Read Dagara, Northern Levitɩ mɩnɛ 26 Bible Online

Levitɩ mɩnɛ 26 - Dagara, Northern bible

Levitɩ mɩnɛ 26

¹«Nyɩ taa maalɛ ŋmɩn-bɛlɛbɛlɛ a nyɩ ƴãw ɛ. Nyɩ taa bine tɩbɛ nɩ kʋsɛ-teli ɛ. Nyɩ taa bine kʋsɛ-wiri a nyɩ tẽw pʋɔ mɩ́ gbĩ dume gũu tɩ tɔ tẽw puori a ɩ. Bʋ̃ʋ n'ʋ vɛ̃, mãa n'ɩ a Sore nyɩ Naaŋmɩn.»

²«Nyɩ mɩ́ pɩ̃ɛnɩ a pɩ̃ɛnʋ-bibir, ɛ́ ƴãwnɛ a ɩ̃ zi-sõw. Mãa n'ɩ a Sore.»

³«Nyɩmɛ wa tuur a ɩ̃ wulu a, nyɩmɛ wa tɛr a ɩ̃ nɛ-ƴãwnɩ vla ɛ́ sàwr a a,

⁴ɩ̃ na mɩ́ kʋ̀ nyɩ nɩ a saa a ʋ daar. A tẽsɔw bʋ̃-kʋ́ɔrɩ na mɩ́ maal'a, ɛ́ a tɩɩr wɔ̃ a wɔmɛ.

⁵A nyɩ zie a, nyɩ na mɩ́ va n a bʋ̃-varɩ tɩ ta n a divɛ̃ tɩɩr wɔmɛ pɔrʋ daar, ɛ́ pɔr a divɛ̃ tɩɩr wɔmɛ tɩ ta n a bʋ̀rʋ daar. A bʋ̃-dɩrɩ na mɩ́ ʋr'a, ɛ́ nyɩ ɓãá ƴãw kpɩɛr a tẽw.

⁶Ɩ̃ na ƴãw nɩ ƴã-ɓaarʋ a tẽw pʋɔ: nyɩmɛ wa gã a, bom bɛ waar wa damnɛ nyɩ ɛ. Ɩ̃ na ɩ na a dʋ̃-faar bɔr a tẽw pʋɔ. Nɩr bɛ waar wa ŋmaarɛ nɩ nyɩ zɛbr ɛ.

⁷Nyɩ na mɩ́ diw nɩ a nyɩ dɔ̃ dem bɛ zɔ, nyɩ na mɩ́ gɔr bɛ na lɔb nɩ a nyɩ zɛbr-sɔ-bɛrɛ.

⁸A nyɩ nɩbɛ anũu na mɩ́ diw nɩ dɔ̃ dem kʋba (100) bɛ zɔ, ɛ́ a nyɩ nɩbɛ kʋba diw dɔ̃ dem tùr-pie (10 000), nyɩ na mɩ́ gɔr bɛ na lɔb nɩ a nyɩ zɛbr-sɔ-bɛrɛ.

⁹Ɩ̃ na jɩ́r nyɩ na kaa, ɩ̃ na kʋ̀ nyɩ nɩ bibiir bɛ yãwmɛ, ɛ́ maal tɛr a ɩ̃ wõ-taa nɩ a nyɩɩm.

¹⁰Nyɩ na mɩ́ de nɩ a bʋ̃-dieri yaga za, mɩ́ tɩ cãà tɛr bʋ̃-kore dɩrɛ. A na mɩ́ fɛr'a nyɩ yaw a bʋ̃-kore ɛ́ su a bʋ̃-paalɛ.

¹¹Ɩ̃ na ƴãw nɩ a ɩ̃ kpɛb zie a nyɩ sɔgɔ, ɛ́ kʋ̃ jɛ nyɩ bɛr ɛ.

¹²Ɩ̃ na be n a nyɩ zie kʋralɛ ɩ a nyɩ Naaŋmɩn, ɛ́ nyɩ ɩ a ɩ̃ nɩ-bʋʋrɛ.

¹³Mãa n'ɩ a Sore nyɩ Naaŋmɩn na ɩ kɛ̀ nyɩ yi zaa a Eziptɩ nɩbɛ tẽw pʋɔ, kɛ́ nyɩ ta cãà ɩ a bɛ gbãgbaar a. Ɩ̃ ɩ na a Eziptɩ tẽw dem gãdaalʋ baarɩ a nyɩ zu, ɛ́ ɩ nyɩ bɛr vĩ ɛ́ cere.»

¹⁴«Nyɩmɛ bɛ wa bɛrɛ wone a ɩ̃ ƴɛ̀rʋ, ɛ́ bɛ sàwr a ɩ̃ nɛ-ƴãwnɩ a,

¹⁵nyɩmɛ wa zawrɩ a ɩ̃ nɛ́ɛ bɛr, nyɩmɛ bɛ wa nɔnɛ a ɩ̃ tub ɩ̃ na ƴãw a, nyɩmɛ bɛ wa sàwr a ɩ̃ nɛ-ƴãwnɩ, sãw a wõ-taa ɩ̃ na maal'ɩ nyɩ a bɛr a,

¹⁶nyɩ nyɛ̃ a lɛ ɩ̃ na na ɩ nyɩ a: Ɩ̃ na ƴãw na a pʋl-vʋ̃ɔ, a kõwfʋ nɩ a ƴã-tʋlʋ wa a nyɩ ƴãw wa ɩ nyɩ lo mimie ɛ́ sɩrɛ cere. Nyɩ na mɩ́ bʋ̀r'ɩ a nyɩ póru zawla, bʋ̃ʋ n'ʋ vɛ̃, a nyɩ dɔ̃ dem nɛbɛ na mɩ́ cɛ̀ a.

¹⁷Ɩ̃ na ìr'ɩ a nyɩ ƴãw, ɛ́ a nyɩ dɔ̃ dem na tʋ̃ɔ́ nyɩ na. A bɛlɩ dem na hɩ̃ɛn nyɩ a na so nyɩ na, ɛ́ nyɩ na mɩ́ lɩɛb'a zɔrɛ nɩr saa bɛ diwr nyɩ a.

¹⁸Nyɩmɛ cãà bɛ wa bɛrɛ wone a ɩ̃ ƴɛ̀rʋ a, ɩ̃ na dɔwrɩ nyɩ nɩ gb'a ayopõi dɔwlɩ a nyɩ yel-bebe zũú.

¹⁹Ɩ̃ na ɩ na a nyɩ kpɛnʋ pɔ̀l-ɩb baarɩ, ɩ̃ na ɩ na a nyɩ salom kpɛmɛ mɛ̃ kure a, ɛ́ a nyɩ tẽsɔwr kpawlɩ kpɛmɛ mɛ̃ kur-zɩɛ a.

²⁰Nyɩ na mɩ́ bàl'ɩ nyɩ tʋɔra zawla: a tẽsɔw bʋ̃-kʋ́ɔrɩ za kʋ̃ mɩ́ lɛb maalɩ ɛ, ɛ́ a tẽw tɩɩr kʋ̃ cãà wɔnɛ ɩ.

²¹Nyɩmɛ bɛ wa bɛrɛ wone a ɩ̃ ƴɛ̀rʋ, zawrɩ a ɩ̃ tub a, ɩ̃ na bãwnɩ nɩ a nyɩ yel-bebe, dɔwrɩ nyɩ gb'a ayopõi dɔwlɩ.

²²Ɩ̃ na ƴãw na wɛ-dʋn wa a nyɩ ƴãw, wa kʋ a nyɩ bibiir, kʋ a nyɩ dʋn pàw pɛr, ɛ́ baarɩ nyɩ, bɛ bɛ mɩ́ cãà nyɛ̃ nɩr sɔ́r zu ɛ.

²³Nyɩmɛ cãà bɛ wa sàw a ɩ̃ kpãàfʋ, cãà zawrɩ a ɩ̃ tub a,

²⁴a mãa mɩ̀ a, ɩ̃ na zawr'ɩ a nyɩ tub, ɛ́ lɛb maal dɔwrɩ nyɩ gb'a ayopõi dɔwlɩ a nyɩ yel-bebe zũú.

²⁵Ɩ̃ na ɩ na zɛbr lo a nyɩ zu a ɩ̃ wõ-taa nyɩ na ɩ k'ʋ sãw a ƴãw. Nyɩ na zɔ na kpɛ a nyɩ tẽ-bɛrɛ pʋɔ. Ɩ̃ na ɩ na a jɛ̀lmɛ̃ bàalʋ páw nyɩ, ɛ́ a nyɩ dɔ̃ dem na so nyɩ na.

²⁶Ɩ̃ na sɩb nyɩ nɩ a bʋ̃-dɩrɩ[47]. Pɔwbɛ pie na mɩ́ tʋ̃ɔ́ na sɛ̃ a nyɩ dipɛ̃ dam-been yõ pʋɔ, bɛ na mɩ́ wa n na a bɛ saalɩ ɛ, nyɩ 'wɔb bɛ tɩw ɛ.

²⁷À á ŋá za wa ɩ, ɛ́ nyɩ cãà bɛ bɛrɛ wone a ɩ̃ ƴɛ̀rʋ, ɛ́ cãà zawrɩ a ɩ̃ tub a,

²⁸a mãa mɩ̀ a, ɩ̃ na nyɛ̃ nɩ suur yaga zawrɩ a nyɩ tub, mãa mɩŋa na dɔwrɩ nyɩ nɩ gb'a ayopõi dɔwlɩ, a nyɩ yel-bebe zũú.

²⁹A na fɛr'a nyɩ 'wɔb a nyɩ bidɛbr nɩ a nyɩ pɔwyaar ƴã-gã-nɛnɛ.

³⁰Ɩ̃ na sãw nɩ a nyɩ maalʋ-ziir bɛr, ɩ̃ na ŋmɛr'ɩ a nyɩ bàwr-maal-kube al zu nyɩ na mɩ́ nyɩw a parfɛ̃ a bɛr, ɩ̃ na gbõ n a nyɩ kũuni taa a tɩbɛ na ŋmɛr ŋmɛr ɛ́ kar kar a zu. A ɩ̃ pʋɔ kʋ̃ nɔ̃w nyɩ towtow ɛ.

³¹Ɩ̃ na ŋmɛr'ɩ a nyɩ tẽ-bɛrɛ bɛr, ɛ́ nɩr kʋ̃ cãà be a nyɩ zi-son pʋɔ ɩ. Ɩ̃ kʋ̃ cãà sàwr a nyɩ bagɛ zʋ̀ʋ́r na nyùur nʋ̃ɔ̀ nʋ̃ɔ̀ a ɩ.

³²Mãa mɩŋa na sãw nɩ a nyɩ tẽw bɛr kɛ̀ nʋɔr ɓãá a nyɩ dɔ̃ dem na wa kɛ́ bɛ wa kpɛ a ʋ pʋɔ a.

³³Ɩ̃ na vʋ̃ɔ nɩ a zɛbr-sɔ-kpɛ̃ɛ a nyɩ ƴãw, ɛ́ diw nyɩ yaarɩ a nɩ-bʋʋr-yoru pʋɔ. A nyɩ tẽw na lɩɛb'ɩ wɛja-kpalɛ, ɛ́ a nyɩ tẽ-bɛrɛ lɩɛbɩ debo-bɛrɛ.

³⁴Lɛ n'a a yome al nyɩ na na be a nyɩ dɔ̃ dem ten pʋɔ a, a nyɩ tẽsɔwr nyɩ na cen kɛ́ bɛr a na pɩ̃ɛnɩ, yáa a zɩ̃-pɩ̃ɛnʋ voru al nyɩ na bɛ tɩ sàw tu a san.

³⁵A tẽsɔw na pɩ̃ɛnɩ na lɩɛrɩ a pɩ̃ɛnʋ voru al nyɩ na bɛ sàw ʋ pɩ̃ɛnɩ a lɛn daar nyɩ na tɩ kpɩɛr a ʋ pʋɔ a.

³⁶A bɛlɩ dem nãà wa cãà vʋʋrɛ a bɛ dɔ̃ dem tẽw pʋɔ a, ɩ̃ na ƴãw bɛ nɩ pʋl-vʋ̃ɔ: váar na lore a damnʋ tɛwr na mɩ́ ɩ na bɛ nyɔw zɔba. Bɛ na mɩ́ zɔ na mɛ̃ dɔ̃ sob niŋé fʋ na zɔrɛ a, ɛ́ bɛ na mɩ́ lo na, nɩr za saa bɛ diwr bɛ a.

³⁷Bɛ na lore na dine taa mɛ̃ a lɛn daar fʋ na mɩ́ zɔrɛ dɔ̃ sob niŋé a, ɛ́ nɩr kʋ̃ diwr bɛ mɩ̀ ɛ. Bɛ kʋ̃ tʋ̃ɔ́ mɩ́ bà gbɛ́r a bɛ dɔ̃ dem niŋé ɩ.

³⁸Tẽ-yũo pʋɔ n'a bɛ na kpi, a bɛ dɔ̃ dem ten n'a na baarɩ bɛ.

³⁹A bɛlɩ dem nãà wa cãà vɩrɩ vʋʋrɛ a nyɩ dɔ̃ dem ten pʋɔ a, kʋ̃ tɛr fãw ɛ, a bɛl mɩŋa yel-bebe nɩ a bɛ sãàkʋm-kore yel-bebe zũú.»

⁴⁰«Ɛcɛ a bɛlɩ dem nãà wa cãà vʋʋrɛ a na sàw na kɛ́ bɛlɛ nɩ a bɛ sãà mɩnɛ maal'ɩ yel-bier, kɛ́ bɛ sãw mɛ̃ nɩ yaga, ɛ́ zawrɩ a ɩ̃ tub.

⁴¹Bɛ na bãwnɩ a pɛr, ɩ̃ na zawrɩ na tu bɛ, ɛ́ tɛr bɛ a bɛ tẽw yi cen nɩ a bɛ dɔ̃ dem tẽw pʋɔ a. Bɛ na siwr'ɩ bɛ tʋɔra, bɛ na bɛ tu a ɩ̃ pùor a ƴãw, ɛ́ bɛ na sàw nɩ a bɛ sãwna dɔwrʋ.

⁴²Lɛ n'a ɩ̃ na lɛb bãwnɩ a wõ-taa ɩ̃ na maal'ɩ a bɛ sãàkʋm-kore Zakɔb, Ɩzaakɩ nɩ Abraham a. Ɩ̃ mɩ̀ na lɛb'a bãwnɩ k'ɩ̃ɩ ƴãw nɩ nʋɔr k'ɩ̃ɩ na kʋ̀ bɛ nɩ a tẽw ŋa.

⁴³À ŋá n'a bɛlɛ bɛ wa cãà a tẽw ŋa pʋɔ a, a tẽw na tʋ̃ɔ́ pɩ̃ɛnɩ. A lɛn daar a, bɛ na nyɛ̃ nɩ a bɛ dɔwrʋ, bɛ na bɛr a ɩ̃ nɛ́ɛ ɛ́ lɔb a tub na yi a ɩ̃ zie bɛr a ƴãw.

⁴⁴Ɛcɛ a lɛn daar bɛ na na saa cãà be a bɛ dɔ̃ dem tẽw pʋɔ a, ɩ̃ kʋ̃ jɛ bɛ bɛr ɛ, ɩ̃ kʋ̃ hɩ̃ɛn bɛ ɩ, ɩ̃ kʋ̃ kʋ bɛ pàw pɛr ɛ, ɩ̃ɩ kʋ̃ sãw a ɩ̃ wõ-taa bɛr ɛ, ɩ̃ na ɩ a Sore bɛ Naaŋmɩn a ƴãw.

⁴⁵A bɛ maalʋ ƴãw a, ɩ̃ na lɛb'a bãwnɩ a wõ-taa ɩ̃ na maal'ɩ a bɛ sãàkʋm-kore a, a bɛl ɩ̃ na ɩ bɛ yi a Eziptɩ tẽw, a nɩ-bʋʋr-yoru niŋé, k'ɩ̃ɩ ɩ a bɛ Naaŋmɩn a. Mãa n'ɩ a Sore.»

⁴⁶A nɛ́ɛ, a tub nɩ a wulu n'ɩ à á ŋá na be a Sore nɩ Ɩsɩrayɛl nɩbɛ cara pʋɔ a. A Sore mɩŋa n'ʋ tɩ ƴãw a Moyiir tɩr a kʋ̀ bɛ a Sinayi tãw zu.