãwfʋ ƴãw, ɛ́ nyɩ bɛ tone tõ-kpɛ̃w kãw za ɩ.

³⁶A da-ɓil bibir za a, nyɩ na mɩ́ maal'ɩ bàwr nyɩw a de-kʋ̀b bome kʋ̀ a Sore. A bibie ani sob a, nyɩ na lɛb'a ɓã taa a ɩ̃ ƴãwfʋ ƴãw, ɛ́ lɛb maalɩ bàwr nyɩw a de-kʋ̀b bome kʋ̀ a Sore: a na ɩ n a cuw nʋɔr kʋb bibir. Nyɩ bɛ tone tõ-kpɛ̃w kãw za ɩ.

³⁷Nyɩmɛ wa maalɛ a cuw-bɛrɛ á ŋá a ɩ̃ ƴãwfʋ ƴãw a, nyɩ na mɩ́ ɓã n taa kɛ́ nyɩ maalɩ nyɩw-a-za-bagɛ kʋ̀ m, lãwnɩ zɔ̃ na naw nɩ kãá a de-kʋ̀b, bɩɩ nyɩ na mɩ́ maal'ɩ lãw-taa bagɛ ƴãw divɛ̃, mɛ̃ a lɛ a na tuur cuw za ƴãw a.

³⁸A bagɛ á ŋá na pʋɔ nɩ a al nyɩ na mɩ́ maalɩ kʋ̀ m a pɩ̃ɛnʋ-bibie a pʋɔ, mɛ̃ a bʋ̃-kʋ̀rɩ za nɩ a bagɛ nyɩ na mɩ́ nɔnɛ maalɩ bɩɩ nyɩ na mɩ́ maalɩ nʋɔr íru ƴãw kʋ̀ m a.

³⁹A cuwr ayopõi sob bibie pie nɩ anũu sob a, nyɩmɛ wa de a bʋ̃-dieri baar'a, nyɩ na tĩ nɩ bibie ayopõi cuw maalʋ a ɩ̃ ƴãwfʋ ƴãw. A bibi-dãw-niwn sob nɩ a bibie ani sob na ɩ n pɩ̃ɛnʋ bibie.

⁴⁰A bibi-dãw-niwn sob a, nyɩ na de nɩ tɩ-wɔ̃-vɩɛlɩ, kpãkparmɛ váar, tɩɩr na tɛr váar yaga a wuli bɩɩ bàa pʋɔ tɩɩr váar. Nyɩ na ɩ n a nyɩ nʋ̃ɔ̀ ʋ sãá a mãa Sore nyɩ Naaŋmɩn niŋé bibie ayopõi.

⁴¹Yũon za a, nyɩ na mɩ́ maal'ɩ a cuw ŋa a ɩ̃ ƴãwfʋ ƴãw bibie ayopõi, a cuwr ayopõi sob. Nʋɔr'ʋ ƴãw gã kʋralɛ, a nɩbɛ na dɔwr lɩɛrɛ taa a ƴãw, nyɩ na sàwr ʋ na.

⁴²A bibie ayopõi á ŋá pʋɔ a, a nyɩɩm Ɩsɩrayɛl nɩbɛ a, nyɩ na kpɩɛr'ɩ sɛwr pʋɔ,

⁴³lɛ n'a a nyɩ bʋʋrɛ na bãw k'ɩ̃ɩ ɩ n a bɛ sãàkʋm-kore kpɛ sɛwr pʋʋr, a lɛn daar ɩ̃ na tɩ tɛr bɛ yi n a Eziptɩ tẽw pʋɔ a. Mãa n'ɩ a Sore nyɩ Naaŋmɩn.”»

⁴⁴À à ŋá n'a a Moyiir tɩ yel kʋ̀ a Ɩsɩrayɛl nɩbɛ a cuwr bɛ na na maalɛ a Sore ƴãwfʋ ƴãw a.