Read Dagara, Northern Levitɩ mɩnɛ 25 Bible Online

Levitɩ mɩnɛ 25 - Dagara, Northern bible

Levitɩ mɩnɛ 25

¹A Sore tɩ yel'ɩ a Moyiir a Sinayi tãw zu,

²k'ʋʋ tɛr wulu á ŋá a Ɩsɩrayɛl nɩbɛ zie: «Nyɩmɛ wa kpɛ a tẽw ɩ̃ na na kʋ̀ nyɩ a pʋɔ a, nyɩ na mɩ́ bɛr'ɩ a tẽsɔw ʋ pɩ̃ɛnɩ a ɩ̃ ƴãwfʋ ƴãw.

³Yome ayʋɔb ƴãw a, nyɩ na mɩ́ bʋ̀rɛ nɩ a nyɩ póru, ɓɛlɛ a nyɩ divɛ̃ tɩɩr wuli ɛ́ dier a wɔmɛ.

⁴A yome ayopõi sob a, mãa na so ʋ, ʋ na ɩ n pɩ̃ɛnʋ yũon a tẽsɔw zie: nyɩ bɛ bʋ̀rɛ a nyɩ póru, bɛ ɓɛlɛ a nyɩ divɛ̃ tɩɩr wuli ɛ.

⁵Nyɩ bɛ dier bʋ̃-yɛɛ nyɩ na de a bome baarɩ ɛ́ a lɛb bul a ɩ, bɛ pɔrɛ wɔmɛ na mʋ̃ɔ divɛ̃ tɩɩr nyɩ na bɛ kaa a zu ɛ. Ʋ na ɩ n pɩ̃ɛnʋ yũon a tẽsɔw zie.

⁶A bome al na na bul a pɩ̃ɛnʋ yũon ŋa pʋɔ a, alɛ n'a nyɩ na dɩrɛ, a nyɩɩm, a nyɩ tõ-tõ-bi-dɛbr nɩ a nyɩ tõ-tõ-bi-pɔwbɛ, a sã-ya-dierbɛ nɩ a sãanbɛ na kpɩɛr a nyɩ zie a.

⁷A mɩ̀ na cãà na ɩ a nyɩ dʋn bʋ̃-dɩrɩ tɩ lãwnɩ a nyɩ tẽw wɛ-dʋn.»

⁸«Nyɩ na sɔr'ɩ yome ayopõi gb'a ayopõi, a pɛr lɛ kɛ́ yome lɩz'a ayi nɩ pie for bir.

⁹Al pùorí, a cuwr ayopõi sob bibie pie sob na ɩ a yel-bebe suur-dɩ-kʋ̀b bibi-kpɛ̃ɛ a, nyɩ na pɛbl'ɩ wɩ́ɛ ʋ yi a tẽw za pʋɔ, ɛ́ nyɩ lãwnɩ nʋ̃ɔ̀-cɛlsɩ-ŋmɛb.

¹⁰À ŋá n'a nyɩ na wul k'aa yome lɩz'a ayi nɩ pie sob ɩ n yũon-sõw, ɛ́ nyɩ na hier'a yel k'aa tẽw nɩbɛ za lɛb'a so bɛ tʋɔra. Ʋ na ɩ n Pʋ-pɩɛlʋ yũon a nyɩ zie. A nyɩ kãw za na tʋ̃ɔ́ na mɩ́ lɛb so a ʋ ziir, ɛ́ lɛb kpɛ a ʋ sãà yir.

¹¹À ŋá n'a nyɩ na mɩ́ maalɩ a “Pʋ-pɩɛlʋ yũon” a yome lɩz'a ayiri nɩ piir za. Nyɩ bɛ bʋ̀rɛ a nyɩ póru ɛ, nyɩ bɛ dier bʋ̃-yɛɛ ɩ, nyɩ bɛ ŋmarɛ divɛ̃ tɩɩr wɔ̃-cãacule na mʋ̃ɔ divɛ̃ tɩɩr bɛ na bɛ kaa a zu ɛ,

¹²bʋ̃ʋ n'ʋ vɛ̃, ʋ na ɩ n a “Pʋ-pɩɛlʋ yũon” nyɩ na na bãwnɩ ʋ na ɩ sõw a. Ɛcɛ nyɩ na tʋ̃ɔ́ na dɩrɛ a bome al za na bule a tʋɔra a póru pʋɔ a.»

¹³«A “Pʋ-pɩɛlʋ yũon” a, a nyɩ kãw za na tʋ̃ɔ́ na mɩ́ lɛb so a ʋ ziir.

¹⁴Nyɩmɛ wa kʋɔrɛ bom kʋ̀rɛ tẽ-bie bɩɩ dàar bom a ʋ zie a, nyɩ taa nɛbr ʋ ɛ.

¹⁵Nyɩ dàar bɩɩ kʋɔrɛ ɛ́ bãwnɩ a yome nʋɔr na tɔl a Pʋ-pɩɛlʋ yũon pùorí a, ɛ́ a na ɩ lɛ a, nyɩ mɩ́ bãwnɩ a bʋ̃-dieri yome nʋɔr na cãà cɛ nɩ a Pʋ-pɩɛlʋ yũon na waar a.

¹⁶A yome na cãà cɛ a wa yãwmɛ a, a bom dàarʋ na do na, ɛ́ a yome na cãà cɛ a wa ɩ pʋrɩ a, a bom dàarʋ na siw na, bʋ̃ʋ n'ʋ vɛ̃, a bom kʋɔrʋ ƴãw a, a bʋ̃-dieri na na de a nʋɔr'a bɛ mɩ́ jiel'ɩ.

¹⁷Nyɩ taa nɛbr a nyɩ tẽ-bi-tɔ ɩ, a sãá kɛ́ nyɩ ƴãwnɛ mɛ̃ na, a mãa Sore nyɩ Naaŋmɩn.

¹⁸Nyɩ sàwr a ɩ̃ nɛ́ɛ, ɛ́ maal tɛr a ɩ̃ tub tuur, lɛ n'a nyɩ na ɓãá ƴãw kpɩɛr a tẽw.

¹⁹A tẽsɔw bʋ̃-kʋ́ɔrɩ na mɩ́ maalɩ na, nyɩ na tɛr'ɩ bʋ̃-dɩrɩ a sɛw, ɛ́ lɛ n'a nyɩ na ɓãá ƴãw kpɩɛr a tẽw.»

²⁰«Kapaw nyɩ na sowre nɩ nyɩ tʋɔra à ŋá: “Bʋ̃ʋ n'ʋ tɩ na mɩ́ dɩ a yome ayopõi sob tɩ na kʋ̃ mɩ́ bʋ̀r, nɩ tɩ na kʋ̃ mɩ́ cɛ̀ a?”

²¹Ɩ̃ na mɩ́ maalɩ nyɩ nɩ a yome ayʋɔb sob, ƴãw a tẽsɔw bʋ̃-kʋ́ɔrɩ a maalɩ yome ata dɩb ƴãw.

²²A yome ani sob a, nyɩ na mɩ́ lɛb'a bʋ̀r a nyɩ póru, ɛcɛ nyɩ na mɩ́ cãà na dɩrɛ a yũon-kʋra bome a ʋlɩ yũon nɛ, bʋ̃ʋ n'ʋ vɛ̃, nyɩ na mɩ́ tɛr'ɩ bʋ̃-dɩrɩ a man tɩ ta a yome piwaɩ sob bʋ̃-dieri-deb daar.»

²³«Nyɩ bɛ kʋɔrɛ tẽsɔw a nʋɔr kʋrɛ ɩ, bʋ̃ʋ n'ʋ vɛ̃, mãa so a tẽsɔw, a mãa Sore, ɛ́ nyɩ na ɩ na mɛ̃ nʋʋrɩ nɩ sãanbɛ a, a ɩ̃ tẽw pʋɔ.

²⁴Alɛ n'a so, a tẽw ŋa za ɩ̃ na na kʋ̀ nyɩ a pʋɔ a, nyɩ na ƴãw na a tẽsɔwr ya-deb sɔ́r be be.»

²⁵«Nã́w wa kpɛ a nyɩ tẽ-bi-tɔ kãw a fɛr k'ʋʋ kʋɔrɩ a ʋ tẽsɔw kãw a, a ʋ nɩr kãw nɩ a ʋl na ɩ bʋ̃-been, ʋʋ tɛr sɔ́r a ya-deb ƴãw a, ʋ na ya na de a tẽsɔw ŋa.

²⁶Nɩr bɛ wa tɛr nɩr ʋ tɛr sɔ́r na ya de a tẽsɔw, ɛ́ a ʋl mɩŋa tɛr a fãw na tʋ̃ɔ́ ya de a ʋ tẽsɔw a,

²⁷ʋ na sɔr'ɩ a yome lɛ nʋɔr na cãà cɛ nɩ a “Pʋ-pɩɛlʋ yũon” a, ɛ́ sɔ́r a tẽsɔw-daarɛ libie kʋ̀ ʋ, ɛ́ lɛb so a ʋ tẽsɔw.

²⁸Ʋlɛ bɛ wa tɛr a na ya de nɩ a ʋ tẽsɔw a, a sob nɛ na dà a tẽsɔw a na cãà na so ʋ tɩ ta a “Pʋ-pɩɛlʋ yũon”. A lɛn daar a, a tẽsɔw sob na lɛb'a so a ʋ zie.»

²⁹«Nɩr wa kʋɔrɩ yir-kpɩɛra na be tẽ-kpɛ̃ɛ pʋɔ dacĩ-kpɛ̃ɛ na mɛ viiri koli a pʋɔ a, a ya-deb tɛr'ɩ daar: a bɛ zuore yũon a yir na kʋɔrɩ baarɩ a ɩ.

³⁰Nɩr bɛ wa ya de a yir a tɩ maalɩ yũon a, a yir-daarɛ nɩ a ʋ bʋʋrɛ na so ʋ kʋralɛ. Bɛ bɛ lɛb tɩrɛ ʋ a “Pʋ-pɩɛlʋ yũon” daar ɛ.

³¹Ɛcɛ a yie al na be a tẽli pʋɔ dacine na bɛ mɛ viiri koli a, bɛ na mɩ́ tu n a ƴãw mɛ̃ a lɛ bɛ na mɩ́ tu a tẽw póru ƴãw a: ya-deb sɔ́r na mɩ́ be n be kʋralɛ a yir ŋa tɔ ƴãw, ɛ́ alɛ mɩ̀ saa ŋmɛ̃ ŋmɩŋmɩn a, a yir sob na mɩ́ lɛb'a so a ʋ yir a “Pʋ-pɩɛlʋ yũon” daar.»

³²«A levitɩ mɩnɛ bɛl a, kʋralɛ n'a bɛ na tɛr sɔ́r na mɩ́ ya de a bɛ yie na be a levitɩ mɩnɛ tẽ-bɛrɛ pʋɔ a[46].

³³Levitɩ kãw mɩ̀ saa n'ʋ dà a yie á ŋá kãw a, a na fɛr'a ʋ lɛb kʋ̀ a yir sob a ʋ yir a “Pʋ-pɩɛlʋ yũon” daar, bʋ̃ʋ n'ʋ vɛ̃, a yie á ŋá ɩ n a levitɩ mɩnɛ bʋ̃-sori tɛwr a Ɩsɩrayɛl tẽw pʋɔ.

³⁴Ɛcɛ a póru al na viiri koli a levitɩ mɩnɛ tẽ-bɛrɛ a, bɛ bɛ kʋɔrɛ a ɩ, bʋ̃ʋ n'ʋ vɛ̃, a ɩ n a levitɩ mɩnɛ sób kʋralɛ.»

³⁵«Nã́w wa kpɛ a nyɩ tẽ-bi-tɔ kãw ʋ kʋ̃ tʋ̃ɔ́ ya nyɩ a ʋ san a, a fɛr'a kɛ́ nyɩ sõw ʋ, ʋ tʋ̃ɔ́ cãà vʋʋrɛ a nyɩ lõbowrí. Nyɩ na ɩ n a lɛ tɔr za a nʋʋra zie bɩɩ a sãan na kpɩɛr a nyɩ tẽw pʋɔ a zie.

³⁶Nyɩ bɛ dier tɔnɛ bʋʋrɛ kãw za a ʋ zie ɩ. À à ŋá n'a nyɩ na wul kɛ́ nyɩ ƴãwnɛ mɛ̃ na, ɛ́ sàw ʋ vʋʋrɛ a nyɩ lõbowrí.

³⁷Nyɩmɛ wa pɛ̃w ʋ libir a, nyɩ ta fɛr ʋ ʋ ya nyɩ lãwnɩ dɔwlɛ ɩ. Nyɩmɛ wa kʋ̀ ʋ bʋ̃-dɩrɩ a, nyɩ ta yel k'ʋʋ lɛb kʋ̀ nyɩ ɛ́ ƴãw bom dɔwlɩ ɛ.

³⁸Mãa n'ɩ a Sore nyɩ Naaŋmɩn. Ɩ̃ tɛr nyɩ na yi n a Eziptɩ tẽw, k'ɩ̃ɩ kʋ̀ nyɩ a Kanãa tẽw, ɛ́ ɩ a nyɩ Naaŋmɩn.»

³⁹«Nã́w wa kpɛ a nyɩ tẽ-bi-tɔ kãw ʋ kʋɔrɩ ʋ tʋɔra a nyɩ zie a, nyɩ kʋ̃ ƴãw ʋ tone gbãgba-tome ɩ,

⁴⁰nyɩ na ɩrɛ ʋ na mɛ̃ nɩr na tone dier libie a, bɩɩ mɛ̃ sãan na kpɩɛr a nyɩ zie a. Ʋ na ɩ n a nyɩ tõ-tone tɩ ta a “Pʋ-pɩɛlʋ yũon.”

⁴¹A lɛn daar a, ʋ na lɛb'a so ʋ tʋɔra, ʋlɛ nɩ a ʋ bibiir. Ʋ na lɛb'a ta a ʋ nɩbɛ pʋɔ, ɛ́ lɛb de a ʋ sãà mɩnɛ tẽsɔw.

⁴²Bʋ̃ʋ n'ʋ vɛ̃, a Ɩsɩrayɛl nɩbɛ ɩ n a ɩ̃ tõ-tõ-biir, bɛl ɩ̃ na ír a Eziptɩ tẽw gbãgbaalʋ pʋɔ bɛr a, alɛ so bɛ bɛ kʋɔrɛ bɛ mɛ̃ a lɛ bɛ na kʋɔrɛ gbãgbaar a ɩ.

⁴³Nyɩ taa ɩrɛ po-to-fãw-ɩb a bɛ zie ɩ. Lɛ n'a nyɩ na wul kɛ́ nyɩ ƴãwnɛ mɛ̃ na, a mãa nyɩ Naaŋmɩn.»

⁴⁴«Nyɩmɛ wa bɔbr tõ-tõ-bi-dɛbr bɩɩ tõ-tõ-bi-pɔwbɛ a, a nɩ-bʋʋrɛ na kpɩɛr viiri koli nyɩ a zie n'a nyɩ na mɩ́ dà bɛ.

⁴⁵Nyɩ mɩ̀ na tʋ̃ɔ́ na mɩ́ dà bɛ a sãanbɛ na wa zɩ̃ a nyɩ tẽw a bibiir pʋɔ, bɩɩ a bɛ dɔwlʋ nɩbɛ bɛl na dɔw a tẽw pʋɔ a pʋɔ. Nyɩmɛ na so bɛ.

⁴⁶A pùorí a, nyɩ na bɛr bɛ na kʋ̀ a nyɩ bibiir, bɛ ɩ a bɛ gbã-dɩ-bom, bɛ mɩ̀ so bɛ. Nyɩ na tʋ̃ɔ́ na tɛr bɛ kʋralɛ bɛ ɩ gbãgbaar. Ɛcɛ a nyɩɩm Ɩsɩrayɛl nɩbɛ pʋɔ a, nɩr kãw za bɛ ɩrɛ po-to-fãw-ɩb a ʋ tɔ zu ɛ.»

⁴⁷«Nʋʋra bɩɩ sãan na kpɩɛr a nyɩ tẽw pʋɔ a wa kpɛ naalʋ a, ɛ́ nã́w kpɛ a nyɩ tẽ-bi-tɔ kãw ʋ kʋɔrɩ ʋ tʋɔra a nɩr ŋa zie, bɩɩ nʋʋra dɔwlʋ nɩr kãw zie a,

⁴⁸sɔ́r be n be bɛ na tʋ̃ɔ́ ya de a nyɩ tẽ-bi-tɔ ŋa: a ʋ yɛb kãw na tʋ̃ɔ́ na ya de ʋ.

⁴⁹Ʋlɛ bɛ wa tɛr yɛb a, a ʋ sãà yɛb kãw, bɩɩ a ʋ sãà yɛb bidɛb kãw, bɩɩ a ʋ dɔwlʋ nɩr kãw na tʋ̃ɔ́ na ya de ʋ. Ʋ mɩ̀ na tʋ̃ɔ́ na ya de ʋ tʋɔra, ʋlɛ wa tɛr a fãw a.

⁵⁰A lɛ pʋɔ a, ʋlɛ nɩ a ʋ daarɛ na sɔr'ɩ a yome na be a yũon ʋl ʋ na kʋɔrɩ ʋ tʋɔra a, nɩ a “Pʋ-pɩɛlʋ yũon” cara pʋɔ a nʋɔr. A yar jiele nɩ nɩ a yome nʋɔr ɛ́ tõ-tõ-bie bibi-been sã-ya n'ʋ bɛ mɩ́ manɩ nɩ a yũon-been yar libie.

⁵¹A yome na cãà cɛ nɩ a “Pʋ-pɩɛlʋ yũon” wa cãà yãwmɛ a, a ʋ daarʋ libir bɛ́rʋ zie n'a ʋ na tɩr a ʋ ya-deb ƴãw.

⁵²Ɛcɛ a yome na cɛ a bɛ wa yãwmɛ a, ʋ na sɔr'a bãw a nʋɔr, ɛ́ ya man nɩ a yome á ŋá.

⁵³A Ɩsɩrayɛl nɩr ŋa na tʋ̃ɔ́ na be a ʋ nɩ-kpɛ̃ɛ zie mɛ̃ yũon-ɓil sã-ya diere a, ɛcɛ nyɩ kʋ̃ sàw a ʋ nɩ-kpɛ̃ɛ ɩrɛ po-to-fãw-ɩb a ʋ zie ɩ.

⁵⁴Bɛlɛ bɛ wa tʋ̃ɔ́ ya de ʋ a tub á ŋá kãw pʋɔ a, ʋlɛ nɩ a ʋ bibiir na lɛb'a so bɛ tʋɔra a “Pʋ-pɩɛlʋ yũon” daar.»

⁵⁵«A Ɩsɩrayɛl nɩbɛ sɩrɩ na ɩ a ɩ̃ tõ-tõ-biir! Bɛ ɩ n a ɩ̃ tõ-tõ-biir, bɛl ɩ̃ na ɩ kɛ̀ bɛ yi a Eziptɩ tẽw a! Mãa n'ɩ a Sore nyɩ Naaŋmɩn.»